ජවිපෙ දේශපාලන මණ්ඩල සභික
කේ.ඞී. ලාල්කාන්ත

21වැනිදා එල්ලකළ ත‍්‍රස්තවාදී ප‍්‍රහාරයෙන් මාසයකට පස්සේ රට තියෙන තැන ගැන ඔබේ අදහස මොකක්ද?


රට සම්පූර්ණයෙන්ම වෙනස් වෙලා තියෙන්නේ. හැම කෙනෙකුටම අලූතෙන් හිතන්න බලකරලා තියෙනවා. ඉස්ලාම් ආගමික ප‍්‍රජාවටත් හිතන්න බලකරලා තියෙනවා. සිංහල බෞද්ධ ජනතාවටත් අලූතෙන් හිතන්න බලකරලා තියෙනවා. දෙමළ ප‍්‍රජාවටත් අලූතෙන් හිතන්න තියෙනවා. ශ‍්‍රී ලාංකිකයො විදියට අපි හැමෝටම අලූතින් හිතන්න වෙනවා. මේ ඇතිවෙච්ච තත්වය පාවිච්චි කරලා සිංහල බෞද්ධයන්ව තමන්ගේ පටු වුවමනාවලටත් දේශපාලන බල වුවමනාවලටත් පාවිච්චි කරමින් දේශපාලනය කරන අය ඉන්නවා. එයාලා සුපුරුදු ලෙස මේ සිදුවීම් තමන්ට ඕනෑ විදියට පාවිච්චි කරන්න බලනවා.

කුරුණෑගල දොස්තරගේ සිද්ධිය නැතිනම් වෙන සිද්ධියක් හරි ඉදිරියට ගන්න ඔවුන් උත්සාහ කරනවා. මාධ්‍ය ආයතනත් ඒ සඳහා උඩගෙඩි දෙමින් ඉන්නවා. ඊළඟට තමන්ගේ දේශපාලන බංකොලොත්භාවය වහගන්න උත්සාහ කරන ඇතැම් පුද්ගලයන් ඊළඟට එන ආණ්ඩුවත් එක්ක සම්බන්ධ වෙන්නට තමන්ට බලයක් හදාගැනීමේ අරමුණෙන් ඒවාට පනිනවා. මේ විදියට විවිධ අය මේ සිදුවීම තමන්ගේ බල ව්‍යාපෘතිවලට මේ ත‍්‍රස්ත ප‍්‍රහාරය පාවිච්චි කරනවා. ඒවා නොදන්න සාමාන්‍ය ජනතාව මේවා පස්සේ දුවනවා. ඒත් ශ‍්‍රී ලංකාවේ වාසනාවට සිංහල, දෙමළ, මුස්ලිම් ජනතාව අතර අන්තවාදයත් එක්ක දුවන්නේ නැති ප‍්‍රජාවක් ඉන්නවා.


මිනුවන්ගොඩ හා කුරුණෑගල යම් ප‍්‍රදේශවල ඉතාම සුළුතර සිංහල ප‍්‍රජාවක් මුස්ලිම් ප‍්‍රජාවට එල්ල කරන ලද ප‍්‍රහාරය හමුවේ 1983 කළු ජූලිය වගේ තත්වයකට රට යන්න ඉඩ තිබුණා. ඒත් අර වගේ ජනතාවක් ලංකාවේ ඉන්න හින්දා මේ ප‍්‍රතිගාමී බලවේගවලට අද ඒ වැඬේ කරන්න බැහැ. ඒක තමයි රටේ වාසනාව. ඒ තත්වෙට රට ගෙනියන්න එදා පුළුවන් වුණා නම් මැදපෙරදිග හිටපු ලක්ෂ ගාණක ජනතාවට ආයේ ලංකාවට එන්න සිද්ධවෙනවා.

ලංකාවෙන් අපනයනය කරන දේවලට බලපෑමක් වෙන්න ඉඩ තිබුණා. දකුණු ආසියානු කලාපයේ ගත්තත් බංග්ලාදේශය, පාකිස්ථානය, ඇෆ්ගනිස්ථානය, මාලදිවයින, ඉන්දියාවේත් විශාල ජනතාවක් මුස්ලිම්වරුන්. ඔවුන් ශ‍්‍රී ලංකාවත් එක්ක දැවැන්ත විරසකයකට යන්න ඉඩ තිබුණා 13 වැනිදා ප‍්‍රහාරය දැවැන්ත වුණා නම්. එදා ප‍්‍රහාරය නවත්වාගෙන යටපත් කරන්න ලැබීම දේශපාලන වශයෙන් ජයග‍්‍රහණයක්.

ගෙවුණු කාලසීමාව තුළ කාදිනල් මැල්කම් රංජිත් හිමි ඇතුළු ආගමික නායකයන් ආගමික සීමාවෙන් එහා ගොස් රටේ මිනිස්සුන්ට දේශපාලන, සමාජ, ආරක්ෂක කාරණා ගැන උපදෙස් දෙන තැනට පත්වුණා නේද?


කාදිනල් මැල්කම් රංජිත් හිමියන්ගේ ප‍්‍රකාශ සියල්ලම දෙවියන් වහන්සේගේ ප‍්‍රකාශ නෙවෙයි. ඒ ප‍්‍රකාශ අතර දේශපාලන ප‍්‍රකාශත් තියෙනවා. කිතුනුු ආගමේ පූජකතුමන්ලා ප‍්‍රකාශ කරන සියල්ල දේව වාක්‍ය නොවන බව ජනතාව තේරුම්ගත යුතුයි. ඒවා අතර තියෙන දේශපාලන ප‍්‍රකාශ වෙන් කර හඳුනාගැනීමට සමත්කමක් ජනතාවට තිබිය යුතුයි. ඒ වගේම බෞද්ධ හිමිවරුන් පළකරන හැම මතයක්ම බුදුන් වහන්සේගේ මතවාද නෙවෙයි. ඔවුන්ගේ දේශපාලන මතවාදත් ඒ ප‍්‍රකාශ අතර සඟවා තියෙනවා. ඉස්ලාම් ධර්මයේ මවුලවිවරුන් කරන ප‍්‍රකාශවලත් අල්ලා දෙවියන්ගේ ප‍්‍රකාශ පමණක් නොවෙයි, දේශපාලන ප‍්‍රකාශත් තියෙනවා. ජනතාව ආගමික නායකයන්ගේ ප‍්‍රකාශවලින් හිතට යමක් ගන්නවා නම් ඒ ප‍්‍රකාශවල තියෙන දේශපාලනය වෙන්කර හඳුනාගත යුතුයි. මෙවැනි මොහොතක ඒ අවබෝධයෙන් කටයුතු කිරීම අතිශයින් වැදගත්.

මේ වෙද්දී ලෝකය පුරාම ස්වෝත්තමවාදී දේශපාලන ව්‍යාපාර ක‍්‍රියාත්මක වෙනවා. ශ‍්‍රී ලංකාවේත් නැවත එවැනි බලවේග ශක්තිමත්ව හිස ඔසවනවා. මේ ව්‍යාපාර ධනවාදයේ ප‍්‍රතිඵල බවත් කොමියුනිස්ට්වාදී රාජ්‍යයක් ගොඩනැඟුණාම ස්වෝත්තමවාදී අදහස් පරාජය වනු ඇති බවත් වාමාංශික කණ්ඩායම් පෙන්වාදෙනවා. වාමාංශික පක්ෂයක් විදියට ජවිපෙ මේ තත්වය දකින්නේ කොහොමද?


මම හිතන්නේ ශ‍්‍රී ලාංකික ජාතිකවාදයක් මේ වෙලාවේ රටට අවශ්‍යයි. ඒ වගේම ඒක මේ මොහොතේ වාමාංශිකයි. අද පවතින ලෝක යථාර්ථය ඇතුළේ ජාතිකවාදයක් ඕනෑ. දාර්ශනිකයන්ට පුළුවන් මාක්ස්වාදය, පශ්චාත් නූතනවාදය හෝ වෙනත් සංකල්ප මත පදනම් වෙලා රාජ්‍යයක් ගොඩනැඟීම ගැන මත පළ කරන්න. ඒත් දේශපාලන බල ව්‍යාපෘතියකදී ඒ රටේ ජීවත්වෙන සුළු ජනවර්ග හා අනෙකුත් සංස්කෘතික කණ්ඩායම් සියල්ල එකතු කරගත්ත ජාතිකවාදී ව්‍යාපෘතියකට තමයි රටේ ප‍්‍රශ්න විසඳන්න සිද්ධ වෙන්නේ. වෙනත් දාර්ශනික අදහස් පුංචි පුංචි කල්ලිවලට තැන් තැන්වල තේ බොමින් කතාකරන්න පුළුවන්.


අපි දේශපාලන බල ව්‍යාපෘතියක් විදියට හිතුවොත් සිංහල බහුතර ජනතාවත්, දෙමළ හා මුස්ලිම් සුළුතර ජන කණ්ඩායමුත් තම තමන්ගේ අනන්‍යතා තියාගනිමින් ඒවා අනෙක් අයගේ අනන්‍යතාවලට බාධාවක් කර නොගනිමින් එයට ඉහළින් ශ‍්‍රී ලාංකික අනන්‍යතාවක් ඇති කරගන්න ඕනෑ. එවැනි දේශපාලන ව්‍යාපාරයකට විතරයි මේ වෙලාවේ ශ‍්‍රී ලංකාව මේ තියෙන ආගම්වාදී හා ජාතිවාදී වියරුවෙන් බේරාගන්න පුළුවන් වෙන්නේ. ජාතිකවාදයකට ලෝක දර්ශනයක් නැහැ. ඒක රටට අදාළ දර්ශනයක්. ඒ ජාතිකවාදී දර්ශනයට මාක්ස්වාදයෙන්, ලෙනින්වාදයෙන්, ට්‍රොට්ස්කිවාදයෙන් හෝ වෙනත් ආගමික දර්ශනවලින් අදහස් උපුටාගන්න පුළුවන්. ඒක සිංහල ජාතිකවාදය නොවන බවත් අවධාරණය කරන්න ඕනෑ.

මේ ප‍්‍රහාරයෙන් පස්සේ ජවිපෙ කරන්නේ මොනවාද කියා හැමෝම බලාගෙන හිටියා..


අපි මුලින්ම හිතුවේ කවුරුත් දුවගෙන ගිහිල්ලා මේකට කඩාපනින්නේ නැතිව ආරක්ෂක අංශවලට ඉඩ ලබාදෙමින් කටයුතු කිරීමයි. මේක ඇතුළේ ප‍්‍රතිගාමී දේශපාලන කණ්ඩායම් තමන්ගේ දේශපාලන ව්‍යාපෘතිවලට මේ තත්වය උපයෝගී කරගත්ත බව දැක්කා. අපි ඒකට ඉඩ දුන්නේ නැහැ. ආරක්ෂක අංශ මේ තත්වය සමනය කළාට පස්සේ අපි හිතුවා මේ තත්වය සමනය කරන්න ඕනෑ කියලා. ඒ නිසා තමයි අපි විහාරමහාදේවි උද්‍යානයේ දැවැන්ත සත්‍යග‍්‍රහයක් ක‍්‍රියාත්මක කළේ. එතැනට විවිධ ජනවර්ගවලට අයත්, ජාතිවාදයට විරුද්ධ විශාල පිරිසක් සහභාගි වුණා. ජාතික සමගිය තුළින් ජාතික ආරක්ෂාව ගොඩනැගෙන බව අපි විශ්වාස කළා. මේ වෙද්දී අපි රට පුරා රැුස්වීම් පවත්වමින් කියනවා, පොදු මුස්ලිම් ජනතාව පීඩාවට පත් නොකළ යුතු බව. කුමන හෝ ජන කණ්ඩායමක් කවුරුන්ව හෝ පීඩාවට පත් කරනවා නම් අපි එයට එරෙහි වෙනවා. අපි එරෙහි වෙන්නේ පීඩාවට පත්වෙන කණ්ඩායම වෙනුවෙන් පමණක් නෙවෙයි. පීඩාවට පත් කරන්නන්ට පවා කවදාවත් ගැලවීමක් නැහැ. අපි ඉවසීමෙන් මේ අන්තවාදය පරාජය කිරීමට වැඩසටහනක් නිර්මාණය කරමින් ඉන්නවා. ‘

අපි පිළිගන්න ඕනෑ පන්ති දේශපාලනයටත් වඩා, වෙනත් විමුක්ති දේශපාලනයකටත් වඩා ආගම හා ජාතිය මුල් කරගත් දේශපාලනයක් උඩට එද්දී එය පරාජය කිරීම අතිසංවේදී හා බරපතළ වැඩක්. අද ආගම හා ජාතිය මිනිස්සුන්ගේ ඇඟ පුරා දුවලා තියෙන්නේ. ඒ නිසා සියුම් ආකාරයකින් තමයි මේකට උත්තර හොයන්න මැදිහත් වෙන්න සිද්ධවෙන්නේ. අපට අද හැම පැත්තෙන්ම චෝදනා තියෙනවා. සිංහල ජාතිකවාදීන් කියනවා, අපි මුස්ලිම් අයට එරෙහිව කරන අරගලයේ නැති බව. අනෙක් පැත්තෙන් සහරාන්ලාගේ අන්තවාදයට විරුද්ධ මුස්ලිම් ජනතාව තුළ අපට විවේචනයක් තියෙනවා, අපි සාමාන්‍ය මුස්ලිම් ජනතාව වෙනුවෙන් මැදිහත් වෙන ප‍්‍රමාණය මදි කියලා.

මුස්ලිම් සමාජය උඩ හිටගන්නා එකත්, සිංහල බෞද්ධ සමාජය උඩ හිටගන්නා එකත් ඉතා පහසුයි. ඒත් මේ ප‍්‍රශ්නවලට සැබෑ උත්තර හොයන දේශපාලන ව්‍යාපාරයකට ඉතාම ප‍්‍රවේශමෙන් තමයි ජනතාව පෙළගස්වන්න වෙන්නේ. ඒත් අපි කිසිදු ජාතිවාදයකට හෝ ආගම්වාදයකට ඇතුළු නොවී ඒවා පරාද කරන්න ඕනෑය කියන ස්ථාවරයේ තමයි ඉන්නේ.

දිවයින පුවත්පතෙන් වෛද්‍යවරයෙකු ගැන පළකළ ප‍්‍රවෘත්තිය ගැන ජවිපෙ උනන්දු වුණා. එයට මේ විදියට මැදිහත් වුණේ ඇයි?


අපි ඉතා පැහැදිලිව කියන්න ඕනෑ රටේ පවතින නීතියට පිටින් යම් කෙනෙකු කටයුතු කරලා තියෙනවා නම් එයා සම්බන්ධයෙන් විධිමත් පරීක්ෂා කළ යුතුයි. අත්අඩංගුවට ගත යුතු කාරණා තියෙනවා නම් අත්අඩංගුවට අරගෙන ප‍්‍රශ්න කරනවා. වැරැුද්දක් වුණා කියන අය ඉන්නවා නම් විධිමත් ආකාරයට කටයුතු කළ යුතුයි. එසේ නොමැතිව ජාතිවාද, ආගම්වාද, වෛරයන් සමාජය තුළ මතු කරන එක ඉතාමත් වැරදියි. ලංකාවේ ජනප‍්‍රිය මාධ්‍ය විශාල ප‍්‍රමාණයක් මේ වැරැුද්ද කරනවා. අපි මාධ්‍යවලටත් කියන්නේ ඒක නතර කරලා මේ ප‍්‍රශ්නවලට සාධනීය උත්තරයක් හොයාගන්නා පැත්තට කටයුතු කරනවා විනා වෛරය පතුරුවලා රට විනාශ කරන තැනට කටයුතු කරන්න එපා. දැනට ඒක තමයි සිද්ධවෙමින් තියෙන්නේ. ජාතිවාදය හා ආගම්වාදය මත පදනම් වෙලා උඩට ආවාට පස්සේ අනෙකුත් ප‍්‍රගතිශීලී බලවේගවලට වැඩ කරන්න හරිම අමාරුයි. කොච්චර අමාරු වුණත් ඒක කරන්න ඕනෑ,

මිනුවන්ගොඩ ආදි ප‍්‍රදේශවලට එල්ලවූ ප‍්‍රහාරවලදී හමුදා සෙබළුන් ඒවාට ඉඩදුන් බවත්, ඇතැම් සෙබළුන් පහරදීම්වලට සහභාගි වී තිබෙන බවත් චෝදනා විදියට එල්ලවෙනවා. ඒ ගැන අදහස මොකක්ද?


එහෙම තත්වයක් වෙලා තියෙනවා නම් ඒක සම්පූර්ණයෙන්ම වැරදියි. එවැනි තත්වයන් පරාද කළ යුතුයි. ආණ්ඩුව මේ ගැන වහාම පරීක්ෂණයක් කරන්න ඕනෑ. ආරක්ෂක හමුදාවන්ගේ වගකීම ඉටු නොකළ සෙබළුන් කිහිපදෙනෙක් හරි ඉන්නවා නම් ඒ අය සම්බන්ධයෙන් කටයුතු කරන්න ඕනෑ. හමුදාවට ආගමක් හෝ ජාතියක් නැහැ. පොලීසියට ආගමක් නැහැ. හමුදාවේ හා පොලීසියේ ඉන්න තනි තනි පුද්ගලයන්ට ආගම් තියෙනවා. වෙන කිසිදු ආයතනයකට ආගමක් නෑ. තනි පුද්ගලයන්ගේ ආගම් හමුදාවේ ආගම විදියට පත්වෙනවා නම් ඒ තත්වය භයානකයි. මෙවැනි තත්වයන්හිදී මැදිහත් නොවෙන නිසා තමයි අපි මේ විශ්වාසභංගය ඉදිරිපත් කරලා තියෙන්නේ. මේ ආණ්ඩුව අසමත්.

ආණ්ඩුව මෙහෙයවන එක්සත් ජාතික පක්ෂය වර්තමානයේ මතුපිටින් පෙන්වන්නේ ජාතිවාදයට එරෙහි පක්ෂයක් විදියටයි. එහෙත් ඔවුන් මේ මොහොතේ ජාතිවාදයට විරුද්ධව කිසිදු දෙයක් කරන්නේ නැහැ. මේ අතර ජවිපෙන් එජාපයට විශ්වාසභංගයක් ගෙනාවා නේද?


එජාපය ඉතිහාසය පුරාම අවශ්‍ය වෙලාවට ජාතිවාදය පාවිච්චි කරලා තියෙනවා. සංවිධානාත්මක ජාතිවාදී ව්‍යාපාරවල නිරත වෙලා තියෙනවා. කළු ජූලිය කියන්නේ එජාපය සංවිධානාත්මකව නිර්මාණය කළ එකක් කියලා අද කාටවත් බැහැර කරන්න බෑ. එජාපය පාලනය කිරීමේ කටයුත්තේදී අසමත් කියන එකත්, මේ තත්වයන් පැන නගින්න ඔවුන් ප‍්‍රජාතන්ත‍්‍රීය පාලන ක‍්‍රමයක් ක‍්‍රියාත්මක නොකළ එක හේතුවූ බවත් පැහැදිලියි. ඔවුන් නිවැරදි ආණ්ඩුකරණයක යෙදිලා නැති බව මේ වෙද්දී විරෝධයකට ලක්වෙලා තියෙනවා. සමාජය තුළ පවතින එම විරෝධතාව පාර්ලිමේන්තුව තුළ නිරූපණය කරන එක අපේ වගකීම. ඒ සඳහා පාර්ලිමේන්තු ක‍්‍රමය තුළ තියෙන එක ක‍්‍රමයක් තමයි විශ්වාසභංගයක් ඉදිරිපත් කරන එක. අප දන්නා විදියට විශ්වාසභංගවලින් 99%ක්ම ජයග‍්‍රහණය කරලා නෑ. ඒත් එයින් යම් දේශපාලනික ප‍්‍රකාශනයක් ඉදිරිපත් වෙනවා. අපි එජාපයේ ශාඛාවක් නෙවෙයි නම්, අපි ඒකාබද්ධ විපක්ෂයේ ශාඛාවක් නෙවෙයි නම්, අපට කියලා දේශපාලන අනන්‍යතාවකුත් තියෙනවා නම් ඒ මත පදනම් වෙලා ස්වාධීන ක‍්‍රියාමාර්ග ගැනීමේ අයිතියක් අපට තියෙනවා. x