ලෝකය පුරා, නව කොරොනාවයිරස් හෙවත් කෝවිඞ් 19 වයිරසය ආසාදනයවූවන්ගේ සංඛ්‍යාව, පසුගිය බ‍්‍රහස්පතින්දා (අපේ‍්‍රල් 2)  වන විට  මිලියනය ඉක්මවා ගොස් තිබෙනවා. ඒ, වෛරසය මුලින්ම වාර්තා වී දින 93ක් ඇතුළතදීයි. මේ ආසාදනයවූවන් වාර්තා වන්නේ රටවල් හා පාලන ප‍්‍රදේශ 203කින්. වයිරසය ආසාදනය වීමෙන් මියගිය සංඛ්‍යාවෙ දැන් 52,000 ඉක්මවා තිබෙනවා. ඒ මරණ වාර්තා වන්නේ රටවල් හා පාලන ප‍්‍රදේශ 183කින්. ඉන් වැඩිම මරණ සංඛ්‍යාව ඉතාලියෙන් වාර්තා වන විට දෙවැනි වැඩිම සංඛ්‍යාව වාර්තා වන්නේ ස්පාඤ්ඤයෙන්. ඊළඟට ඇමෙරිකාවෙන්. මේ බව කියන්නේ අමෙරිකාවේ මේරිලන්ඞ්හි ජෝන් හොප්කින්ස් පර්යේෂණ විශ්වවිද්‍යාලයේ, කොවිඞ් 19 ව්‍යසනය පිළිබඳ නිරීක්‍ෂකයන්.

ඒ වාගේම වයිරස ආසාදනය වූ 200,00කට වැඩි පිරිසක් සුවය ලබා තිබෙන බවද වැදගත් කාරණාවක්.

වයිරසය ආසාදිතයන් පළමුවැනි 100,000ක පිරිස වාර්තා වන්නට දින 55ක් ගතවුණු නමුත්, පළමුවැනි 500,000 වාර්තා වන්නට ගතවුනේ දින 76ක් පමණයි. ලක්‍ෂ පහක සංඛ්‍යාව ලක්‍ෂ දහය හෙවත් මිලියනය දක්වා දෙගුණයක් වුණේ දින 8ක් ඇතුළතදියි. පසුගිය බ‍්‍රහස්පතින්දා ලෝකය පුරා වාර්තා වුණු ආසාදිතයන්ගේ සංඛ්‍යාව ඊට පෙර දිනට වඩා සියයට දහයකින් වැඩිවීමක් පෙන්නුම් කළා. අමෙරිකාව මේ වන විට වැඩිම ආසාදිතයන් සංඛ්‍යාවක් එනම්, 143,055ක් වාර්තා කරනවා. බ‍්‍රහස්පතින්දා (2) වන විට එහි මියගිය සංඛ්‍යාව 2,514ක්. ඉතාලියේ මරණ සංඛ්‍යාව 10,779ක් වන විට ආසාදිතයන්ගේ සංඛ්‍යාව 97,689ක්. චීනයේ මරණ සංඛ්‍යාව 3,340ක් වන විට ආසාදිතයන් ගණන 81,470ක්.

ආසාදිතයන් 100කට වැඩියෙන් වාර්තා වූ රටවල් සහ පාලන ප‍්‍රදේශ 117ක් වෙනවා. 1000කට වැඩි ආසාදිතයන් රටවල් 50කින් පමණ වාර්තා වෙනවා.  රටවල් 7කින් ආසාදිතයන් 50,000කට වඩා වාර්තා වෙනවා. ඉන් බොහොමයක් යුරෝපීය රටවල්.

ආසාදිතයන් අතුරෙන් මරණ ප‍්‍රතිශතය සියයට පහකට වැඩි බවයි හොප්කින්ස් විශ්වවිද්‍යාලය වාර්තා කරන්නේ. ඒ තත්ත්වයට පසුගිය දින කිහිපය තුළ ඇමෙරිකාවෙන්, එක්සත් රාජධානියෙන් මෙන්ම ස්පාඤ්ඤයෙන් වාර්තාවූ වැඩි මරණ සංඛ්‍යාව බලපා තිබෙනවා.

වාර්තාවන ආසාදිතයන් අතුරෙන් ආසන්න වශයෙන් සියයට 22ක් ඇමෙරිකාවෙන්. ඉතාලියෙන් හා ස්පාඤ්ඤයෙන් සියයට 11 බැගින්. පසුගිය දෙසැම්බරයේ මුල් වරට රෝගය ගැන වාර්තා වුණ චීනයේ දායකත්වය සියයට 8ක් පමණයි. වයිරසයේ පළමු අපිකේන්ද්‍රය චීනය වුණත්, දැන් එය යුරෝපයට හා ඇමෙරිකාවට විස්ථාපනය වී තිබෙනවා.

ආසාදිතයන් අතුරෙන් සියයට 50කට වැඩි ප‍්‍රමාණයක් වාර්තා වෙන්නේ යුරෝපයෙන්. ඒ වාගේම මරණවලින් සියයට 70ක් පමණ වාර්තා වන්නේත් යුරෝපා රටවලින්. දකුණු යුරෝපයේ, විශේෂයෙන් වැඩිහිටි ජනගහනය වැඩි රටවල් වැඩියෙන් ව්‍යසනයට ගොදුරු වී තිබෙනවා.

ලෝකය පුරා බිලියන 3.9ක මහජනතාව, එනම් ලෝක ජනගහනයෙන් (බිලියන 7.8) බාගයකට සමාන පිරිසක්, කෝවිඞ් 19 පැතිරයාම වැළැක්වීම සඳහා නිවාස අඩස්සිගතව දැන් කල් ගෙවනවා.

2019 දෙසැම්බර් 31 වැනිදා, දහවල් 12ට, ඒඑෆ්පී පුවත් සේවය වචන 280කින් සමන්විත ප‍්‍රවෘත්තියක් ලොව පුරා බෙදාහැරියා.   ‘චීනයේ වූහාන් නගරයේ පුද්ගලයන් 27 දෙනකු ඒ වන විට, නොදන්නා හේතුවකින් ව්‍යාප්ත වන නිව්මෝනියාවට ලක්ව තිබෙන බව’ එහි වාර්තා වුණා. අලූත් අවුරුද්ද පිළිගන්නට සූදානම් වෙමින් සිටි ලෝකය ඒ ප‍්‍රවෘත්තිය කෙරෙහි දැක්වූයේ අඩු අවධානයක්. එහෙත් ඉන් දින සියයක් ඉක්මවන්නට පෙර, ලෝකයේ මිලියනයක් දෙනා රෝගීන් බවට පත්කරන්නට ඒ වන විට ‘දන්නා හේතුව’ හේතුව හෙවත් කොවිඩ් 19 වයිරසය හේතුවුණා. ලෝක සෞඛ්‍ය සංවිධානය දැන් කියන්නේ 2 වැනි ලෝක මහා යුද්ධයෙන් පසු ලෝකය මුහුණ දුන් දැවැන්තම ඛේදවාචකය මෙය බවයි.

අරුණ ජයවර්ධන

(ඬේලිමේල්, හින්දුස්තාන් ටයිම්ස් වාර්තා ඇසුරෙනි.)