හැත්තෑදෙවන ජාතික නිදහස් දින සමරුවේදී ජනාධිපති ගෝඨාභය රාජපක්ෂ සිදුකළ කථාව ඔහුව විවේචනය කළ අයගේ පවා ප‍්‍රශංසාවට භාජනය වී තිබේ. එමෙන්ම ජාතික නිදහස් දින උත්සවයට පෙර ජාතික නිදහස් දින උළෙලේ අංගෝපාංග සම්බන්ධයෙන් ජනාධිපතිවරයා ලබාදුන්නේ යැයි කියූ උපදෙස් හා නියෝග නිසාද සාමාන්‍ය මහජනයා අතරේ යහපත් කතාබහක් ඇතිව තිබේ.


ජාතික නිදහස් දින උළෙලේ පැරෂුට් සංදර්ශන නැවැත්වීම, ආබාධිත රණවිරුවන් පෙළපාලියේ ගමන් කිරීම නැවැත්වීම, මිලිටරි සංදර්ශන රථ ප‍්‍රමාණය අඩු කිරීම, ජනාධිපතිවරයා නිදහස් දින උත්සවයට කැඳවාගෙන එන අශ්වාරෝහක පෙළපාලිය නැවැත්වීම, ජාතික නිදහස් දින උත්සවය කෙටි කාලයකදී අවසන් කිරීම ආදිය එම මහජන ප‍්‍රසාදයට හේතුවී තිබේ.


එහෙත් නිදහස් දින උත්සවයේදී ජනාධිපතිවරයා ජාතිය අමතා කළ කථාව ඔහුව විවේචනය කරන්නන් පවා ඇගැයීමට ලක් කරන්නේ ඒ තුළ ඇති මූලික මිනිස් අයිතිවාසිකම්වලට අයත් කොටස් නිසා විය යුතුය.


සෑම පුරවැසියෙකුටම නිදහස්ව හා සුරක්ෂිතව ජීවත්වීමේ අයිතිය තිබෙන බවටත්, ස්වාධීන මතයක් දැරීමේ හා අදහස් ප‍්‍රකාශ කිරීමේ අයිතිය තහවුරු කරන බවටත්, ඕනෑම පුරවැසියෙකුට තමන් කැමති ආගමක් ඇදහීමට ඇති අයිතියට ගරු කරන බවටත්, සාමකාමීව ඒකරාශී වීමට ඇති අයිතිය මෙන්ම, දේශපාලන ක‍්‍රියාවලියට හා රාජ්‍ය පාලනයට සම්බන්ධ වීමේ පුරවැසි අයිතිය ආරක්ෂා කරන බවටත් කී ජනාධිපතිවරයාගේ එකී අදහස් මේ වනවිටත් රටේ ආණ්ඩුක‍්‍රම ව්‍යවස්ථාවෙන්ම පුරවැසියන්ට ලබාදී ඇති මූලික මිනිස් අයිතිවාසිකම්ය.


එමෙන්ම ඡුන්දය දුන් නොදුන් සියලූ දෙනාට සේවය කිරීමට ඔහු බැඳී සිටින බවද ඒ සියල්ලන්ගේම ජනාධිපතිවරයා ඔහු බවද වැරදි කරන පිරිසට එරෙහිව කඩිනමින් නීතිය ක‍්‍රියාත්මක කරන බවද, නීතිගරුකව, විනයගරුකව හා ගුණගරුකව ජීවත්වීම සඳහා ජනතාවට සැබෑ නිදහසක් ලබාදෙන බවද ජනාධිපතිවරයා කියා තිබේ.


තවද සිතීමට ඇති නිදහස හා ලිවීමට ඇති නිදහස සම්පූර්ණයෙන් තහවුරු කරන බවද, තම රජයට විරුද්ධ මත ඉවසන්නට හැමවිටම සූදානම් බවද ජනාධිපතිවරයා තවදුරටත් එම අදහස් ගොන්නට එක්කර ඇත. මේ අදහස් මුලින් කී ජනාධිපතිවරයාට විරුද්ධ අදහස් ඇති පිරිස්වලට ආකර්ෂණයක් ගෙන දෙනවාට සැක නැත. ජනාධිපතිවරයාගේ එම කතාවේ ඇති ඉතිරි කොටස් ආකර්ෂණයක් ඇති කරන්නේ දෙවැනියට කී පිරිස්වලටය. මන්ද ඔවුන් කොහොමත් ජනාධිපතිවරයාගේ පාර්ශ්වයේ සිටි පිරිස් නිසාය.


මෙහිදී මගේ අවධානය යොමුවෙන්නේ ජාතික නිදහස් දින උත්සවයේ ජනාධිපතිවරයා කී එකී කතාවලින් ඔබ්බට ගොස් ලබාදුන් සංකේතාර්ථයක් පිළිඳවය. ඔහු ජාතිය ඇමතුවේ සුපුරුදු ලිනන් කමිසයේ හමුදා දිවියේ ලැබූ පදක්කම් පැළඳගෙනය. හමුදා ආචාර ලැබෙන උළෙලක් නිසා ජනාධිපතිවරයා එසේ හමුදා පදක්කම් පැළඳුවා යැයි යමකුට කිව හැකිය. එහෙත් මේ රටේ ජනාධිපතිධුරය දරන්නේ ප‍්‍රජාතන්ත‍්‍රවාදී ඡුන්දයකින් තේරී පත්වූ දේශපාලන පක්ෂයකින් ඉදිරිපත් වූ සිවිල් පුරවැසියෙකි. ජනාධිපතිවරයා හමුදාවේ සේවය කර ඉවත්වී තිබුණේ මීට අවුරුදු තිහකට පමණ පෙරය. එසේම ඔහු හමුදාවෙන් ඉවත්වන විට කටයුතු කර තිබුණේ ලූතිනන් කර්නල් නිලයේය. හමුදාවෙන් විශ‍්‍රාම යෑමෙන් හෝ ඉවත්වීමෙන් පසු එම මට්ටමේ තනතුරු දැරූවන් සාමාන්‍යයෙන් හමුදා තනතුර භාවිත කරන්නේ නැත.

එවන් තත්වයක නිල දැරුවකු ජාතික නිදහස් දින උත්සවයේදී හමුදා පදක්කම් පැළඳ ජාතිය ඇමතීම සරල දෙයක් ලෙස අප සිතිය යුතු නැත. අප සිතිය යුත්තේ කථාවෙන් කියන ටොන් ගණනට වඩා භාවිතාවෙන් පෙන්නුම් කරන අවුන්ස ගණන පිළිබඳවය.


ජාතික නිදහස් දිනයේදී ජනාධිපතිවරයා යුද හමුදාවේ නිලධාරීන් 244කට උසස්වීම් ලබාදී ඇත. ඒ මේජර් ජෙනරාල් නිලයට 17 දෙනෙකු, කර්නල් නිලයට 45 දෙනෙකු, ලූතිනන් කර්නල් නිලයට 45 දෙනෙකු, මේජර් නිලයට 42 දෙනෙකු, කපිතාන් නිලයට 80 දෙනෙකු හා ලූතිනන් නිලයට 11 දෙනෙකු වශයෙන්ය. ශ‍්‍රී ලංකා යුද හමුදාව කියන්නේ එම උසස්වීම් පුරප්පාඩු අනුව නිසි සුදුසුකම්වලට ලබාදුන් ඒවා බවය. වත්මන් ජනාධිපතිවරයා ධුරයට පත්වීමට ඔන්න මෙන්න කියා තිබියදී හිටපු ජනාධිපතිවරයා යුද හමුදාවේ විශාල පිරිසකට උසස්වීම් ලබාදුන් බවද අප අමතක කළ යුතු නැත.


මේ ක‍්‍රියාවන් අතර සුවිශේෂම ක‍්‍රියාව වන්නේ දේශපාලන පළිගැනීම් සොයාබැලීම සඳහා ජනාධිපතිවරයා පත්කර ඇති ජනාධිපති කොමිසමේ විෂය පථයට අපරාධ පරීක්ෂණ දෙපාර්තමේන්තුව සිදුකරණ පරීක්ෂණ පසුව ඇතුළත් කිරීමය. එම දෙපාර්තමේන්තුව සිදුකළ සුවිශේෂ ඝාතන පරීක්ෂණවලින් අමාරුවේ වැටී සිටියේ යුද හා නාවික හමුදාවේ ජනාධිපතිවරයාට සමීප පිරිස්ය. පළමු පැමිණිල්ල කොමිසමට කර තිබුණේද ඔවුන්ය.


ඒ සමහරවිට ජනාධිපතිධුරයට පත්වීමෙන් පසුවදාම චෝදනා එල්ලකර ඇති රණවිරුවන් නිදොස් කොට නිදහස් කරනවායැයි ජනාධිපතිවරයාගේ කල් පසු වූ ඡුන්ද පොරොන්දුව ඉටු කිරීමටද විය හැකිය.


ඒ නිසා කථාවලින් වැසී ඇති සැබෑ සංකේතාර්ථ ගැන අප විමසිලිමත් විය යුතුය. සිවිල් සංකේතයක් වූ සිය මැදමුලන නිවසේ කුරහන් සාටකය නොපළඳින ජනාධිපතිවරයා හමුදා පදක්කම් පැළඳීමෙන් අපට කියාපාන්නේ කුමක්දැයි විශ්ලේෂණය කළ යුතුය. මන්ද ඔහු තවමත් හමුදා මානසිකත්වයෙන් සිටින බව අපට පෙන්නුම් කර ඇති නිසාය.

පුරවැසියා