No menu items!
19.6 C
Sri Lanka
29 March,2024

තුන්වැනි වරටත් ඇනගන්නද හදන්නේ?

Must read

■ අරුණ ජයවර්ධන

නව අගවිනිසුරුවරයා පත්වුණු පසු, තමාගේ ධුර කාලය වන අවුරුදු පහ ඇරඹෙන්නේ කවදා සිටදැයි ජනාධිපතිවරයා ශ්‍රේෂ්ඨාධිකරණයේ මතය විමසන්නට ඉඩ ඇතැ’යි ශ්‍රී ලංකා නිදහස් පක්‍ෂයේ මහලේකම් දයාසිරි ජයසේකර පැවසුවේය. එහෙත්, පසු ගිය ‘ඉරිදා දිවයින’ පුවත්පතේ ප්‍රධාන සිරස්තලයෙන් කියැවුණේ, එවැනි විමසීමක් කිරීමට ජනාධිපතිවරයා තීරණය කර නැති බවයි.  එහෙත්, අනිද්දා පුවත්පතටද දැනගන්නට ලැබුණු තොරතුරු අනුව, (ඒ ගැන සතියකට පෙර පුවත්පතේ ප්‍රධාන සිරස්තලයෙන්ද හෙළිදරව් කෙරිණ.) තමාගේ අවුරුදු පහක ධුර කාලය පටන් ගන්නේ කවදා සිටදැයි ජනාධිපතිවරයා නැවත විමසන්නට සූදානමක් තිබේ. ඊට හේතුව, අවුරුදු පහක කාලය පටන්ගන්නේ 19 වැනි සංශෝධනය සම්මතවූ පසුවයැ’යි කවුරුන් හෝ ජනාධිපතිතුමාට ‘දිරච්ච ව්‍යවස්ථා ලණුවක්’ දී තිබීමය.

යම් හෙයකින් ජනාධිපතිවරයා එසේ ශ්‍රේෂ්ඨාධිකරණයෙන් විමසන්නේ නම්, අවුරුදු පහක ධුර කාලය තුළ තුන්වැනි වරටත් අධිකරණය ඉදිරියේ සවුත්තු වුණු රටේ එකම ජනාධිපතිවරයා බවට මෛත්‍රීපාල සිරිසේන මහතා පත්වනු ඇත.

පළමුවරට ශ්‍රේෂ්ඨාධිකරණය ඉදිරියේ ජනාධිපතිවරයා සවුත්තු වුණේ,  දිවුරුම් දුන් දවසේ සිට තමාට අවුරුදු හයක් ධුරය දරන්නට හැකිදැයි අසන්නට ගිහින්ය. එහිදී අගවිනිසුරු පියසාත් ඩෙප්, ඊවා වනසුන්දර, බුවනෙක අලුවිහාරේ, සිසිර ද ආබ්‍රැ, කේටී චිත්‍රසිරි යන විනිසුරු මඬුල්ලෙන් සැදි ශ්‍රේෂ්ඨාධිකරණය කිව්වේ, ඔබට ධුරය දරන්නට හැකි කාලය අවුරුදු පහක් පමණක් බවය. (ඒ අවස්ථාවේදී ජනාධිපතිවරයා වෙනුවෙන් පෙනීසිටිමින්, නීතිපතිවරයා තර්ක කළේ ජනාධිපතිවරයාට අවුරුදු හයක කාලයක් ධුරය දැරිය හැකි බවයි. ඒ අවස්ථාවේදී ඔහු ආණ්ඩුක්‍රම ව්‍යවස්ථාවේ ඉතාම පැහැදිලිව තිබෙන කාරණයක් එනම්, ජනාධිපතිට හැකි අවුරුදු පහක් පමණක්ය යන්න, විකෘති කරමින් අධිකරණය ඉදිරියේ කරුණු දැක්වීම නිසා, නීතිපතිවරයකු ලෙස තමාගේ ස්වාධීන භූමිකාව කෙළෙසා ගත්තේයැයි චෝදනා ලැබුවේය.)

ජනාධිපති සිරිසේන දෙවැනි වරට ශ්‍රේෂ්ඨාධිකරණය ඉදිරියේ සවුත්තු වුණේ, ඔක්තෝබර් 26 ව්‍යවස්ථා කුමන්ත්‍රණයෙන් පසු නීති විරෝධී ලෙස පැවැති පාර්ලිමේන්තුව විසුරුවා හරින්නට ගිය විටය. එහිදී ශ්‍රේෂ්ඨාධිකරණය කිව්වේ, අවුරුදු හතරහමාරක් යන තුරු පාර්ලිමේන්තුව විසුරුවා හරින්නට නොහැකි පැහැදිලි වගන්තියක් ව්‍යවස්ථාවේ ඇති නිසා ජනාධිපතිවරයාට විසුරුවා හැරීමේ බලයක් නැති බවය.

මෙලෙස දෙවරක්ම සවුත්තු වුණු ජනාධිපති සිරිසේන, තුන්වැනි වරටත් ශ්‍රේෂ්ඨාධිකරණය ඉදිරියේ සවුත්තු වෙනවාද යන්න තෙමේ ම කල්පනා කළ යුතුය. මන්ද, ජනාධිපතිවරයාගේ ධුර කාලය පටන්ගන්නේ ඔහු දිවුරුම් දුන් දා පටන් බව ඉතාම පැහැදිලි නිසාය. ඔහු දිවුරුම් දුන්නේ එක් වරකි. එනම් 2015 ජනවාරි 9 වැනිදාය. ඔහුගේ ධුර කාලය අවුරුදු පහකි. ඒ ගැන කිසිම අපැහැදිලිකමක් නැත.

මේ ඒ ගැන ජනාධිපති නීතිඥ ආචාර්ය ජයම්පති වික්‍රමරත්නගෙන් විමසූ විට එහු පැහැදිලි කල කාරණාය:

‘දැන් අදහසක් ප්‍රකාශ කරලා තියෙනවා මමත් දැක්කා, ජනාධිපතිවරයාගේ කාලය අවුරුදු පහක් වුණත්, ඒ කාලය ගණන් ගන්න ඕනෑ 19 වැනි සංශෝධනය සම්මත වුණු 2015 ජුනි මාසයේ දිනයක සිටය කියලා. ඒ දක්වලා තියෙන දිනය (ජුනි මාසය)ත් වැරදියි. එයිනුත් පෙනෙනවා, 19 වැනි සංශෝධනය හරියට කියවන්නේවත් නැතිවයි ඒ ප්‍රකාශය කරලා තියෙන්නේ කියලා. 19 වැනි සංශෝධනය පාර්ලිමේන්තුවෙන් සම්මත වුණාට පස්සේ, කතානායකවරයා එයට තමාගේ සහතිකය යොදා තිබෙන්නේ මැයි 15 වැනිදා මිස ජුනි මාසයේ දිනයක නෙවෙයි.

19 වැනි සංශෝධනය සකස් කරනකොටම එකඟත්වයක් තිබුණා, ජනාධිපතිවරයාගේ ධුර කාලය අවුරුදු පහ දක්වා අඩුකරන්නත්, මෛත්‍රීපාල සිරිසේන මහතාට ඒ අවුරුදු පහ සීමාව අදාළ වන බවටත්. එනිසා තමයි 19වැනි සංශෝධනයේ 49 වැනි ව්‍යවස්ථාවට ඇතුළත් කළේ අන්තර්කාල විධිවිධානයක්. ඒ අදාළ කොටස මම කියවන්නම්.

‘49 (1) සැක දුරුකිරීම සඳහා පහත සඳහන් ලෙස ප්‍රකාශ කරනු ලැබේ.

(ආ) 2015 අප්‍රේල් 22වැනි දිනට පෙර පිළිවෙළින් ජනාධිපති ධුරය සහ අග්‍රාමාත්‍ය ධුරය දරන තැනැත්තන් එම දිනෙන් පසු, මෙම පනත මගින් සංශෝධිත ආණ්ඩුක්‍රම ව්‍යවස්ථාවේ විධිවිධානවලට යටත්ව එම ධුර දැරිය යුතු වන්නේය.’

ඒ අනුව පැහැදිලියි, ඔවුන් ධුර දැරිය යුත්තේ 19 වැනි සංශෝධනයට යටත්වය කියලා.

19 වැනි සංශෝධනයෙන් අලුත් ජනාධිපති ධුරයක් ඇතිකළා නම්, අවුරුදු පහ ගණන් ගත යුත්තේ එදා සිටයි. ඒක ඇත්ත. ‘හිටපු ජනාධිපති නව ධුරයේ දිවුරුම් දිය යුතුයි’ ආදි වශයෙන් කියලා තිබුණා නම් ඒක හරි. නමුත් ඉහත ව්‍යවස්ථාවේ ඉතාම පැහැදිලිව කියනවා, ඒ ජනාධිපතිමයි දිගටම ඉදිරියට කටයුතු කරන්නේ කියලා.

ජනාධිපති මෛත්‍රීපාල සිරිසේන මීට ඉස්සෙල්ලාත් ශ්‍රේෂ්ඨාධිකරණයේ මතය විමසුවා. එහිදී විමසුවේ, තමන්ගේ ධුර කාලය අවුරුදු පහද හයද කියලා නෙවෙයි. ඔහු ඇහුවේ, ‘2015 ජනවාරි 9වැනිදා සිට, එනම් දිවුරුම් දුන්න දවසේ සිට, තමාට අවුරුදු හයක් ධුරය දරන්න පුළුවන්ද’ කියලා. ව්‍යවස්ථාවේ සියලු වගන්ති සලකා බලා ශ්‍රේෂ්ඨාධිකරණය උත්තරේ හැටියට කිව්වේ මොකක්ද? මේ 49 වැනි වගන්තිය සමග කියැවිය යුතු 30 වැනි වගන්තිය, (එම 30(2) වගන්තියෙන් අවුරුදු හය, අවුරුදු පහ දක්වා අඩු කළා) අතීතයට බලපාන පරිදි ක්‍රියාත්මක වෙනවා කියලා. එය අතීතයට අදාළ වෙන්නේ, 19 වැනි සංශෝධනයේ 49(1) (ආ) වගන්තිය අනුව බවත් කිව්වා. ඊළඟට කියනවා. මෙය 2015 ජනවාරි 8 වැනි දින තේරී පත්වූ ජනාධිපතිවරයාට බලපායි. ඔහුගේ ධුර කාලය අවුරුදු පහකි යනාදි වශයෙන් ශ්‍රේෂ්ඨාධිකරණ මතයේ අන්තිම ඡේදයේ ඉතාම පැහැදිලිව කියා තිබෙනවා. අපි හිතමු නිකමට 19 වැනි සංශෝධනය සම්මත වුණේ 2016 මැයි මාසයේදීය කියලා. එතකොට අවුරුදු පහ ගණන් ගත යුත්තේ එදා සිට නම්, 2016 මැයි සිට අවැරුදු පහක් ගණන් ගතහොත් ඇතිවන තත්ත්වය මොකක්ද? ඒ අනුව 2021 මැයි වෙනකම් ජනාධිපති සිරිසේනට ධුරයේ සිටිය හැකිද? ඒ කියන්නේ අවුරුදු හයහමාරක්. එනම්, තමා තේරී පත්වුණු අවුරුදු හයටත් වඩා වැඩි කාලයක්. ඒකෙන්ම මේ තර්කය පදනම් රහිත බව හොඳට තේරෙනවා.’■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි