නිසි සෞඛ්‍යාරක්ෂිත මෙවලම් ලබා නොදන්නේනම් තැපැල් කටයුතු සිදුනොකරන බව තැපැල් වෘත්තිය සමිති කරන ලද අනතුරු හැඟවීම ගැන අමාත්‍ය බන්දුල ගුණවර්ධන සමඟ සාකච්ඡුා කරන ලද්දේ මැයි මස 03 වැනිදාය. වෘත්තිය සමිති ක‍්‍රියාමාර්ග නොගන්නා ලෙසත් අවශ්‍ය ආරක්ෂක මෙවලම් සම්පාදනය කරන බවත් අමාත්‍ය බන්දුල ගුණවර්ධන එහිදී වෘත්තිය සමිතිවලට පොරොන්දු විය.

මේ අත්‍යවශ්‍ය සෞඛ්‍යාරක්ෂිත මෙවලම් සම්බන්ධයෙන් මීට පෙරත් රාජ්‍ය අංශයේ විවිධ වෘත්තිකයන් ආණ්ඩුවට අනතුරු හඟවනු ලැබීය. රජයේ වෛද්‍ය නිලධාරීන්ගේ සංගමය, රජයේ හෙද නිලධාරීන්ගේ සංගමය, මහජන සෞඛ්‍ය පරීක්ෂකවරුන් යන සෞඛ්‍ය සේවාවලට සම්බන්ධ අය ඒ අතර විය. මීට අමතරව පෞද්ගලික බස් හිමියන්ගේ සංගමයද කීවේ රජයෙන් ඉන්ධන සහනාධාරයක් නොලැබෙන්නේ නම් රජය කියන ආකාරයේ දූරස්ථභාවයක් පවත්වාගනිමින් මගීන් ප‍්‍රවාහනය කළ නොහැකි බවයි.

මේ කොවිඞ්-19 වසංගත තත්වය හමුවේ ප‍්‍රතිකාර සේවා සඳහාත්, ජන ජීවිතය අඩාල නොවී පවත්වාගෙන යෑම සඳහාත් අත්‍යාවශ්‍ය සේවාවන් අවශ්‍ය බව අවිවාදිතය. එහෙත් මෙම ක්ෂේත‍්‍ර වෘත්තිය සමිති ක‍්‍රියාමාර්ග ගතහොත් ඒ සම්බන්ධයෙන් නිත්‍යානුකූලව රජයට ගත හැකි ක‍්‍රියාමාර්ගයක් නැත. ඒ එම සේවාවන් අත්‍යාවශ්‍ය සේවා ලෙස කථා කිරීමේ හැකියාවක් රජයට දැන් නොමැති නිසාය.

රටේ  ඕනෑම සේවාවක් අත්‍යාවශ්‍ය සේවාවක් ලෙස ප‍්‍රකාශයට පත්කිරීම සඳහා රට තුළ හදිසි නීති තත්වයක් ප‍්‍රකාශයට පත්කර තිබිය යුතුය. කොවිඞ්-19 වසංගත තත්වය හමුවේ සෞඛ්‍ය සේවා පවත්වාගෙන යෑම සඳශාත්, ජන ජීවිතයේ හා ආර්ථිකයේ අනෙකුත් අංශ බිඳ නොවැටී පවත්වාගෙන යෑම සදහා යම් අනතුරක් මතුවුවහොත් එම සේවා අත්‍යාවශ්‍ය සේවාවක් ලෙස ප‍්‍රකාශයට පත්කිරිමේ හැකියාව ඇත්තේ හදිසි නීති රෙගුලාසිවලට පමණය.

එහෙත් හදිසි නීතියට ජනාධිපති ගෝඨාභය රාජපක්ෂ මේ මොහොතේ පුදුම තරම් භයය. අකමැතිය. ඒ ලොව පිළිගත් ප‍්‍රජාතන්ත‍්‍රවාදී පාලන මූලධර්ම අනුව හදිසි නීතියෙන් තොරව සාමාන්‍ය නීතියෙන් රට පවත්වාගෙන යෑමේ කැමැත්ත නිසා නොව, හදිසි නීතිය පැනවුවහොත් ආණ්ඩුක‍්‍රම ව්‍යවස්ථාව අනුව පාර්ලිමේන්තුව කැඳවන්නට සිදුවන නිසාය. ඒ අනුව ජනාධිපති ගෝඨාභය රාජපක්ෂ අකමැති හදිසි නීතියට නොව ඒ මගින් ඇතිකරන තත්වය මත පාර්ලිමේන්තුව නැවත කැඳවීමටය. ප‍්‍රජාතන්ත‍්‍රවාදී මූලධර්මලට ගරුකරන නායකයෙකු විශේෂයෙන්ම ගෝලීය වසංගත තත්වයක් හමුවේ තම රටටද එම වසංගතයෙන් අනතුරක් ඇති විට පාර්ලිමේන්තුව කැඳවන්නට අකමැති වන්නේ නැත. ඒ අනුව ජනාධිපති ගෝඨාභය රාජපක්ෂ ප‍්‍රජාතන්ත‍්‍රවාදී පාලන මූලධර්මවලට අකමැති නායකයෙකු බව පැහැදිළිය.

ඉහත කී අත්‍යවශ්‍ය සේවාවල යම් බිඳවැටීමක් රටතුළ සිදුවුවහොත් හදිසි නීතියෙන් තොරව ඒ සඳහා සිදුකළ හැකි ප‍්‍රතිකර්ම මොනවාද? අවශ්‍ය නම් එවැනි ක්ෂේත‍්‍රවල වෘත්තිය සමිති නායකයින්ව බිය ගැන්විය හැකිය. එය නිල හා නොනිල ආකාරයට යන දෙකටම කළ හැකිය. එම වෘත්තිය සමිති නායකයන්ව අනීතික ලෙස පැහැරගෙන ගොස් රඳවා තබාගත හැකිය. මේ ක‍්‍රියා මගින් පසුගිය මහින්ද රාජපක්ෂ පාලන කාලයේදී රාජ්‍ය අනුග‍්‍රහය ඇතිව ක‍්‍රියාත්මක වූ අතුරු හමුදා කණ්ඩායම්වලට පළපුරුද්ද තිබූ බව අපි දනිමු. එම අතුරු හමුදා කණ්ඩායම්වලට නායකත්වය දුන් පිරිස්  දැන් මේ ආණ්ඩුවේ තනතුරුලාභීන් බවද අපි දනිමු. එමෙන්ම එම අතුරු හමුදා කණ්ඩායම්වල සාමාජිකයන් බොහෝ දෙනෙකු තවමත් ආරක්ෂක අංශවල සේවය කරන බවද අපි දනිමු.

ඒ අනුව ජනාධිපති ගෝඨාභය රාජපක්ෂට මේ කොවිඞ්-19 ගෝලීය වසංගතය හමුවේ රට තුළ අත්‍යවශ්‍ය සේවා බිඳ වැටුණහොත් කළ හැකි ප‍්‍රතිකර්මයන්ට ඉතිරි වී ඇත්තේ ඉහත සඳහන් කළ දේ පමණය.

මේ හදිසි නීති තත්වයක් ජනාධිපතිවරයෙකු ප‍්‍රකාශයට පත්කළ යුත්තේ මහජන ආරක්ෂක ආඥාපනත යටතේය. 2019 වර්ෂයේ පාස්කු ඉරුදින ප‍්‍රහාර අවස්ථාවේදී එවක ජජනාධිපති මෛත‍්‍රීපාල සිරිසේන මහජන ආරක්ෂක ආඥාපනත යටතේ රටතුළ හදිසි නීතිය පනවනු ලැබීය. ඔහු ඒ සඳහා වූ අතිවිශේෂ ගැසට් පත‍්‍රයේ පැහැදිළිව සඳහන් කරන දෙයක් වේ. ඒ ‘ශ‍්‍රී ලංකාවේ හදිසි අවස්ථා තත්වයක් පැවතීම හේතුකොටගෙන මහජන ආරක්ෂාව සහ රටේ යථා පැවැත්ම සුරක්ෂිත කිරීම හා ජන ජීවිතයට අවශ්‍ය සැපයීම් හා සේවා පවත්වාගෙන යෑම සඳහා මෙසේ කිරීම අවස්ථානුකූල යැයි මා අදහස් කරන හෙයින්’ හදිසි නීතිය ප‍්‍රකාශයට පත්කරන බවය.

එම මහජන ආරක්ෂක ආඥාපනත යටතේම මහජන සාමය පවත්වාගෙන යෑම සඳහා ත‍්‍රිවිධ හමුදාව එවක ජනාධිපති මෛත‍්‍රීපාල සිරිසේන කැඳවනු ලැබුවේය. ත‍්‍රිවිධ හමුදාවලට හමුදා කඳවුරුවලින් පිටත සෝදිසි කිරීම්, මාර්ග බාධක ඇතුළු රාජකාරි ඉටු කිරීමට බලය ලැබෙන්නේ මහජන ආරක්ෂක ආඥාපනත යටතේ පළකරනු ලබන එම අතිවිශේෂ ගැසට් පත‍්‍රය නිසාය. මසකට වරක් නිකුත් කරන එම ගැසට් පත‍්‍රය හිටපු ජනාධිපති මෛථ‍්‍රීපාල සිරිසේන ධුරයෙන් බැසයන තෙක්ම පළකළේය.

එයම අනුගමනය කරමින් වත්මන් ජනාධිපති ගෝඨාභය රාජපක්ෂද ඔහු ධුරයට පත්වූ පසු මේද ක්වාම සන්නද්ධ හමුදා මහජන සාමයට කැඳවන මහජන ආරක්ෂක ආඥාපනත යටතේ බලය ලැබෙන එම අතිවිශේෂ ගැසට් පත‍්‍රය මාසිකව පළකරනු ලැබීය.

රාජපක්ෂවාදී අධිපති මාධ්‍ය කරුණු දැන හෝ කරුණු නොදැන හෝ ජනාධිපති ගෝඨාභය රාජපක්ෂ නිකුත් කළ 2019 නොවැම්බර් 22 දින නිකුත් කළ ඒ සම්බන්ධයෙන් වූ ඔහුගේ පළමු ගැසට් පත‍්‍රය හැඳින්වූවේ එතෙක් සිටි ජනාධිපතිවරයා නොකරන ලද කාර්යයක් ගෝඨාභය රාජපක්ෂ ජනාධිපතිවරයා කළ බව හුවා දක්වමින් මහා ප‍්‍රචාරයක් ලබාදෙමින්ය. (එය සත්‍ය නොවන බව ලියුම්කරු එම අවස්ථාවේදීම ලීවේය.)

අවසන්වරට ජනාධිපති ගෝඨාභය රාජපක්ෂ මහජන ආරක්ෂක ආඥාපනත යටතේ නිකුත් කරන සන්නද්ධ හමුදා මහජන සාමයට කැඳවීමේ හෙවත් කඳවුරුවලින් පිටත රාජකාරී වලට කැඳවීමේ අතිවිශේෂ ගැසට් පත‍්‍රය පළකරනු ලැබුයේ පසුගිය අපේ‍්‍රල් මස 22 වැනිදාය.

මහජන ආරක්ෂක ආඥාපනත යටතේ මාසිකව නිකුත් කරන එම ගැසට් පත‍්‍රය නොමැතිනම් මේ වන විට ත‍්‍රිවිධ හමුදාව සිදුකරන සෞඛ්‍ය මෙහෙයුම් කිසිවක් නිත්‍යානුකූලව සිදුකළ නොහැකිය.

ඒ අනුව පැනනඟින ප‍්‍රශ්නය වන්නේ මහජන ආරක්ෂක ආඥාපනතේ එක් බලතලයක් (සන්නද්ධ හමුදා මහජන කටයුතුවලට කැඳවීම) හොඳ වන විට තවත් බලතලයක් (හදිසි නීති රෙගුලාසි හෙවත් අත්‍යාවශ්‍ය සේවා බලතල) නරක වන්නේ කෙසේද යන්නය.

මහජන ආරක්ෂක ආඥාපනතට විරුද්ධ නම් හා සාමාන්‍ය නීති තත්වය යටතේ රට පාලනය කිරීමට සැබෑ කැමැත්තක් ජනාධිපතිවරයා දක්වන්නේ නම් කළ යුත්තේ අපේ‍්‍රල් මස 22 ඔහු නිකුත් කළ ගැසට් පත‍්‍රය අහෝසි කිරීම හෝ මැයි මාසයේදීත් එම ගැසට් පත‍්‍රය පළනොකර සන්නද්ධ හමුදා කඳවුරුවලට සීමාකර රට සිවිල් නිලධාරීන්ගෙන් පවත්වාගෙන යෑමය.