ආරක්ෂක අමාත්‍යාංශ ලේකම්වරයා ප්‍රතික්ෂේප කර ඇති රටේ ආර්ථික මධ්‍යස්ථානයකට අයිඑස්අයිඑස් ත්‍රස්තවාදී ප්‍රහාරයක් එල්ල විය හැකි බවට වූ අනතුරු හැඟවීම සිදුකර ඇත්තේ ශ්‍රී ලංකා ඉන්ෂුවරන්ස්හි ආරක්ෂක කළමනාකරු හිටපු ලුතිනන් කර්නල් ප්‍රිමල් රොද්‍රිගු බව වාර්තා වේ.

ඔහු ශ්‍රී ලංකා ඉන්ෂුවරන්ස්හි නියෝජ්‍ය ප්‍රධාන අධිකාරී, මානව සම්පත් හා සේවක සබඳතා වෙත ආරක්ෂක තොරතුරු ඉදිරිපත් කිරීම මැයෙන් මැයි 18 දින සහිතව එම අනතුරු හැඟවීම සිදුකර ඇත.

එම වාර්තාවෙන් ආරක්ෂක කළමනාකරු හිටපු ලුතිනන් කර්නල් ප්‍රිමල් රොද්‍රිගු සදහන් කරන්නේ රාජ්‍ය බුද්ධි අංශ නිලධාරීන් පැමිණ ඔහුට එම කරුණු දැන්වූ බවයි.

විදේශයන්හි පුහුණුව ලැබූ ආගමික අන්තවාදී අදහස් සහිත පුද්ගලයන් සමාජය තුළ නිදැල්ලේ සැරිසරන බවත් ඔවුන් රාජ්‍ය හා පෞද්ගලික සේවා සපයනු ලබන ආයතනයක් තුළට ඇතුල්ව තියුණු අවිආයුධ භාවිතයෙන් තුවාල සිදු කිරීමට හෝ විෂ සහිත තියුණු ආයුධ මගින් මරණීය තුවාල සිදුකිරීමේ අවදානමක් පවතින බව බුද්ධි අංශ නිලධාරීන් තමාට දැන්වූ බව ලුතිනන් කර්නල්වරයා වාර්තාවේ අවධාරණය කර තිබේ.

මේ දිනවල සිදුකරන ත්‍රස්ත ක්‍රියා සම්බන්ධයෙන් වූ විමර්ශන අඩාල කිරීම සඳහා මේ ක්‍රියාකාරකම් කිරීමට නියමිත බව විශ්වාස කෙරෙන බව සඳහන් කරන ඔහු වැඩිදුරටත් සඳහන් කර ඇත්තේ කොවිඩ්-19 තත්වය නිසා ආරක්ෂාව සම්බන්ධ වැඩි අවධානයක් යොමු නොවීම නිසා ශ්‍රී ලංකා ඉන්ෂුවරන්ස් එහි ආරක්ෂක ක්‍රියාමාර්ග දැඩි කළ යුතු බවට උපදෙස් දෙන බවයි.

හිටපු ලුතිනන් කර්නල් ප්‍රිමල් රොද්‍රිගු යුද හමුදාවේ ගජබා රෙජිමේන්තුවේ සාමාජිකයෙකු වන අතර ඔහු ශ්‍රී ලංකා ඉන්ෂුවරන්ස්හි ආරක්ෂක කළමනාකරු තනතුරට පත්වූයේ පසුගිය රාජපක්ෂ පාලන කාලයේදී එවක ශ්‍රී ලංකා ඉන්ෂුවරන්ස්හි අධ්‍යක්ෂවරයෙකු ලෙස කටයුතු කළ වත්මන් ජනාධිපති ගෝඨාභය රාජපක්ෂගේ ආශීර්වාදයෙනි.