නව කොරෝනා වෛරසය පැතිරයෑම ආරම්භ වූ චීනයේ වුහාන් නගරයට ඇතුළුවීමට හෝ පිටවීමට කිසිවෙකුට අවසර නොදීම හේතුවෙන් එහි සිටින ශ‍්‍රී ලාංකික සිසුන් තිස්දෙනෙකු මෙරටට ගෙන්වා ගැනීමට නොහැකි වී ඇතැයි රාජ්‍ය අමාත්‍ය සුසිල් පේ‍්‍රම්ජයන්ත මාධ්‍ය හමුවේ ප‍්‍රකාශ කර ඇත.


මෙම ප‍්‍රකාශය ආණ්ඩුවේ ඇමතිවරයෙකු කරන්නේ ඊට පෙර වුහාන් ප‍්‍රාන්තයේ සිටින ශ‍්‍රී ලාංකික සිසුන් ගෙන්වා ගැනීමට විශේෂ ගුවන් යානාවක් එම ප‍්‍රදේශයට යෑම සඳහා ජනාධිපතිවරයා දුන් උපදෙස් අනුව චීනයේ ශ‍්‍රී ලංකා තානාපති කාර්යාලය කටයුතු කරන බවට ආණ්ඩුව කළ ප‍්‍රකාශවලට වැඩිමනත් වශයෙන්ය.


චීනයේ සිටින සිසුන් මෙන්ම අනෙකුත් ශ‍්‍රී ලාංකිකයන් මෙරටට ගෙන්වාගැනීමට ඉක්මනින් කටයුතු කරන ලෙස ජනාධිපතිවරයා බලධාරීන්ට උපදෙස් දී තිබුණි. මෙම නව කොරෝනා වෛරස් සිද්ධියෙන් පසු දෙසීයකට වැඩි ශ‍්‍රී ලාංකිකයන් සංඛ්‍යාවක් මේ වනවිට ලංකාවට පැමිණ තිබේ.


මෙසේ පැමිණෙන අයගේ ගුවන් ගාස්තුද සීයට 50කින් අඩු කිරීමට ශ‍්‍රී ලංකන් ගුවන් සේවය කටයුතු කරන බව නිවේදනය කරනු ලැබූ අතර චීනයේ සිට විශේෂ ගුවන් යානා දෙකක්ද මෙරටට පැමිණ තිබුණි.


එමෙන්ම වුහාන්වල සිට ශ‍්‍රී ලාංකික සිසුන් පැමිණියහොත් ඔවුන් දියතලාව හමුදා කඳවුරේ සති දෙකක කාලයක් රඳවා තබන බවට සෞඛ්‍ය ඇමතිනි පවිත‍්‍රා වන්නිආරච්චි ප‍්‍රකාශ කර තිබුණි. ඊට රජයේ වෛද්‍ය නිලධාරීන්ගේ සංගමයේ බදුල්ල දිස්ත‍්‍රික් ශාඛාව විරෝධය පළ කරමින් කියා තිබුණේ නව කොරෝනා වෛරසය සම්බන්ධයෙන් පරීක්ෂණ කිරීමේ හැකියාවක් එම පළාතේ ප‍්‍රධාන රෝහල වන බදුල්ල රෝහලටවත් නැති බවයි. එම පරීක්ෂණ සඳහා සාම්පල් කොළඹට රැුගෙන යෑමද ප‍්‍රායෝගික නොවන බවයි.


වුහාන් නගරයේ සිටින ශ‍්‍රී ලාංකික සිසුන්ගේ වීඩියෝ හඬපටි මාධ්‍යවලට උණුසුම් පුවතක් වී ඇති අතර එවැනි සමහර සිසුන්ගේ අදහස ශ‍්‍රී ලංකාවට නොපැමිණ වුහාන් නගරයේ සිටීම ඔවුන්ට ආරක්ෂා සහිත බවය. ඊට හේතු වශයෙන් ඔවුන් දක්වන්නේ වුහාන් නගරයෙන් ඔවුන් පිටවනවා නම් පිටවිය හැකි වන්නේ ඉතා හොඳ නිරෝධායන ක‍්‍රියාවලියකින් පසුව බවය.


එය ඇත්තය. ශ‍්‍රී ලංකාවට වඩා ඉතා හොඳ නිරෝධායන වැඩපිළිවෙළක් මේ නව කොරෝනා වෛරසය සම්බන්ධයෙන් චීනයට ඇති බවට සැකයක් නැත. එමෙන්ම වුහාන් නගරයේ නොවන වෙනත් පළාත්වල සිටින ශ‍්‍රී ලාංකික සිසුන් සමහරෙකුද පවසා ඇත්තේ වෛරස් තත්වය සම්බන්ධයෙන් ඔවුන් ආරක්ෂිත බවය. වුහාන් නගරයේ සිටින සිසුන් 30 දෙනා හැරුණුවිට චීනයේ සිටින තවත් ශ‍්‍රී ලාංකිකයන් තුන්සියයකට අධික සංඛ්‍යාවක් තවමත් මෙරටට පැමිණ නැත්තේ ඒ නිසා විය යුතුය.


අපේ දේශපාලන බලධාරීන් තේරුම් ගෙන නැති යථාර්ථය වන්නේ එයය. වෛරසයක් පාලනය කිරීම සඳහා සීල් තබා ඇති නගරයකට කිසිවෙකුට පිටතින් ඇතුළු වන්නට ඉඩ දෙන්නේ නැත. ඒ තුළ සිටින කිසිවෙකුටත් පිටතට යාමට දෙන්නේ නැත. දැනට වුහාන් නගරයේ වැසියන් සිටින්නේ ඔවුන්ගේ නිවාසවලට වීය. ප‍්‍රවාහන සේවා සිදුවන්නේද නැත. කඩ සාප්පු බොහොමයක්ද වසා දමා ඇත.


ඒ අස්සේ ශ‍්‍රී ලාංකික සිසුන් රැුගෙන ඒමට විශේෂ ශ‍්‍රී ලංකන් ගුවන් යානයක් වුහාන් නගරයට ගොඩබැස්වීමට රාජ්‍ය තාන්ත‍්‍රික ඉල්ලීමක් කිරිම කරුණු නොදැනීමක්ද නැතිනම් රටේ ජනතාවගේ ප‍්‍රසාදය දිනාගැනීම සඳහා කළ තවත් එක් සංදර්ශනයක්ද යන්න දන්නේ එම නියෝගය දුන් අයම පමණය.