‘මං ජීවත්වෙන්නෙ ඩියොන්ටේ වයිල්ඩර්ගේ ඔළුවේ. සීයට සීයක් කුලියක් ගෙවන්නේ නැතිව.’ අපරාජිත බොක්සින් ක‍්‍රීඩක ටයිසන් ෆියුරි එසේ කීවේ, ලෝක බොක්සින් කවුන්සිලයේ ශූරයා වන අපරාජිත ක‍්‍රීඩක ඩියොන්ටේ වයිල්ඩර්ට එරෙහි සටන ගැන අදහස් දක්වමින්. මේ දෙදෙනා බොක්සින් කවුන්සිල ශූරතා බඳපටය වෙනුවෙන් පෙබරවාරි 22 වැනිදා සටන් වැදීමට නියමිතයි.
නෙවාඩාහි ලාස් වේගාස් නුවර එම්.ජී.එම්. ග‍්‍රෑන්ඞ් නම් දැවැන්ත ක‍්‍රීඩාංගණයෙහි මෙම තරගය පැවැත්වීමට නියමිතව තිබෙනවා. මේ සටන මෑත ඉතිහාසයේ දැවැන්තම බොක්සින් සටන් අතරින් එකක්. බොක්සින් ලෝකයම කුතුහලයෙන් මේ සටන දෙස බලා සිටිනවා.


34 හැවිරිදි ඩියොන්ටේ වයිල්ඩර් හා 31 හැවිරිදි ටයිසන් ෆියුරි යන දෙදෙනාම අපරාජිත බොක්සින් ක‍්‍රීඩකයන්. එහෙත් මේ දෙදෙනාගේම නම්වලට ඉදිරියෙන් එකම එක ජය පරාජයෙන් තොර තරගය බැගින් සටහන්ව තිබෙනවා. ඒ ජය පරාජයෙන් තොර සටන ඒ දෙදෙනා එකිනෙකා 2018 වර්ෂයේදී මුණගැහුණු බොක්සින් තරගය.


මේ දෙදෙනාම රාත්තල් 200 ඉක්මවු යෝධයන්. දෙදෙනාම නූතන බොක්සින් ඉතිහාසයේ විශිෂ්ටතමයන් ලෙස ඉතිහාසගත වීමට නියමිතයි. එහෙත් මේ දෙදෙනාට එකිනෙකා අතර අවසන් නොකළ ගනුදෙනුවක් විසඳාගන්නට තිබෙනවා. ඒ නිසාම මේ සටන හඳුන්වා ඇත්තේ අසම්පූර්ණ ගනුදෙනු විසඳන සටනක් ලෙස.


ප‍්‍රතිවාදියා වන ටයිසන් ෆියුරි පවා ගරුකරන ඩියොන්ටේ වයිල්ඩර්ට අදාල කාරණාවක් තියෙනවා. ඒ වයිල්ඩර්ගේ තරග 43න් 41ක්ම ප‍්‍රතිවාදියා නොකවුට් කිරීම හෙවත් නැවත නැගිටීමට නොහැකි ලෙස බිම වැට්ටීමෙන් ජයගෙන තිබෙනවා. ඒ නිසාම ඩියොන්ටේ වයිල්ඩර් නොකවුට් රජෙක් ලෙස සැලකෙනවා.


ප‍්‍රධාන පෙළේ ලෝක බොක්සින් ක‍්‍රීඩකයන් අතරින් අපරාජිත ක‍්‍රීඩකයන් වන්නේ මේ දෙදෙනා පමණයි. අනෙක් ප‍්‍රධාන බොක්සින් ශූරයා වන ඇන්තනි ජොෂුවා තරග පරාජය වී තිබෙනවා. ඒ නිසා මේ දෙදෙනා අතර පැවැත්වීමට නියමිත සටන ලොව සිටින අපරාජිත ශූරයන් අතරින් එක් ජයග‍්‍රාහකයෙකු තීන්දු කරන සටනක් වනු ඇති.


ටයිසන් ෆියුරි අයර්ලන්ත ජාතිකයෙක්. ජිප්සි කිංග් යන අන්වර්ථ නාමයෙන් ඔහු හඳුන්වනවා. ඩියොන්ටේ වයිල්ඩර් ඇමෙරිකානුවෙක්. බ්‍රෝන්ස් බොම්බර් යන අන්වර්ථ නාමයෙන් ඔහු හඳුන්වනවා. මෑත ඉතිහාසයේදී ලොව ප‍්‍රමුඛ බොක්සින් හෙවිවේට් ශූරතාවක් දිනාගත් එකම ක‍්‍රීඩකයා වයිල්ඩර්. ඒ නිසා ලාස් වේගාස්හි එම්.ජී.එම්. ග‍්‍රෑන්ඞ් පිටියේදී, බොහෝ රසිකයන් වයිල්ඩර් පසුපස සිටගනු ඇති. එහෙත් හේතු ගොඩක් නිසා ලෝක රසිකයන් ටයිසන් ෆියුරි පසුපස සිටගනු ඇති.


මේ තරගයට අදාළව එක් වැදගත් කරුණක් වන්නේ වයිල්ඩර්ගේ වයස. ඔහුගේ වයස අවුරුදු 34ක්. ටයිසන් ෆියුරි කියා ඇත්තේ වයිල්ඩර්ගේ උපරිමය දැකිය හැකි වයස දැන් අවසන් බව. ඔහු වයස ගෙවෙද්දී දුර්වල වන බව. 2018 දී තමන්ට හමුවූ වයිල්ඩර් දැන් නැති බව ටයිසන් ෆියුරි කියනවා.


මේ සටනේදී ටයිසන් ෆියුරි බලාපොරොත්තු වන්නේ වයිල්ඩර් සතු ශූරතාව. ලෝකයේ බොක්සින් ශූරතා බඳපටි අයත්වන ප‍්‍රධාන ආයතන කිහිපයක් තියෙනවා. ඒ ආයතන අතරින් එක ශූරතාවක් හෝ තිබෙන අයෙකු ලෝක ශූරයා ලෙස හැඳින්විය හැකියි. ප‍්‍රධාන හෙවිවේට් කිරුළු අතරින් ටයිසන් ෆියුරි කිසිදා ජයග‍්‍රහණය කර නැත්තේ දැනට ඩියොන්ටේ වයිල්ඩර් සතුව තිබෙන ලෝක බොක්සින් කවුන්සිලයේ හෙවිවේට් ශූරතාව පමණයි.


නිල වශයෙන් මෙම තරගය ලෝක බොක්සින් කවුන්සිල ශූරතාව වෙනුවෙන් පවත්වනවා. වයිල්ඩර් පරාජය කළොත් එය ඔහුට ලද හැකියි. අනෙක් පැත්තෙන් ෆියුරි පරාජය කළොත් වයිල්ඩර්ට ලැබෙන ශූරතාවකුත් තිබෙනවා. එයත් මේ තරගයට අදාළ කතාවේ එක් වැදගත් කොටසක්.


ෆියුරිගේ බොක්සින් ජීවිතය ඉතා රළු එකක්. ඔහු 2016 – 2018 කාලසීමාවේ බොක්සින් ලෝකයෙන් ඉවත්ව අසීරු කාලයක් ගතකළා. ඊට පෙර ඔහු බොක්සින් ලොව ඉහළම තත්වයකට පැමිණ සිටියා. ඔහු ඉවත්වීමට පෙර ටයිසන් ෆියුරි 2015 දී විචාරකයන් පුදුම කරමින් ලෝක බොක්සින් සංගමය, අන්තර්ජාතික බොක්සින් ෆෙඩරේෂනය, ලෝක බොක්සින් සංවිධානය, අන්තර්ජාතික බොක්සින් සංවිධානය, ද රිංග් සඟරා ශූරතාවය හා ලිනියල් ශූරතාවය යන ලොව ප‍්‍රධාන බොක්සින් කිරුළු හයක් එකවර ජයගත්තා. ඒ ඉතා තරුණ ක‍්‍රීඩකයෙකුව සිටියදී.
එහෙත් 2016 වනවිට මානසික තත්වයේ කඩාවැටීම් මෙන්ම මත්ද්‍රව්‍ය පාවිච්චිය නිසා ඒ කිරුළු රැුකගැනීම සඳහා තරගවලට සහභාගි වීමට ඔහුට නොහැකි වුණා. ආතතිය නිසා ඔහු නිසියාකාරව පුහුණුවීම්වලට එක්වී තිබුණේ නැහැ. මත්ද්‍රව්‍ය පාවිච්චි කර තිබුණේත් ඒ නිසාමයි. ඔහුගේ සිරුර අසාමාන්‍ය ලෙස තරබාරු වී තිබුණා. ෆියුරි ශාරීරිකව හා මානසිකව දුර්වල වී කඩාවැටුණා. ඔහු සතුව තිබුණු ලෝක බොක්සින් සංගමය, අන්තර්ජාතික බොක්සින් ෆෙඩරේෂනය, ලෝක බොක්සින් සංවිධානය, අන්තර්ජාතික බොක්සින් සංවිධානය යන ආයතනවල ශූරතා ඔහුගෙන් ඉවත් කරනු ලැබුවා.


එසේ සියල්ල අහිමිවූ ෆියුරි ඉතා අසීරු කාලයක් ගතකොට නැවත බොක්සින් තරගයකට එක්වන්නේ 2018 දී. ඒ වයිල්ඩර්ට එරෙහිව අප පෙර සඳහන් කළ තරගයට. එයින් පසුව ඔහු වතාවක් ඩබ්ලිව්.ඩබ්ලිව්.ඊ. ආයතනයේ රෙස්ලින් වැඩසටහන්වලටද සහභාගි වුණා. දැන් ඔහු තමන් තුළ ඇති ආතතිය ආදි පීඩාවන් ජයගනිමින් ක‍්‍රමයෙන් බොක්සින් ලොව නැගී සිටිනවා. මීට පෙර ශූරතා බඳපටි ඉණේ සහ කරේ ඉල්ලාගෙන සිටි සිටි ඔහුට, අද එක ශූරතා බඳපටියක්වත් අද නැහැ.


බඳපටියක් නැතත් ටයිසන් ෆියුරි තවම ලිනියල් බොක්සින් ශූරයා ලෙස සලකනවා. එනමින් හඳුන්වන්නේ නිශ්චිත බොක්සින් ආයතනයක බඳපටයක් නොවෙයි. ලිනියල් බොක්සින් ශූරතාව සංකල්පයක් පමණයි. මීට පෙර බොක්සින් ලෝකයේ සිටි විශිෂ්ටයා පරාජය කළ පුද්ගලයා ලිනියල් ශූරයා ලෙස හඳුන්වනවා. මෙලෙස සංකල්පීය ශූරතාවක් බිහිවීමට හේතුවක් තිබෙනවා.
අප කලිනුත් පෙන්වූ පරිදි බොක්සින් බඳපටියක් දිනාගන්නට මීට පෙර සිටි ශූරයා පරාජය කළ යුතුම නැහැ. යම් ශූරයෙකු තම බඳපටිය රැුකගැනීම සඳහා තරගවලට සහභාගි වීමට අසමත් නම් ඒ ආයතනය ශූරතාව ශූරයාගෙන් ඉවත්කොට හිස්වූ ශූරතාව වෙනුවෙන් තරගයක් පවත්වනවා. අයහපත් සෞඛ්‍ය තත්වය, හදිසි අනතුරු, තහනම් උත්තේජක පාවිච්චිය, අපරාධවලට සම්බන්ධ වී නීතියෙන් දඬුවම් ලැබීම, මත්ද්‍රව්‍ය පාවිච්චිය ආදි නොයෙකුත් හේතු නිසා ශූරයෙකුගෙන් ශූරතාව ඉවත් කළ හැකියි. එවැනි මොහොතක අලූතින් බිහිවන ශූරයා පෙර සිටි ශූරයා පරාජය කර නැහැ.
එම තත්වයට ප‍්‍රතිචාර ලෙස බොක්සින් ක‍්‍රීඩාවේ රසිකයන්, ක‍්‍රීඩකයන්, මාධ්‍ය ඇතුළු පුද්ගලයන් සාමූහිකව ලිනියල් ශූරතාව නම් සංකල්පයක් පවත්වාගෙන යනවා. මොහොමඞ් අලි වැනි ක‍්‍රීඩකයන්ගේ කාලයේ සිට, පෙර සිටි ශූරයා පරාජය කළ ක‍්‍රීඩකයා ලිනියල් ශූරයා ලෙස හඳුන්වනවා. ඒ අනුව 2016 දී බොක්සින් ආයතනවල බඳපටි ටයිසන් ෆියුරිගෙන් ඉවත් කළත්, තවම ෆියුරි ලිනියල් ශූරයා ලෙස හැඳින්විය හැකියි. වයිල්ඩර් ෆියුරි පරාජය කළොත් වයිල්ඩර් ලිනියල් ශූරයා ලෙස හඳුන්වනවා.


ද්වන්ද්ව සටන් ක‍්‍රීඩා ආවරණය කරන ද රිංග් සඟරාවෙන් තමන්ගේම බොක්සින් ශූරතා බඳපටයක් පවත්වාගෙන යනවා. ඔවුන් එය ලබාදෙන්නේ ලිනියල් ශූරයා යැයි ඔවුන් සංකල්පීයව හඳුනාගන්නා ශූරයාට. 2016 දී ෆියුරි ඉවත්වූ නිසා ඔවුන්ගේ බඳපටය කිසිම ශූරයෙකුට ලබාදුන්නේ නැහැ. ෆියුරි සහ වයිල්ඩර් අතර තරගයෙන් ජයගන්නා ක‍්‍රීඩකයාට ද රිංග් සඟරාවේ ශූරතා බඳපටයත් හිමිවනු ඇති.


2016 දී ටයිසන් ෆියුරිගෙන් ඉවත් කළ ශූරතා අතරින් ලෝක බොක්සින් සංගමය, අන්තර්ජාතික බොක්සින් ෆෙඩරේෂනය, ලෝක බොක්සින් සංවිධානය, අන්තර්ජාතික බොක්සින් සංවිධානය යන ආයතනවල ශූරතා සියල්ල දැන් තිබෙන්නේ ඇන්තනි ජොෂුවා නම් බි‍්‍රතාන්‍ය ජාතික බොක්සින් ක‍්‍රීඩකයා සතුව. ෆියුරි එම ශූරතා අත්හැරීමෙන් පසු හිස්වුණ ශූරතා ඇන්තනි ජොෂුවා අතට පත්ව තිබෙනවා. මේ තරගයෙන් ජයගන්නා ක‍්‍රීඩකයා ඉදිරි දිනයක ජොෂුවා පසුපස හඹායනු ඇති.


මේ සටනේ සටන්කරුවන් දෙදෙනාටම ප‍්‍රතිවාදියා සමග සටන් කිරීමට අමතරව තමන්ගේම ආත්මීය සටනක් කරන්නට සිදුවීම සුවිශේෂයි.


වයිල්ඩර් තමන්ගේ වයස පිළිබඳ අභියෝගය ජයගත යුතුයි. ටිකෙන් ටික අසමත් වන තමාගේ සිරුර එකලස් කොට, සටනට මුහුණදීමේ අභියෝගය ඔහුට තිබෙනවා. පුහුණුවීම්, නිසි පෝෂණය ආදිය වයසෙහි අභියෝගය ජයගැනීමට ඔහුට පාවිච්චි කරන්නට සිදුවෙනවා.
අනෙක් පැත්තෙන් ටයිසන් ෆියුරි තමන්ගේම මානසික ආතතිය පරාජය කළ යුතුයි. ප‍්‍රතිවාදියාගේ මුෂ්ටි ප‍්‍රහාරයකින් නොකවුට් වීමේ අවදානමට අමතරව තමන්ගේම මානසික පීඩනය සමග ගනුදෙනු කිරීමේ අභියෝගයක් ෆියුරිට තියෙනවා.


ලොව පුරා බොක්සින් රසිකයන් බලා ඉන්නේ මේ අපරාජිතයන් දෙදෙනා තමන්ගේම අභ්‍යන්තර සටන් ජයගෙන, ප‍්‍රතිවාදියා පරාජය කරනු ඇතිද කියායි.

අනුරංග ජයසිංහ