බත්තරමුල්ලේ සිට ජනාධිපති මෛත‍්‍රීපාල සිරිසේන සැහැල්ලූ‍වෙන් ජන රැුලියක් අමතන අන්දම නොවැම්බර් 06 වැනිදා දකින්නට ලැබුණි. කොළඹ සිට මාලඹේ, අතුරුගි රිය, තලවතුගොඩ ඇතුළු ප‍්‍රදේශ රැුසකට ගමන් කරන්නට ඇති මාර්ගයක ප‍්‍රධාන මංසන්ධියක් හරි මැදින් ආවරණය කරගෙන ජනාධිපතිවරයා ජනතාව ඇමතූ එම රැස්වීමෙන් පැය පහ හයක් රස්තියාදු වූ ජනතාව ගැන තැකීමක් ජනාධිපතිවරයාට නොවූ සේය. ඒ ගැන තැකීම කෙසේ වෙතත් තමා විසින් ව්‍යවස්ථා විරෝධී කුමන්ත‍්‍රණයකින් රට අවුලකට පත් කර තිබෙන බවත්. පාර්ලිමේන්තුව කැඳවීම කල් යන තරමට අවුල තවත් අවුල් වන බවත් ඔහුට අමතක වී තිබුණි. ඒ සියල්ලට වඩා ඔහුට අමතක වී තිබුණේ ඔහුගේ හිතුවක්කාර කුමන්ත‍්‍රණය නිසා දැනටමත් ජීවිතයක් රටට අහිමිව තිබෙන බවයි.
ඔක්තෝබර් 28 වැනි ඉරිදා ඛණිජ තෙල් සංස්ථා පරිශ‍්‍රයට ඇතුළු වූ ඛණිජ තෙල් අමාත්‍යවරයා වූ අර්ජුන රණතුංගට මැර ප‍්‍රහාරයකට මුහුණදෙන්නට සිදුවිය. අර්ජුන රණතුංගට පහරදෙන්නට සංවිධානය වෙමින් සිටි ඛණිජ තෙල් සංස්ථාවේ සේවකයන් සහ සේවකයන් නොවන කණ්ඩායමක් වෙත අර්ජුන රණතුංග අමාත්‍යවරයාගේ ආරක්ෂක නිලධාරියෙකු විසින් වෙඩි තබා තිබුණි. මෛත‍්‍රීපාල සිරිසේන ජනාධිපතිවරයා ඇති කළ නීතිවිරෝධී ආණ්ඩුව විසින් ජීවිතයක් බිලිගෙන තිබුණි.
වෙඩි තැබූ ඇමති ආරක්ෂක නිලධාරියා අත්අඩංගුවට ගත්තේය. කොළඹ අපරාධ කොට්ඨාසය විසින් පසුදිනම අර්ජුන රණතුංග අමාත්‍යවරයාද අත්අඩංගුවට ගෙන තිබුණි. එදිනම ඇමතිවරයාට ඇප ලබාදුනි. මේ සිදුවීම් ජනතාව දැක්කේ මාධ්‍ය හරහාය.
ප‍්‍රධාන රූපවාහිනී නාලිකා සියල්ලේම පාහේ ඔක්තෝබර් 28 වැනිදා ප‍්‍රධාන ප‍්‍රවෘත්තිය ලෙස වෙඩි තැබීමේ සිදුවීම වාර්තා කර තිබුණි. පුවත්පත් ද එසේමය. ඒ පුවත් අතරින් අතිබහුතරයක ඛණිජ තෙල් සංස්ථාවේ සේවකයන්ගේ අදහස් දැක්වීම් වාර්තා කර තිබුණි. ‘අර්ජුන වෙඩි තියපන් කිව්වා. එතකොට වෙඩි තිබ්බා.’ සේවකයන් ඇසින් දුටුවාක් සේ කියන අන්දම මාධ්‍ය වාර්තා කර තිබුණි. ‘අර්ජුන බල්ලෙක්ට වගේ වෙඩි තියනවා.’ තවත් කෙනෙකු කියන අන්දමද මාධ්‍ය වාර්තා කර තිබුණි. ඊට අමතරව උසස් පොලිස් නිලධාරියෙකු එතැන සිටි බවත්, ඒ පොලිස් නිලධාරියා එපායැයි කියද්දී වෙඩි තැබූ බවත් මාධ්‍ය හරහා වාර්තා කළ අදහස් දැක්වීම්වල ඇතුළත් විය.
එහෙත් අර්ජුන රණතුංග අමාත්‍යවරයා මාධ්‍ය සාකච්ඡුාවක් පවත්වමින් කියා තිබුණේ වෙඩි තැබීම සිදුවූ මොහොතේ තමන් එතැන නොසිටි බවය. එහෙත් ඒ අදහස් දැක්වීම් පළවී නොතිබුණි. අර්ජුනගේ අදහස් දැක්වීම්වලට ලැබුනේ පුංචි ඉඩකි. දෙරණ, ජාතික රූපවාහිනිය වැනි නාලිකා අර්ජුන රණතුංගගේ කතාවෙන් කොටසක් පමණක් වාර්තා කර තිබුණි. ඒ සිදුවීම වූ මොහොතේ තමන් එතැන නොසිටි බව කියැවෙන කොටස නොවේ. නව ඇමතිවරයෙකු පත් කළහොත් ඒ ඇමතිවරයාට අමාත්‍යාංශය බාරදිය යුතු නිසා බඩු බාහිරාදිය ඉවත් කරගැනීමට තමන් එහි ගිය බව කියැවෙන කොටසය. නව ආණ්ඩුවේ නීත්‍යනුකූලභාවය අර්ජුන භාර ගත්තායැයි ඉස්මතු කිරීම මේ ඛේදවාචකය මැද ඒ නාලිකාවල වුවමනාව විය.
ඒ සියල්ලට අමතරව ඛණිජ තෙල් සංස්ථාවේ කලබලය ආරම්භ කළේ කවුද යන්නත්, ආයුධ රැුගත් මැරයන් එතැන සිටි බවත්, ඛණිජ තෙල් සංස්ථාවේ සේවය නොකළ අයද සිටි බවත්, මේ සිදුවීම්වලට කිසිදු අදාලත්වයක් නැති පොදුජන පෙරමුණේ නාගරික මන්ත‍්‍රීවරයෙකු වන කුලතිස්ස ගීගනගේ නමැත්තාද එතැන සිටි බවත් බොහෝ මාධ්‍ය විසින් වාර්තා කර නොතිබුණි.
අවසානයේදී රූපවාහිනී ප‍්‍රවෘත්ති නාලිකා අතරින් බහුතරය නැරඹූ පේ‍්‍රක්ෂකයන්ට ලැබුණු ප‍්‍රවෘත්තිය වුණේ අර්ජුන රණතුංග නව ආණ්ඩුව නීත්‍යනුකූල බව පිළිගත් බවත්, ඔහු ඒ අනුව තමන්ගේ බඩු බාහිරාදිය ඉවත් කරගැනීමට ඛණිජ තෙල් සංස්ථාවට ගිය බවත්, එයට සේවකයන් පිරිසක් විරෝධය දක්වා ඇති බවත්, සේවකයන්ගේ විරෝධය වැඩි වෙමින් අර්ජුන රණතුංග අසලට විරෝධතාකරුවන් ළං වෙද්දී අර්ජුන රණතුංග වෙඩි තැබීමට උපදෙස් දුන් බවත්ය. වෙඩි තබද්දී ඉහළ පොලිස් නිලධාරියෙකු වෙඩි නොතබන්නැයි කෑ ගැසූ බවත්, ඒ වෙද්දීත් උසස් පොලිස් නිලධාරියා සිදුවීම පාලනය කර තිබුණු බවත් එසේ තිබියදීත් වෙඩි තැබීම සිදුවූ බවත්ය.
මේ සිදුවීම් අස්සේ ෆෙස්බුක්හි හිටි විචාරකයන්, වාමාංශිකයන් කීවේ ආරක්ෂාව පිළිබඳ ප‍්‍රශ්නයක් ඇතොත් පහළට වෙඩි තැබිය යුතු බවය. පපුවට වෙඩි තැබීම වරදක් බවය. ඒ නිසා අර්ජුන රණතුංගගේ ආරක්ෂකයන් බරපතළ වැරැුද්දක් කර ඇති බවය.
නොවැම්බර් 03 වැනිදා සිදුවීමට අදාළ සී.සී.ටී.වී. දර්ශන ලැබී තිබුණි. ටී.එන්.එල්. නාලිකාව හැර අන් කිසිදු ප‍්‍රධාන ප‍්‍රවෘත්ති නාලිකාවක් එම සී.සී.ටී.වී. දර්ශනවලින් පැහැදිලි වුණ කාරණා පිළිබඳව නිසි පුවතක් ඉදිරිපත් කර නොතිබුණි. ඒ නිසා රටේ බහුතරයක් ජනතාව තවමත් විශ්වාස කරන්නේ ඉහතින් කී ප‍්‍රවෘත්තිවල පළවූ කාරණාමය.
කෙසේ වෙතත් සී.සී.ටී.වී. දර්ශනවලින් පැහැදිලිව පෙනෙන්නට තිබුණේ අර්ජුන රණතුංග සිදුවීම වූ මොහොතේ එතැන නොසිටි බවයි. කුලතිස්ස ගීගනගේ නම් නාගරික මන්ත‍්‍රීවරයා ඇතුළු පිරිසක් සිදුවීමට පෙර එතැනට පැමිණ අර්ජුන රණතුංගට පහරදෙන්නට උත්සාහ කරන අන්දම පැහැදිලිව සී.සී.ටී.වී. කැමරාවල සටහන් වී තිබුණි. ඉන්පසුව පිටතට යන ඒ කණ්ඩායම නැවත පැමිණෙන අන්දමද සටහන් වී තිබුණි. නැවත පැමිණෙන්නේ ක‍්‍රිකට් පිති ඇතුළු ආයුධත් සමගය. ඉන්පසුව එක් ආරක්ෂකයෙකුට මුලින්ම පහර එල්ලකරයි. ඉන්පසුව අර්ජුන රණතුංග සමග පැමිණි කණ්ඩායමේ සිටි තවත් ආරක්ෂකයෙකුට පහරදෙයි. වෙඩි තැබීම කළ නිලධාරියාටද පහරදෙන අතර තුවක්කුව උදුරාගන්නට උත්සාහ කරන අන්දමත් ඒ සමගම වෙඩිතැබීම සිදුවන අන්දමත්, බියට පත් ආරක්ෂකයා තමන්ට පහරදෙන්නට උත්සාහ කළ අය දෙසට තුවක්කුව එල්ල කරගෙනම ආරක්ෂක ස්ථානයකට යන අන්දමත් සී..සී.ටී.වී. කැමරාවල සටහන්වී තිබුණි.
වෙඩි තැබීමේ සිදුවීමකදී වෙඩි තබන්නන් වෙනුවෙන් පෙනී සිටීම අපට පුරුදු කාරණයක් නොවේ. එසේ පෙනී සිටීමේ අවශ්‍යතාවක්ද අපට නැත. එහෙත් ලංකා ඛණීජ තෙල් සංස්ථාවේ ඔක්තෝබර් 28 වැනිදා වූ සිදුවීම පිළිබඳව නිශ්චිතව කතා කළහොත් වෙඩි තැබීම හැර ආරක්ෂකයන්ට විකල්පයක් නොතිබූ බව පැහැදිලි කාරණයක් විය.
ආරක්ෂක නිලධාරීන් වන තමන්ට බිම දමාගෙන පහරදෙමින් සිටින කලහකාරීන් පිරිසක් අතේ ඇති පිස්තෝලය උදුරාගන්නට උත්සාහ කරද්දී වෙඩි තැබීම හැර අන් කුමක් කරන්නදැයි මේ නිශ්චිත සිදුවීමේදී අසන්නට සිදුවෙයි. මේ කලහකාරීන්ගේ ඊළඟ ඉලක්කය තමන් ආරක්ෂා කිරීමට බැඳී සිටින අර්ජුන රණතුංග අමාත්‍යවරයා බව ආරක්ෂකයන් නොදන්නවා නොවේ. තමන් අත ඇති පිස්තෝලයද අමාත්‍යවරයාට පහරදීමට සූදානම්ව සිටින කණ්ඩායම අතට පත්කිරීම ආරක්ෂකයන්ට තෝරාගත හැකිව තිබුණු විකල්පයක් නොවන බව පැහැදිලි කාරණයකි.
2015 ජනවාරි 08 වැනිදාද ආණ්ඩු පෙරළියක් සිදුවිය. එහෙත් ආයතනවලට මැරයන් පැමිණ ආයතනවල බලය අල්ලාගන්නා අන්දම එදා දකින්නට නොවුණු බව කියන්නට දෙයක් නොවේ. ආයතනවල බලය අල්ලන්නට මැරයන් පැමිණීම එජාපයේ එදා තිබුණු සම්ප‍්‍රදායක් යැයි කෙනෙකුට කිව හැකිය. එය සැබෑවකි. එහෙත් මේ තරම් දියුණු ලංකාව තුළ ඒ සම්ප‍්‍රදාය ක්රියාත්මක කරන්නේ රාජපක්ෂලා පමණක් බව පැහැදිලිය. නීතිවිරෝධී කුමන්ත‍්‍රණයකින් ඒ රාජපක්ෂලාට නීතිවිරෝධි ආණ්ඩුවක් හදා දුන්නේ ජනාධිපති මෛත‍්‍රීපාල සිරිසේනය. ඒ නිසා නැතිවුණු ජීවිතය පිළිබඳව මෛත‍්‍රීපාල සිරිසේන ජනාධිපතිවරයා වගකිව යුතු බව පැහැදිලිව ලියා තබන්නෙමු.
