No menu items!
20.9 C
Sri Lanka
28 March,2024

මධුෂ් ඝාතනය හා ලංකාවේ නීතියේ පාලනය

Must read

මධුෂ් ඝාතනය ගැන පොලිසිය කියන්නේ ගොතන ලද කතාවක්: මාකඳුරේ මධුෂ්ගේ නීතිඥවරයා කියයි
ආයුධ පෙන්වීමට ගෙනගොස් ජීවිතයට හානි කිරීමේ සැලසුමක් ගැන සැකයි: මධුෂ්ගේ බිරිඳ
මධුෂ්ගේ රැඳවීමේ නියෝගය අවසන් වීමට නියමිතව තිබුණේ ඔක්තෝබර් 28දා
එදිනෙන් පසු රිමාන්ඞ් කළ යුතුමයි
ඊට සතියකට පෙර සීසීඩීයට මාරු කළේ ඇයි?
සීසීඩීයට මාරු කර දින දෙකක් තුළ ඝාතනය කළා
අත්‍යවශ්‍ය සැකකරුවකුට ආරක්‍ෂාව දීමට නොහැකි වීම ගැන සීසීඩීය වගකිව යුතු නැද්ද?
සීඅයිඩීයෙන් සීසීඩීයට මාරු කිරීම නීති විරෝධියි

■ අරුණ ජයවර්ධන
සමරසිංහ ආරච්චිගේ මධුෂ් ලක්‍ෂිත හෙවත් මාකඳුරේ මධුෂ් පොලිස් අත්අඩංගුවේදී ඝාතනය වීම ගැන පොලිසිය පවසන ‘පරණ’ කතාවට, අලුතෙන් එකතුවී ඇති ‘චරිතය’ වන්නේ, ‘පිටතින් පැමිණි මධුෂ්ගේ කල්ලියේ සාමාජිකයන්’ යන්නය.
පොලිස් අත්අඩංගුවේ සිටියදී, මීට පෙර 2005-2014 රාජපක්‍ෂ ආණ්ඩුව කාලයේත්, 2019න් පසු දැන් රාජපක්‍ෂ ආණ්ඩුව කාලයේත්, සැකකරුවන් ඝාතනය වීම ගැන පොලිසිය කියූ කතාවලදී, සැකකරුට වෙඩි තබා තිබුණේ, පොලිසියම විසිනි. සැකකරු පොලිස් නිලධාරීන්ට පහරදී පලායැමට තැත් කළ නිසා හෝ ආයුධයකින් වෙඩි තබන්නට හෝ බෝම්බයකින් දමා ගසන්නට හෝ උත්සාහ කළ නිසා, පොලිසිය ආත්මාරක්‍ෂාවේ අයිතිය පාවිච්චි කිරීමට යාමේදීය කියාය, ඒ හැම විටකදීම පොලිසිය කිව්වේ. මෙවර එම කතාවට අලුතින් එකතුවී ඇති කොටස නම්, සැකකරු හෙවත් මාකඳුරේ මධුෂ්, පොලිසිය නොවන ‘වෙනත් පාර්ශ්වයක්’ විසින් තබන ලද වෙඩි පහරවලින් ඝාතනය වූවාය යන්නයි.
ඩුබායි රාජ්‍යයේ සිට මධුෂ් ලංකාවට ගෙන ආවේ, 2019 මැයි මාසයේ 5 වැනිදාය. ඒ නීතිමය හා රාජ්‍යතාන්ත්‍රික මෙහෙයුමකින් පසුවය. ඊට පෙර පෙබරවාරි 5 වැනිදා ඩුබායි පොලිසිය ඉහළ පෙළේ හෝටලයක කළ වැටලීමකින් පසු මධුෂ් ඇතුළු පිරිසක් රඳවා ගැනිණි. ඒ පිරිස අතර, මධුෂ් සිටින බව දැනගන්නට ලැබීමෙන් පසු එවකට අපරාධ පරීක්‍ෂණ දෙපරේතමේන්තුව (සීඅයිඩීය) භාර ජ්‍යෙෂ්ඨ නියෝජ්‍ය පොලිස්පති රවි සෙනෙවිරත්න, අධ්‍යක්‍ෂ ශානි අබේසේකර ඇතුළු පිරිසක් කරන ලද වෙහෙසකර මැදිහත්වීමකින් පසු ඔහු ලංකාවට බාරදෙන්නට ඩුබායි පොලිසිය කැමති විය. ලංකාවට ගුවන් යානයෙන් ඔහු ගෙන එන තුරුත්, ඒ බව දැන සිටියේ එවකට අපරාධ පරීක්‍ෂණ දෙපාර්තමේන්තුව භාර ජ්‍යෙෂ්ඨ නියෝජ්‍ය පොලිස්පතිත්, අධ්‍යක්‍ෂත් පමණි.
මේ ලිපිය සමග පළවන, කටුනායක ගුවන් තොටේ පියගැට පෙළෙන් මධුෂ් පහළට රැගෙන එන ඡායාරූපය බැලීමෙන් පමණක් ලංකාවට ගෙන එන විට ඔහුට යොදා තිබුණු දැඩි ආරක්‍ෂාව ගැන අදහසක් ගත හැකිය. එවැනි ආරක්‍ෂාවක් ඔහුට සපයා තිබුණේ, ඔහු ලංකාවේ අංක එකේ මත්ද්‍රව්‍ය ජාවාරම්කාරයකු, අපරාධකරුවකු නිසා පමණක් නොවේ. ඔහු නිරුපද්‍රිතව තබාගෙන, ඔහුගෙන්, ලංකාවේ මත්ද්‍රව්‍ය ජාවාරම් ජාලය ගැනත් අනිකුත් අපරාධ ගැනත් වැදගත් තොරතුරු ලබාගැනීම අත්‍යවශ්‍ය වී තිබුණු නිසාය. ඒ නිසා, 1979 අංක 48 දරන ත්‍රස්තවාදය වැළැක්වීමේ පනත යටතේ, ආරක්‍ෂක ඇමතිවරයා විසින් නිකුත් කරන ලද රැඳවුම් නියෝගයක් යටතේ මධුෂ් සීඅයිඩියේ රඳවා තබාගන්නා ලදි.
සීඅයිඩීය අවුරුදු එකහමාරක් ගත වන තුරු, වරින් වර ඔහුගෙන් තොරතුරු ලබාගනිමින් ඔහුගේ ජීවිතයද ආරක්‍ෂා කෙළේය. ඒ මධුෂ් හොඳ මිනිහකු නිසා නොවේ. ඔහුගෙන් ලබාගත යුතු තොරතුරුවල වැදගත්කමත්, අධිකරණයට ඉදිරිපත් කර ඔහුට නීතිය අනුව දඬුවම් දීමේ අවශ්‍යතාවත් නිසාය. මේ සා වැදගත්කමක් ඇති මධුෂ් 20වැනිදා උදේ තුනට පමණ, මාලිගාවත්ත ඇපල්වත්ත ලක්සඳ සෙවණ නමැති මහල් නිවාස සංකීර්ණය තුළට ගෙනයන්නේ පොලිස් නිලධාරීන් හය දෙනකුගේ පමණක් ආරක්‍ෂාව ඇතිවයෟ ඒ බව පොලිසියම කියයි. අවසාන ප්‍රතිඵලය මධුෂ් එතැනදී ඝාතනය වීමයි.
එවැනි වැදගත් සැකකරුවකු මෙවැනි අවදානම් සහිත ගමනක්, නිසි ආරක්‍ෂාවකින් තොරව ගෙනගොස් ඔහු ඝාතනය වීම නිසා, ඔහුගෙන් ලැබිය යුතු වැදගත් තොරතුරු ලබාගත නොහැකි වීම ගැන සීසීඩීය රාජකාරිමය වශයෙන් වගකිව යුතු නැද්ද?

රිමාන්ඞ් කරන්න තිබුණේ 28දා
මධුෂ්, 2019 මැයි මාසයේ අත්අඩංගුවට පත්වීමෙන් පසු පසුගිය 16 දක්වා රඳවාගෙන තිබුණේ අපරාධ පරීක්‍ෂණ දෙපාර්තමේන්තුවේ හෙවත් සීඅයිඩීයේය. එසේ රඳවා ගැනීම සඳහා මාස තුනෙන් තුනට රැඳවුම් නියෝගයක්, ත්‍රස්තවාදය වැළැක්වීමේ පනත යටතේ රටේ ආරක්‍ෂක ඇමතිවරයා නිකුත් කළ යුතුය. එවැනි රැඳවුම් නියෝගයක් මත වුවද, සැකකරුවකු බන්ධනාගාරයකින් පිටත රඳවා තබාගත හැකි උපරිම කාලය, මාස 18ක් හෙවත්, අවුරුදු එකහමාරක් පමණක් බව ත්‍රස්තවාදය වැළැක්වීමේ පනතේ නිශ්චිතව කියා තිබේ. ඒ අනුව, අවුරුදු එකහමාරක් ගතවුණු මධුෂ්ගේ රඳවා ගැනීමේ නියෝගය කල් ඉකුත්වීමට නියමිතව තිබුණේ, ඔක්තෝබර් 28 වැනිදාය. එදායින් පසු අනිවාර්යයෙන්ම ඔහු රිමාන්ඞ් භාරයට පත්කළ යුතුය. තවදුරටත් පොලිසියේ කිසිම අංශයක, අලුත් රැඳවුම් නියෝග මතවත්, රඳවා තබාගත නොහැකිය.
සීසීඩීයට යැවීම නීති විරෝධීයි
එහෙත්, එදිනට පෙර, 16 වැනි සිකුරාදා වැඩිදුර විමර්ශන සඳහා යැයි කියමින්, මධුෂ් සීඅයිඩීයෙන් ඉවත් කර කොළඹ අපරාධ කොට්ඨාසය (සීසීඩී) වෙත භාරකරන ලදි. ඒ වැඩබලන පොලිස්පතිවරයාගේ නියෝගයක් මත යැයි කියමිනි. මෙය නීතිමය වශයෙන් මුළුමනින්ම වැරදිය. පුද්ගලයකු රඳවා තබාගැනීම සඳහා රඳවාගැනීමේ නියෝගයක් නිකුත් කරන විට, ඔහු රඳවා තබන්නේ කොතනදැයි එම නියෝගයේ සඳහන් කළ යුතු අතර, එහි පිටපතක් සැකකරුගේ පවුලේ අයටද භාරදිය යුතුය. කිසිම හේතුවක් නිසා, එම නිශ්චිත ස්ථානයෙන් සැකකරු ඉවත් කිරීමට නීතියෙන් ඉඩක් නැත. පොලිසිය, මධුෂ්ගේ සිදුවීමේදී, එම නීති නියමයද කඩකර තිබේ.
මධුෂ්ගේ රඳවා තැබීමේ නියෝගයේ කාලය අවසන්වී රිමාන්ඞ් බන්ධනාගාරගත වන්නට පෙර ඔහු සීසීඩීය වෙත භාරදීමත්, එහි අත්අඩංගුවේ සිටින කාලය තුළ, නිසි ආරක්‍ෂාවක් නැතිව ඔහු පිටතට ගෙනයාමත්, එහිදී ඝාතනය වීමත් එකම කතාවේ එකිනෙකට පෑහෙන සිදුවීම් නොවේද?
මාකඳුරේ මධුෂ් සීසීඩීයට භාරදීමෙන් පසු, ඔහු ඝාතනය වන්නට ඉඩක් තිබේය යන සැකය විවිධ හේතු නිසා ඔහුගේ බිරිඳ තිළිණි නිශායා තිලකරත්නට ඇතිවී තිබුණි. ඒ නිසා, ඇය 17 වැනි සෙනසුරාදා, ඒ ගැන ලියුමක් ලියා අතින්ම ගෙනගොස් සීසීඩීයේ අධ්‍යක්‍ෂවරයාට භාරදුන්නාය. එහි සඳහන් වූයේ, තම ස්වාමියා ආයුධ පෙන්වීම සඳහා පිටතට ගෙනගොස් ඝාතනය කිරීමේ සැලසුමක් තිබෙන බව තමාට දැනගන්නට තිබෙන බවය. යම් හෙයකින් එසේ පිටතට ගෙනයන්නේ නම් ශ්‍රී ලංකා රතුකුරුස හමුදාවේ හෝ මානව හිමිකම් කොමිෂන් සභාවේ හෝ නිලධාරීන් සමග පමණක් එසේ ගෙනයන ලෙස ඇය ලිපියෙන් ඉල්ලා තිබුණි. ඇය ඒ ලියුම භාරදෙන්නට සීසීඩීයට යන විටත්, මධුෂ් සීසීඩීයෙන් පිටතට ගෙනගොස් තිබුණි. ඒ ද සඟවා ඇති මත්ද්‍රව්‍ය සොයාගැනීමට යැයි කියමිනි. එහෙත්, එදින එනම් සෙනසුරාදා නැවතත් මධුෂ් සීසීඩීය වෙත ගෙනැවිත් තිබිණි.
සීසීඩීයේ අධ්‍යක්‍ෂට අතින් භාරදුන් ලිපියේ පිටපත්, ඇය වැඩබලන පොලිස්පති, සීසීඩී අධ්‍යක්‍ෂ, මානව හිමිකම් කොමිෂන් සභාව වැනි අය සහ ආයතනවලට සඳුදා තැපැල් කළාය.
ඇගේ ලිපියේ මෙසේ සඳහන්ය.
‘මාගේ ස්වාමියා රැඳවුම් නියෝග මත අපරාධ පරීක්‍ෂණ දෙපාර්තමේන්තුවේ රඳවා සිටින අතර 16 දින ඔහුව කොළඹ අපරාධ කොට්ඨාසයට රැගෙන විත් ඇති බව මා හට තොරතුරු ලැබුණි.
මාගේ ස්වාමි පුරුෂයා සඟවා ඇති ආයුධ පෙන්වා දීම සඳහා රැගෙන ගොස් ඔහුගේ ජීවිතයට හානි කිරීමේ සැලසුමක් පවතින බවට මාහට තොරතුරු ලැබී ඇති අතර ඒ සම්බන්ධයෙන් ඔබතුමාගේ අවධානය යොමුකරන මෙන් ඉල්ලා සිටිමි.
ඔබ ආයතනය කරන ප්‍රශ්නකිරීම්වලදී ඔහුට ජිවිත තර්ජනයක් හෝ වධහිංසා පැමිණවීමට ඇති ඉඩකඩ වළක්වාලීම සඳහා කටයුතු කරන මෙන් කාරුණිකව ඉල්ලා සිටින අතර කිසියම් විමර්ශනයකට ඔබ ආයතනයෙන් පිටතට මාගේ ස්වාමිපුරුෂයා රැගෙන යන්නේ නම්, ඔහුව ශ්‍රී ලංකා මානව හිමිකම් කොමිෂන් සභාවේ හෝ ශ්‍රී ලංකා රතුකුරුස සමාජයේ නිලධාරීන්ගේ අධීක්‍ෂණය යටතේ රැගෙන යන ලෙස අදාළ විමර්ශකයන්ට උපදෙස් දෙන මෙන් තවදුරටත් ඉල්ලා සිටිමි.
පිටපත්: පොලිස්පති, මානව හිමිකම් කොමිසමේ සභාපති’
එහෙත්, 20 වැනි අඟහරුවාදා උදේ පාන්දර මධුෂ් ඝාතනය කෙරිණි. ඒ සම්බන්ධයෙන් පොලිසිය කියන කතන්දරය, සිහිබුද්ධිය ඇති කිසිවකු, අඩුගණනේ රාජපක්‍ෂ ආණ්ඩුව බලයට පත්කරන්නට වෙහෙසුණු හැට නව ලක්‍ෂයක ජනතාවවත් පිළිගන්නේ නැත.

පොලිසිය කියන කතාව
පොලිසිය කියන කතාව ‘මව්බිම’ පුවත්පතේ කීර්ති මෙන්ඩිස් වාර්තා කරන අන්දමට ලුහුඬින් මෙසේය.
‘සීසීඩීය තුළදී මධුෂ් ජංගම දූරකථනයක් ඉල්ලුවේය. එය ලබාදෙන ලදි. එයින් කළ එක් කතාවක දෙබස් මෙසේය.
‘වැඬේ හරිද? බඩු ගෙනාවාද?’
‘ඔව් බඩු හරි.’
‘කොහාටද ගේන්නේ?’
‘මාලිගාවත්ත ෆ්ලැට් එකට.’
‘ඒ කිව්වේ?’
‘අර රවුෆ් හිටපු ගෙදරට.’
‘ඒ කොහාටද?’
‘අර දහවැනි තට්ටුවේ තියෙන්නේ’
‘හරි හරි මල්ලි හරි.’
සීසීඩී ප්‍රධානීහු, 19 දා මහ රෑම පොලිස් නිලධාරීන් දෙදෙනකු එම නිවෙසට යැව්වෝය. නිවසේ දොරගුළු ලා තිබුණේ නැත. කිසිවකු පදිංචිව සිටියේද නැත. සෝදිසියේදී නිවස තුළ හෙරොයින් පාර්සල් කිහිපයක් ඇති බව පොලිස් නිලධාරීන්ට පැටහිණි. මේ බව ප්‍රධානීන්ට දන්වන ලදි. ඒ අනුව 16 දෙනකුගෙන් යුක්ත පොලිස් කණ්ඩායමක් හොරොයින් තොගය අත්අඩංගුවට ගැනීමට පිටත් විය. ඒ මධුෂ්ද සමගයෟ වෙලාව අලුයම 2.50 පමණය.
3.05 වන විට ඔවුහු මාලිගාවත්ත ඇපල්වත්ත නිවාස සංකීර්ණයට ගියෝය. මුල් නිලධාරීහු දෙදෙනා එහි දහවැනි මහලේ තවමත් රැඳී සිටියහ.
මධුෂ් සහ පොලිස් නිලධාරීන් පඩිපෙළෙන් 2 වැනි මහලට පිය තැබුවා පමණි. ඉහළ සිට වෙඩි වරුසාවක් එල්ල විය. වෙඩි එල්ල වන පැත්තට නිලධාරීහු වෙඩි තැබූහ. අත් බෝම්බයක්ද එල්ල විය. පළාතම දුමෙන් නැහැවිණ. ඒ අතර යතුරු පැදි එහෙ මෙහ ගියේය.
විනාඩි පහක් ඇතුළත සියල්ල සන්සුන් වන විට මධුෂ් වෙඩි වැදී වැටී සිටියේය. පොලිස් නිලධාරීන් දෙදෙනකුටද තුවාල සිදුවී තිබිණ.’ (ඔක්තෝබර් 21 මව්බිම ඇසුරෙනි.)
පොලිසිය කියන කතාව ඇත්තක් නම්, ඔහු ඝාතනය වුණු බව කියන මහල් නිවාස සංකීර්ණයේ මත්කුඩු සඟවා තිබුණු බව කියන්නට දැනීමක් මධුෂ්ට තිබුණේ කෙසේද? මධුෂ් ලංකාව හැර යන්නේ 2013දීය. නැවත ලංකාවට ගෙනඑන්නේ 2019 මැයි මාසයේදීය. සාමාන්‍ය මිනිසුන් ‘ඇපල්වත්ත ෆ්ලැට්ස්‘ නමින් හඳුන්වන කොළඹ ඛෙත්තාරම ක්‍රීඩාංගණය මායිමේ පිහිටි මේ ලක්සඳ සෙවණ මහල් නිවාසවල මිනිසුන් පදිංචි කරවන්නේ 2017දීය. මේ මත්ද්‍රව්‍ය සඟවා තිබුණායැයි පොලිසිය කියන එහි 10වැනි තට්ටුවේ යූ31 නිවසද විශේෂ එකකි. මීට මාස කිහිපයකට පෙර එම නිවසේදී මත්ද්‍රව්‍ය ජාවාරම්කරුවකු වන රවුෆ් නමැත්තෙකු තවත් පිරිසක් විසින් ඝාතනය කරනු ලැබිණ. එම සිදුවීමෙන් පසු, මේ නිවසෙහි කිසිවකු වාසය කළේ නැත.
පොලිස් නිලධාරීහු දෙදෙනෙක් මුලින්ම එම නිවසට යති. ඔවුන්ට හෙරොයින් පාර්සල් හමුවෙයි. ඒවා අත්අඩංගුවට ගෙන එනවා වෙනුවට ඔවුන් කරන්නේ ප්‍රධානීන්ට කීමය. එසේ කී පසුත් තවත් නිලධාරීන් යවා හොරොයින් අත්අඩංගුවට ගන්නවා වෙනුවට, පොලිසිය මධුෂ්ද රැගෙන එහි යයි. ඒ කුමටද?
පහත ප්‍රශ්න කිහිපයද විහිළුවට මෙන් ඇසිය හැකිය. 1. මධුෂ්ගේ තොරතුරු අනුව පොලිස් නිලධාරින් දෙදෙනකු ගොස් හෙරොයින් තොගයක්ද සොයාගත් තැනකට යළිත් මධුෂ් ගෙනයන්නේ ඇයි? 2. මේ තරම් ජීවිත අවදානමක් තිබෙන මධුෂ් පොලිස් නිලධාරීන් 6 දෙනකු සමග පමණක් මහල් නිවස තුළට ගෙන ගියේ ඇයි? 3. මහ දවල් නිසි ආරක්‍ෂාව ඇතිව ඔහු ගෙනයනවා මිස, අලුයම් කාලයේ සීසීඩීයෙන් පිටතට ගෙනගියේ ඇයි? 4. ඔහු පිටතට ගෙනයෑමට පෙර, ඔහුගේ ආරක්‍ෂාව ගැන පොලිසිය නිසි තක්සේරුවක් කළේ නැද්ද? 5. නිවාස සංකීර්ණයේ තට්ටු දහයම පයින් නැගීමටද පොලිසිය බලාපොරොත්තු වුණේ? 6. මධුෂ් පොලිස් කණ්ඩායම ඉදිරියෙන් තබාගෙන නිරාවරණව ගෙනගියේ ඇයි? (මධුෂ්ගේ වම් ඇස හා ආශ්‍රිත ප්‍රදේශය වෙඩි වැදීම නිසා බරපතළ ලෙස තුවාල වී තිබේ.) 7. මධුෂ්ගේ සගයන් ඔහු බේරාගැනීමට වෙඩි තිබ්බා නම්, පොලිස් නිලධාරීන්ට බරපතළ තුවාල නොවී මධුෂ්ගේ හිසට පමණක් වෙඩි වදින්නේ කොහොමද? මධුෂ් ගලවාගැනීමට නම් වෙඩි තැබිය යුත්තේ පොලිසිය දෙසට නොවේද? 8. මධුෂ් ගලවා ගැනීමට ආ අය යතුරුපැදියකින් පමණක් ආවේ ඇයි? ගලවා ගත්තා නම් ඔහු ගෙනයන්නේ කෙසේද? 9. ගලවා ගැනීමට ආ අය නිරුපද්‍රැතව යන්නට සමත් වී නම්, ඔවුන්ගේ පිස්තෝල දෙක බිම දමා ගියේ ඇයි? 10. යතුරුපැදිය අතහැර දමා ගියේ ඇයි? 11. වෙඩි පහරකට ලක්වුණා නම්, පොලිසිය සමග ඔවුන් වෙඩි හුවමාරු කරගත්තා නම්, බෝම්බයක්ද පිපිරුණා නම් එම ස්ථානයේ බිත්තිවල පවා වෙඩි පහර වැදුණු තැන් තිබෙනවාද? 12. පොලිසිය කියන පරිදි, මධුෂ් ඇතුළු පොලිස් පිරිස පහළත් ප්‍රහාරකයන් ඉහළත් සිටියා නම්, මධුෂ්ගේ සිරුරේ තිබෙන තුවාල, ඉහළින් තබන ලද වෙඩි පහර නිසා සිදුවුණු තුවාලද? නැතිනම් මධුෂ් හා සමාන මට්ටමක සිට තබන ලද වෙඩිපහරවලින් සිදුවුණු තුවාලද?
ඉහත ප්‍රශ්න නැගෙන්නේ සිද්ධිය පිළිබඳවය.

නීතියේ පාලනයක් තිබේද?
එහෙත්, සිද්ධිය ඉක්මවා යන, රටේ නීතියේ පාලනය පිළිබඳ වැදගත් කාරණා කිහිපයක් පසුගිය කාලයේදී මෙන්ම මේ ඝාතනය හරහාද නැවත ඉස්මත්තට පැමිණ තිබේ.
ඉන් පළමුවැන්න, මෙලෙස පොලිස් අත්අඩංගුවේ සිටියදී බරපතළ අපරාධවල සැකකරුවන් ඝාතනය වන්නේ, රාජපක්‍ෂවරුන් බලයේ සිටි 2005-2014 කාලයේ සහ 2019න් පසු අද දක්වා වීමයි. 2015-2019 යහපාලන ආණ්ඩුකාලයේදී එවැනි ඝාතන (එකක් හෝ දෙකක් හැරෙන්නට) ප්‍රවණතාවක් ලෙස සිදුවුණේ නැත්තේ ඒ කාලයේ සිටි නායකයන් නීතියේ පාලනය ගැන යම් තරමකට හෝ විශ්වාස කළ නිසාය. ඒ කාලයේ එවැනි ඝාතන සඳහා ආණ්ඩුවෙන් මගපෙන්වීමක් හෝ අනුමැතියක් හෝ නොලැබිණ. ඒවා කරන තමන් ආණ්ඩුව විසින් ආරක්‍ෂා කරාවියැයි විශ්වාසයෙන් පොලිසියේ කිසිවෙකු සිටියේද නැත. ආණ්ඩුවේ ආරක්‍ෂාව ලැබෙන්නේ නැති බව ඔවුන් දැන සිටි නිසාය. අද පිල් විදහාගත් මොනරුන් බවට පත්ව සිටින සමහර උසස් පොලිස් නිලධාරීන් ඒ කාලයේ වේදිකාවේ සිටියේ ද නැත. නැවතත් මේ ආකාර ඝාතන ප්‍රවණතාවක් ලෙස ඇරඹුණේ 2019 අවසානයේදී රාජපක්‍ෂවරුන්ට රටේ ආණ්ඩු බලය ලැබීමෙන් පසුවය.

අපිට ඕනෑ දේ කරනවා
දෙක, මේ හා සමාන සිදුවීම් හා විශේෂයෙන්ම මාකඳුරේ මධුෂ් ඝාතනය හරහා ප්‍රකාශ වන්නේ, ‘උඹලාට ඕනෑ විදියට හිතපල්ලා. නීතිය බල්ලාට දමා හෝ අපිට වුවමනා දේ අපි කරනවා’ය කියන විනාශකාරී අදහසයි. මධුෂ් සම්බන්ධයෙන් වන විට, ඔහු රිමාන්ඞ් බන්ධනාගාරගත වන්නට හරියටම සතියකට පෙර, සීඅයිඩීයේ සිට සීසීඩීයට මාරුකිරීමත්, 17 සෙනසුරාදා ඔහු මත්ද්‍රව්‍ය සොයන්නට පිටතට ගෙනයන බව මාධ්‍ය හරහා පොලිසිය ප්‍රචාරය කිරීමත් මගින්, මෙය ප්‍රසිද්ධියට පත්කළ නාටකයක් බව පැහැදිලිව පෙනේ. ඒ අනුව, ඝාතනය සිදුවී ඇත්තේ සියල්ලන්ටම පෙනෙන සේ මාධ්‍ය මගින්ද ප්‍රචාරය කිරීමෙන් පසුවය. ඒ තරම් බලයක් හුදෙක් පොලිස් නිලධාරීන් කිහිප දෙනකුට තිබේද? නැතිනම් ඔවුන් ආරක්‍ෂා කරන බවට සහතිකයක්, ඔවුන්ට අනුමැතිය දුන් කිසිවකුගෙන් ලැබී තිබුණේද?
එය එසේ විණි නම්, රට තිබෙන්නේ, කවුරුන් කෙසේ කීවත්, ‘අපට අවශ්‍ය අය ගැන අපි බලාගන්නවා’ කියන ශිෂ්ට සමාජයක් කිසිසේත් නොඉවසන භයානක තත්වයක නොවේද? එවැනි සමාජයක නීතියේ පාලනයට කුමක් සිදුවෙයිද?

ජාත්‍යන්තර අවුලක්
තුන, මධුෂ් ලංකාවට ගෙනආවේ නීතිමය හා රාජ්‍ය තාන්ත්‍රික වශයෙන් දරන ලද වෙහෙසකර වෑයමකින් පසුව බව මුලින්ම අපි කීවෙමු. හිටපු ජනාධිපති මෛත්‍රීපාල සිරිසේන ඝාතන තැතක් ගැන මධුෂ්ගේ නම ඈඳී තිබුණු නිසාත්, ඩුබායි සිට ඔහු ලංකාවට ගෙන ඒමට ලංකාවේ රජයට අවශ්‍ය විය. ඒ සඳහා ජනාධිපති සිරිසේන පෞද්ගලිකවම එරට එමීර්වරයා වෙත ඉල්ලීමක් කෙළේය. ඒ ඉල්ලීම එහි ගෙනගියේ එවකට අමාත්‍ය තිලක් මාරපන ඇතුළු පිරිසක් විසිනි.
තමා ලංකාවට ගෙනගියහොත්, අධිකරණයට ඉදිරිපත් නොකර මරා දමාවියැයි මධුෂ් එහිදී කීවේය. ඔහුගේ ඒ ඉල්ලීම වැඩිදුර සලකා නොබැලුණේ, ඉහත රාජ්‍ය තාන්ත්‍රික ගනුදෙනුව නිසාය.
මධුෂ් ඩුබායි රාජ්‍යයේ සිටියේ එරටට ‘විදේශ විනිමය’ විශාල ලෙස ගෙනඑන ආර්ථික වශයෙන් වැදගත් පුද්ගලයකුද හැටියටය. ඔහු වැනි පිටරටවල සිටින අපරාධකරුවන් ලංකාවට ගෙනඑන්නට (උදර්පණය කරවාගන්නට) සැරසෙන විට, ඒ රටවල අධිකරණය ඉදිරියේ උදර්පණ නඩුවක් දැමීම කළ යුතුය. එහිදී ඔවුන් ඉල්ලන්නේ, තමන් ලංකාවේ නීති බලධාරීන්ට ලබා නොදෙන ලෙසත්, ලංකාවට ගෙනගියහොත් අධිකරණයට ඉදිරිපත් නොකර මරාදැමීමේ අවදානමක් ඇතිවන බවත්ය. රටක සිටින, වෙනත් රටක අපරාධකරුවකු ඒ රටට භාරදීමේදී රටවල් දෙක අතර පවතින නීතිමය බැඳීම් හා රාජ්‍යතාන්ත්‍රික සම්බන්ධතා වැදගත් වෙයි. එහෙත්, යම් පුද්ගලයකු, අපරාධකරුවකු වේවා, ඔහු සිය රටට බාරදුන් විට සිදුවන්නේ නීතියට පිටින් ගොස් ඔහු ඝාතනය කිරීම නම්, එම අපරාධකරුවන් ඔවුන්ගේ රටට භාර නොදෙන්නට සාධාරණ හේතුවක් ඒ රටවල අධිකරණයට ඇතිවේ. මේ විදියට ගියොත්, ලංකාවට අත්‍යවශ්‍ය අපරාධකරුවන් පිටරටවලින් ලංකාවට ගෙන්වා ගැනීමත් අසීරු වනු ඇත.

ඉන්ටර්පොල්
ඉන්ටර්පොල් යනු ලංකාවද සාමාජිකයකු වන ඒ ඒ රටවල පොලිසිවල ජාත්‍යන්තර ජාලයයි. එක් රටකට අත්‍යවශ්‍ය අපරාධකරුවකු වෙනත් රටක සිටින විට, ඔහු ගැන විමර්ශනය කිරීම, අත්අඩංගුවට ගැනීම, අවශ්‍ය රටට පිටුවහල් කිරීම ආදිය සඳහා රටවල් දෙකේ පොලිසිය අතර සම්බන්ධීකරණය සිදුවන්නේ ඉන්ටර්පොල් හරහාය. මධුෂ් ලංකාවට ගෙනෙන්නේද ඉන්ටර්පොල් සහායෙනි. එහෙත්, තමන්ගේ සහායද ලබාගෙන රටක් වෙතින් ලබාගන්නා සැකකරුවන්, මෙලෙස අධිකරණයට ඉදිරිපත් නොකර ඝාතනය කරන්නේ යැයි අවබෝධ කරගන්නා විට, ඉන්ටර්පොල් වෙතින් ලංකාවට ඉදිරියට සහාය ලැබෙනු ඇද්ද? ඉන්ටර්පොල් තිබෙන්නේ නීතියේ ආධිපත්‍යය සුරැකීමට මිස විනාශ කිරීමට දිරිදීමට නොවේ.

අපරාධකරුවකුට වුවත් නීතිය එකයි
රටක නීතියේ පාලනය යනුවෙන් හඳුන්වන්නේ නීතියට අනුව සියලු දේ සිදුවීමය. අපරාධ විමර්ශනය, අත්අඩංගුවට ගැනීම, රඳවා තැබීම, නඩු විභාගය හා දඬුවම් දීම යන සියල්ල සිදුවිය යුත්තේ නීතියෙන් නියම කර ඇති විධියටය. මාකඳුරේ මධුෂ් ලංකාවේ සිටි බලවත්ම මත්ද්‍රව්‍ය ජාවාරම්කරුවකු, අපරාධකරුවකු බවට සැකයක් නැත. එහෙත්, ඔහු සිටියේ පොලිස් අත්අඩංගුවේය. පොලිසිය යනු රජයයි. සැකකරුවකුට එරෙහිව විමර්ශන පවත්වා නඩු විභාගයකට ඉදිරිපත් කොට වරදකරු වුණොත් දඬුවම් දීමේ බලය ඇත්තේ ද රජයටය. ඒ අවසාන පියවර දක්වා, තමා භාරයේ සිටින සැකකරුගේ (කවර තරමේ අපරාධකරුවකු වුණත්) ආරක්‍ෂාව, ජීවිත ආරක්‍ෂාව පැවරෙන්නේ රජයටය. මීට පෙරදීද වී ඇතිවාක් මෙන්, මධුෂ් සම්බන්ධයෙන්ද රජයේ ඒ වගකීම කඩවී තිබේ. එසේ නම්, නිසි ආරක්‍ෂාවක් නැතිව තමා භාරයේ සිටින්නකු අවදානමේ හෙළීම ගැන ඔහු බාරව සිටි ලොකු පොඩි පොලිස් නිලධාරීන්ට එරෙහිව රජය අඩුගණනේ රාජකාරි පැහැර හැරීමට අදාළ විනය පියවර ගත යුතුය.
පසුගිය රාජපක්‍ෂ පාලන සමයේදී ලංකාව ලෝකය ඉදිරියේ බලවත් අපකීර්තියට පත්වන්නට, ලංකාවට එරෙහිව ජාත්‍යන්තර සම්බාධක පනවන්නට ඔන්න මෙන්න තත්වයක් ඇතිවුණේ ැංඑර් වමාසජස්ක නසකකසබටි යනුවෙන් හැඳින්වෙන, නීතියට පිටින් ගොස් පුද්ගලයන් මරාදැමීම් පිළිබඳ සංඛ්‍යාලේඛන අතින් ලංකාව ඉහළ මට්ටමක සිටීම නිසාය. දැන් යළිත් එළැඹී ඇත්තේ ඒ ඉතිහාසය පුනරුච්චාරණය වන අවස්ථාවක් නොවේද?

මාධ්‍ය හැසිරීම
මධුෂ් ඝාතනය නීතියේ පාලනය අනුව බැලූ විට බරපතළ ලෙස ප්‍රශ්නගත බව පැහැදිලිය. එහෙත්, මෙතෙක් ලංකාවේ එකුදු මාධ්‍යයක්වත්, ඒ කෝණයෙන් මේ දෙස බලා නැති බව පෙනේ. සියලුම මාධ්‍ය පාහේ තම වාර්තාකරණය කර ඇත්තේ ‘මධුෂ් මෙවැනි ඝාතනයකට ලක්වීමට හැම අතින්ම සුදුස්සෙක්ය’ යන පදනමේ පිහිටමිනි. ‘අවිගත්තෝ අවියෙන්ම නසිති, දිට්ඨදම්ම වේදනීය කර්මය පඩිසන් දීම’ වැනි පැහැදිලි කිරීම් එන්නේ ඒ නිසාය. මධුෂ් ඝාතනයෙන් පසු සියලුම පාහේ මුද්‍රිත මාධ්‍ය කර තිබුණේ, මධුෂ්ගේ දීර්ඝ අපරාධ ලැයිස්තුව පොලිසිය කියවන විට ලියාගෙන සිය පත්තර පිටුවල ඒ විදියටම ඇතිරීමයි. ඒ හරහා ‘මධුෂ් මෙවැනි අපරාධකාරයෙකි, ඔහුට මෙවැනි මරණයක්ම හිමි විය යුතුය’ යන අදහස පාඨක මනසේ ඇති කිරීමට දායක වීමයි. පොලිසිය සාධාරණය කිරීමයි. එහෙත්, ඒ ඝාතනය හරහා ඉස්මතු වන පොලිස් භාරයේ සිටින අය ඝාතනය වීමේ ම්ලේච්ඡ ප්‍රවණතාව යළි හිස එසවීම ගැන මතයක්, විග්‍රහයක් ඔවුන්ට තිබුණේ නැත.
මේ විදියටම තමන්ට වුවමනා පුද්ගලයන් තෝරාගෙන අත්අඩංගුවට ගෙන ඒ අත්අඩංගුව තුළදී ඝාතනය කිරීමේ පොලිස් ප්‍රවණතාව ඉදිරියට ගියොත්, අහිංසකයන් වුවද, රජයේ විවේචකයන් වුවද, සමහර විට තමන්ගේ සමීපතමයන් වුවද, නඩු නැති ඝාතනවලට ලක්වීමට ඇති ඉඩකඩ ගැන සිතන්නට මේ මාධ්‍යකරුවන්ට වුවමනාවක් නැති බව පෙනේ.

අධිකරණයේ කාර්යභාරය කුමක්ද?
මේ නීතියට පිටින් සිදුවන ඝාතන ප්‍රවණතාවට තිත තැබීමේ හැකියාව ඇත්තේ අධිකරණයටය. මේ ඝාතන ගැන පශ්චාත් මරණ පරීක්‍ෂණයක් පවත්වා, එහි වාර්තාව මත නියෝග දීමේ හැකියාව අධිකරණයට තිබේ. සාමාන්‍යයෙන් මෙවැනි සිදුවීමකදී ඝාතනය වූ අයගේ සමීපතමයන්, තමන්ට සිදුවූ අසාධාරණය ගැන නීතිමය පියවර ගන්නේ නැත. සමාජ අපවාදයට ඒ වන විටත් ඔවුන් ලක්වී සිටීමත්, නීතිමය පියවර පොලිසියට එරෙහිව ගැනීම අනාගත අනතුරු කැඳවාගැනීමක් විය හැකි නිසාත්, ඔවුහු නිහඬවම සිටිති. ඒ තත්වය තේරුම් ගෙන අඩු ගණනේ මේ ඝාතනවලදී හරියටම සිදුවූයේ කුමක්දැයි යන්න ගැන නිසි පරීක්‍ෂණ පවත්වා නීතිය අනුව ඉදිරි පියවර ගැනීමට නියෝග කිරීමට අධිකරණයට හැකිය. එය අපරාධකරුවන්ට සේවය කිරීමක් නොව, රටේ නීතියේ පාලනය තහවුරු කිරීමට දායක වීමකි. අධිකරණ නිලධාරීන්ගේ වගකීම වන්නේ රටේ නීතියේ පාලනය පවත්වා ගැනීමයි.

නීතිඥවරයා නීතිඥ සංගමයට ලියයි
මධුෂ්ගේ නීතිඥ චමින්ද අතුකෝරල, ඔක්තෝබර් 20වැනිදා, ශ්‍රී ලංකා නීතිඥ සංගමයේ සභාපතිවරයාට ලිපියක් යවමින් කියන්නේ, තමාගේ සේවාදායකයාගේ ඝාතනය සම්බන්ධයෙන් නීතිය බලාත්මක කිරීමේ ආයතන විසින් ඉදිරිපත් කර ඇති කරුණු බැලූ බැල්මටම ගොතන ලද ප්‍රබන්ධයක් බවයි.
මේ කාරණය ගැන අදාළ ආයතන සමග සම්බන්ධවී කටයුතු කරන ලෙසත්, එම ක්‍රියාවලිය හැකි උපරිම ආකාරයෙන් හෙළා දකින ලෙසත් ඔහු සභාපතිවරයාගෙන් ඉල්ලා සිටියි. එහෙත්, නීතිඥ සංගමයේ සභාපතිවරයා ඒ ගැන ගත් පියවර කුමක්දැයි තවමත් පැහැදිලි නැත.
මාකඳුරේ මධුෂ්ගේ ඝාතනය ගැන මහේස්ත්‍රාත් පරීක්‍ෂණය ඉදිරි දිනයකදී පැවැත්වීමට නියමිතය. එදිනට තම සැමියා ඝාතනය කරාවියැයි සැකයක් තමාට ඇතිවුණේ ඇයිදැයි මධුෂ්ගේ බිරිඳ සමහර විට අධිකරණයට පැහැදිලි කරනු ඇත.

මධුෂ්ගේ නීතිඥ චමින්ද අතුකෝරලගේ ලිපිය
මා මේ ලිපිය ලියන්නේ, ඔක්තෝබර් 20 වැනිදා, එනම් අද උදේ කොළඹ අපරාධ විමර්ශන කොට්ඨාසය බාරයේ සිටියදී ඝාතනය කරන ලද ඉහත නම් දරන මාගේ සේවාදායකයාගේ බිරිඳගේ උපදෙස් මතය.
මාගේ සේවාදායකයා 1979 අංක 48 දරන ත්‍රස්තවාදය වැළැක්වීමේ පනත යටතේ ලබාගත් රැඳවුම් නියෝගයක් මත, රඳවාගෙන සිටියේය. වරින් වර එම නියෝගය අලුත් කරන ලදි. අවසාන රැඳවුම් නියෝගය නික්තුත් කර ඇත්තේ 2020 ජුලි 28 වැනිදාය. එය ඔක්තෝබර් 28 වැනිදා කල් ඉකුත්වීමට නියමිතව තිබුණි.
1979 අංක 48 දරන ත්‍රස්තවාදය වැළැක්වීමේ පනත ප්‍රකාරව එවැනි රැඳවුම් නියෝග ලබා දිය හැක්කේ මාස 18ක කාලයක් සඳහා පමණක් බව ඔබ දනියි. ඒ අනුව මගේ සේවාදායකයාගේ අඛණ්ඩ රැඳවුම් කාලය 2020 ඔක්තෝබර් 28 දින අහෝසි වීමට නියමිතයි.
ඔබ දන්නා ආකාරයට රැඳවුම් නියෝගයකදී රඳවා තබන ස්ථානය විශේෂයෙන් සඳහන් කළ යුතුය. එම්ඕඩී/එල්ඊජී/පීටීඒ173/2019 දරන මාගේ සේවාදායකයාට අදාළ රැඳවුම් නියෝගයෙහි, රඳවාගන්නා ස්ථානය හැටියට දක්වා ඇත්තේ අපරාධ පරීක්‍ෂණ දෙපාර්තමේන්තුවයි. කෙසේ වෙතත් නීති විරෝධී හා අත්තනෝමතික ලෙස ඔක්තෝබර් 16 වැනිදා හෝ ආසනන දිනක, මාගේ සේවාදායකයා අපරාධ පරීක්‍ෂණ දෙපාර්තමේන්තුවෙන් කොළඹ අපරාධ කොට්ඨාසයට මාරුකර තිබුණි.
එම මාරුකිරීම නීති විරෝධී වන අතර අද උදේ සිදුවූ සිදුවීමට පෙරනිමිත්තකි.
මාගේ සේවාදායකයාගේ ජීවිතයට ඇති තර්ජනය පිළිබඳව බියවූ ඔහුගේ බිරිඳ අපගේ උපදෙස් මත ඔක්තෝබර් 17 වැනිදා රජයේ ආයතන මගින් සිදුවිය හැකි අනතුර පිළිබඳව කොළඹ අපරාධ කොට්ඨාසයේ අධ්‍යක්‍ෂවරයාට ලිපියක් යැවූ අතර, ඒ බව දූරකථනයෙන්ද දැනුම් දුන්නාය. එම ලිපියෙන් පොලිස් අත්අඩංගුවේ සිටියදී ඇගේ ස්වාමියා ඝාතනය වීමට ඇති ඉඩ පිළිබඳව පැහැදිලි බිය සඳහන් කර තිබේ.
නීතියේ ආධිපත්‍යයට ගරු කරන ශිෂ්ට සම්පන්න සමාජයක් ලෙස නීතිය බලාත්මක කිරීමේ ආයතනවල භාරයේ සිටියදී මෑතදී සිදුවූ ඝාතනවලට දඬුවම් නොලැබී ඇති අතර කිසිදු ශිෂ්ට සම්පන්න සමාජයක් මෙම හැසිරීම අනුමත නොකළ යුතු බව පිළිගෙන තිබේ.
මගේ සේවාදායකයාගේ ඝාතනය සම්බන්ධයෙන් අද වන විට නීතිය බලාත්මක කිරීමේ ආයතන විසින් ඉදිරිපත් කර ඇති කරුණු බැලූ බැල්මටම ගොතන ලද ප්‍රබන්ධයක් බව ඔබද දන්නවා ඇත.
මේ කාරණය ගැන අදාළ ආයතන සමග සම්බන්ධවී කටයුතු කරන ලෙස ඔබෙන් ඉල්ලා සිටින අතර, එම ක්‍රියාවලිය හැකි උපරිම ආකාරයෙන් හෙළා දකින ලෙසද ඉල්ලා සිටිමි.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි