ආර්.ජී. පොඩිමැණිකේ – නැගෙනහිර එක්සත් කාන්තා සංවිධානය

 

ඔබේ සංවිධානය වැඩ කරන්නේ කුමනාකාරයේ ප්‍රජාවන් එක්කද?

නැගෙනහිර එක්සත් කාන්තා සංවිධානය ත්‍රිකුණාමල දිස්ත්‍රික්කයේ ප්‍රාදේශීය ලේකම් කොට්ඨාස හතරක වැඩ කරමින් ඉන්නවා. කන්තලේ, තඹලගමුව, කින්නියා හා මොරවැව කියන ප්‍රාදේශීය ලේකම් කොට්ඨාස හතරේ. කාන්තාවන් එක්ක වැඩ කරන ගමන් අපි තරුණ, තරුණියන් එක්ක හා ළමයින් එක්ක වැඩ කරනවා. අපි වැඩ කරන ප්‍රදේශීය ලේකම් කොට්ඨාස හතරෙන් කන්තලේ, තඹලගමුව හා මොරවැව කොට්ඨාස තුනේම දෙමළ, මුස්ලිම් හා සිංහල ජන වර්ග තුනම ජීවත් වෙනවා. කින්නියාවල දෙමළ හා මුස්ලිම් අය විතරයි ජීවත් වෙන්නේ.

 

කාන්තා සංවිධානයක් ලෙස කරන්නට තියෙන කාර්යභාරය මොකක්ද?

අපේ සමාජයේ තිබෙන ප්‍රශ්නවලින් බොහෝමයක් අවසානයේ කාන්තාවන්ගේ ප්‍රශ්නයක් බවට පත්වෙනවානේ. ළමයින්ගේ ප්‍රශ්නයත්, පිරිමින්ගේ ප්‍රශ්නයත් අවසානේ කාන්තාවන්ගේ ප්‍රශ්නයක්නේ. ඒ නිසයි අපි කාන්තාවන් මූලිකව වැඩ කරමින් ඉන්නේ. මූලිකව අපි කරන්නේ දැනුවත් කිරීම්. විවිධ තේමාවන් ඔස්සේ දැනුම්වත් කිරීම් කරනවා. කාලීන ප්‍රශ්න පිළිබඳව දැනුම්වත් කරනවා. සමාජයේ පවතින ප්‍රශ්නයක් කාන්තාවන්ගේ ප්‍රශ්නයක් වෙන්නේ කොහොමද, රටේ ප්‍රශ්නයක් වෙන්නේ කොහොමද කියලා අපි දැනුවත් කරනවා. ඉතිරිකිරීම් හා ණය පිළිබඳව කියලා දෙනවා. ආදායම් උත්පාදන පුහුණු දෙනවා. ඊට අවශ්‍ය පසුබිම හදලා දෙනවා. ස්ත්‍රී පුරුෂ සමාජභාවය පිළිබඳව දැනුවත් කරනවා. දේශපාලනය පිළිබඳ දැනුවත් කරනවා.

 

දේශපාලනය පිළිබඳ තව දුරටත් පැහැදිලි කළොත්?

පහුගිය කාලේ අපේ කාන්තාවන් 27 දෙනෙක් කන්තලේ ප්‍රදේශීය සභාවට ස්වාධීන කණ්ඩායමකින් ඡන්දේ ඉල්ලුවා. තඹලගමුව හා කින්නියාවලට පක්ෂවලින් කාන්තාවන් තුන් දෙනෙක් දැම්මා. අපට දිනන්න බැරි වුණා. එහෙත් අදහස් සමාජගත කිරීම පැත්තෙන් විශාල වෙනසක් කරන්න අපට හැකි වුණා. අනික අපි කොළඹ විශ්ව විද්‍යාලයේ ආචාර්ය ධම්ම දිසානායකගේ සහභාගීත්වයෙන් කාන්තාවන්ගේ දේශපාලන දැනුම ඉහළට ගෙන ඒම සඳහා දේශපාලන විද්‍යා පීඨයක් පවත්වාගෙන යනවා. එහි තොරාගත් කාන්තාවෝ 40 දෙනෙක් දේශපාලනය පිළිබඳ අවුරුදු තුනක උසස් පාඨමාලාව හදාරමින් සිටිනවා.

 

ඔබේ සංවිධානය ගොඩනගා තිබෙන ‘බලපෑම් කණ්ඩායම්’ කුමන සමාජ මෙහෙවරක්ද ඉටු කරමින් සිටින්නේ?

අපි දැනට ගම් 34 ක වැඩ කරනවා. ඒ හැම ගමකම අවම වශයෙන් බලපෑම් කණ්ඩායමේ කාන්තාවන් දෙදෙනෙක්වත් සිටිනවා. ලොකු ගමක් නම් තුන් දෙනෙක් ඉන්නවා. ඒ අයට මූලික මිනිස් අයිතිවාසීකම් ගැන, නීතිය ගැන ප්‍රමාණවත් දැනුමක් ලබාදීලයි තිබෙන්නේ. ඒ දැනුමෙන් ඔවුන් තමන්ගේ ගමට, සමාජයට විශාල සේවයක් කරනවා. ඔවුන් ඒ ඒ ගම්වල සිදුවෙන දේවල් ගැන අවධානයෙන් සිටිනවා. අපි සංවිධානයක් විදිහට ඒ අයට දැනුම ශක්තිය ලබා දෙනවා. ඒ අය ස්වාධීනව තමන්ගේ වැඩ කොටස කරගෙන යනවා. ගමේ කාගේ හරි ළමයෙක්ට ළමා අපයෝජනයක් වුණහම ඒ ගමේ ඉන්න අපේ සමාජිකයින් වහාම ඒවාට මැදිහත් වෙනවා. නීතිමය පැත්තෙන් මැදිහත් වෙන්න ඕන නම් ඒ පිළිබඳව අවශ්‍ය කටයුතු කරනවා. උද්ඝෝෂණයක් කරන්න ඕන නම් එයට නායකත්වය දෙනවා.

 

ඔබේ සංවිධානය වැඩ කරමින් සිටින්නේ යුද්ධයට සෘජුව මුහුණ පෑ දෙමළ, මුස්ලිම්, සිංහල ප්‍රජාවක් සමග නේද?

ඔව්. කාන්තාවන්ට තමයි යුද්ධය වැඩිපුරම බලපෑවේ. මනුස්සයා ඝාතනය වෙලා තනි වුණාම කාන්තාවට තමයි ළමයි එකක ජීවිතේට මුහුණ දෙන්න සිද්ධ වුණේ. ගෙදර පුතෙක් ඝාතනය වුණා නම්, අතුරුදහන් වුණා නම් එහි පීඩාවත් වැඩිපුර දැනෙන්නේ අම්මාට. සෘජුව යුද්ධයට මුහුණ දුන්නු අය ලෙස අතුරුදන් වීම්, පොලිසියෙන් රැගෙනයාම් වගේ දේවල්වලටත් මේ ප්‍රදේශයේ කාන්තාවන් තමයි මුහුණ දුන්නේ.

අපේ සංවිධානයේ තීන්දු තීරණ ගන්න විධායක කමිටුව හැදිලා තියෙන්නේ ගමින් ගමට අපි හදලා තියෙන කණ්ඩායම්වල සභාපතිනියන්ගේ එකතුවෙන්. දෙමළ, මුස්ලිම්, සිංහල තුන්ගොල්ලම විධායක කමිටුවේ ඉන්නවා. භාෂා දෙකෙන්ම ඉතාම ලස්සනට විධායක කමිටුවේ වැඩ ටික ඒ අය කරගෙන යනවා. කිසිම ජන කොටසකට පුද්ගලයෙකුට අසාධාරණයක් නොවෙන විදිහට. යුද්ධය නිසා දෙමළ, මුස්ලිම්, සිංහල බේදයක් නැතුව සියලු ජනකොටස් පීඩාවට පත් වූ බව ඔවුන් හැමෝම අද පිළිගන්නවා.

 

දෙමළ, මුස්ලිම්, සිංහල ජනකොටස් අතර සංහිඳියාව ඇති කිරීම ගැන ඔබේ අත්දැකීම?

යුද්ධය නිසා මේ ප්‍රදේශවල ජන කොටස් අතර විශාල වෛරයක් ගොඩ නැගිලා තිබුණා. සිංහල අය දෙමළ අයට වෛර කරනවා. දෙමළ අය සිංහල අයට වෛර කරනවා. මුස්ලිම් අයට වෛර කරනවා. ඔය වගේ තත්ත්වයක් නිර්මාණය වී තිබෙනවා. අපි කරමින් සිටින ක්‍රියාකාරකම් නිසා අපේ කණ්ඩායම් තුළ සංහිඳියාව ගොඩනගන්න අපිට හැකි වී තිබෙනවා. අපේ සංවිධානය තුළ දෙමළ, මුස්ලිම්, සිංහල අය එකට ඉතාම සහෝදරත්වයෙන් වැඩ කරමින් සිටිනවා. මූතූර්වල රිසානාගේ ප්‍රශ්ණය වෙලාවේ සිංහල කාන්තාවන් ගිහිල්ලා ඒ ප්‍රශ්නයට උරදීලා වැඩ කළා. ඒ සහෝදරත්වය රටට පෙන්නන්න නෙමේ. ඒ අයගේ හදවතින්ම තමයි මැදිහත් වුණේ. රජයෙන් සාමය හා සංහිදියාව කියලා කරන වැඩසටහන්වලින් බිම් මට්ටමේ ජන කොටස්වලට පණිවිඩයක් දෙන්න බැරි වෙලා තියෙන බව අපි හඳුනාගෙන තියෙනවා. රජය ඒ දේවල් එහෙම කරපුවාවේ. අපි වගේ ගම්වල ඉන්න පුංචිම මිනිස්සු අතර සංහිඳියාව ගොඩනගන්නටත්, රටේ ලෝකයේ සිදුවෙනමින් තිබෙන්නේ මොනවාද කියලා පැහැදිලි කර දෙන්නටත් අපි කටයුතු කරමින් සිටිනවා.■

ප්‍රියන්ජිත් ආලෝකබණ්ඩාර