ජනාධිපතිවරණයක් ඕනෑ
කථිකාචාර්ය අතුල විතානවසම්

ව්‍යවස්ථාවක් උල්ලංඝනය කිරිම දෝෂාභියෝග යක් ගේන්න තරම් බරපතළ වැරුද්දක්. ඒ වැරැද්ද කරපු ජනාධිපතිවරයා තව දුරටත් මේ ධුරය නොදැරිය යුතුයි. මොකද ව්‍යවස්ථාවට අනුවම ව්‍යවස්ථාව උල්ලංඝණය කිරීම දෝෂාභියෝගය සඳහා හේතුවක්.
සජිත් ප්‍රේමදාස කියා තිබෙනවා ජනාධිපතිවරයාව ඔවුන් ආරක්ෂා කරනවා කියලා. ඒත් ඇත්තටම මේ වෙලාවේ කල යුත්තේ සජිත් ප්‍රේමදාස වගේ මිනිස්සුන්ව නොමග යවන කථා කියන එක නෙවෙයි. මෛත්‍රීපාල සිරිසේන ජනාධිපතිවරයාව කිසිදු පුද්ගලයෙක් තව දුරටත් ආරක්ෂා කල යුතු නැහැ.
ඒත් ප්‍රායෝගිකව දෝශාභියෝගයක් ගෙන ඒම කියන්නේ හිතලු‍වක් වගේ වැඩක්. තුනෙන් දෙකක ඡන්දයක් ලබා ගන්න එක අභියෝගයක්. එහෙත් දැන් තියෙන තත්ත්වය අනුව නීතීයට අනුවයි, සදාචාරයට අනුවයි දෙකම මේ ජනාධිපතිවරයා එම ධුරයට සුදුසු නැහැ. ඒ නිසා ඔහු කල යුත්තේ ජාතියෙන් සමාව ගෙන රටේ ජනාධිපතිධුරයෙන් ඉවත්ව යැමයි.
ඒත් අපටට ඉන්නේ ලැජ්ජාවක් නැති ජනාධිපතිවරයෙක් නිසා ඔහු ඉවත්වන්නේත් නැහැ. දැන් සමහරුන් ජනාධිපතිවරයාගේගේ මොලේ පරික්ෂා කල යුතු බව කියනවා.ඔහු පාර්ලිමේන්තු මැතිවරණයක් පිළිබඳව කතා කළත් සියළු කාරණා සලකා බලද්දී අපට අවශ්‍ය ජනාධිපතිවරණයක්.■

ජනපතිව විශ්වාස නැහැ
සිවිල් ක්‍රියාකාරික රාජා උස්වැටකෙයියාව

ජනාධිපතිවරයාට 2019 ජනවාරි 08 වැනිදායින් පස්සේ ජනාධිපතිවරණයක් කැඳවන්න ව්‍යවස්ථානුකූලව පුලු‍වන්. වසර පහක් යනතුරු විධායක ජනාධිපති ධූරයේ කටයුතු කරන්නට ජනාධිපතිවරයාට බලයක් තියෙන බව ඇත්ත. එහෙත් ජනාධිපතිවරයා විසින් පහුගිය වකවානුවේදී කරපු ප්‍රජාතන්ත්‍ර විරෝධී ක්‍රියාවන් අපිට අමතක කරන්න බැහැ. රටේ ජනතාවට ජනාධිපතිවරයා කෙරෙහි යම් මට්ටමක විශ්වාසයක් තිබුණා නම් ඒක සම්පුර්ණයෙන්ම මේ වන විට බිඳවැටිලා තියෙන්නේ.
ජනාධිපතිවරයාට 2015 ජනවාරි 08 වෙනිදා ලැබුණ ජනවරම එතුමා විසින්ම සුණුවිසුණු කරලා දාලා තියෙනවා. මා හිතන විදියට කිසිම දේශපාලන පක්ෂයකටවත් ඔහු පිළිබඳ විශ්වාසයක් තැබිය නොහැකියි. පාර්ලිමේන්තුවේ 225 ම අත්සන් කළත් අගමැතිධූරය ලබානොදෙන බවට ඔහු කළ ප්‍රකාශය දිහා බලන්න. මේවා හරිම බරපතළයි. ඔහු කිසිදාක නොකරන්නේයැයි කී දෙයක් ඔහු විසින්ම කරනවා. ඊට පස්සේ කියනවා මම කිවේ පෞද්ගලික මතයක් කියලා.
රනිල් වික්‍රමසිංහ මහත්තයා දෙසැම්බර් 16 වෙනිදා නැවත දිවුරුම් දෙන අවස්ථාවේ ඔහු කල කතාව ඇහුවාම, ඕනැම පුද්ගලයෙකුට තේරුම් ගන්න පුළුවන් රනිල් වික්‍රමසිංහ ඇතුළු එජාපය එක්ක සුහදව වැඩකටයුතු කිරිමට ඔහුට කිසිදු වුවමනාවක් නැති බව. ඔහුගේ එම කතාවේදි එජාපය ඇතුළු අනෙකුත් පක්ෂවලට සහ සිවිල් සංවිධාන වලට බරපතළ චෝදනා ඔහු විසින් එල්ල කරපු ආකාරය දකින්න පුලු‍වන්. ඔහු එම සංවිධාන හැඳින්වුවේ රටට වින කරන සංවිධාන විදියට. එහෙත් ඔහු ඒ සංවිධාන එක්කම ගිවිසුමක් අත්සන් කරලා ජනාධිපතිවරණයේදී ඒ සංවිධානවල සහාය තමන්ට ලබාගත්තා. ඒ සංවිධාන පාවාදීම අතිශය නිර්ලජ්ජිත ක්‍රියාවක්. ඔහුට ඡන්ද ලබාග ැනීම වෙනුවෙන් පෙනී ඉඳපු සංවිධාන විවේචනය කරමින්, ඒ සංවිධානවල ඡන්දයෙන් ධූරයේ රැඳී ඉන්නට ඔහුට කිසිම අයිතියක් නැහැ.■

එකම විකල්පය ජනාධිපතිවරණය
සිනමාවේදී චින්තන ධර්මදාස


මේ වෙද්දි අපිට ඉතිරිවෙලා තියෙන එකම විකල්පය තමයි ජනාධිපතිවරණය. මොකද ජනාධිපතිවරයා ව්‍යවස්ථාව උල්ලංඝනය කරලා තියෙනවා. ජනමතය පාමවාදීලා තියෙනවා. ඔහු කළේ ආණ්ඩු පෙරළීමේ කුමන්ත්‍රණයක් නෙවෙයි. ව්‍යවස්ථාව උල්ලඝණය කරමින් ,අගමැතිවරු පත් කරමින්, ගැසට් ගහමින් රාජ්‍ය කුමන්ත්‍රණයක් කළේ. මේක බරපතළයි.
මිනිස්සුට මේ වෙනකොට තියෙන ප්‍රශ්නය තමයි මේ ජනාධිපතිවරයා යටතේ තව දුරටත් රට පාලනය වෙන්න පුළුවන්ද කියන එක. මේක විධායක බලතල තියෙන ජනාධිපති ධුරයක්. ඒක නිසා ඇත්තටම ලංකාවට අවශ්‍ය ඊලග පියවර වන්නේ විධායක ජනාධිපතිධුරය අහෝසි කිරීම.
එහෙත් මෛත්‍රීපාල සිරිසේන ජනාධිපතිවරයා යටතේ ඒ වැඬේ සිද්ධ වෙන්නේ නැහැ. ඔහු බලන්නේ මොන ගැටේ ගහලා හරි ඔහුගේ ධූරය ආරක්ෂා කරගන්න. ඒ අහෝසි කිරීම සඳහා ජනාධිපතිවරණයක් ඉල්ලීමේ අවශ්‍යතාවයක් තියෙනවා. කෙනෙක්ට අහන්න පුලු‍වන් මහ මැතිවරණයකින් තුනෙන් දෙකක බලයක් ලබාගෙන විධායක ජනාධිපති ක්‍රමය අහෝසි කරන්න පුලු‍වන් නේද කියලා. එහෙත් මේ ජනාධිපතිවරයා සිටින තෙක් ඒක කරන්න බැරි බව පැහැදිළි කාරණයක්.
අනෙක මේ වෙලාවේ කුමන්ත්‍රණයක් කරපු අයට දඬුවම් කරන්නත් නව ජනාධිපතිවරයෙක් අවශ්‍ය වෙනවා. මොන පක්ෂයේ වුණත් බලයට ආවට පස්සේ එක එක ඩීල් දාගන්නවා. ඒක අලු‍ත් කාරණාවක් නෙවෙයි. සජිත් ප්‍රේමද්‍රස ප්‍රකාශයක් කලා ජනාධිපතිවරයාට දෝෂාභියෝගක් ගේන්නේ නැහැ කියලා. මම හිතන විදියට ඔහු එහෙම ප්‍රකාශයක් කලේ ජනාධිපතිවරයා ඉදිරියේ ලකුණු දාගන්න වෙන්න ඇති. එහෙත් මේ වෙලාවේ දෝෂාභියෝග යක් ගෙන ඒම අත්‍යාවශ්‍ය බවත් කියන්නට ඕනෑ. දෝෂාභියෝගයක් දිනනවාද නැද්ද නෙවෙයි දැන් තියෙන ප්‍රශ්ණය. මේ ජනාධිපතිවරයා කල ප්‍රජාත්‍රන්ත්‍ර විරෝධි වැඩ ගැන විරෝධය පළ කරන්නයි ඕනෑ. දෝශාභියෝගයක් ගේන එක ප්‍රජාත්‍රන්තවාදය වෙනුවෙන් හිට ගත්ත පක්ෂවල වගකීමක්.■

ඡන්දයක් ඉල්ලන්නේ එයාමයි
ගී පද රචක රවී සිරිවර්ධන

ලංකාවේ ප්‍රධාන පුරවැසියා තමයි මහජන ඡන්දයෙන් පත්වන ජනාධිපතිවරයා. ඔහුට රටේ මුලික නීතිය සුරක්ෂිත කරන්නට වගකීමක් තියෙනවා. මේ වෙනකොට මේ ජනාධිපතිවරයා රටේ මුලීක නීතිය උල්ලංඝණය කොට රටේ ජනතාවට මුලික අයිතිවාසිකම් අහිමි කළා යැයි රටේ උත්තරීතරම ආයතනය වන ශ්‍රේෂ්ඨාධිකරණය ඉතා පැහැදිලිවම කියලා අවසන්.
ලැජ්ජයි. දැන් ලංකාවේ ඉන්නේ රටේ ව්‍යවස්ථාව උල්ලංගණය කරපු, පාර්ලිමේන්තු ප්‍රජාත්‍රන්තවාදය අමු අමුවේ විනාශ කරපු ජනාධිපතිවරයෙක්. කොහෙත්ම මේ ඉන්නේ මේ මොහොතේ ජනතාව විසින් තෝරා පත් කරගත්ත ජනාධිපති නෙවෙයි. දැන් ඔහු මන්තරයක් වගේ මතුරන්නේ ඡන්දයක් ඕනෑ කියන එක. ඉතින්, ඡන්දයක් ඉල්ලන්නේ ඔහු විසින්මයි. ඔහුට පුලු‍වන් ජනවාරි අටවැනිදායින් පස්සේ ජනාධිපතිවරණයක් පවත්වන්න.

මම විශ්වාස කරනවා, ඉතා පැහැදිලිවම ජනමතය විමසිය යුත්තේ ජනාධිවරයා සම්බන්ධවයි. මොකද අද වෙනකොට පාර්ලිමේන්තුවේ කිසි අර්බුදයක් පේන්න නැහැ. එක් කණ්ඩායමක් විසින් බහුතරයක් පෙන්නුම් කරමින් ස්ථාවරබව පෙන්නුම් කලා. එබඳු පාර්ලිමේන්තුවක් සම්බන්ධයෙන් ජනමත විමසීමකට යන්න වුවමනාවක් නැහැ. ඇත්තටම දැන් අර්බුදය තියෙන්නේ ව්‍යවස්ථාදායකයේ නෙවෙයි. විධායකයේ.
මම විශ්වාස කරනවා විධායක ජනාධිපති ධුරය අහෝසි කල යුතුයි කියලා. මේ තනතුරු අතිශයින්ම භයානක තනතුරක්. පාර්ලිමේන්තුවට පනතක් ගෙනල්ලා මේ මොහොතේම සියළු පක්ෂ එකතු වෙලා විධායක ජනාධිපති ධුරය අයින් කල යුතුයි. ඒක කරන්න බැරිවුණොත් ජනාධිපතිවරණයක් පවත්වන්න ඕනෑ.■

ජනාධිපතිවරු ඇති
රංගන ශිල්පිනි කෞශල්‍යා ප්‍රනාන්දු

ජනාධිපතිවරයා විසින් රටේ නීතිය ගැන තකන්නේ නැතිව අත්තනෝමතිනක විධියට හැසිරුණු නිසා අපේ රට අවුරුදු දෙකකින් විතර පසුපසට ගියා. කිසිම දෙයක් රටේ සිද්ද වුනේ නැහැ. රට ව්‍යාකූල වුනා. ජනාධිපතිවරයා කෙරූ ඒ ක්‍රියාව පිළබඳව පාපෝච්චාරණයක්වත් ඔහු විසින් සිදු කල යුතුයි. ඔහු මේ වැරුද්ද කලා කියලා පිළිගත යුතුයි. ඇත්ත වශයෙන්ම ඔහු ජාතියෙන් සමාව ඉල්ලන්න ඕන.
හැබැයි පහුගිය මාස දෙක ගැන පොඩි කාරණයක් කියන්න ඕනෑ. ජනාධිපතිවරයා විසින් රටේ මුලික නීතීය කඩ කරපු වෙලාවේ රටේ ජනතාව ජන අරගල කලා. ඒකට පොලිසියෙන්වත් කිසිදු බාධාවක් එල්ල වුනේ නැහැ. අපි ඒකට පොලිසියට ආචාර කරනවා. රටේ වාසනාවට එහෙම වුනේ. නැතිනම් ජනාධිපතිවරයාගේ වැඩ හින්දා ලොකු ව්‍යසන්‍යක් මේ රටේ ඇති වෙන්න ඉඩ තිබුණා. ඇත්තටම මේ රට යුද්ධ පිටියක් කරන්න වුවමනා බලය තියෙන අයට.
කොහොම වුණත් පහුගිය කාලයේදි ජනතාවගේ තොරතුරු දැනගැනීමේ අයිතිය සීමා වුණා. මාධ්‍ය විසින් ජනතාවට බොරු තොරතුරු ප්‍රචාරය කළා. නීතිය ගැන වැරදි කතා කීවා. ඒ බොහොමයකට ජනාධිපතිවරයා වගකිව යුතුයි. රටට තවදුරටත් ජනාධිපති ක්‍රමය අවශ්‍ය නැහැ. මමනම් කියන්නේ තවත් ජනාධිපතිවරණයක් පැවැත්වීම වෙනුවට විධායක ජනාධිපති ක්‍රමය අහෝසි කරලා දාන්න ඕනෑ බවයි. විසිවෙනි සංශෝධනය කෙසේ හෝ සංශෝධනය කරගන්න ඕනෑ. විධායක ජනාධිපතිවරු නිසා අපේ රටේ ජනතාව දුක් වින්දා ඇති.■

■ රේඛා නිලු‍ක්ෂි හේරත් / තරිඳු උඩුවරගෙදර