උද්ඝෝෂණ කිරීම සදහා රජය ගාලූ මුවදොර පිටියේ ස්ථානයක් වෙන් කර තිබුණද එම ස්ථානයේ පමණක් උද්ඝෝෂණ කිරීමට බලාපොරොත්තු නොවන බවත් උද්ඝෝෂකයන්ට තමන් කැමති ස්ථානයක උද්ඝෝෂණවල නිරත වීමට අයිතියක් ඇති බවත් වෘත්තීය සමිති නායකයෝ පවසති.

යහපාලන රජය සමයේ මෙලෙස උද්ඝෝෂණය කිරීමට ස්ථානයක් වෙන් කළ යුතුයැයි යෝජනා කළ අවස්ථාවේදී තම සංගමය ඇතුළු වෘත්තීය සමිති රැුසක් විරෝධය පළ කළ බවත් ජනාධිපති ගෝඨාභය රාජපක්ෂ මහතා මෙසේ සිදු කිරීම වැරදි බවත් ලංකා ගුරු සංගමයේ ලේකම් ජෝසප් ස්ටාලින් පැවසීය. යම් කිසි පුද්ගලයෙකු හෝ කණ්ඩායමක් උද්ඝෝෂණයක් සිදු කරන්නේ තමන්ගේ ඉල්ලීම් ඉටු කරගැනීමට බවත් ආණ්ඩුක‍්‍රම ව්‍යවස්ථාවේ  සඳහන් වන භාෂණයේ නිදහස සහ අදහස් ප‍්‍රකාශ කිරීමේ නිදහස භාවිත කරමින් සිදු කරනා වෘත්තීය අරගලවලට මෙසේ සීමා පැනවීම වැරදි බවත් ඒ  මහතා පැවසීය.

අන්තර් විශ්වවිද්‍යාලීය ශිෂ්‍ය බලමණ්ඩලයේ කැඳවුම්කරු රත්කරව්වේ ජිනරතන හිමියන් පැවසූවේ සිංගප්පූරුව වැනි රටවල් උදාහරණයට ගනිමින් ආණ්ඩුව මෙසේ සිදු කළත් සිංගප්පූරුව කිසිම ප‍්‍රජාතන්ත‍්‍රවාදයක් නොමැති ජනතාව මර්දනය කරන රටක් බවය. මේ ක‍්‍රියාව සිංගප්පූරුවේ ඇති ආකාරයේ මර්දනයක් ගෙන ඒමට තැත්කිරීමක්දැයි සැකයන් පැනනැගෙන  බව ඒ හිමියන් වැඩිදුරටත් පැවසීය.

සමාජ ක‍්‍රියාකාරික විදර්ශන කන්නංගර අදහස් දක්වමින් කියා සිටියේ සදාචාර සම්පන්නව උද්ඝෝෂණ සිදු කළ යුතු බවට ඇති දෘෂ්ටිවාදයට එරෙහි විය යුතු බවය. තමන්ට කැමති ආකාරයකින් කැමති ස්ථානයක උද්ඝෝෂණය කිරීමට අයිතිය ඇති බව ඔහු කීය.

බැංකු සේවක සංගමයේ උප සභාපති කේසර කෝට්ටේගොඩවිතාන පැවසුවේ රජය උද්ඝෝෂණ කිරීමට සුදුසු තැන යැයි දක්වමින් ස්ථානයක් වෙන් කිරීම සම්බන්ධයෙන් තම සංගමයේ විරෝධතාවක් නොමැති බවත්, එලෙස සුදුසු යැයි රජය තීරණය කළ ස්ථානයේ  හැර වෙනත් ස්ථානවල උද්ඝෝෂණය කිරීමට උද්ඝෝෂකයන්ට ඇති අයිතිය නැති කිරිමට රජය උත්සාහ කරන්නේ නම් තමන් එයට එකඟ නැති බවය.