කප්පම් ගැනීම සඳහා පැහැරගෙන ගොස් ඝාතනය කරන ලද තරුණයන් 5 දෙනා පිළිබඳව ඔවුන් ඝාතනය කිරීමට පෙර එවක නාවික හමුදාපතිවරයා වශයෙන් කටයුතු කළ වසන්ත කරන්නාගොඩ දැන සිට ඇති බව ඔහු අපරාධ පරීක්ෂණ දෙපාර්තමේන්තුවට ලබාදෙන ලද ප‍්‍රකාශයක් මගින් තහවුරු වී ඇත.

ඔක්තෝම්බර් 09වැනි දින අපරාධ පරීක්ෂණ දෙපාර්තමේන්තුව අධිකරණයට ඉදිරිපත් කළ බී වාර්තාවක මෙම කරුණු අඩංගු වෙයි. එහි සඳහන් අන්දමට අධිකරණ නියෝගයකට අනුව‍සෙැප්තැම්බර් මස 26 සහ 27 යන දින දෙක තුළ වසන්ත කරන්නාගොඩ මහතා අපරාධ පරීක්ෂණ දෙපාර්තමේන්තුව වෙත පැමිණ ප‍්‍රකාශයක් ලබා දී ඇත. එහිදී ඔහු ප‍්‍රකාශ කර ඇත්තේ කොමදෝරු බණ්ඩාර සහ කපිතාන් රණසිංහ යන අයගෙන් ලැබුණු තොරතුරු මත 2009 මැයි 10 දින එවක නැගෙනහිර ආඥාපති සුසිත් වීරසේකර පුද්ගලිකවම ත‍්‍රිකුණාමලයේ ගන් සයිඞ් භූගත කඳවුර වෙත යවා පරීක්ෂා කළ බවය. එහිදී අපරාධ පරීක්ෂණ දෙපාර්තමේන්තුව විමසා ඇත්තේ 2009 මැයි 28 වැනි දින ලූ‍තිනන් කොමදෝරු සම්පත් මුණසිංහට විරුද්ධව මෙම පැහැරගෙන ගොස් කප්පම් ගැනීමේ සිද්ධිය පිළිබඳව පොලිසියට කරනු ලැබූ පැමිණිල්ලේ මෙම කරුණ සඳහන් නොකළේ ඇයි යන්න ය. එහිදී ඔහු ප‍්‍රකාශ කර ඇත්තේ සුසිත් වීරසේකර එම ස්ථානයේ තරුණයින් නැහැ යැයි ප‍්‍රකාශ කළ නිසා නැති දෙයක් පිළිබඳව වාර්තා කිරීමෙන් නීතිමය ප‍්‍රශ්නයක් ඒවි යැයි තමන්ගේ නීති උපදේශකයා කල්පනා කරන්නට ඇති බවයි.

මෙම තරුණයින් ඝාතනය වන්නට ඇත්තේ 2005 මැයි 21 දා බව සාධාරණ කරුණු අනාවරණය වන්නේ යැයි අපරාධ පරීක්ෂණ දෙපාර්තමේන්තුව ප‍්‍රකාශ කරයි. ඒ අනුව වසන්ත කරණ්නාගොඩ හිටපු නාවික හමුදාපතිවරයා මෙම තරුණයින් ගන්සයිඞ් කඳවුරේ සිටිනවා දැයි පරීක්ෂා කිරීමට ඉහත නිළධාරියා එහි යවන විටද එම තරුණයින් ජීවත්ව සිට ඇත. ඒ අනුව මෙම තරුණයින් ඝාතනය වන්නට පෙර වසන්ත කරන්නාගොඩ දැන සිට ඇති බව අපරාධ පරීක්ෂණ දෙපාර්තමේන්තුව අධිකරණයට කරුණු වාර්තා කරමින් සඳහන් කර ඇත.

මෙම ඝාතනයන් සහ කප්පම් ගැනීමට අදාළව නාවික හමුදා නිළධාරීන් 15 දෙනෙකු සැකරුවන් වී සිටින අතර එයින් 10වැනි සැකකරු පමණක් තවමත් ඇප නොලබා රක්ෂිත බන්ධනාගාරයේ සිටී. මෙම සැකකරුවන් 15 දෙනා අතර හිටපු නාවික හමුදාපති වසන්ත කරන්නාගොඩ, වර්තමාන ආරක්ෂක මාණ්ඩලික ප‍්‍රධානී රවීන්ද්‍ර විජයගුණරත්න, ඇතුලූ‍ එවක නාවික හමුදාවේ සිටි ඉහළ නිළධාරීන් රැුසක් සිටී.