යන යකා කොරහත් බිඳගෙන යනවායැයි කියමනක් තිබේ. එය නැවත ජනවරමක් ඉල්ලීමට නොහැකිව ධුරයෙන් බැසගිය හිටපු ජනාධිපති මෛත‍්‍රීපාල සිරිසේන සම්බන්ධයෙන් හොඳටම ගැළපේ.


ඔහු ධුරයෙන් බැස යෑමට දින කිහිපයක් තිබියදී යුද හමුදාපති ලූතිනන් ජෙනරල් ශවේන්ද්‍ර සිල්වාට වසර දෙකක සේවා දීර්ඝයක් ලබා දුන්නේය. ඊට අමතරව යුද හමුදාවේ දෙවැනියා හෙවත් මාණ්ඩලික ප‍්‍රධානී මේජර් ජෙනරාල් සත්‍යප‍්‍රිය ලියනගේට මාස හයක සේවා දිගුවක් ලබා දුන්නේය.


ඊට පෙරත් වත්මන් යුද හමුදාපති ශවේන්ද්‍ර සිල්වාට හිටපු ජනාධිපතිවරයා මාස 6කට ආසන්න කාලයක් සේවා දිගුවක් ලබාදුන්නේය. ඒ වයස අවුරුදු 55 පිරීම නිමිත්තෙන් ශවේන්ද්‍ර සිල්වා මහතා විශ‍්‍රාම යෑමට නියමිතව සිටි නිසාය. වයස අවුරුදු 55 පිරීම නිමිත්තෙන් ශවේන්ද්‍ර සිල්වා මහතා හමුදාවෙන් විශ‍්‍රාම යෑමට සිටියේ පසුගිය ජුනි 21 වැනිදාය.


ශ‍්‍රී ලංකා යුද හමුදාවේ ක‍්‍රමවේදය අනුව වයස අවුරුදු 55 සැපිරීමේදී මේජර් ජෙනරාල්වරුන් ඇතුළු අනෙකුත් නිලධාරීන් විශ‍්‍රාම යා යුතුය. යම් මේජර් ජෙනරාල්වරයෙකු යුද හමුදාපති ධුරකට පත්වී ලූතිනන් ජෙනරාල් නිලයට උසස්වීමක් සමග මාස 6ක, වසරක හෝ මාස හයෙන් හෝ වසරින් වසර දිගු වන සේවා දිගු ලැබේ.


යුද හමුදාපතිධුරය නොලැබී මේජර් ජෙනරාල් නිලයේ සිටියදීම ජනාධිපතිවරයෙකුගෙන් සේවා දිගු ලැබී ඇත්තේ කිහිප දෙනෙකුට පමණය. එක් අයකු වන්නේ වත්මන් යුද හමුදාපති ශවේන්ද්‍ර සිල්වාය. තව කෙනෙකු වන්නේ යුද හමුදා මාණ්ඩලික ප‍්‍රධානී සත්‍යප‍්‍රිය ලියනගේය. මීට පෙර එම සේවා දිගු අවස්ථාව ලැබී ඇත්තේ මේජර් ජෙනරාල්වරුන් කිහිප දෙනෙකුට පමණය.
ශවේන්ද්‍ර සිල්වාට යුද හමුදාපති ධුරය ලැබුණේ පසුගිය අගෝස්තු 18 වැනිදාය. ඒ ඔහු සේවා දිගුවක සිටියදීය.


යුද හමුදාවේ දෙවැනියා වන මේජර් ජෙනරාල් සත්‍යප‍්‍රිය ලියනගේට වයස අවුරුදු 55 සැපිරුණේ නොවැම්බර් 14 වැනිදාය. ලැබී ඇති සේවා දිගුවත් සමග ඔහුට ලබන වසරේ මැයි මස දක්වා යුද හමුදාවේ සිටිය හැකිය.
එමෙන්ම යුද හමුදාපති ශවේන්ද්‍ර සිල්වාට වසරක හා වසර දෙකක සේවා දිගුවක් ලැබී ඇති බවට දෙයාකාරයකට වාර්තා වෙයි. එහෙත් ප‍්‍රශ්නය ඇත්තේ මේ දෙදෙනොගේම සේවා දිගුවලට අදාල අතිවිශේෂ ගැසට් පත‍්‍රය තවමත් නිකුත් වී නැති තත්වය තුළ නිවැරදි කාලය වසරක්ද නැතහොත් වසර දෙකක්ද යන්න තීරණය කළ නොහැකිකමය.


හිටපු ජනාධිපති මෛත‍්‍රීපාල සිරිසේන හිටපු යුද හමුදාපතිවරයෙකු වූ ලූතිනන් ජෙනරාල් ක‍්‍රිෂාන්ත සිල්වාට තුන් වරකදී වසර තුනක කාලයකට සේවා දිගු ලබාදුන් බවද අප මතක් කරගත යුතුය. ඒ මගින් යුද හමුදාපතිධූරය හෝ යුද හමුදාවේ දෙවැනි ධුරය වන මාණ්ඩලික ප‍්‍රධානී ධුරය නොලැබී මේජර් ජෙනරාල්වරු රාශියක් තවදුරටත් සේවා දිගු නොලැබීම හේතුවෙන් වයස අවුරුදු 55 සම්පූර්ණ වී ගෙදර ගිය බවද අප සිහිතබා ගත යුතුය. එහෙත් හිටපු නාවික හමුදාපති ට‍්‍රැවිස් සින්නයියා නාවික හමුදාපතිධුරයට පත්කර මාස තුනක කාලයකින් ගෙදර යවන විට හිටපු ජනාධිපති මෛත‍්‍රීපාල සිරිසේන කීවේ අන් අයට ඉඩදීම සඳහා එසේ කළ බවය.


හිටපු ජනාධිපති මෛත‍්‍රීපාල සිරිසේන ඔහු ධුරයෙන් බැස යෑමට පෙර යුද හමුදාපතිවරයාට හා එහි දෙවැනියාට මේ ලබාදුන්නායැයි කියන සේවා දිගු නිසා මේජර් ජෙනරාල්වරුන් රැුසකට යුද හමුදාපතිධුරය හෝ එහි දෙවැනි ධුරය නොලබා විශ‍්‍රාම යෑමට සිදුවනු ඇත. එහි යම් වෙනසක් සිදුවිය හැක්කේ ශවේන්ද්‍ර සිල්වාට හා සත්‍යප‍්‍රිය ලියන්ගේට මෙන් වත්මන් ජනාධිපති ගෝඨාභය රාජපක්ෂ මේජර් ජෙනරාල්වරුන් කිහිප දෙනෙකුට සේවා දිගු ලබා දුනහොත් පමණය.

යුද හමුදාපති ශවේන්ද්‍ර සිල්වාට ලබාදී ඇත්තේ වසර දෙකක සේවා දිගුවක් නම් ඔහුට 2021 දෙසැම්බර් දක්වා ධුරයේ කටයුතු කළ හැක. ඔහුගේ සේවා දිගුවේ කාලය එය නම් එහි ඇති බරපතළම කාරණය වන්නේ යුද හමුදාවේ දැනට සිටින 40ක් පමණ වන මේජර් ජෙනරාල්වරුන් සියල්ලටම වයස අවුරුදු 55 සැපිරීමෙන් ගෙදර යෑමට සිදුවීමය. එම තත්වය ශ‍්‍රී ලංකා යුද හමුදාව ජ්‍යෙෂ්ඨයන්ගෙන් තොරව සෝදාපාළුවට ලක්වීමක් වශයෙන්ද හැඳින්විය හැකිය.


එම සේවා දිගුව වසරක කාලයකට පමණක් වූවත් ඒ මගින් දැනට සිටින මුළු මේජර් ජෙනරාල්වරුන් සංඛ්‍යාවෙන් භාගයකටත් වඩා එනම් 25කට ආසන්න සංඛ්‍යාවකට වයස අවුරුදු 55 සම්පූර්ණවීමෙන් ගෙදර යෑමට සිදුවේ. එම තත්වයද යුද හමුදාවේ ජ්‍යෙෂ්ඨයන්ගේ සෝදාපාළුවක් මිස අනෙකක් නොවේ.
මේ තත්වය අවශ්‍ය නම් වෙනස් කිරීමට වත්මන් ජනාධිපති ගෝඨාභය රාජපක්ෂට හැකිය. ඒ යුද හමුදාපති ශවේන්ද්‍ර සිල්වාට ලබාදී ඇති සේවා දිගුව කෙටි කාලයකින් අවසන් කිරීම මගින්ය.


එහෙත් එය එසේ සිදුවීමේ ඉඩ ඉතා මඳ බව ලියුම්කරුගේ අදහසය. යුද හමුදාපති ශවේන්ද්‍ර සිල්වාත්, වත්මන් ජනාධිපති ගෝඨාභය රාජපක්ෂත් අතර පවතින දිගුකාලීන මිත‍්‍රත්වය එයට හේතුවය. ජනාධිපති ගෝඨාභය රාජපක්ෂද ශවේන්ද්‍ර සිල්වාද යුද හමුදාවේ ගජබා රෙජිමේන්තුවේ සේවය කළ අයය. එකල ලූතිනන් කර්නල් ගෝඨාභය රාජපක්ෂ යටතේ ශවේන්ද්‍ර සිල්වා කටයුතු කර ඇත්තේ බුද්ධි නිලධාරී වශයෙන්ය. එමෙන්ම වත්මන් ආරක්ෂක අමාත්‍යාංශ ලේකම් විශ‍්‍රාමික මේජර් ජෙනරාල් කමල් ගුණරත්නද ගෝඨාභය රාජපක්ෂ යටතේ ගජබා රෙජිමේන්තුවේ කටයුතු කළ අයෙකි. කොටින්ම එල්ටීටීඊ සංවිධානයත් සමඟ පැවති අවසන් යුද්ධයේදී එකළ තාවකාලික මේජර් ජෙනරාල් ශවේන්ද්‍ර සිල්වා එවක යද හමුදාපති සරත් ෆොන්සේකා මඟහැර කෙළින්ම එවක ආරක්ෂක අමාත්‍යාංශ ලේකම් ගෝඨාභය රාජපක්ෂ සමඟ සන්නිවේදනයන් කළ බව ප‍්‍රසිද්ධ කරුණකි.


වත්මන් ජනාධිපති ගෝඨාභය රාජපක්ෂ නොවැම්බර් 19 දින ජනාධිපති ලේකම් කාර්යාලයට ගොස් නිල වශයෙන් වැඩ බාර ගැනීමෙන් පසු ඔහු නිල වශයෙන් හමුවූ ප‍්‍රථම තැනැත්තා වූයේද යුද හමුදාපති ශවේන්ද්‍ර සිල්වාය. එහිදී යුද හමුදාපති ශවේන්ද්‍ර සිල්වා නව ජනාධිපතිවරයාට සුභ පතා යුද හමුදාපතිවරයා වශයෙන් සම්ප‍්‍රදායානුකූලව තිළිණයක්ද පිරිනමා තිබුණි. එම අවස්ථාවට නාවික හා ගුවන් හමුදාපතිවරුන් සහභාගී වී තිබුණද එය කැපී පෙනුණේ නැත.


සමහරවිට සිදුවනවා නම් සිදුවිය හැක්කේ යුද හමුදාපති ශවේන්ද්‍ර සිල්වාට ත‍්‍රිවිධ හමුදා මාණ්ඩලික ප‍්‍රධානී වැනි ඊට වඩා ඉහළ තනතුරක් හෝ ආරක්ෂාවට සම්බන්ධ හෝ ආරක්ෂාවට සම්බන්ධ නැති වෙනත් ඉහළ තනතුරක් ලබාදී ගජබා රෙජිමේන්තුවේම තවත් මේජර් ජෙනරාල්වරයෙකු හමුදාපති තනතුරට පත්කිරිමය. ආරක්ෂාවට අදාල තනතුරු සියල්ල ගජබා රෙජිමේන්තු සාමාජිකයන්ගෙන් පිරවීම ඒ මගින් සිදුකර ගත හැකිය.


වයස අවුරුදු 55 සැපිරීමෙන් 2020 වසරේ විශ‍්‍රාම යෑමට නියමිත මේජර් ජෙනරාල්වරු


( 2019 වසරේ ඉදිරි දිනවල විශ‍්‍රාම යන මේජර් ජෙනරාල්වරු කිහිප දෙනෙකුද 2020 වසරේ විශ‍්‍රාම යන මේජර් ජෙනරාල්වරු කිහිපදෙනෙකුගේ නම් මෙහි සඳහන් නොවේ. *


එන්.ඒ. ධර්මරත්න
එච්.ජේ.එස්. ගුණවර්ධන
ඩබ්ලිව්.ආර්.පී. සිල්වා
එම්. මුදන්නායක
එල්.එම්. මුදලිගේ
එච්.ආර්.එන්. ප‍්‍රනාන්දු
ජී.ජේ.එල්. වඩුගේ
ජී.වී. රවිප‍්‍රිය
ඒ.එම්.ආර්. ධර්මසිරි
ඞී.කේ.ජී.ඞී. සිරිසේන
ටී.එස්. බන්සජයා
කේ.ඒ.ඩබ්ලිව්. කුමරප්පෙරුම
ජී.එබ්ලිව්.ඞී.ඒ. ජයතිලක
කේ.ජේ. ජයවීර
කේ.එච්.පී.පී. ප‍්‍රනාන්දු
ආර්.කේ.බී.එස්. කැටකුඹුර
ඒ.එස්. ආරියසිංහ
ඩබ්ලිව්.ඞී.සී.කේ. කොස්තා
පී.අයි. පතිරත්න
ඒ.ඞී. ඇල්වත්ත
ඒ.එම්.එස්.බී. අතපත්තු
ඒ.අයි. මාරසිංහ