කථානායක කරූ ජයසූරිය පසුගිය දෙසැම්බර් 27 වැනිදා පොලිස් කොමිසමේ නිලධාරීන් තමා හමුවට කැඳවා අතිශයින් වැදත් විමර්ශන කිහිපයක වගකීම් දරන නිලධාරීන් මාරුකර යවන ලෙස බලපෑම් කර තිබෙන බව දෙසැම්බර් 31 දින ‘මව්බිම’ පුවත්පත සිය මුල් පුවත ලෙස වාර්තා කර තිබේ.

‘කථානායක කරූගෙන් පොලිස් කොමිසමට බලපෑම්’ යන සිරස්තලය හා ‘ජනපති අගමැතිගේ අවධානය පිණිසයි’ යන අවධාරණය සහිතව මුල් පිටේ සම්පූර්ණ පිටු භාගයක් වන ලෙස එම ප‍්‍රධාන පුවත පළකර තිබුණි. පුවතට අදාල විස්තර තිබුණේ අනෙක් පිටුවේය.

එහි වැඩිදුරටත් දැක්වුණේ විමර්ශනවලට අදාලව තාවකාලිකව පිහිටුවා ඇති නිලධාරීන් ස්ථීර නොකරන ලෙසත් වැඩබලන තනතුරුවලින් ඉවත් කරන ලෙසත් කථානායකවරයා බලපෑම් කර ඇති බවයි.

එම පුවත පළවූ දිනයේම කථානායක කාර්යාලය නිවේදනයක් නිකුත් කරමින් සඳහන් කළේ මව්බිම පුවත්පතේ එම පුවත සම්පූර්ණයෙන්ම අසත්‍ය බවයි. එම නිවේදනය මව්බිම පුවත්පතට යොමුකළාද නැද්ද යන්න නිශ්චිත නැත.

එසේ වුවද ජාතික පොලිස් කොමිසමේ ලේකම් එස්.ඒ. වීරසිංහ මව්බිම පුවත්පතට පිළිතුරක් යවමින් සඳහන් කර ඇත්තේ එම පුවත සම්පූර්ණ අසත්‍යයක් වන බවත් දෙසැම්බර් 27 වන දින හෝ වෙනත් දිනයක කොමිසමේ නිළධාරීන් හෝ වෙනයම් නිළධාරීන් කැඳවීමක් කථානායකවරයා කර නොමැති බවත්, කිසිදු අවස්ථාවක කිසිදු බලපෑමක් කථානායකවරයා කර නැති බවත්, පුවතේ සඳහන් දෙසැම්බර් 27 දින පොලිස් කොමිසමේ සාමාජිකයන් එහි රැුස්වීම්වලට සහභාගි වෙමින් සිටි බවත්ය.

චම්පික රණවක මන්ත‍්‍රීවරයා අත්අඩංගුවට ගැනීම පාර්ලිමේන්තු සම්ප‍්‍රදායට අනුකූලව සිදු නොවූ බව පමණක් ලිපියක් මගින් කථානායකවරයා කොමිසමට දැනුම්දී ඇති බවය. එම පිළිතුර පළකරමින් මව්බිම පුවත්පත ඊට පසු දින පළකර ඇත්තේ ‘කථානායක බලපෑම් කළේ නෑ, පොලිස් කොමිසමේ ලේකම්’ යනුවෙනුත් ‘අපගේ පුවත තහවුරුයි, මව්බිම’ යනුවෙන් වූ සිරස්තලයන්ය. 

කුමන හෝ න්‍යායපත‍්‍රයක් අනුව ගෙතූ මේ සා විශාල බොරුවක් කීමෙන් පසු අපගේ පුවතේ අඩංගු කරුණුවල අන්තර්ගතය අපි යළිදු තහවුරු කරමු යනුවෙන් කර්තෘ සටහනක් දැමීම ප‍්‍රමාණවත් වන්නේ නැත.

එම පුවත සත්‍යයක් නම් මව්බිම පුවත්පත එකී දින කථානායකවරයාගේ කැඳවීම අනුව ගිය නිළධාරීන්ගේ නම් හෙළිකළ යුතුය. එම හමුව සිදුවූ ස්ථානය හා වේලාව හෙළිදරව් කළ යුතුය. ඒ කිසිදු තොරතුරක් මව්බිම පුවත්පත සතුව නැති බව ඔවුන්ගේ කෙටි වචන කිහිපයේ කර්තෘ සටහනෙන් පෙනේ. එහි තේරුම වන්නේ එම පුවත හිතාමතාම කථානායක කරූ ජයසූරිය ඉලක්ක කර ගනිමින් නිර්මාණය කරන ලද බොරුවක් බවය.

මව්බිම පුවත්පත කරුණු විකෘති කිරීම්වලට හරි දක්ෂය. මෑතක ඊට හොඳම උදාහරණයක් වන්නේ ඝාතනය කරන ලද මාධ්‍යවේදී සන්ඬේ ලීඩර් කර්තෘ ලසන්ත වික‍්‍රමතුංගගේ දියණි අහිම්සා වික‍්‍රමතුංග සිය පියාගේ රූපයක් අතැතිව සිටි ඡුායාරූපයක් විකෘති කර පළකිරීමය. එම විකෘති කිරීම සම්බන්ධයෙන් සමාව ගන්නා ලෙසද වරද නිවැරදි කරන ලෙසද කර්තෘවරුන් ඇතුළු ජ්‍යෙෂ්ඨ මාධ්‍යවේදීන් මව්බිම පුවත්පතෙන් ලිඛිතව කරන ලද ඉල්ලීම ඔවුන් දැමුවේ කුණු කූඩයටය. මව්බිම පුවත්පතේ මෙවැනි අධම භාවිතාවන් රාශියක් ගැන  ඕනෑතරම් උදාහරණ කිව හැකිය. එහෙත් මෙම කෙටි සටහනේ ඊට ඉඩ මදිය.

ජනමාධ්‍ය නොව ජඩ මාධ්‍ය ක‍්‍රියාකරන්නේ ඒ ආකාරයටය. ඔවුන්ට ආචාරධර්ම වැඩක් නැත.  ඕනෑම බොරුවක් සමාජගත කිරීම හෝ  ඕනෑම විකෘත කිරීමක් සිය දේශපාලන න්‍යායපත‍්‍රය අනුව කරන්නට ඔවුන් සූදානම්ය.

කනගාටුවට කරුණ වන්නේ ලංකාවේ මුද්‍රිත මාධ්‍ය ආචාරධර්ම සංග‍්‍රහයේ හිමිකරුවන් වන ශ‍්‍රී ලංකා කර්තෘ සංසදයේ ලේකම්වරයා මව්බිම පුවත්පත්හි කර්තෘ මණ්ඩල අධ්‍යක්‍ෂ වීමය.