No menu items!
27.5 C
Sri Lanka
29 March,2024

ඇමෙරිකානු ජනාධිපතිවරණය හමුවේ ට්‍රම්ප්ගේ ඒකාධිපති වියරුව

Must read

■ පවිත්‍රා රූපසිංහ
ඇමෙරිකානු ජනාධිපති ඩොනල්ඞ් ට්‍රම්ප්, ඩිමොක්‍රටික් පාර්ශ්වයේ සහ සිවිල් වැසියන්ගේ ඍජු විරෝධතා මධ්‍යයේ වුවත් එරට ශ්‍රේෂ්ඨාධිකරණ විනිසුරුවරියක ලෙස 48 හැවිරිදි එමී කොනී බැරට් නම් කළේය. ඒ පසුගිය සැප්තැම්බර් 18 වනදා එරට දීර්ඝ කාලයක් ධුරයේ සිටි ශ්‍රේෂ්ඨාධිකරණ විනිසුරුවරියක වූ රූත් බේඩර් ගින්ස්බර්ග් අභාවයට පත්වීමෙන් පසු එම තනතුර පුරප්පාඩු වූ නිසාය.
විනිසුරු කොනී බැරට් ඒ සඳහා නම් කිරීම පිළිබඳ ඩිමොක්‍රටික් පක්ෂයේ බහුතරයක් ට්‍රම්ප්ට ඍජුවම විරෝධය ප්‍රකාශ කර තිබේ. ඒ ඉදිරියේ පැවැත්වෙන්නට නියමිත ජනාධිපතිවරණයෙන් අනතුරුව එම තනතුරට නමක් යෝජනා සම්මත කළ යුතු බව අවධාරණය කරමිනි. ට්‍රම්ප් සිදුකළ මෙම මැදිහත්වීම එරට මහාධිකරණයේ සහ සෙනෙට් සභාවේ විශ්වසනීයත්වයට හානිකර වන බව ඩිමොක්‍රටික් පක්ෂය තවදුරටත් පවසා තිබේ.
ඔවුන් පවසන ආකාරයට, ජනාධිපති ට්‍රම්ප්ට සහ සෙනෙට් සභාවේ බහුතර නායක මිච් මැක්කොනෙල්ට හැකි ඉක්මනින් කොනී බැරට් එම තනතුරට පත්කර ගැනීමට හේතුවක් තිබේ. ඒ නොවැම්බරයේ පැවැත්වෙන ඔබාමාකෙයා නම් වූ ප්‍රකට සෞඛ්‍ය පනත පිළිබඳ නඩුව විභාග කිරීමට කොනී බැරට්ගේ ඡන්දය තීරණාත්මක ලෙස භාවිත කළ හැකි වන හෙයිනි.
වොෂින්ටනය ඇතුළු රටේ ප්‍රධාන නගර ගණනාවක, ජනාධිපති ට්‍රම්ප් එම විනිසුරු ධුරයට බැරට් නම් කිරීම සම්බන්ධයෙන් විරෝධය පළ කරමින් පෙළපාලි පවත්වයි. ඔවුන්ගේ අපේක්ෂාව වී ඇත්තේ එළැඹෙන නොවැම්බර් 03 වනදාට යෙදී තිබෙන ජනාධිපතිවරණයෙන් ඩොනල්ඞ් ට්‍රම්ප් පරාජය කිරීමය. මෙය මෑත ඉතිහාසයේ විශාලතම මහජන විරෝධතා මාලාවකි.
රටේ ජනාධිපතිවරණය පැවැත්වීමට සති තුනකටත් වඩා අඩු කාලයක් තිබියදීත්, නව කොරෝනා වසංගතය තවමත් ජන ජීවිත අඩාල කරමින් තිබියදීත්, නොකඩවා එම විරෝධතා සඳහා පිරිස් ඇදෙමින් සිටිති.
ඇමෙරිකාවේ ශ්‍රේෂ්ඨාධිකරණ විනිසුරුවරුන් පත් කිරීමේදී ජනාධිපතිවරයාට පත් කිරීමේ හැකියාව පවතින අතර, සෙනෙට් සභාවේ අනුමැතිය පමණක් එයට වුවමනා වේ. සාමාන්‍යයෙන් ජනාධිපතිවරයාගේ පක්ෂයටම අයත් සෙනෙට් සභාවක් ඇමෙරිකාවේ බලයට පත්වන නිසා ජනාධිපතිවරයාට සුදුසුයැයි හැඟෙන කෙනෙකු ශ්‍රේෂ්ඨාධිකරණ විනිසුරුවරුන් ලෙස පත් කිරීමේ හැකියාව ඇත.
එහෙත් කාලාන්තරයක් තිස්සේ ඇමෙරිකානු ප්‍රජාතන්ත්‍රවාදී සම්ප්‍රදාය හැඩගැසී ඇත්තේ හිතුමතේට ජනාධිපතිවරුන් පත් කළ හැකි ආකාරයට නොවේ. ජනමාධ්‍ය, සිවිල් සමාජය ඇතුළු පාර්ශ්ව යම් තනතුරකට පත්කරන පුද්ගලයාගේ සුදුසුකම් පිළිබඳ විමසා බැලීමක් කරනු ලබයි. ඔවුන්ගේ දෘෂ්ටිවාදය පිළිබඳ විවෘත සංවාදයක යෙදෙයි.
තනතුර පුරප්පාඩුවට හේතු වූ මියගිය හිටපු විනිසුරුවරිය වන රූත් බේඩර් ගින්ස්බර්ග් යනු ප්‍රකට ලිබරල් මතධාරී විනිසුරුවරියකි. ඇය මිනිස් අයිතිවාසිකම්වලට ඉහළ වටිනාකමක් දුන්, සමානාත්මතාව අගය කළ විනිසුරුවරියකි. එහෙත්, එමී කෝනි බැරට් සාම්ප්‍රදායික අදහස් ඇති විනිසුරුවරියකි.
ලිබරල් අදහස් සහ සාම්ප්‍රදායික අදහස් අතර සමබර වූ ශ්‍රේෂ්ඨාධිකරණයක් පැවතීම ඇමෙරිකානු ප්‍රජාතන්ත්‍රවාදී සංවිධාන සහ මාධ්‍ය අගය කරන තත්වයකි. එමී කෝනි බැරට් පත් කිරීමෙන් එම සබරතාව ගිලිහී යෑම ඉහත කී විරෝධතාවලට ප්‍රධාන හේතුවය.■

 

 

- Advertisement -

පුවත්

1 COMMENT

  1. Pavithra has done a very good analysis. Trump as the president is setting unprecedented practices as normal trends. It is likely that Joe Biden will defeat Trump according to polls.

LEAVE A REPLY

Please enter your comment!
Please enter your name here

- Advertisement -

අලුත් ලිපි