හොරාගේ අම්මාගෙන් පේන ඇසුවා වාගේ යන්න අමුතුවෙන් අරුත් පැහැදිළි කර දිය යුතු නැති අපට හුරුපුරුදු කියමනකි. මේ කියන්නට යන කථාවත් ඒවාගේ හොරාගේ අම්මාගෙන් පේන ඇසුවා වැනි වූ කතාවක්ය.
මෙහි පේන අසා ඇත්තේ ගාල්ලේ පදිංචි අසෝක වෙලගෙදරය. පේනකරුවා බවට පත්වී ඇත්තේ ශ‍්‍රී ලංකා ප‍්‍රජාතන්ත‍්‍රික සමාජවාදී ජනරජයේ ජනාධිපති මෛත‍්‍රීපාල සිරිසේන ය. ඔහුගෙන් අශෝක වෙළගෙදර මහතා එම පේනය අසා ඇත්තේ 2019 පෙබරවාරි 13 වන දින සහිත ලිපියක් මඟින්ය. එම ලිපියෙන් වෙළගෙදර මහතා පේනකරුවා වන ජනාධිපතිවරයාගෙන් ඉල්ලා සිටින්නේ ඔහුගේ පුත‍්‍රයා වන නාවික හමුදා ලූතිනන් කමාන්ඩර් ක‍්‍රිෂාන් වෙළගෙදරගේ ජීවිතයට ඇති තර්ජන පිළිබඳව සලකා බලා ඔහුගේ ජීවිතාරක්ෂාවට අදාල කටයුතු සිදු කර දෙන ලෙසය.
එම ඉල්ලීමට ජනාධිපතිවරයාගෙන් ලිඛිත පිළිතුරු ලැබෙන්නේ 2019 පෙබරවාරි 20 දින සහිතවය. ඒ ආරක්ෂක මාණ්ඩලික ප‍්‍රධානී අද්මිරාල් රවීන්ද්‍ර විජේගුණරත්නට යවන ලිපියක පිටපතක් ලෙසය.
රවීන්ද්‍ර විජේගුණරත්නට ජනාධිපතිවරයා යවන ලිපියේ උධෘතය ‘ජීවිතය අවදානමට ලක් කිරීම’ යන්නය. එහි මෙසේ සඳහන් වේ. උක්ත කරුණ සම්බන්ධයෙන් ගාල්ල කහමවවත්ත නාවින්න පාර, අංක 225 ලිපිනයයැති කිත්සිරි අශෝක වෙලගෙදර මහතා විසින් 2019 පෙබරවාරි 13 දිනැතිව ගරු ජනාධිපතිතුමා වෙත යොමු කර ඇති ලිපිය, ‘ගරු ජනාධිපතිතුමන් විසින් ලිපියේ සටහන් තබා ලබාදී ඇති උපදෙස් පරිදි අවශ්‍ය ඉදිරි පියවර ගැනීම සඳහා මේ සමඟ ඔබ වෙත ඉදිරිපත් කරමි.’ ආර්.ඒ.ජී. ජනක නම් ජනාධිපතිවරයාගේ පෞද්ගලික ලේකම්වරයා විසින් එය ඉදිරිපත් කර ඇත.
ලූතිනන් කොමාන්ඩර් ක‍්‍රිෂාන් වෙලගෙදර යනු තරුණයන් 5 දෙනෙකු ඇතුළු පුද්ගලයන් 11 දෙනෙකු කප්පම් ලබාගැනීම සඳහා පැහැරගෙන ගොස් මරා දැමීමේ නඩුවේ දැනට නාවික හමුදාව තුළ සේවය කරන එකම සාක්ෂිකරුවාය. ඝාතනය කළ ඉහත සඳහන් සිද්ධියේ පුද්ගලයන්් කිහිපදෙනෙකුව ඔහු ත‍්‍රිකුණාමල ගන්සයිඞ් කඳවුරේදී දැක තිබේ. ඒ නිසාම ඔහුට පසුගිය කාලය තුළ ශ‍්‍රී ලංකා නාවික හමුදාව තුළ විවිධ කරදර හිරිහැරයන්ට භාජනය වන්නට සිදුවිය. එම කරදර හිරිහැරයන්වලදී චෝදනා එල්ලවූ එක් ප‍්‍රධාන පුද්ගලයෙකු වූයේ අද්මිරාල් රවීන්ද්‍ර විජේගුණරත්නය. තවද රවීන්ද්‍ර විජේගුණරත්න යනු කප්පම් ලබාගැනීම සඳහා පුද්ගලයන් පැහැරගෙන ගොස් මරා දැමීමේ නඩුවේ එක් සැකකරුවෙකි. එම නඩුව සම්බන්ධයෙන් ඔහු දැනට සිටින්නේ ඇප පිටය.
අශෝක වෙළගෙදර මහතා ඔහුගේ පුතා වෙනුවෙන් එම ලිපියෙන් ඉල්ලන්නේ ඔහුගේ පුතාගේ විශ‍්‍රාම යෑමට අවශ්‍ය කටයුතු සිදුකර දෙන ලෙසත්, පුතාට හිමි උසස්වීම් ලබාදෙන ලෙසත්ය. එහිදී ජනාධිපතිවරයාගේ නියෝග පවා නොතකමින් ආරක්ෂක අමාත්‍යාංශයේ සමහර නිලධාරීන් කටයුතු කරන ආකාරයත්, නාවික හමුදාවේ ඉහළ නිලධාරීන් කටයුතු කරන ආකාරයත් එම ලිපියේ විස්තර කර ඇත.
ඉන් පෙනෙන්නේ සේනාධිනායක වුවත් ආරක්ෂක අමාත්‍යවරයා වුවත් විධායක ජනාධිපති වුවත් ජනාධිපතිවරයාගේ නියෝග නොතකා කටයුතු කරන ඔහු යටතේ ඇති ආයතනවල නිලධාරීන් සිටින බවය.
එම කරුණු එසේ තිබියදීත් අශෝක වෙලගෙදර මහතාගේ මෙම ඉල්ලීම, රවීන්ද්‍ර විජේගුණරත්නට යොමු කිරීමට හේතුව කුමක්ද යන්න තේරුම්ගත නොහැකිය. මන්ද ආරක්ෂක මාණ්ඩලික ප‍්‍රධානී යනු ශ‍්‍රී ලංකා නාවික හමුදාව සම්බන්ධයෙන් හෝ නැතහොත් ශ‍්‍රී ලංකා යුධ හමුදාව හෝ ශ‍්‍රී ලංකා ගුවන් හමුදාව සම්බන්ධයෙන් තීන්දු තීරණ ගත හැකි තනතුරක් නොවන නිසාය. ඇත්තවශයෙන්ම එම තනතුර වූ කලී විශ‍්‍රාම යන යුධ, ගුවන් හෝ නාවික හමුදාපතිවරුන්ට තනතුරු උසස්වීමක් සමඟ තවත් ටික කාලයකට වැටුප් හා පහසුකම් ලබාදීමට දැන් පවත්වාගෙන යන නාමික තනතුරක් පමණය.
අනෙක් පැත්තෙන් ජීවිත අවදානම් පිළිබඳව විමර්ශණය කිරීමට හෝ ජීවිත අවදානම් අවම කිරීමට අදාල ප‍්‍රතිපාදන සැලසීමද ආරක්ෂක මාණ්ඩලික ප‍්‍රධානියාට කළ හැක්කක් නොවේ. ජනාධිපතිවරයාගේ බලාපොරොත්තුව වූයේ එවැනි විමර්ශණයක් හෝ ප‍්‍රතිපාදන සැලසීමක් නම් එය යොමුකළ යුතුව තිබුණේ ශ‍්‍රී ලංකා පොලීසිය වෙතය. දැන් ඒ සම්බන්ධයෙන් ජනාධිපතිවරයාට දෙපාරක් සිතන්නට දෙයක්ද නැත. මන්ද පොලීසිය බාර ඇමතිවරයාද ඔහු නිසාය.
ලූතිනන් කොමාන්ඩර් ක‍්‍රිෂාන් වෙලගෙදර ඔහුගේ විශ‍්‍රාමය පූර්ව විශ‍්‍රාම කාලයක් ගතකර යෑමට ඉල්ලීම සාධාරණය. මන්ද නාවික හමුදාව තුළ සේවයේ සිටියදී පවා තවදුරටත් ඔහුගේ ජීවිතය පිළිබඳ ආරක්ෂාව දැන් අනතුරේය. මෙම සිද්ධියේ එක් නාවික හමුදා සාක්ෂිකරුවෙකු වූ සෙනෙවිරත්න නැමති සුළු නිලධාරියා පසුගිය කාලයේ අභිරස් ලෙස මියගොස් තිබුණි. තවත් සාක්ෂිකරුවෙකු වූ විජයකාන්තන් නමැති ඔත්තුකරු අතුරුදන්ය.
නාවික හමුදාව තුළින් පමණක් නොව ඉන් බාහිරව සිටින අන්ත ජාතිවාදී ෆැසිස්ට් බලවේග දැන් ඔහුව ඉලක්ක කරගනිමින් ප‍්‍රචාරක ව්‍යාපාර අරඹා ඇත. ඒ ඔහු වීරෝධාර රණවිරුවන්ව පාවාදුන්නෙකු ලෙස හඳුන්වමින් ය ඇත්ත වශයෙන්ම ලූතිනන් කොමාන්ඩර් ක‍්‍රිෂාන් වෙලගෙදර කර තිබුණේ ඔහුගේ රාජකාරියට අවශ්‍ය සත්‍ය රාජ්‍යයට හෙවත් අධිකරණයට ප‍්‍රකාශ කිරීම පමණය. රජයේ සේවකයෙකුව පමණක් නොව ඕනෑම පුරවැසියෙකුගේ වගකීම වන්නේ යම් අපරාධයක් සම්බන්ධයෙන් ඔවුන් දන්නා තොරතුරු විමර්ශණ කණ්ඩායම් වලට හෙළිදරව් කිරීමය.
මෑතකදී ආරක්ෂක අමාත්‍යාංශයේ හිටපු ලේකම්වරයෙකු වූ ගෝඨාභය රාජපක්ෂ මාධ්‍යවේදී ලසන්ත වික‍්‍රමතුංග ඝාතනය කළේ කවුදැයි ඔහු දන්නා බව මාධ්‍යයට ප‍්‍රකාශ කර තිබුණි. ඇත්ත වශයෙන්ම ඔහුගේ වගකීම වන්නේ එම ඝාතනය පිළිබඳ පරීක්ෂණ සිදුකරන අපරාධ පරීක්ෂණ දෙපාර්තිමේන්තුට ඒ පිළිබඳ සියළු දෑ පැවසීමය. එම ඝාතනය සම්බන්ධයෙනුත් ඇඟිල්ල දිගුවන්නේ හමුදා සාමාජිකයන්ටය. ( අණ නොවේ * ළමුන් 5 දෙනෙකු ඇතුළු පුද්ගලයන් 11 දෙනෙකු කප්පම් ලබාගැනීම සඳහා පැහැරගෙන ගොස් මරාදැමීම සම්බන්ධයෙන් ඇඟිල්ල දිගුවන්නේද නාවික හමුදා බුද්ධි අංශ සාමාජිකයන්ටමය. මේ මිනීමැරුම්වලට අදාල සිද්ධි දෙකම කිසිසේත්ම යුද්ධයකට අදාල නැත. යුධ භූමියෙන් හා යුද්ධයෙන් පිටස්තරව සිදුවූ සිදුවීම්ය. අති ම්ලේච්ඡු මිනීමැරුම්ය.
එවැනි පසුබිමක නාවික හමුදාවේ එම මිනීමැරුම් අපරාධ සැකකරුවන්ට රටින් පිටවීමට හා සැඟවී සිටීමට ආධාර අනුබල දුන් හිටපු නාවික හමුදාපතිවරයෙකු වූ රවීන්ද්‍ර විජේගුණරත්නට එම අපරාධයේ සාක්ෂිකරුවකුගේ ජීවිත අවදානමක් ගැන වූ පැමිණිල්ලක් අවශ්‍ය කටයුතු සඳහායැයි කියමින් ජනාධිපතිවරයා විසින් යොමුකිරීම අප තේරුම්ගත යුත්තේ කෙසේද? හොරාගේ අම්මා විසින් එය හොරාට දැනුම්දීමක් ලෙස නොවේද? මන්ද අද යුද්ධයට මුවාවී සිදුකරන ලද මේ ආකාරයේ ම්ලේච්ඡු අපරාධවලට සැක අපරාධකරුවන්ගේ ආරක්ෂකයා හෙවත් අම්මා වී සිටින්නේ ජනාධිපතිවරයා නිසාය.