ලූ‍තිනන් කර්නල් තෙල්ගේ එරන්ත රදීෂ් පීරිස් මාධ්‍යවේදී ප‍්‍රගීත් එක්නැළිගොඩ පැහැරගෙන ගොස් අතුරුදන් කිරීමට අදාළව අත්අඩංගුවට පත්වන්නේ එකළොස්වන සැකකරුවා ලෙසය. ඒ කෝප‍්‍රල් වසන්ත උළුගෙදර අත්අඩංගුවට ගැනීමට පසුවය.

එරන්ත පීරිස් පසුගිය 20 වැනි බ‍්‍රහස්පතින්දා දින සවස රහස් පොලිසිය අත්අඩංගුවට ගන්නේ දීර්ඝවූත් දුෂ්කරවූත් විමර්ශනයකින් පසුවය. මොහුද මෙම පැහැරගැනීම් දෙකම සිද්ධවෙන අවධියේ ගිරිතලේ යුදහමුදා බුද්ධි කදවුරේ කර්නල් ෂම්මි කුමාරරත්න යටතේ සේවය කළ ඊනියා රණවිරුවෙක් ය. එනිසා දැන් වර්තමාන ජනපතිගේ සිට බොහෝ දෙනෙකු උඩ පැන පොලිසියට චෝදනා ගොනුකරනු ඇත.

තත්ත්වය එසේ තිබියදී මේ පුද්ගලයාට තිබෙන චෝදනා මොනවාද? අපි සොයා බලන්නට සිතුවෙමු. මොහු අත්අඩංගුවට පත්වන්නේ මනුෂ්‍ය ඝාතනයක් කිරීම සහ එයට ආධාර අනුබල දීමේ, මහාධිකරණයකින් පමණක් ඇප ලබාගත හැකි බරපතළ වරදක් සම්බන්ධයෙන් ය. දැන් අප මේ චෝදනා සනාථ කිරීම සඳහා තිබෙන සාක්ෂි මොනවාද සොයා බැලිය යුතුය. වර්තමාන ජනාධිපතිගේ සිට රණවිරු ඝාතකයන් ආරක්ෂා කරන්නට උදේ හවස වෙහෙසෙන පාර්ශ්වයන් කියන්නේ රණවිරුවන්ට තිබෙන චෝදනා සනාථ කරන්නට ප‍්‍රමාණවත් සාක්ෂි පොලිසිය අත නැති බවය.

ලූ‍තිනන් කර්නල් එරන්ත පීරිස් 2008ත් 2012ත් අතර කාලයේ ගිරිතලේ හමුදා බුද්ධි කඳවුරේ සේවය කර ඇත. එය සනාථ වූ තොරතුරක් ය. ප‍්‍රගීත් එක්නැළිගොඩ පළමු වරට පැහැරගන්නේ 2009 අගෝස්තු 27 දිනය. ඉන්පසුව දෙවෙනි වර පැහැර ගන්නේ 2010 ජනවාරි 24 වැනි දිනය. මේ දෙවෙනි පැහැරගැනීමෙන් පසුව තවම ඔහු ගැන තොරතුරක් නැත. පරීක්ෂණ අංශ සැකකරන්නේ මොහු අක්කරෙයිපත්තුව ප‍්‍රදේශයට රැුගෙන ගොස් මරාදමන්නට ඇතැයි කියා ය. මේ පැහැර ගැනීම් දෙකටම ගිරිතලේ බුද්ධි කඳවුර දායක වූ බවටද දැන් සනාථ වූ තොරතුරු ඇත. මේ පැහැරගැනීම් දෙකටම සැලසුමෙන් සහ මෙහෙයවීමෙන් දායකවී ඇත්තේ එවක මෙම කඳවුරේ අණදෙන්නා වූ කර්නල් ෂම්මි කුමාරරත්නය. එයද සනාථ වූ තොරතුරු ය. ප‍්‍රදීප් කියා කෙනෙකු ගිරිතලේට රැුගෙන ගිය බවද පසුව එම ප‍්‍රදීප් සැරයන් රන්බණ්ඩාට (මේ නඩුවේ සාක්ෂිකරුවෙක්) භාර කළ බවද කර්නල් ෂම්මි කුමාරරත්නම පොලීසියට ප‍්‍රකාශ කර ඇත. ඔහු මේ පවසන ප‍්‍රදීප් සහ අප පවසන ප‍්‍රගීත් එකම පුද්ගලයෙකු බව මේ සිද්ධියේ තවත් සැකකරුවෙකු වන සහ පැහැරගැනීම් දෙකටම දායකවී ඇති කෝප‍්‍රල් නාදන් ඔහුගේ ප‍්‍රකාශයෙන් පිළිගෙන ඇත. ඒ ප‍්‍රගීත්ගේ ඡුායාරූපයක් පෙන්නූ විට ඔවුන් පැහැරගත් ප‍්‍රදීප් මේ පුද්ගලයාම බව හඳුනාගැනීම හරහාය.
දැන් අපි ලූ‍තිනන් කර්නල් එරන්ත දෙසට හැරෙමු.

0773451352
මෙම දූරකථනය අංකය, අංක 87, බෞද්ධාලෝක මාවත, කොළඹ 7 යන ව්‍යාජ ලිපිනයකට යුද්ධ හමුදා බුද්ධි අංශය විසින් ඩයලොග් ආයතනයෙන් ලබාගත් සිම්පතකට අදාළ දූරකථන අංකයකි. මෙලෙස ලබාගත් දූරකථන අංක රැුසකි. එම අංකවලින් 0773451352 සහ 0773451353 යන අංක දෙක ගිරිතලේ බුද්ධි කඳවුරේ නිලධාරීන් භාවිත කර ඇති බවට වූ තොරතුරු රහස් පොලිසියට එන්නේ මේ පරීක්ෂණ ආරම්භ කළ මුල් අවධියේදීමය. එහෙත් පොලිසියට අවශ්‍ය තොරතුරු දිගින් දිගටම හමුදාව මගහැරීම නිසා, නියමිත ඉලක්කයට පරීක්ෂණ අභිමුඛ වන්නට සෑහෙන්න කාලයක් ගතවී ඇත. මුලින්ම යුද හමුදාව මෙම අංක දෙක ගිරිතලේ කදවුරේ භාවිතය සඳහා ලබාදුන් අංක දෙකක් බව පිළිගත්තද, එම අංක භාවිත කළේ කවුරුන්ද යන ප‍්‍රශ්නයට පිළිතුරු සපයා නැත. ඔවුන් එහිදී පවසා ඇත්තේ ජාතික ආරක්ෂාව ගැන සිතමින්, එම තොරතුරු එකල ලේඛනගත කර නැති බවය. මේ අතර පොලිසියේ ඉල්ලීම මත අධිකරණය යුදහමුදා පොලිසියට නියෝග නිකුත් කරන්නේ මෙම දූරකථන අංකය භාවිත කළ පුද්ගලයන් පිළිබදව විමර්ශනයක් කර ඒ පිළිබඳව අධිකරණයට කරුණු වාර්තා කරන ලෙසය. එහිදී යුදහමුදා පොලිසිය මේ පිළිබඳව ගිරිතලේ කඳවුරේ සිටි හමුදා නිලධාරීන් ගෙන්වා විමර්ශනයක් සිදුකර ඇත. එම විමර්ශනයට හිටපු යුද්ධ හමුදා බුද්ධි සැරයන් රන්බණ්ඩා මහතාද කැඳවා ඇති අතර ඒ දිනයේදී ඔහු කිරුළපන යුද්ධ හමුදා පොලිස් කඳවුරට ගොස් ඇත. එහිදී ඔහුගෙන් ප‍්‍රකාශයක් හෝ සටහන් නොකරගනිමින් ඔහු ආපසු හරවා යවා ඇත. මේ පිළිබඳව සැක සිතුණු මේ හමුදා නිලධාරියා ඒ පිළිබඳව රහස් පොලීසියට කරුණු කියා ඇත. එහිදී ඔහු 0773451353 යන අංකය තමන් භාවිත කළ බවටද, 0773451352 යන අංකය ලූ‍තිනන් කර්නල් එරන්ත පීරිස් භාවිත කළ බවටද තොරතුරු ලබා දී ඇත. මෙම තොරතුරම කුකුලේගම යුද්ධ හමුදා පුහුණු කඳවුරේ ලේඛනයක්ද තහවුරු කර ඇත. ඒ 2012 අවුරුද්දේදී 40 දෙනෙකුගෙන් සමන්විත යුද්ධ හමුදා පුහුණු සැසියකට සහභාගිවූ පිරිසේ නාම ලේඛනයක් තුළ ලූ‍තිනන් කර්නල් තෙල්ගේ එරන්ත රදීෂ් පීරිස්ගේ නම ඉදිරියෙන් මෙම දූරකථන අංකය සටහන්වී තිබීම නිසාය. ගිරිතලේ බුද්ධි කඳවුරේ නිවාඩු අනුමත ලේඛනය තුළද මේ නම ඉදිරියෙන් මේ දුරකථන අංකය ලියවී තිබෙන අවස්ථාවක් රහස් පොලිස් පරීක්ෂණවලට හමුවී ඇත. 0773451352 අංකය දුරකථන දත්ත විශ්ලේෂණයේදී පැහැරගැනීම් දෙකටම ඍජුවම සම්බන්ධ බව අනාවරණය වී ඇත.

මෙලෙස මෙම දූරකථන අංකය පිළිබඳව දිගටම පරීක්ෂණ කළ එම පරීක්ෂණ කණ්ඩායම මෙම අංකය හා සම්බන්ධ නො 19, හේවාහැට පාර, රිකිල්ලගස්කඩ ලිපිනයේ ලියාපදිංචි ලංකා බෙල් දූරකථනයක් පිළිබඳව පරීක්ෂණ පවත්වා ඇත. ඒ අනුව එම දූරකථනයේ හිමිකරුට රහස් පොලීසියට පැමිණ ප‍්‍රකාශයක් ලබාදෙන්න යැයි දන්වා ඇත. එහිදී යුද්ධ හමුදා නිල ඇඳුමින් සැරසී පැමිණ ඇත්තේ මේ හමුදා නිලධාරියා ය. ඒ මෙම හමුදා නිලධාරියා පොලිසියට අනාවරණය වූ අයුරුය. එහිදී ඔහු පවසා ඇත්තේ එම ප‍්‍රශ්නගත ඩයලොග් අංකය තමන් නොදන්නා බවය. එම අංකය තම බිරිඳ කතාකළ දුරකථන අංකයක් වියහැකි බවද ඔහු එහිදී පවසා ඇත. ඒ අනුව ඔහුගේ බිරිඳගෙන් ප‍්‍රකාශයක් ලබාගන්නා රහස් පොලිසිය, මේ ලංකා බෙල් දූරකථනයට ඇමතුම් විශාල ප‍්‍රමාණයක් මෙම ඩයලොග් අංකයෙන් අරගෙන තිබෙන තැනැත්තා කවුරුන්දැයි බිරිඳගෙන් අසා ඇත. එහිදී ඇය පවසා ඇත්තේ එම ඩයලොග් අංකය තම සැමියාගේ බවය. මෙම කාරණය සමග මෙම නිලධාරියා ගෙන්වා නැවත ප‍්‍රශ්න කර ඇති අතර එහිදීද ඔහු පවසා ඇත්තේ තම බිරිඳ කුමක් කීවද තමන් එය නොදන්නා බවය. මෙහිදී මෙම ඩයලොග් දුරකථනය සමග වැඩි වාරගණනක් සම්බන්ධතා පවත්වා ඇති මොරටුව ප‍්‍රදේශයේ යුවලක්ද ගෙන්වා ප‍්‍රශ්න කර ඇති අතර එහිදී ඔවුන්ද පවසා ඇත්තේ මෙම ¥රකථන අංකය තමන්ගේ සහෝදරයෙකු වන එරන්තගේ බවය.

සාදය
එරන්ත මෙම දූ¥රකථන අංකය තමන්ගේ බව දිගින් දිගටම ප‍්‍රතික්ෂේප කළත්, ඔහුගේ නිවාසය පිහිටි නුවර මයිලපිටිය ප‍්‍රදේශයේ දූරකථන කුලූනු දත්ත විශ්ලේෂණය කිරීම තුළින්ද, මෙම දුරකථන අංකය ඔහුගේ බව සනාථ වී ඇත. ඒ ඔහු නිමාඩු ලබා ගෙදර පැමිණි දිනයන්ට අදාළව කුළුණු වාර්තා විශ්ලේෂණයේදී ය. මෙම දුරකථන අංකය ප‍්‍රගීත් එක්නැළිගොඩ පළමු වරට පැහැරගත් අවස්ථාවේ එම දිනයේදී හබරණ ප‍්‍රදේශයේදී ක‍්‍රියාත්මක වී ඇත. ඒ ඔවුන් ප‍්‍රගීත් ඔහුගේ හබරණ වත්තේදී මුණගැසුණු වේලාවන්ට අනුවය. ඉන්පසුව දෙවැනි වර පැහැරගැනීමට ආසන්න 2010/01/20 දින සිට එම මස 26 වැනි දින දක්වා මෙම හමුදා නිලධාරියා නිවාඩු ලබා ගෙදර ගොස් ඇත. ඒ 2010/01/21 වැනි දින ඔහු සුබ මොහොතින් මයිලපිටියේ නව නිවසකට ගොඩවැදීම නිමිති කරගනිමින් ය. එලෙස 21 වැනි දින නව නිවසට ගොඩවැදුණත් ඊට අදාළ සාදය පවත්වා තිබෙන්නේ 24 වැනි දිනයේදීය. එම දිනයේදී කර්නල් ෂම්මි කුමාරරත්න සහ කණ්ඩායමක් මෙම සාදයට ගොස් නුවර පාර ඔස්සේ කොළඹ පැමිණ ඇත. ඒ ප‍්‍රගීත් එක්නැළිගොඩ පැහැරගැනීම සදහාය. එහිදී තවත් කණ්ඩායමක් ගිරිතලේ සිට කුරුණෑගල හරහා පැමිණෙන තුරු මොවුන් අඹේපුස්ස ප‍්‍රදේශයේ රැුදීසිට ඇති බවටද තොරතුරු ඇත. සාදය නිමවී මෙම හමුදා නිලධාරීන් අදාළ කාරණයට කොළඹ පැමිණියත් අප මේ කතා කරන හමුදා නිලධාරියා කොළඹ පැමිණ නැත. ඔහු නිවසේ නතරව සිට ඇත. එහෙත් 26 වැනිදා එනම් ජනාධිපතිවරණ දිනය දක්වා නිවාඩු ලබා සිටි මේ හමුදා නිලධාරියාගේ දුරකථනය නැවත 25 වැනි දින සබැඳියාවන් පෙන්වන්නේ ගිරිතලේ ප‍්‍රදේශය ආශ‍්‍රිතවය. මේ පිළිබඳව ප‍්‍රශ්න කිරීමේදී ඔහු 25 වැනි දින කඳවුරට පැමිණි බව පිළිගෙන ඇත. එහිදී 26 තෙක් නිවාඩු ලබා තිබියදී සහ 26 වැනි දින යනු ජනාධිපතිවරණ මැතිවරණය පැවැත්වෙන දිනය බැවින්, 25 වැනි දින නැවත කඳවුරට පැමිණියේ ඇයිදැයි, පරීක්ෂණ අංශ විමසා ඇත. එයට ඔහුගේ පිළිතුර වී ඇත්තේ පසුදා ජනපතිවරණයක් පවත්වන බව තමන්ට අමතක වූ බවය. මේ සියලූ කරුණු සහ ප‍්‍රකාශවල පරස්පරතාද දූරකථන දත්ත තොරතුරුද, මෙම පුද්ගලයාගේම බිරිඳගේ ප‍්‍රකාශයද සැලකිල්ලට ගනිමින් මෙම හමුදා නිලධාරියා අත්අඩංගුවට ගෙන ඇත. දැන් ඔවුන්ට මෙයින් ගැලවී ගැනීමට එකදෙයක් උවමනා නම් කළ හැකිය. එනම් මෙම පැහැරගැනීමට සහ ඝාතනයට අණදුන් පුද්ගලයන් කවුරුන්ද යන්න හෙළිකිරීමය. එහෙත් රටේ ජනපතිගේ සිට හමුදා ලොක්කන් බහුතරයක්ද, සිංහල දේශපාලන ලොක්කන් බහුතරයද, මේ ඝාතන පරීක්ෂණ යටපත් කිරීමට කැසකවන මොහොතක, මේ පොඞ්ඩන් ඇත්ත කියා නිදහස් වේයැයි සිතිය නොහැකිය.