සන්ඬේ ලීඩර් පුවත්පතේ හිටපු කර්තෘ ලසන්ත වික්‍රමතුංග සාහසික ලෙස ඝාතනය කර වසර දහයක් ජනවාරි 8 වෙනිදාට සම්පූර්ණ වෙයි.
මෙම ඝාතනය සම්බන්ධයෙන් ගල්කිස්ස මහේස්ත්‍රාත් අධිකරණයේ නඩුවක් පැවතියද එහි සැකකරුවන්ට චෝදනා ගොනුකිරීමක් තවමත් සිදුවී නැත.
ලසන්ත වික්‍රමතුංග ඝාතනයට සැකයැයි දූරකථන විශ්ලේෂණ වාර්තා මඟින් අපරාධ පරීක්‍ෂණ දෙපාර්තමේන්තුව විසින් තහවුරු කරගත් කොළඹ මරදාන ටි්‍රපොලි හමුදා කඳවුරේ එවක සේවය කළ යුද හමුදා සමාජිකයන්ගෙන් ප්‍රශ්න කිරීම ජනාධිපති මෛත්‍රීපාල සිරිසේන මැදිහත්වී නවතා දමනු ලැබූ අතර, එම ප්‍රශ්න කිරීම නවතා දමන ලෙස තමා නියෝග කළ බව ජනාධිපතිවරයා ප්‍රසිද්ධියේම ප්‍රකාශ කළේය.
ලසන්ත වික්‍රමතුංග මහතා ඝාතනය කරනු ලැබ තිබුණේ විශේෂ වර්ගයේ අවියකින් වන අතර එම වර්ගයේ අවි සතුන් ඝාතනය කිරීම සඳහා යොදාගන්නා බෝල්ට් ගන් වර්ගයේ බව පරීක්ෂණවලින් තහවුරු වී තිබුණි. එවැනි අවියකින් පහරදීමක් කිරීමේදී උණ්ඩ පිටවීමක් සිදු නොවන අතර අවියෙන් නිකුත් වන උණ්ඩයක් වැනි යමක් අදාළ ඉලක්කය වෙත ගොස් ආපසු අවිය වෙතට පැමිණෙයි. මෙවැනි අවි හමුදාවේ විශේෂ ඒකක විසින් භාවිත කළ බවට මතයක්ද ප්‍රචාරය වී තිබුණි.