කුරුණෑගල ශික්ෂණ රෝහලේ සේවය කළ වෛද්‍ය සාෆි සියාබ්දීන් නීති විරෝධීව අත්අඩංගුවට ගෙන, චෝදනා ගොනු නොකරමින් රඳවා තබාගැනීම පිළිබඳව මූලික අයිතිවාසිකම් පෙත්සමක් ඉදිරිපත් කිරීමට බලාපොරොත්තු වන බව ඔහුගේ බිරිඳ වන වෛද්‍ය එම්.එන්.එෆ්. ඉමාරා අනිද්දා කළ විමසීමකදී පැවසුවාය.

වෛද්‍ය සියාබ්දීන් සාෆිට තවමත් චෝදනා ගොනු කර නොමැති බව අනිද්දා කළ විමසීමකදී පොලිස් මාධ්‍ය ප‍්‍රකාශක ජ්‍යෙෂ්ඨ පොලිස් අධිකාරී රුවන් ගුණසේකර පැවසීය.

අදාල වෛද්‍යවරයා  අත්අඩංගුවට ගෙන රඳවා තබා ගෙන ඇත්තේ කුමන නීතිය යටතේ දැයි විමසූ අවස්ථාවේදී ඔහු ප‍්‍රකාශ කළේ ඒ සම්බන්ධයෙන් තවම තමා දැනුවත් නැති බවය. මැයි 24 වැනිදා අත්අඩංගුවට ගැනීමෙන් පසු දින 14ක් තිස්සේ වෛද්‍ය සියාබ්දීන් සාෆි අධිකරණයට ඉදිරිපත් කිරීමක් නොකළ අතර ඔහු සම්බන්ධයෙන් රඳවා තබාගැනීමේ නියෝගයක්ද අධිකරණයෙන් ලබාගෙන තිබුණේ නැත.

මැයි 23 වන දින දිවයින පුවත්පතේ පළ වූ ප‍්‍රධාන ප‍්‍රවෘත්තිය ලියූ මාධ්‍යවේදී  හේමන්ත රන්දුනු සහ මැයි 24 වන දින ලංකාදීප වෙබ් අඩෙවියෙහි පුෂ්පකුමාර ජයරත්න පළ කරන ලද ප‍්‍රවෘත්තිය සම්බන්ධයෙන් පළමුව පරීක්ෂණ ආරම්භ කළ බවත් ඉන්පසුව සාෆි ෂියාබ්දීන් වෛද්‍යවරයා පිළිබඳව පරීක්ෂණ ආරම්භ කළ බවත්  තවමත් පරීක්ෂණ ඉදිරියට යමින් පවතින බවත් පොලිස් මාධ්‍ය ප‍්‍රකාශකවරයා කීය. මැයි 23 වන දින මාධ්‍ය සාකච්ඡුාවක් පවත්වමින් පොලිස් මාධ්‍ය ප‍්‍රකාශකවරයා පවසා සිටියේ දිවයින පුවත්පතේ පළ වූ ප‍්‍රවෘත්තිය අසත්‍ය ප‍්‍රවෘත්තියක් බවත් එම ප‍්‍රවෘත්තිය පිළිබදව පරීක්ෂණයක් ආරම්භ කර තිබෙන බවත්ය.

මේ වන විට මාධ්‍යෙව්දී හේමන්ත රන්දුනු, කුරුණෑගල රෝහලේ අධ්‍යක්ෂ වෛද්‍ය සරත් වීර බණ්ඩාර සහ කුරුණෑගල දිසාව භාර නියෝජ්‍ය පොලිස්පති වසන්ත කිත්සිරි ජයලත් අපරාධ පරීක්ෂණ දෙපාර්තුමේන්තුවට කැදවා ප‍්‍රශ්න කර ඇති බව පොලිස් ආරංචි මාර්ග පවසයි.x