ඔක්තෝබර් 26දා මහින්ද රාජපක්ෂ නිතී විරෝධි ලෙස අගමැති ධුරයේ වැඩ බාරගත්තේය. එදින රාත්‍රියේ රාජ්‍ය මාධ්‍ය ආයතන රැසකට ඇතුල් වූ මහින්ද රාජපක්ෂ හිතවාදී පිරිස් එහි බලය අත්පත් කර ගත්තෝය. එලෙස ආයතනයට කඩාවැදුණු පිරිස අතර පහුගිය කාලයේදී විනය පියවරවලට ලක්වූ අයයි. මැදිරිවලට කඩාපැන වැඩසටහන් කාලපරිච්ඡේද වෙනස් කර තිබුණි. හිටපු ආණ්ඩුවේ හිතවාදීන් ලෙස සැලකූ පුද්ගලයන්ට ප්‍රහාර එල්ල කර තිබිණ.
ස්වාධීන රුපවාහිනියේ ප්‍රධාන විධායක නිලධාරී චන්දන තිලකරත්න ‘අනිද්දා’ට අදහස් දක්වමින් පවසා සිටියේ තමා ඔක්තෝබර් 26 වැනිදා රාජකාරි කටයුත්තක් සඳහා වවුනියාවට ගොස් සිටි බවයි. එදින තම රියැදුරාට දූරකථනයෙන් අමතමින් අදාළ කලහකාරි පුද්ගලයන් තමා වවුනියාවේ දමා නිල රථය සමග ස්වාධීන රූපවාහිනියට පැමිණෙන ලෙස දැනුම්දුන් බව ඔහු කීය. තම රියදුරා එසේ නොකළ බවද ඔහු කියයි. රනිල් වික්‍රමසිංහ මහතා නැවත අග්‍රාමාත්‍යවරයා ලෙස පත්වීමෙන් පසුව තමාට නැවත ගොස් ප්‍රධාන විධායක නිලධාරී ධුරය භාර ගන්නා ලෙසට කළ ඉල්ලීමකින් පසුව දෙසැම්බර් 27 වන දින නැවත එම තනතුර භාරගැනීමට ගියත්, ස්වාධීන රූපවාහිනියේ ගේට්ටුව අසල රැඳී සිටි සේවකයන් 30කු පමණ ඔහුට ප්‍රධාන පිවිසුම් දොරටුවෙන් ඇතුල්වීමට නොදී ගේට්ටුව අවහිර කරමින් කලහකාරී ලෙස හැසිරුණු බව ඔහු කියයි. ඒ නිසා ඔහු නැවත හැරී ගොස් තිබේ.
ඒ අතර ඔක්තෝබර් 26 තෙක් ස්වාධීන රූපවාහිනී සේවයේ සභාපතිනියව සිටි තිලකා ජයසුන්දර මහත්මිය නැවත සේවයට වාර්තා කර තිබුණි. ඇය ඔක්තෝබර් 26 වැනිදා ස්වාධීන රූපවාහිනිය තුළ කලහකාරී ලෙස හැසිරෙමින් අනෙකුත් සේවකයන්ගේ රාජකාරියට බාධා එල්ලකළ සේවකයන්ට එරෙහිව විනය පියවර ගැනීමේ තීන්දුවක් ගෙන ඇත.
ඒ අනුව සේවකයන් 13 දෙනෙකුගේ වැඩ තහනම් කර තිබුණි. ඒ දෙසැම්බර් 31 වැනිදාය. එයින් කෝපයට පත් සේවකයන් පිරිසක් සභාපතිනියට හූ තබමින් ස්වාධීන රූපවාහිනියෙන් එලවීමට කටයුතු කර තිබුණි. ස්වාධීන රූපවාහිනියේ පිවිසුම් දොරටුව ඉදිරිපිට අට්ටාලයක් ගසා වැඩ තහනම් කෙරූ සේවකයන් පිරිස උද්ඝෝෂණයක් ආරම්භ කර ඇත. මේ වෙද්දී ස්වාධීන රූපවාහිනියේ සේවකයෝ විවිධ සටන්පාඨ ඔසවාගෙන ස්වාධීන රූපවාහිනිය ඉදිරිපිට සිටිති. ඒ අතර දූෂණ වංචා චෝදනාත් ඇත. එහෙත් ඔවුන්ගේ මූලික ඉල්ලීම වන්නේ ස්වාධීන රූපවාහිනිය ජනාධිපතිවරයාට පවරාගන්නා ලෙස ඉල්ලීමය.
මෙය දේශපාලන වුවමනා මත වරනැගෙන බංකොලොත් සටන්පාඨයක් බව පැහැදිලිය. මේ කණ්ඩායම සටන් කරමින් ඉන්නේ රාජපක්ෂවරුන්ගේ වුවමනාවට බවද පැහැදිලි කාරණයකි. ශ්‍රී ලංකා පොදුජන පෙරමුණේ සංජීව එදිරිමාන්න සමග මේ කණ්ඩායමට සමීප සම්බන්ධයක් ඇති බව ඉතා පැහැදිලි කාරණයකි. ජනවාරි 02 වැනිදා ශ්‍රී ලංකා පොදුජන පෙරමුණේ කාර්යාලයට ගොස් බැසිල් රාජපක්ෂ සමඟ ප්‍රභාත් දුෂ්‍යන්ත නම් වැඩ තහනමට ලක්වූ සේවකයා ඇතුළු පිරිසක් සාකච්ඡා කර තිබුණි.
ස්වාධීන රූපවාහිනියට ආදරයක් ඇත්නම් ඔවුන් ඉල්ලිය යුත්තේ ස්වාධීන රූපවාහිනිය දේශපාලන ඇඟිලි ගැසීම්වලින් තොර අපක්ෂපාතී ආයතනයක් කරන ලෙසය. ආයතනය ඒ පැත්තෙන් මේ පැත්තට මාරු කරන ලෙස නොවේ.
රාජ්‍ය මාධ්‍ය ආයතන සඳහා වඩා ස්වාධීන ආකෘතියක් නිර්මාණය කළ යුතු බව අපේ අදහසය. උද්ඝෝෂකයන් විසින් ස්වාධීන රූපවාහිනියට එල්ලකරන දූෂණ වංචා චෝදනා පිළිබඳව පියවර ගත හැකිවනු ඇත්තේද එවිටය.
යහපාලන ආණ්ඩුව එවැන්නක් කළේ නැත. සුපුරුදු ලෙස තම ආණ්ඩුවේ හොරණෑවක් බවට රාජ්‍ය මාධ්‍ය පත් කරගත්තේය. සාපේක්ෂව ලිබරල් අදහස් තිබුණු පුද්ගලයන් තනතුරුවලට පත්වූ බව ඇත්තය. එසේ වුව ව්‍යුහයක් ලෙස මේවා ස්වාධීන වුණේ නැත. එවැනි තත්ත්වයක් ඇති කිරීමට උත්සාහ කළේද නැත.
ඒ සියල්ල මැද එක් කාරණයක් පැහැදිලිව දකින්නට තිබුණි. තිලකා ජයසුන්දර මහත්මිය මෑත කාලයේදී රාජ්‍ය මාධ්‍ය ආයතනයකට පත්කරන ලද යහපත්ම පත්කිරීමක් විය. මීට පෙර ආණ්ඩුවේ බලවතුන් විසින් ස්වාධීන රූපවාහිනියට ඇතුළුවෙන්නට උත්සාහ කළ මොහොතේ තිලකා ජයසුන්දර දැඩිව එරෙහිවී තිබුණි.
රාජ්‍ය මාධ්‍ය චණ්ඩින්ගේ තිත්පොලවල් නොවිය යුතුය. රාජ්‍ය මාධ්‍ය ආයතන දේශපාලන හෙංචයියන්ගේ ගුහා නොවිය යුතුය. ඔක්තෝබර් 26 වැනිදා සිට රාජ්‍ය මාධ්‍ය ආයතනවල චණ්ඩිකම් පෑ සියලුදෙනාට නීතිය ක්‍රියාත්මක විය යුතුය. ඔවුන් එම කාලයේදී නිල පත්වීම් නොලබා රාජ්‍ය මාධ්‍ය ප්‍රාණඇපයට ගෙන තිබුණි. තිලකා ජයසුන්දර අනෙක් රාජ්‍ය මාධ්‍ය ආයතනවල ප්‍රධානීන්ද ආදර්ශයට ගතයුතු බව අපේ අදහසය. ජයසුන්දර සභාපතිනියද තම දැඩි ස්ථාවරයේ කටයුතු කළ යුතුය. කෙසේ වෙතත් අප සිහිපත් කරන වැදගත්ම කාරණය වන්නේ රාජ්‍ය මාධ්‍ය දැන්වත් දේශපලන ගුහා නොකළ යුතු බවය. මේවා ස්වාධීන කළ යුතුය. අප සියලුදෙනා බදුගෙවන්නටත් දේශපාලන පක්ෂවල හෙංචයියන් ජෝගි නටන්නටත් රාජ්‍ය මාධ්‍ය පැවතිය යුතු නැත. දැන් ස්වාධීන රූපවාහිනිය ඉදිරිපිට නටන නාඩගමටත් නැවතීමේ තිත තැබිය යුතුය.■

■ හංසි මානවඩු