මේ දිනවල පැවැත්වෙන්නේ ඩයලොග් රගර් ලීග් 2019/2020 තරගාවලියය. එහි අලූත්ම ප‍්‍රවෘත්තිය බවට පත්වී ඇත්තේ එම තරගාවලියේ 9 වැනි සතියේ සිට යෝෂිත රාජපක්ෂ ශ‍්‍රී ලංකා නාවික හමුදා කණ්ඩායමට ක‍්‍රීඩා කරන බවය. ඔහු ගැන මාධ්‍ය ලියා ඇත්තේ ශ‍්‍රී ලංකා රගර් කණ්ඩායමේ හිටපු නායක හා ශ‍්‍රී ලංකා නාවික හමුදා කණ්ඩායමේ හිටපු නායක වශයෙන්ය. ඔහු ශ‍්‍රී ලංකා ජාතික කණ්ඩායමේ හා ශ‍්‍රී ලංකා නාවික හමුදා කණ්ඩායමේ නායකයා වූයේ ඒ සඳහා තිබූ දක්ෂතාව හා සුදුසුකම නිසාද යන්න වෙනම සාකච්ඡුා කළ යුත්තකි.


පාසල් රගර් කණ්ඩායමේ නායකත්වය ලැබූ දක්ෂතම ක‍්‍රීඩකයන් නොවූ නාමල්, යෝෂිත හා රෝහිත යන මහින්ද රාජපක්ෂ පුතුන් ශ‍්‍රී ලංකා ජාතික රගර් කණ්ඩායමට ක‍්‍රීඩා කිරීම පමණක් නොව එහි නායකත්වය පවා දැරීම ශ‍්‍රී ලංකාව වැනි පසුගාමී දේශපාලන සංස්කෘතියක් ඇති රටක අනිවාර්යයෙන් සිදුවිය හැකි දෙයකි. සිය දෙමාපියන්ට දේශපාලන බලය ඇති විට මේ ¥පුතුන්ට පහළ නොවන දක්ෂතාවක් නැත. ක‍්‍රීඩාව පමණක් නොව නොකරන දෙයක්ද නැත. ඒ සෑම කටයුත්තකදීම මේ ¥ දරුවන්ට නිසි නොව අනිසි තැන් ලබාදීමට කැපවී පෙහෙවී සිටින නිලධාරී තන්ත‍්‍රයක්ද සිටින බව අප මතක තබාගත යුතුය. ගල්කිස්ස ශාන්ත තෝමස් විදුහලේ රගර් කණ්ඩායමේ කළ නොහැකි වූ ආශ්චර්යයන් මේ පුතුන් ජාතික මට්ටමේදී කළේ ඒ නිසාය. ශාන්ති තෝමස් වැනි පාසල්වල සංස්කෘතිය දේශපාලන බලය හමුවේ රටේ ආයතන පද්ධතිය තරම් පසුගාමී නොවන බව එහි තේරුමය.


2019/2020 ඩයලොග් ලීග් තරගාවලියේ දැනට රගර් ක‍්‍රීඩා කරන එකම රාජපක්ෂ පුතු රෝහිත රාජපක්ෂය. ඔහු සී.එච්. ඇන්ඞ් එෆ්.සී. රගර් ක‍්‍රීඩා කණ්ඩායමේ නායකයාය. යෝෂිත රාජපක්ෂද 2017 වර්ෂයේදී සී.එච්. ඇන්ඞ් එෆ්.සී. කණ්ඩායම නියෝජනය කර තිබුණි. ඒ ඔහුට ශ‍්‍රී ලංකා නාවික හමුදාවේ වැඩ තහනමට ලක් වීමෙන් පසුය.


දැන් සී.එච්. ඇන්ඞ් එෆ්.සී. රගර් කණ්ඩායම පාලනය කරන්නේ රාජපක්ෂ පුතුන්ය. ඔවුන් එම ක‍්‍රීඩා සමාජයේ පාලනය ලබාගෙන තිබුණේ ගෝඨාභය රාජපක්ෂ ජනාධිපතිධුරයට පත්වීමට පෙරය.


එස්.එච්. මව් ක‍්‍රීඩාංගණය වන කොළඹ සී.සී.සී. පිටියේ දැන් සී.එච්. පිල පුහුණුවීම් කරන්නේ නැත. ආණ්ඩු මාරු වීමට පෙර පුහුණුවීම් සදහා තුරඟ තරඟ පිටිය ලබා ගත් රාජපක්ෂ පුතුන්ට එය ඉදිරියටත් පවත්වා ගෙන යෑම අපහසුවක් නොවනු ඇත.


සමහරවිට ඉදිරි තරගවාරවලදී නාමල් රාජපක්ෂද සී.එච්. කණ්ඩායමට ක‍්‍රීඩා කළ හැකිය. දැනට අංක එකේ නොසිටින සී.එච්. කණ්ඩායම රටේ දක්ෂතම රගර් ක‍්‍රීඩකයන්ගෙන් සමන්විතව අංක එකේ රගර් කණ්ඩායම බවට පත්විය හැකිය. එදා ශ‍්‍රී ලංකා නාවික හමුදා කණ්ඩායමට දක්ෂම රගර් ක‍්‍රීඩකයන් බඳවා ගත්තා සේය. හම්බන්තොට බ්ලැක්ස් හා බ්ලූස් වශයෙන් බාස්කට් බෝල් කණ්ඩායම් දෙකක් සාදා ඒවාට රටේ දක්ෂතම බාස්කට් බෝල් ක‍්‍රීඩකයන් රාජපක්ෂ පුතුන් මිලදී ගත්තා සේය. රාජපක්ෂ පුතුන් එදා ලබාගත් කොළඹ හෙන්රි පේද්‍රිස් බාස්කට් බෝල් පිටියේදී ඩයලොග් වැනි ප‍්‍රමුඛ සමාගම්වල අනුග‍්‍රාහකත්වයෙන් කාල්ටන් බාස්කට් බෝල් තරගාවලියකදී මෙන්ම හම්බන්තොට බ්ලැක්ස් හා බ්ලූස් කණ්ඩායම් යළි කරළියට පැමිණිය හැකිය. කාර් රේස්ද යළි ඒ ආකාරයෙන්ම පැමිණිය හැකිය.


දෙමාපියන්ට දේශපාලන බලය ඇති කළ ¥දරුවන්ට දක්ෂතා පහළවීම නියතය. පුදුමය වන්නේ දක්ෂතා පහළ නොවුණහොත් පමණය.


එහිදී අනිවාර්යයෙන්ම ඇසිය යුතු ප‍්‍රශ්නයක් තිබේ. ඒ ක‍්‍රීඩා සමාජයක් නඩත්තු කිරීම සඳහා මේ රාජපක්ෂ පුතුන්ට මුදල් කොහින්ද යන්නය.


නාමල් රාජපක්ෂ ව්‍යාපාර හිමියෙකු නොවන නිකම්ම නිකම් පාර්ලිමේන්තු මන්ත‍්‍රීවරයෙකි. යෝෂිත රාජපක්ෂ නැවත සේවයේ පිහිටුවූ නාවික හමුදා නිලධාරියෙකු පමණය. සී.එස්.එන්. නාලිකාව දැන් ඔහුට නැත. රෝහිත රාජපක්ෂ කිසිදු රැුකියාවක් කරන්නේ නැත. ඔහු කරන්නේ ඉහළ විභාගත් පර්යේෂණත් පමණය. මහින්ද රාජපක්ෂ මහතාද ව්‍යාපාර හිමියෙකු නොවන අගමැතිවරයා පමණය. ශිරන්ති රාජපක්ෂ මහත්මියටද ඇත්තේ ලාභ අපේක්ෂාවක් නැති කාල්ටන් පෙරපාසල්ය. ඒ නිසා අප සිතිය යුත්තේ ඬේසි ආච්චිගේ මැණික් මල්ල මෙන් ඔවුන්ට මුදල් පහළ වී ඇති බවය. නැතහොත් බිරින්දෑ පාර්ශ්වයෙන් මේ අයට මුදල් පොම්ප කරමින් පවතින බවය.

ලයින්ස්මන්