No menu items!
22.3 C
Sri Lanka
29 March,2024

තෝරා ගත යුත්තේ මරණ දඬුවම අහෝසි කරන අපේක්‍ෂකයා ය

Must read

ජනාධිපතිවරණ අපේක්‍ෂකයන් මත්ද්‍රව්‍ය උවදුර මඬින බවටත්, මත්ද්‍රව්‍ය ජාවාරම්කරුවන්ට මරණ දඬුවම දෙන බවටත් පොරොන්දු විය යුතුයැ’යි ජනාධිපති මෛත්‍රීපාල සිරිසේන කියා තිබේ.

ඔවා දෙනු පරහට- තමා සම්මතෙහි පිහිටා සිට යැ’යි කතාවක් තිබේ. ඒ අනුව, ජනාධිපතිවරයා මේ උපදෙස් දෙන්නේ තමා දුන් පොරොන්දු ඉටුකර දැ’යි ප්‍රශ්න කළහොත්, උත්තරය හාස්‍යයකට වඩා භීතියක් නිර්මාණය කරනු ඇත. 2015දී තමා දුන් සකලවිධ පොරොන්දු ඔහු කැඩුවා පමණක් නොව, එහි ප්‍රතිඵලය ලෙස රට බලවත් ව්‍යාකුල තත්ත්වයකට ඇද දමා ද ඇති නිසා ය. එහෙව් කම්මුතුකාරයෙකි, මේ අනුන්ගෙන් පොරොන්දු ගන්න යන්නේ.

ජනාධිපතිවරණ අපේක්‍ෂකයන් පොරොන්දු වුණා හෝ නැතා හෝ මත්ද්‍රව්‍ය ජාවාරම, පාවිච්චිය මර්දනය කළ යුතු ය. එය අලුතෙන් පොරොන්දු වෙන්නට වත් තරම් දෙයක් නොවේ. ජනාධිපතිවරණයට ඉදිරිපත් වන දේශපාලකයන් මතු නොව, හැම පුද්ගලයකු ම සතු මග හැරිය නොහැකි දෛනික වගකීමක් හෙයිනි.

එහෙත්, මරණ දඬුවම ක්‍රියාත්මක කිරීමට ජන වරමක් පතන කිසිදු අපේක්‍ෂකයකුට ඡන්දය නම් දිය යුතු නැතෟ

එවැන්නකු ළංවන්නේ මනුෂ්‍යයකුට නොව, අතීතයේ විසූ ගෝත්‍රිකයකුට නිසා ය. එවැනි ගෝත්‍රිකයකු රටේ ජනාධිපති පදවියට කිසි සේත් පත් කර ගත යුතු නැත. 2015 වන විට, තමා මරණ දඬුවම ක්‍රියාත්මක කරනවා යැයි පොදු අපේක්‍ෂක මෛත්‍රීපාල සිරිසේන කීවේ නම්, අද ඔහු ජනාධිපති පුටුවේ නැත.

ජනාධිපති සිරිසේන මරණ දඬුවම යළි ක්‍රියාත්මක කරන්නට ගොස්, රට තුළත්, ජාත්‍යන්තරවත් තෙමේ ම අවමානයට අපවාදයට පත් වුණා පමණක් නොව, ශ්‍රී ලංකාව රටක් හැටියට ජාත්‍යන්තර සමාජයේ ද කොන් වන තැනට වැඩ සැලසුවේ ය. තමාගේ මිනිස් ඝාතන ක්‍රියාන්විතයට එරෙහි ව, මානව අයිතිවාසිකම් හා ශිෂ්ටත්වය වෙනුවෙන් අදහස් පළ කළ යුරෝපා සංගමය, ශ්‍රී ලංකාවට තර්ජනය කරන බවට බොරු ප්‍රවාදයක් ද ඔහු ජනගත කරන්නට වෑයම් කෙළේ ය.

එහෙත්, තවමත් රටේ නීතියේ ආධිපත්‍යය පවතින හෙයින්, ශ්‍රේෂ්ඨාධිකරණය ජනාධිපතිවරයාගේ අපරාධකාරී මනසට තිරිංග යොදමින්, ඔක්තෝබර් මාසය දක්වා මරණ දඬුවම ක්‍රියාත්මක කිරීම අත්හිටුවූයේ ය. රටේ වාසනාවකට, ඒ කාලය වන විට ජනාධිපති සිරිසේන දේශපාලන වශයෙන් අවලංගු වන කාසියක් බවට පත් වන්නේ ය. තමාට ඡන්දය දුන් මහා ජන සන්නිපාතයක් පාවා දුන් පුද්ගලයා හැටියට ඔහුට ඉතිහාස ගත වන්නට සිදු වන්නේ ය. ශ්‍රේෂ්ඨාධිකරණය එම ගෞරවාන්විත නියෝගය නිකුත් නොකරන්නට, ලංකාව අද තිබෙන්නේ, නීති විරෝධී ලෙස, කිසි ම සාධාරණ නිර්ණායකයක් නැති ව, තෝරා ගත් තුන් හතර දෙනකු එල්ලා මැරූ ම්ලේච්ඡයන්ගේ රටක තත්ත්වයේ ය.

දැන් මරණ දඬුවම ලංකාවේ නීති පොතෙන් ඉවත් කිරීම සඳහා පාර්ලිමේන්තුවට පනත් කෙටුම්පතක් ඉදිරිපත් ව තිබේ. ඊට එරෙහි ව කිසිවෙකු අධිකරණයට ගියේ නැත. එම පනත් කෙටුම්පත ආණ්ඩුක්‍රම ව්‍යවස්ථාවට අනුකූලයැ’යි ප්‍රකාශ කරන ලෙස ඉල්ලා ඉදිරිපත් කළ පෙත්සම් තුනක් පසු ගිය සතියේ ශ්‍රේෂ්ඨාධිකරණය නිෂ්ප්‍රභ කෙළේ ය. පනත් කෙටුම්පතක්, ආණ්ඩුක්‍රම ව්‍යවස්ථාවට අනුකූල යැ’යි ප්‍රකාශ කිරීමට බලයක් තමන්ට නැතැ’යි එහි දී ශ්‍රේෂ්ඨාධිකරණය කීවේ ය.

දැන්, මරණ දඬුවම නීති පොතෙන් ඉවත් කිරීම සඳහා වන පනත් කෙටුම්පත පාර්ලිමේන්තුවේ සම්මත කිරීම සඳහා කිසිදු බාධාවක් නැත. පෞද්ගලික ව මන්ත්‍රීවරයකු විසින් ඉදිරිපත් කරන ලද නමුත්, ආණ්ඩුවේ සහාය ඒ සඳහා ලබා දී, එම පනත් කෙටුම්පත වහා ම සම්මත කළ යුතු ය. ඊට එරෙහි වන්නට විපක්‍ෂයටවත්, අන් කවරකුටවත් හැකියාවක් තිබෙන්නට නොහැකි ය. මරණ දඬුවම එතරම් ම ම්ලේච්ඡ දඬුවමක් වන හෙයිනි. මිනිසුන් මරා දමා ප්‍රශ්නවලට විසඳුම් සෙවිය හැකි නොවන හෙයිනි.

එහෙත්, ඒ පනත් කෙටුම්පතට එරෙහි එක් පුද්ගලයෙක් සිටියි. ඒ ජනාධිපති සිරිසේන ය. ඔහු කියන්නේ පනත් කෙටුම්පත පාර්ලිමේන්තුවේ සම්මත වන දා ඔහු ජාතික ශෝක දිනයක් ප්‍රකාශයට පත් කරන බව ය. මිනිසුන් මරා දැමීම වළක්වන නීතියක් සම්මත කරන විට එය ජාතියේ ශෝක දිනයක් වන්නේ කෙසේ දැයි ජනාධිපතිතුමා කරුණු සහිත ව මහජනතාව ඉදිරියේ පැහැදිලි කළ යුතු ය. අඩු ගණනේ මරණ දඬුවම නිසා අපරාධ අඩු වන ආකාරය වත්, ඔහු මාධ්‍ය ඉදිරියට පැමිණ පිළිගත හැකි සාක්‍ෂි යොදා ගනිමින් පැහැදිලි කළ යුතු ය. ඒ කිසිවක් නැති ව මයික්‍රෆෝනයක් ඉදිරියට ගොස්, හිතුමනාපේ මානව ශිෂ්ටත්වයට එරෙහිව ප්‍රකාශ කරන විට, එය ජනාධිපතිවරයකුට නම් නොගැළපෙන බව කනගාටුවෙන් වුවත් කිව යුතු ය.

අතීතයටත් බලපාන සේ මරණ දඬුවම ලංකාවේ නීතියෙන් ඉවත් කෙරෙන පනත් කෙටුම්පත ඉක්මනින් සම්මත කරනු ඇතැ’යි නැවතත් අපි බලාපොරොත්තු වෙමු. මේ අවස්ථාවේ දී සිරිසේන ජනාධිපතිතුමාට අප ස්තුතිවන්ත විය යුත්තේ මෙතෙක් කල් කළ නොහැකි ව තිබුණු, මරණ දඬුවම නීතියෙන් ම ඉවත් කරන්නට පෙර මඟ සැලසීම ගැන ය.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි