No menu items!
20.9 C
Sri Lanka
29 March,2024

ස්නායු ආබාධ නැතිව තිසරපට අඳින්න

Must read


සුදුසු තිසරපටයක් තෝරාගැනීම කෙතරම් අසීරු අභියෝගයක්දැයි දන්නේ කාන්තාවන්මය. ඒ සඳහා වරු ගණන් කාන්තාවන් ගතකරන අයුරු දකින සැමියන්ද කාන්තාවන්ට එය කෙතරම් අභියෝගයක්දැයි දන්නවා විය හැකිය. කෙතරම් වෙහෙස වුවද ඇතැම් කාන්තාවන්ට අවසානයේදී සුදුසු තිසරපටයක් තෝරාගැනීමට නොහැකි වෙයි.


තිසරපට සඳහා ලොව පිළිගත් විද්‍යාත්මක දැනුමක් ඇතත්, ලොව පුරා බොහෝ කාන්තාවන් අතර එය ප‍්‍රකට නැත. ඒ නිසාම බොහෝ කාන්තාවන් තෝරාගන්නේ වැරදි තිසරපටයයි.


වැරදි තිසරපට වැරදි ආකාරයට ඇඳීමෙන් රෝග පීඩා තත්වයන් ඇති විය හැකි බව වෛද්‍යවරුන් පරීක්ෂණ මගින් සොයාගෙන ඇති කරුණකි. එවැනි පර්යේෂණ ඕනෑ තරම් ඇත. කෙසේවෙතත් අපගේ අවධානය එංගලන්තයේ පෝර්ට්මවුත් විශ්වවිද්‍යාලයේ කණ්ඩායමක් මෑත කාලයේදී කරන ලද පරීක්ෂණයක් ඇසුරෙන්, තිසරපටයක් නිවැරදි ආකාරයට පැළඳීම ගැනය.
තිසරපටය වැරදි ප‍්‍රමාණයෙන් යුතුව, වැරදි හැඩයක් ඇතිව ඇඳීමෙන් පියයුරු වේදනාව, හිසරදය, කොන්දේ කැක්කුම්, උරහිසේ වේදනා, බෙල්ලේ වේදනා සහ සමේ ඇති වන චර්ම රෝග වැනි තත්වයන් ඇතිවිය හැකිය. මූලික කාන්තාවන් තමන්ගේ තිසරපටය තෝරාගනිද්දී එහි ආධාරක පටිවල වට ප‍්‍රමාණය ගැන සැලකිලිමත් විය යුතුය. සීමාව ඉක්මවා ලිහිල් වීම මෙන්ම සීමාව ඉක්මවා තද වීමත් ගැටලූ මතු කළ හැකිය. පෝර්ට්මවුත් පර්යේෂණ කණ්ඩායම සොයා ගෙන ඇත්තේ ලිහිල් තිසරපට අඳින කාන්තාවන්ගෙන් සියයට පනහකගේ පියයුරේ පසුපස කොටසේ සම හානි වී ඇති බවය. එනම්, සම ඇදී ගොස් ඇති බවය.


අනෙක් අතට තිසරපටය ඉතා තදින් ඇඳීමද නොකළ යුතුය. එසේ කිරීමෙන්ද පියයුරේ පසුපස කොටසට හානි සිදුවෙයි. පිටෙහි සහ පපු පෙදෙසේ ඇති පේශි තෙරපීම නිසා නහර සහ මාංශපේශි ආශ‍්‍රිතව ඇති විය හැකි තෙරපීම් නිසා ස්නායු දුර්වල විය හැකිය. දීර්ඝ කාලයක් මෙසේ ඇඳීමෙන් උරහිසේ, බෙල්ලේ හෝ කොඳු නාරටියේ ආබාධ හෝ වේදනා ඇති වීමට විශාල ඉඩකඩක් ඇත. ඇතැම් විට, දැනටමත් එවැනි පීඩාවන් විඳින කාන්තාවන්ද සිටිය හැකිය. අනවශ්‍ය ආකාරයට පියයුරු තෙරපමින් තිසරපට ඇදීම නිසා හුස්ම ගැනීමට පවා අපහසු වනු ඇත.


මෙම කාරණාවන් නිසා කාන්තාවන් තමන්ගේ තිසරපටය තෝරාගනිද්දී ශරීරයේ ප‍්‍රමාණය, පියයුරුවල පුමාණය මෙන්ම පියයුරුවල හැඩයටත් ගැළපෙන ආකාරයෙන් තිසරපට තෝරා ගැනීම වැදගත්ය. ඒ හැඩය වෙනස් කිරීමට උත්සාහ කිරීම දීර්ඝකාලීනව භයානක ප‍්‍රතිඵලවලට මුල පුරනු ඇත. තිසරපටයේ ඉදිරිපස කප් තුළ ඇති පැඩින් කොටස්වලින් ඔබගේ පියයුරුවලට හෝ තනපුඩුවලට අනවශ්‍ය පීඩනයක් ඇති නොවන තිසරපටයක් තෝරා ගත යුතුය. උරහිසේ සිට පියයුරුවලට තිසරපටය සම්බන්ධ ආධාරකය වන තනපටි උරහිසට හෝ පිටට තද නොවිය යුතුය.


ඔබ වැරදි තනපටියක් ඇද ඇති දැයි පරීක්ෂා කර ගත හැකි ක‍්‍රමවේද ඇත. තිසරපටය දෙපස ඔබගේ කිහිලි ප‍්‍රදේශය ආශ‍්‍රිත කොටසෙන් පියයුරුවල කොටසක් එළියට පැන තිබෙනවාදැයි පරීක්ෂා කළ හැකිය. අත පිට දෙසට යවා ඔබේ තනපටිය අතින් අදින විට එය ඉදිරියට ඇදෙයි නම් ඔබ ඇඳ සිටින්නේ වැරදි තිසරපටයකි. එය පිටුපස කොටස පිට මැද නොරැුඳී උඩට ඇදෙන්නේ නම් ඔබ ඇඳසිටින්නේ ඔබට නොගැළපෙන පියයුරුවලට වඩා ලොකු තනපටියකි. තිසරපටයේ ආධාරක පටි ඔබේ උරහිසට වඩාත් තද වී ඇත්නම් ඔබ ඇද සිටින්නේ පියයුරුවලට වඩා කුඩා තිසරපටයකි.
මේ වෙද්දී වෙළඳපළේ තිබෙන තිසරපට සඳහා අනුමත ප‍්‍රමාණයන් තිබෙන බව සියලූදෙනා දනිති. ඒ ප‍්‍රමාණයන්ට අදාලව පිළිගත් වගුවක් ඇත. එම වගුව අනුව තිසරපටයෙහි ප‍්‍රමාණය හඳුනාගත හැකිය.


ඒ විධිමත් ප‍්‍රමාණය අනුව තිසරපටයක් මිලදී ගැනීමට නම් මුලින් කළ යුත්තේ තමන්ගේ පියයුරුවල විශාලත්වය මැන ගැනීමය. තිසරපටයෙහි බඳවටෙහි දිග වන්නේ එම දිග ප‍්‍රමාණයයි. උදාහරණයකට යම් පුද්ගලයෙකුගේ එම දිග සෙන්ටිමීටර් 34ක් යැයි සිතමු. ඇය තෝරාගත යුත්තේ සෙන්ටිමීටර් 34ක තිසරපටයකි.


ඉන්පසුව තිසරපටයෙහි ‘කප්’ එකෙහි ප‍්‍රමාණය හඳුනාගත යුතුය. ඒ සඳහා ඉදිරියට පහත් වී පියයුරු පහළට එල්ලා වැටෙන්නට සලස්වා පිටේ සිට එල්ලා වැටෙන පියයුරුවල කෙළවර දක්වා සම්පූර්ණ වට ප‍්‍රමාණය මැනගත යුතුය. එම දිග සෙන්ටිමීටර් 41ක් යැයි සිතමු.


ඒ අනුව දෙවැනි දිගෙන් පළවැනි දිග අඩු කරගත යුතුය. අප දැක්වූ උදාහරණ අනුව සෙන්ටිමීටර් 41න් සෙන්ටිමීටර් 34 අඩු කරගත යුතුය. උදාහරණය අනුව ලැබෙන පිළිතුර හතකි.


අප ඉහත කී වගුවෙහි 1 සිට 21 දක්වා ප‍්‍රමාණයන් ඇත. ඒ ඒ ප‍්‍රමාණයන් අනුව තෝරාගත යුතු ‘කප්‘ එකෙහි ප‍්‍රමාණය වගුවෙහි සඳහන්ය. ඒ අනුව ඔබේ තිසරපටය තෝරාගත හැකිය.


බොහෝ කාන්තාවෝ තිසර පට තෝරාගැනීමේදී තමන්ගේම පියයුරුවල ප‍්‍රමාණය හෝ හැඩය ගැන තමන්ටම ඇති හැඟීම අනුව තිසරපට තෝරාගනිති. තමන්ට උපතින් ලැබුණු පියයුරුවල හැඩය විකෘති කරමින් තිසරපටයක් ඇඳීමට උත්සාහ කරති. අතැම් කාන්තාවන්ට පියයුරු විශාල කර පෙන්වීමටත්, තවත් කෙනෙකුට ඒවා කුඩා කර පෙන්වීමටත් අවැසි වෙයි. ලංකාවේ කාන්තාවන් නම් පියයුරුවල හැඩය වෙනස් කිරිමට උත්සාහ කරන්නේ සංස්කෘතිකමය වශයෙන් ඇතැම් අයගේ චින්තනයෙහි පටු බව නිසාය.
එහෙත් ඒ ආකාරයෙන් තමන්ට උපතින් ලැබුණු පියයුරුවල හැඩය විකෘති කිරීමට උත්සාහ කිරීමෙන් දීර්ඝකාලීනව භයානක ප‍්‍රතිඵල ඇතිවිය හැකි බව තේරුම් ගත යුතුය. බාහිර මිනිසුන්ගේ ආකල්ප ගැන බිය නොවී, තමන්ගේ ශරීර අවයවයක් වන පියයුරුවල ආරක්ෂාව ගැන කල්පනා කිරීමට කාන්තාවන් සැලකිලිමත් වීම වැදගත්ය.

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි