පරාජයෙන් පසු පාර්ලිමේන්තුවෙන් පිටත නැවත දේශපාලනය ආරම්භ කිරීමේ අරමුණෙන් ග්‍රාමීය මට්ටමෙන් රැස්වීම් මාලාවක් පැවැත්වීමට ජාතික ජන බලවේගය බලාපොරොත්තු වන බව එහි සාමාජිකයෙක් පැවසීය.
පැලවත්ත ජනතා විමුක්ති පෙරමුණේ ප්‍රධාන කාර්යාලයේ අගෝස්තු 09 වැනිදා පැවති රැස්වීමේදී ජාතික ජන බලවේගයේ නායකයන් පරාජයට හේතු සහ අනාගත සැලසුම් ගැන සාකච්ඡා කළ බවත්, එහිදී ග්‍රාමීය මට්ටමෙන් සංවිධාන කටයුතු තවත් ශක්තිමත් විය යුතු බවට අදහස් පළ වූ බවත් ඔහු කීය. එම රැස්වීමට ජනතා විමුක්ති පෙරමුණේ නායකයන් සහ ජාතික ජන බලවේගයේ අනෙකුත් සංවිධානවල නායකයන් සහභාගි වී තිබුණි.
ඊට අමතරව පාර්ලිමේන්තු මන්ත්‍රීධුර තුනක් පමණක් ලැබී තිබීම නිසා පාර්ලිමේන්තුවෙන් පිටත රැස්වීම් මාලාවක් සංවිධානය කිරීමට සැලසුම් කර ඇති බවත් ඔහු කීය. ඒ යටතේ ජනතා විමුක්ති පෙරමුණේ වෘත්තීය සමිති සහ ජාතික ජන බලවේගයේ වෘත්තිකයන්ගේ සංවිධාන ඉදිරි කාලසීමාව තුළ රැස්වීම් සංවිධානය කිරීමටත්, දූෂණ විරෝධී හඬ ඇතුළු සංවිධාන මගින් ආණ්ඩුවේ දූෂණ වංචා පිළිබඳ සොයා බලමින් ඒවා පිළිබඳ හෙළිදරව් කිරීමේ වැඩසටහනක් ආරම්භ කිරීමටත් එහිදී යෝජනා වී ඇත.■
අනුරංග ජයසිංහ
