කැබිනට් නොවන අමාත්‍ය හර්ෂ ද සිල්වා
ජනාධිපතිවරයා මරණ දඬුවම ක‍්‍රියාත්මක කරන බව කියා තිබෙනවා. ඔබ මරණ දඬුවමට විරුද්ධයි නේද?
පුද්ගලිකවත් විරුද්ධයි. ප‍්‍රතිපත්තිමය වශයෙනුත් විරුද්ධයි. ඇත්තවශයෙන්ම ඔය මරණ දඬුවමේ ප‍්‍රශ්නය තියෙන්නේ සමහර වෙලාවට වැරදි නොකරපු මිනිස්සුන්ටත් මරණ දඬුවම ලබාදීලා තියෙනවා. එහෙම දේවල් වෙන්නත් ඉඩ තියෙනවා. එහෙම වරදින්නට නොයෙකුත් හේතු තියෙනවා. දේශපාලන හේතු වෙන්න පුලූවන්. අධිකරණයක අඩුපාඩු වෙන්න පුලූවන්. පෞද්ගලික හේතුවක් වෙන්න පුලූවන්. විවිධ හේතු නිසා වැරදි පුද්ගලයන්ට දඬුවම් ලැබෙනවා. සමහරු කියනවා මරණ දඬුවම නිසා මිනිස්සු වැරදි කරන එක අඩුවේවි කියලා. ඒත් මගේ ට්විටර් ගිණුමේ මම බෙදාගෙන තියෙනවා මරණ දඬුවම ගැන අලූතෙන්ම කරලා තියෙන පුලූල් පරීක්ෂණයක ප‍්‍රතිඵල. ඒකෙන් බලලා තියෙන්නේ මරණ දඬුවම තියෙන රටවල් 12ක ඝාතන සිදුවීම් ප‍්‍රමාණය. රටවල් 11ක මරණ දඬුවම දැම්මාට පස්සේ ඝාතන අපරාධ ප‍්‍රතිශතය අඩුවෙලා නැහැ. වැඩිවෙලා. මේ පරීක්ෂයේ තියෙන්නේ කාගෙවත් පෞද්ගලික අදහස හෝ මතුපිට නිරීක්ෂණයක් නෙවෙයි. මගේ ට්විටර් ගිණුමට ගියොත් ඒ සම්පූර්ණ සමීක්ෂණයේ ප‍්‍රතිඵලය බලන්න පුලූවන්. ඒ වගේම තමයි ඇමෙරිකාවේ සමහර ප‍්‍රාන්තවල මරණ දඬුවම තියෙනවා. සමහර ප‍්‍රාන්තවල නැහැ. මරණ දඬුවම තියෙන ප‍්‍රාන්තවල අපරාධ අනුපාතය මරණ දඬුවම නැති ප‍්‍රාන්තවල අපරාධවලට වඩා අඩුවෙලා නැහැ. ඒකේ අනෙක් පැත්ත තමයි වෙලා තියෙන්නේ. එතකොට මරණ දඬුවම ගෙන එන එක සාධාරණීකරණය කරන්න පාවිච්චි කරන හේතුව බොරුවක්. ව්‍යාජ හේතු මත තමයි මරණ දඬුවම ගේන්නේ. දේශපාලනය කරන්නට මරණ දඬුවම පාවිච්චි කරන්න හොඳ නැති බව තමයි මේවා සලකා බලද්දී මගේ අදහස. මම කියන්නේ මරණ දඬුවම දෙනවානම් ගොඩක් රටවල සමාව දීමේ හැකියාවක් නැහැ. දැන් තියෙන තත්වය අනුව බරපතල අපරාධවලට මරණ දඬුවමට අත්සන් කරන ජනාධිපතිවරයාම අනෙක් පැත්තට මරණ දඬුවම හිමිවූ අයගේ දඬුවම් ලිහිල් කරනවා. සමහර සිරකරුවන්ව ජනාධිපතිවරයා නිදහස් කරනවා. එතකොට මේ දෙපැත්තේම බලය ජනාධිපතිවරයාට තියෙනවා. ඒ අනුව ජනාධිපතිවරයාගේ හිතුමතයට අනුව මිනිස් ජීවිත ගැන තීන්දු ගන්න පුලූවන්. ජනාධිපතිවරයා කොහොමද එක් අපරාධකරුවෙක්ව නිදහස දෙන අතරේ තවත් අපරාධකරුවෙක්ව එල්ලන්නේ. එතැන පරස්පරයක් තියෙනවා.
පාර්ලිමේන්තුව තමයි නීති සම්පාදනය කරන්නේ. පාර්ලිමේන්තුවට මරණ දඬුවම ඉවත් කිරීමේ හැකියාවක් තියෙනවා නේද?
ඒකට යම් ඉඩකඩක් තියෙනවා. මරණ දඬුවම දැන් පහුගිය අවුරුදු 40කට වැඩි කාලයක් තිස්සේ ක‍්‍රියාත්මක වෙලා නැහැනේ. ඒත් අපේ නීතිපොත්වල මරණ දඬුවම තියෙනවා. ඒ නිසා ඒ කාලසීමාව ඇතුලේ මරණ දඬුවම නියම වූ අය ඉන්නවානෙ. දැන් මරණ දඬුවම ක‍්‍රියාත්මක කරන්න ලේසි නැහැ. ජනාධිපතිවරයාම ඒකට අත්සන් කරන්න ඕනෑ. ඒත් මරණ දඬුවම නියම වී තිබෙන අය ගැන ජනාධිපතිවරයාට තමයි බලය තියෙන්නේ.
සමාජය ආපස්සට ඇදගෙන යන තීන්දු හා දේශපාලන අදහස් ජනප‍්‍රිය වේදිකාවල ප‍්‍රකාශයට පත්කිරීම ලංකාවේ දේශපාලන සංස්කෘතියේ තියෙන නරක සම්ප‍්‍රදායක් නේද?
ඒක තමයි ලොකුම ප‍්‍රශ්නය. දේශපාලන ක‍්‍රියාවලිය තුළ තමයි මේවා එන්නේ. උදාහරණයක් හැටියට මට මතකයි මඩු වලිගයකින් ගහන කතාවක් ජනාධිපතිවරයා කීවා. ප‍්‍රසංගයකින් පස්සේ. ඒ ප‍්‍රකාශයෙන් ඔහු උත්සාහ කළේ ඔහුගේ පෞද්ගලික සදාචාරවාදී ආකල්ප සමාජයට ඉදිරිපත් කරන්න උත්සාහ කිරීමයි. ඊට පස්සේ කඩුවක් අරගෙන කුඩුපට්ටම් වෙන්න වනන බව කීවා. දැන් එල්ලලා මරණ බව කියනවා. කලින් නම් මේ සම්බන්ධයෙන් කතාකරද්දී යම්කිසි අවංක අරමුණක් තියෙන්න ඇති. දැන් නම් මට පෙනෙන විදියට මේක සම්පූර්ණයෙන්ම දේශපාලන වැඩපිළිවෙලක්. ජාතිවාදය ගැන කතාකරන දේශපාලඥයන් ගැනත් කියන්න තියෙන්නේ ඒකයි. ඇත්තටම අපි ජනාධිපතිවරයා ගැන කතාකරමින් හිටපු නිසා මේක කියලා ඉන්නම්. ජනාධිපතිවරයා ජාතිවාදී කතා කියන බව මම හිතන්නේ නැහැ. මම ඔහුට ජාතිවාදී ලේබලය අලවන්න කැමති නැහැ. කොහොම වුණත් ලංකාවේ ජාතිවාදී කතා පවත්වන දේශපාලඥයන් ඉන්නවානේ. ඔවුන් ජාතිවාදය කෙටිකාලීනව දේශපාලන වාසිවලට පාවිච්චි කරනවා. ඒ නිසා ගෝත‍්‍රිකවාදී කතා එන්න එන්නම වැඩිපුර ඇහෙනවා.
ප‍්‍රතිපත්තිමය වැදගත්කමක් නැති එවැනි ජනප‍්‍රිය ප‍්‍රකාශ කරන පුද්ගලයන් එක්සත් ජාතික පක්ෂයේ ඉහල තැන්වල ඉන්න බව ඔබ පිළිගන්නවාද?
සාපේක්ෂව අපේ පක්ෂය ඇතුලේ ඔයවගේ අදහස් තියෙන අය අඩුයි. මම ඒක කියන්නේ අනෙක් පක්ෂවලට සාපේක්ෂවයි. අපේ පක්ෂයේ නිදහසේ හිතන්න පුලූවන් කණ්ඩායමක් කාලයක් තිස්සේ එකතුවෙලා හිටියා. ඒත් දැන් දැන් සමහර පුද්ගලයෝ ගෝත‍්‍රිකවාදී, ජාතිවාදී කතා කියනවා ඇහිලා තියෙනවා. ඒත් සංසන්දනය කළොත් අපේ පක්ෂයේ එවැනි පුද්ගලයෝ අඩුයි.
කෙසේ වෙතත් පොදුවේ ගත්තාම පටු අදහස්, මිත්‍යා විශ්වාස, ව්‍යාජ අලංකාරික වගේ දේවල් දේශපාලන සංස්කෘතියෙන් තුරන් කිරීම ලොකු අභියෝගයක් නේද?
අපිට මිනිස්සුන්ව මෝඩයාව අන්දන්න ලේසියි. බොරු කියලා, බය කරලා, අවුස්සලා, ප්‍රෝඪාකාරී ලෙස තමන්ගේ අරමුණු ඉෂ්ඨ කරගන්න මිනිස්සු ඉන්නවා. ඒ වගේ අය එන්න එන්නම වැඩිවෙන බවයි මටනම් පේන්නේ. සමහර වෙලාවට අමූලික බොරු ගොතලා කියනවා. ඉන්පස්සේ ඒවා දේශපාලන වේදිකාවලත්, සමාජ මාධ්‍යවලත් ප‍්‍රචාරය කරනවා. ඒවා සමාජගත කරනවා. මේ කියන්නේ බොරු කියලා දැන දැනම ඇත්තක් වගේ ඉදිරිපත් කරනවා. උදාහරණයක් හැටියට මිලේනියම් චැලේන්ජ් එකෙන් ඉඩම් අක්කර ලක්ෂ දෙකක් කොළඹ ඉඳලා ත‍්‍රිකුණාමලයට ඇමෙරිකාවට දෙනවාය කියන එක මහා විශාල අමූලික බොරුවක්. කිසිම තැනක එහෙම දෙයක් නැහැ. ඒත් මිනිස්සු අතරේ සමාජගත කරන්න යන්නේ මිලේනියම් චැලේන්ජ් කෝපරේෂන් එකෙන් ඉඩම් විකුණන බව. එහෙම හිතන්න ඉඟියක්වත් කොතැනකවත්ම නැහැ. මේක සම්පූර්ණයෙන්ම ගෙතූ ප‍්‍රබන්ධයක්.
එජාප ආණ්ඩුව කියූ විදියට එය ලංකාවට ලැබුණු ලොකුම ප‍්‍රදානයක්. එහෙත් විපක්ෂය කියන්නේ එහි තොරතුරු විනිවිදභාවයකින් තොර බවයි…
මේක ලංකාවට ලැබුණු ලොකුම ප‍්‍රදානයක්. ඇත්තටම 2002 දී විතර තමයි මුලින්ම ඕක ගන්න උත්සාහ කළේ. ඒත් ආණ්ඩුව මාරුවුණා. රාජපක්ෂ ආණ්ඩුව ඒක ගන්නට උපරිම උත්සාහ කළත් ලැබුණේ නැහැ. ඉන්පස්සේ ආණ්ඩුව මාරුවුණාට පස්සේ තමයි මේක ලැබුණේ. මේක සම්පූර්ණයෙන්ම ප‍්‍රදානයක්. ඒ පිළිබඳව කිසිම තොරතුරක් අපි හංගලා නැහැ. ඒ ප‍්‍රදානය සම්පූර්ණයෙන්ම විවෘතයි. ඒත් අපේ මිනිස්සු ඒවා කියවන්නේ නැහැ. අපි බොරු ප‍්‍රචාර පිළිගන්න රටක්නෙ. ගැඹුරක් නැති දේවල්වලට ඇහුම්කන් දෙන රටක්නෙ මේක. ඉතින්, මේ වගේ ව්‍යාජ ප‍්‍රකාශවලට වටිනාකමක් ලැබෙනවා.
කොහොම වුණත් ආණ්ඩුව, විපක්ෂය භේදයක් නැතිව වැරදි මත සමාජගත කරනවා. ජනාධිපතිවරයා මරණ දඬුවමෙන් අපරාධ නවත්වන බව කියනවා වගේම පදනමක් නැති කතා නිතර ඇහෙන්න ලැබෙනවා. මෑත කාලයේදී දකින්න ලැබුණු කාරණයක් තමයි එවැනි අදහස්වලට දත්ත හා විද්වත් පෙනුමක් මවා පෙන්වීම. මිත්‍යාවට විද්‍යානුකූල මුහුණුවරක් ලබාදීම අභියෝගයක් විදියට දකිනවාද?
මේක ලොකු අභියෝගයක්. උදාහරණයක් හැටියට මෑත දවස්වල කතාවක් ගියානේ අවුරුදු නවය දක්වා ළමයින්ගෙන් සීයට 51ක් මුස්ලිම් කියලා. මේක අමූලික බොරුවක්. එතකොට ඒ බොරුවට උත්තර දෙන්නේ කොහොමද. කරන්න පුලූවන් දෙයක් තමයි කරුණු පරීක්ෂාව. ඉංග‍්‍රීසියෙන් කියනවා ෆැක්ට් චෙකින් කියලා. මෙවැනි ප‍්‍රකාශයක් කළාම, ඒ ප‍්‍රකාශයේ තියෙන කරුණු ඇත්තද බොරුද කියලා දත්ත ඇසුරෙන් සලකා බලන්න ඕනෑ. දත්තවලට අභියෝග කරනවානම් දත්තවලින්ම පිළිතුරු ඉදිරිපත් කරන්න ඕනෑ. ආණ්ඩුවට තියෙන අභියෝගයක්. ආණ්ඩුව ඒකට මුහුණදෙන්න ඕනෑ. උදාහරණයක් විදියට ජන හා සංඛ්‍යාලේඛණ දෙපාර්තමේන්තුවට අදාලව බොරු ප‍්‍රකාශයක් කළොත්, ඒ දෙපාර්තමේන්තුවෙන් තමයි උත්තර දෙන්න ඕනෑ. මම යෝජනා කළ මුස්ලිම් සිංහල දරු උපත් ගැන සැබෑ දත්ත ජන හා සංඛ්‍යාලේඛණ දෙපාර්තමේන්තුවෙන් ඉදිරිපත් කරන්න කියලා. සති දෙකක් ඇතුලත ඒ දත්ත ඉදිරිපත් කරනු ඇති. මේ නිශ්චිත සිද්ධියේදී එහෙම වෙනවා. පොදුවේ ගත්තාම විශ්වවිද්‍යාල, මාධ්‍ය, රාජ්‍ය ආයතන මේ වගේ ව්‍යාජ ප‍්‍රකාශ ගැන සැලකිලිමත් වෙමින් සැබෑ කරුණු ඉදිරිපත් කරන්න ඕනෑ.
එජාපය ගැන මොන විවේචන තිබුණත් මෑත ඉතිහාසයේ එජාපය තුළ නවීන සමාජයක් අගය කරන ප‍්‍රවණතා යන්තමින් හෝ තිබුණු බව කල්පනා කරන පුරවැසියෝ ලංකාවේ ඉන්නවා. එහෙත් දැන් ඔවුන් හිතන්නේ එජාපය දැන් සිටින තැනින් නවීන සමාජයක් කරා ඉදිරියට යනවා වෙනුවට ආපස්සට ගමන් කරනු ඇතිද කියායි. ඊළඟ ජනාධිපතිවරණයට හුදු ජනප‍්‍රියත්වය හොයන පටු අදහස් ඇති අපේක්ෂකයෙක් ඉදිරිපත් වේවිද කියන බයක් ඒ අයට තියෙනවා. ඒ ගැන හිතන්නේ මොකක්ද?
එක්සත් ජාතික පක්ෂය හැමදාම හිටියේත්, ඉදිරියට ඉන්නේත් ඕනෑ කෙනෙක්ව ඇතුලත් කරගැනීමට උත්සාහ කරන පක්ෂයක් ලෙස. කාවවත් බැහැර කරන්න අපි උත්සාහ කරන්නේ නැහැ. මුල සිටම අපේ පක්ෂයේ දෙමළ, මුස්ලිම්, සිංහල නියෝජනයක් තබාගන්නට කටයුතු කරලා තියෙනවා. අදටත් එහෙමයි. ගැටලූවක් හැටියට තියෙන්නේ සමහර අවස්ථාවලදී සිංහල බෞද්ධ ජනතාවට එක්සත් ජාතික පක්ෂයෙන් කුඩම්මාගේ සැලකිල්ලක් තියෙනවාද කියන මතය සමහරු ගොඩනඟන්න උත්සාහ කිරීමයි. එක්සත් ජාතික පක්ෂය ඇතුලේ එහෙම දෙයක් නැහැ. ඒ බව ජනතාව දැනගන්නත් ඕනෑ.
ජනාධිපතිවරණයේ ජයග‍්‍රහණය තීරණය වෙන්නට ඒක ලොකු සාධකයක් බව ප‍්‍රායෝගිකව හිතුවොත් තේරුම් ගන්න පුලූවන් වේවි. සියලූම ජාතීන්ට එක හා සලකනකොට කිසිම වෙලාවක සිංහල බෞද්ධ ජනතාවට අගතියක් වෙන විදියට වැඩකරලා නැහැ. යූඇන්පීය සිංහල බෞද්ධ බහුතරයට විරුද්ධයි කියන ලේබලය අලවාගෙන අපට ඡුන්දය කරන්න බැහැනේ.
සිංහල බෞද්ධයන්ගේ ආකර්ශනය දිනාගැනීමට උත්සාහ කොට ඉදිරියේදී එජාපයේ හැසිරීම් ජාතිවාදී, ගෝත‍්‍රිකවාදී රැුල්ලට මුළුමනින්ම යටපත් වේවිද?
මම කලිනුත් කීවා වගේ එක්සත් ජාතික පක්ෂය තියෙන්නේ එක් පුද්ගලයෙකුගේ අදහස් මත යැපෙන පක්ෂයක් නෙවෙයි. මහින්ද චින්තනය තියෙද්දී ඒකට ගැලපෙන විදියත්, ගෝඨාභය රාජපක්ෂ එනකොට එතැනටත් හැඩගැහෙනවා වගේ එජාපය වෙනස් වෙන්නේ නැහැ. එජාපයේ කණ්ඩායමේ බොහෝ නියෝජනයන් තියෙනවා. අපට හොඳ මිශ‍්‍රණයක් තියෙනවා. එජාපය විවෘත ආර්ථිකය ගෙනාවේ ප‍්‍රතිපත්තිමය හේතුවක් මත. ඒ අනුව ජේ.ආර්. ජයවර්ධන කියන්නේ නායකත්වයක් විතරයි. එතැන හිටපු දක්ෂ කණ්ඩායමට පුලූවන් වුණා තමන්ගේ හැකියාවන් මත ඒ විශාල වෙනස්කම කරන්න. එජාපය 2019 ඡුන්දයට ඉදිරිපත් වෙනකොට දෙවැනි කණ්ඩායමක් ඉන්නවා. මෑතකදී එජාපයට සම්බන්ධ වුණ වෘත්තිකයන් ඉන්නවා. හොරු, මැරයෝ කියලා හංවඩු ගැහුණේ නැති විශාල පිරිසක් ඉන්නවා. ඒ සියලූදෙනාගේ සුසංයෝගයක් හැටියට තමයි අපේ වැඩපිළිවෙල ක‍්‍රියාත්මක විය යුත්තේ කියන එකත්, වෙන්නේ එහෙමයි කියන එකත් අපි ජනතාවට පැහැදිලි කරලා දෙන්න ඕනෑ. මම හිතන්නෙ නැහැ කිසි විදියකටවත් අපි පස්සට යයි කියලා. එක්කෙනෙකුගේ අදහසක් අනෙක් අයගේ අදහස්වලට වඩා උඩින් යයි කියලා මම හිතන්නෙ නෑ.
