No menu items!
27.4 C
Sri Lanka
29 March,2024

ඇවන්ගාඞ් නැව ඇල්ලුවේ ඇයි? හිටපු නාවික හමුදාපති මහාධිකරණයේදී සාක්‍ෂි දෙයි

Must read

සේනාධිපති කියන්නේ දේශපාලන පළිගැනීමක් බවයි

ඒත් මහාධිකරණය සේනාධිපතිගේ විත්තියේ සාක්‍ෂි කැඳවයි

 

 

ඇවන්ට්ගාර්ඞ් මැරිටයිම් සර්විසස් අධිපති නිශ්ශංක සේනාධිපති, ඉකුත් රජය සමයේ සිදුවු දේශපාලන පළිගැනීම් ගැන සොයා බැලීමේ ජනාධිපති කොමිසමට පැමිණිල්ලක් ඉදිරිපත් කරමින් කියාසිටියේ, දේශපාලන පළිගැනීමක් ලෙස තමාට එරෙහිව මහාධිකරණය ඉදිරියේ නඩු පවරා ඇති බවයි. ඒ සම්බන්ධයෙන් විමර්ශනය පටන් ගත් ජනාධිපති කොමිසම, වගඋත්තරකරුවන් කැඳවීමට නියම කළ පසුථ ජනතා විමුක්ති පෙරමුණේ නායක අනුර කුමාර දිසානායක, අපරාධ පරීක්‍ෂණ දෙපාර්තමේන්තුවේ හිටපු අධ්‍යක්‍ෂ ශානි අබේසේකර ඇතුළු පිරිසක් අභියාචනාධිකරණය ඉදිරියේ එම නියෝගයට අභියෝග කළහ.

ඒ අතර, කොළඹ ත්‍රිපුද්ගල මහාධිරණය ඉදිරියේ නිශ්ශංක සේනාධිපති මහතාට එරෙහිව නඩුවේ සාක්‍ෂි විමසීම ආරම්භ විය. ධම්මික ගනේපොල, ආදිත්‍ය පටබැඳි හා මංජුල තිලකරත්න යන මහාධිකරණ විනිසුරුවරුන් ඉදිරියේ විභාග වන මේ නඩුවේ, විත්තියේ සාක්‍ෂි කැඳවීම ඔක්තෝබර් 6වැනිදා ආරම්භ විය.

සාමාන්‍යයෙන් අපරාධ නඩුවක පැමිණිල්ලේ සාක්‍ෂි විමසා අවසන් වූ විට, එම සාක්‍ෂිවලින් විත්තිකරු හෝ විත්තිකරුවන් හෝ වෙත අපරාධමය වගකීමක් පැවරෙන බවක් බැලූ බැල්මට නොපෙනේ නම්, විත්තිකරුවන් නිදොස්කොට මුදාහැරීමේ බලතල අධිකරණයට තිබේ. එසේ නැතිනම්, ඒ බව අධිකරණයට පෙන්වා දී විත්තිකරුවන් මුදාහරින්නැයි ඉල්ලීමට හැකියාවක් විත්ති පාර්ශ්වයට, අපරාධ නඩු විධාන සංග්‍රහයේ 200වැනි වගන්තිය යටතේ තිබේ. එහෙත්, බැලූ බැල්මට විත්තිකරුට එරෙහිව සාක්‍ෂි තිබෙන බව අධිකරණයට පෙනීයන්නේ නම්, විත්තිකරු වෙනුවෙන් සාක්‍ෂි කැඳවන ලෙස අධිකරණය විසින් නියම කෙරෙයි.

තමාට එරෙහිව ව්‍යාජ නඩුවක් පවරා ඇත්තේ අභූත චෝදනා මත දේශපාලන වශයෙන් පළිගැනීමටයැයි ජනාධිපති කොමිසමට පැමිණිලි කළ නිශ්ශංක සේනාධිපති මහතාට එරෙහි මේ නඩුවේදී, ඉහත මුල් අවස්ථා දෙකෙන් එකක් වත් සිදු නොවීය. ඒ වෙනුවට ත්‍රිපුද්ගල විනිශ්චයාසනය විත්තිකරුවන්ට තමන් වෙනුවෙන් සාක්‍ෂි කැඳවන ලෙස නියම කෙළේය. ඒ අනුව, එළැඹිය හැකි නිගමනය වන්නේ මහාධිකරණ විනිසුරුවරුන් තිදෙන, බැලූ බැල්මට නිශ්ශංක සේනාධිපතිට හා අනෙක් විත්තිකරුවන්ට එරෙහිව සාක්‍ෂි තිබෙන බව තීරණය කර ඇති බවයි.

විත්තියේ සාක්‍ෂි කැඳවූ විට, තෝරාගැනීම් තුනක් විත්තියට තිබේ. පළමුවැන්න, තමන් වෙනුවෙන් සාක්‍ෂිකරුවන් කැඳවීමයි. එසේම විත්තිකරුවන් සාක්‍ෂි කූඩුවට නැග ‘සාක්‍ෂි’ දීමයි. එවිට, පැමිණිල්ලේ මෙන්ම විනිසුරුවරුන්ගේද හරස් ප්‍රශ්නවලට පිළිතුරු දීමට විත්තිකරුට සිදුවෙයි. හරස් ප්‍රශ්නවලට පිළිතුරු දීම අවදානම් බව කල්පනා කරන විත්තිකරුවකුට තෝරාගත හැකි දෙවැන්න වන්නේ විත්තිකූඩුවේ සිට ‘ප්‍රකාශයක්’ කිරීමයි. එහිදී හරස් ප්‍රශ්න අසන්නට පැමිණිල්ලට මෙන්ම විනිසුරුවරුන්ටද අවකාශයක් නැති නිසා, විත්තිකරුවෝ වඩාත් ආරක්‍ෂාකාරී ක්‍රමයක් ලෙස එය සලකති. තුන්වැනි තෝරාගැනීම නම්, නිශ්ශබ්දව සිටීමයි.

විත්තියේ සාක්‍ෂි කැඳවූ අවස්ථාවේදී විත්තිකාර නිශ්ශංක සේනාධිපති තෝරාගත්තේ, විත්තිකූඩුවේ සිට ප්‍රකාශයක් කිරීමයි. එහිදී, ඔහු පැමිණිල්ලේ හෝ විනිසුරුවරුන්ගේ හෝ හරස් ප්‍රශ්නවලට භාජනය නොවේ. ඔක්තෝබර් 6 වැනිදා, ඔහු විත්තිකූඩුවේ සිට පැය තුනකට ආසන්න කාලයක් දීර්ඝ ප්‍රකාශයක් ලබාදුන්නේය.

මේ සමග පළවන්නේ, එම නඩු විභාගයේදී ජ්‍යෙෂ්ඨ රජයේ නීතිඥ ජනක බණ්ඩාරගේ මෙහෙයවීමෙන්  පැමිණිල්ලේ සාක්‍ෂිකරුවකු හැටියට සාක්‍ෂි දුන්, හිටපු නාවික හමුදාපති රවින්ද්‍ර විජේගුණරත්න, ඇවන්ට්ගාර්ඞ් නැව, 2015 ඔක්තෝබර් 6දා ගාල්ල වරායට ආසන්න මුහුදේදී අත්අඩංගුවට ගැනීම සම්බන්ධයෙන් ත්‍රිපුද්ගල මහාධිකරණ විනිශ්චයාසනය ඉදිරියේ දුන් සාක්‍ෂියෙන් කොටසකි.

හිටපු නාවික හමුදාපති රවින්ද්‍ර විජේගුණරත්න..

 

..අපිට දැනගන්න ලැබුණා ගාල්ලේ ඉන්න නියෝජ්‍ය හාබර් මාස්ටර්ගෙන් ‘එම්වී ඇවන්ගාඞ්’ කියන නෞකාව ඒගොල්ලන්ගේ නැවේ ඉන්න ගාඞ්ලා තුන්දෙනෙක්ව සහ ආයුධ තුනක් මාරු කරන්න එන්න අවසර ඉල්ලලා. නමුත් සාමාන්‍යයෙන් අවසර දෙන්න ඉස්සරවෙලා ඒ නැවේ පැමිණීම ගැන නාවික හමුදාවට කියන්න ඕනෑ, නමුත් අපිට ඒ විස්තර ලැබිලා තිබුණේ නැහැ. ඒ හින්දා නියෝජ්‍ය හාබර් මාස්ටර් ගාල්ලේ ඒ නැවට එන්න එපා කිව්වා. ඒ අතරේ අපේ රේඩාර් පද්ධතියේ දැක්කා මේ නැව හැතැප්ම 13ක් විතර ගාල්ලට ඈතින් ඉන්නවා. .. මේක රතු මුහුදේ තියෙන ෆ්ලෝටිං ආමරියක් (පාවෙන අවි ගබඩාවක්) කියලා අපි දන්නවා. නමුත් මේ පැමිණීම ගැන අපිට කලින් කිසිම දැනුම්දීමක් කරලා තිබුණේ නැහැ. ඒ නිසා අපි විස්තර ඇහැව්වා. නමුත් ඒවාට නැවෙන් ප්‍රතිචාර දැක්වූවේ නැහැ. ඒ හින්දා අපි කිව්වා ඒ ප්‍රදේශයේ තියෙන අපේ වේග ප්‍රහාරක යාත්‍රා දෙකකට මේ නැව ළඟට ගිහිල්ලා නැවට කතා කරන්න කියලා. එක ප්‍රහාරක යාත්‍රාවකට කතා කරන්න පුළුවන් වුණා. ඒ අය කිව්වා ඒ අය ආවේ ගාල්ලට කියලා. නමුත් ඔවුන් එන්න නියමිතව තිබුණේ කොළඹට. අපි ඇහුවා කොළඹට එන්න තියෙන එක ඇයි ගාල්ලට ගියේ කියලා. ඒ සඳහා හරි පිළිතුරක් දෙන්න බැරිවුණා.

 

දෙවැනි සැකය

දෙවැනි සැකය මතුවුණේ, අපි විස්තර අහනකොට ඇහුවා අවි ආයුධ නැවේ තියෙනවාද කියලා. මොකද අපි දන්නවා මේ නැව රතු මුහුදේ තිබුණ පාවෙන අවි ගබඩාවක්. ඔවුන් කිව්වා, ආයුධ තුනක් හැර වෙනත් ආයුධ කිසිවක් නැහැ කියලා. ඒකෙන් අපේ සැකය තවත් ටිකක් වැඩිවුණා.

ඇවන්ගාඞ් අපි එක්ක බොහෝම ළඟින් වැඩකරන කොම්පැනියක්. ඒ කොම්පැනියේ අපේ නාවික හමුදාවේ උසස් නිලධාරීන්, විශේෂයෙන්ම මට ඉස්සෙල්ලා විශ්‍රාම ගිය නාවික හමුදාපතිවරුන් හතරක් රාජකාරි කරනවා. ඒ නාවික හමුදාපතිවරු මා එක්ක හැම තිස්සේම කතාකරනවා. ඒ අයට සමහර උදව් අවශ්‍ය වෙලාවට අපි ලබාදෙනවා. ඉතින් අපි නැවට කිව්වා, අපි මේ කොම්පැනිය හොඳට දන්නවා, ඒත් එදා හවස ඔබ දෙන විස්තර ගැන අපේ ප්‍රශ්නයක් තියෙනවා, අපි ඔබේ නැවට නගලා බලන්න ඕනෑ කියලා. ඒ කිව්වේ හවස 5.30ට 6ට වගේ.

යම්කිසි අඩුපාඩුවක් තියෙනවා නම්, මේ කොම්පැනියේ ජ්‍යෙෂ්ඨ නිලධාරීන් කවුරුහරි මට කතා කරනවා. මේ කිසි කෙනෙක් මට කතාකළේ නැහැ. ඉතින් ඒකෙන් මට සැකය තවත් වැඩිවුණා.

රතු මුහුදේ තියෙන්න ඕනෑ නැව මෙතෙන්ට ඇවිල්ලා මෙහෙම කැරකෙනවා. අපිට ඉන්ෆෝම් කරලාත් නැහැ. කවුරුවත් දන්නේත් නැහැ. ඇයි මේ කොම්පැනියේ ඉන්න සීනියර් අයවත් මේ ගැන නොදන්නේ කියලා, මගේ සැකය තවත් වැඩිවුණා.

ඔක්තෝබර් 6 වැනිදා උදේ මම ඕඩර් කළා උදේ පළමු ඉර එළිය වැටුණාට පස්සේ නැවට නැගලා නැව පරීක්‍ෂා කිරීමට.

 

හිටියේ සීමාවට පිටින්

මගේ සැකයට භාජනය වුණ තවත් කරුණක් තිබුණා. ඒ තමයි නැව හැම තිස්සේම හිටියේ අපේ ටෙරිටෝරියල් බෝඩර්ස්වලින් එළියේ. ටෙරිටෝරියල් බෝඩර්ස් අපිට හැතැම්ම 12ක් තියෙනවා. ඒ හැතැම්ම 12දි විතරයි අපේ නීතිය අපිට ක්‍රියාත්මක කරන්න පුළුවන්. නැව හිටියේ හැතැම්ම 12න් හැම තිස්සේම යාර කිහිපයක් හරි එළියෙන්. ඒ කියන්නේ එයාට විරුද්ධව අපේ රටේ නීතිය ක්‍රියාත්මක කරන්න බැහැ.

නමුත් ඒ නැවේ අයට එක දෙයක් අමතක වෙලා තිබුණා. ඒ තමයි නැව ලංකාවේ ලියාපදිංචි වෙච්ච ලංකාවේ ධජය රැගෙන යාත්‍රාකරන එකක්. එවැනි නැවකට නගින්න අපි කාගෙවත් අවසර ගන්න ඕනෑ නැහැ.  අපි නැවෙන් ඇහුවාම ඇයි ටෙරිටෝරියල් බෝඩර්ස්වලට එන්නේ නැත්තේ කියලා ඒකට හේතුවක් ලෙස කිව්වේ, ‘නැහැ කොම්පැනියෙන් අපිට කියලා තියෙන්නේ හැතැම්ම 12කට එහා ඉන්න’ කියලා.

 

කැප්ටන් වෙනස්

ඒ වාගේම අපිට තවත් සැක හිතෙන දෙයක් ඇතිවුණා. නැවක් ගේනකොට අපෙන් අනුමැතිය ගන්න යම් යම් ලිපිද්‍රව්‍ය ලබාදෙනවා. ඒවායේ තියෙනවා, කවුද කැප්ටන්, කවුද තව ඉන්නේ, මොනවාද තියෙන බඩු කියලා. ඒ නැවේ කැප්ටන් විදියට සඳහන් කරලා තිබුණේ නානායක්කාර කියලා කෙනෙක්. නමුත් අපිට තේරුණා නැවේ ඉන්නේ නානායක්කාර කියන කෙනෙක් නෙවෙයි, යුක්රේනියන් කැප්ටන් කෙනෙක්. ඒකෙන් අපේ සැකය තවත් තහවුරු වුණා.

අපේ වීරසිංහ කියන නිලධාරියෙන් නැවට නැග්ගා. මට ඔහුත් සමග ඍජුවම සම්බන්ධ වෙන්න පුළුවන්. මම මගේ මොබයිල් එකෙන් ඔහුට කතාකළා. මට විශේෂයෙන් දැනගන්න වුවමනාව තිබුණේ නැවේ මොනවාද තියෙන්නේ කියලා.

දෙක, නැවේ ඉන්න කැප්ටන් ගැන අපිට හරියටම දැනගන්න ඕනෑකම තිබුණා. මම එයාගෙන් ඇහුවා කැප්ටන් ලංකාවේ නානායක්කාරද කියලා. ඔහු කිව්වා නැහැ යුක්රේන් ජාතිකයෙක් කියලා. ඒ දැනගත්තේ උදේ නැග්ගාට පස්සේ. කැප්ටන් කතාකරන විලාසයෙනුත් තේරුම් ගියා ඔහු ලංකාවේ නොවන බව.

වීරසිංහ මට කිව්වා, මේ නැවේ අවිආයුධ තියෙනවා කියලා. ඊට පස්සේ අපි තවත් කට්ටිය ඇරලා, ඒ අවි ආයුධ ගණන් කරලා, ඒවා කීයක් තියෙනවාද, කාගේද, ඒවායේ නොම්මර හරිද කියන විස්තර ඊට පස්සේ ලබාගත්තා.

 

ලොකු ප්‍රශ්නයක්

එහෙම ආයුධ තිබිච්ච එක ලොකු ප්‍රශ්නයක්. මොකද මේ ආයුධ අරගෙන මේ නැව දවස් 14ක්-15ක් විතර ජාත්‍යන්තර මුහුදේ ඇවිල්ලා ඉන්දියාවේත්, මාලදිවයිනේත් සීමාව ක්‍රොස්කරලා තමයි ඇවිත් තියෙන්නේ. අපි ළඟට එනකල් අපි ඒක දැක්කේ නැහැ. දැනගෙන හිටියේ නැහැ. මේ නැවට අවසර තියෙන්නේ පාවෙන අවි ගබඩාවක් විදියට රතු මුහුදේ කටයුතු කරන්න. රතු මුහුදේ තියෙන ආමරියේ ආයුධ ලංකාවට ගෙනෙනන්න අනුමැතිය දීලා තියෙන්නේ ගුවන් මගින් පමණයි. ළඟම තියෙන පෝට් එකට ගිහින් එතනින් සීල් කරලා, ඒ බොක්ස් එක්ක ඒවා ෆ්ලයිට් එකේ ලංකාවට ගේනවා. කස්ටම් සර්විස් වශයෙන් කරන්න ඕනෑ. සෑහෙන මුදල ක් යනවා. ආයුධ බාරව හැම තිස්සෙම කෙනෙක් ගමන් කරන්නත් ඕනෑ.

 

අඩු ගානට ආයුධ ගෙනෙන්න

මගේ දැනීමේ හැටියට මා හිතන්නේ ඇවන්ගාඞ් කම්පැනියට අවශ්‍යතාව තිබුණේ මේ ආයුධ ටික ඊට වඩා අඩු ගානට ලංකාවට ගෙනෙන්න. ඒ නැව එම්වී ඇවන්ගාඞ් බොහොම දිරාපත් වෙච්ච නැවක්. ඕනෑ වෙලා තිබුණා ඒ නැව ලංකාවට ගෙනැවිත් ඕෆ් චාටර් කරන්න. නැව ලංකාවට ආවාට පස්සේ රාජකාරියෙන් නිදහස් කරලා ගියේ ඉන්දියාවේ නැව් කපන යාඞ් එකකට. මේවා කරන්න අවශ්‍යතාවක් තිබුණා නම්, ඇවන්ගාඞ් කොම්පැනියට නිසි අවසරය ඉල්ලන්න තිබුණා.

ගිනි අවි සහ උණ්ඩ තියෙනවාය කියලා දැනගත්තාම මම දුන්න නියෝගය තමයි, නැව අත්අඩංගුවට අරගෙන ජාත්‍යන්තර වරායට අරගෙන එන්න. නමුත් වරායට එන්න දෙන්න බෑ කිව්වා. හේතුව ෆීස් ගෙවලා නැති නිසා. ඒ හින්දා එළියේ නැංගුරම් දැම්මා.

සාමාන්‍යයෙන් ඒ වාගේ මෙහෙයුමක් කළාට පස්සේ අපි වාර්තාවක් ආරක්‍ෂක ලේකම්තුමාට දෙනවා. ඒ වැඬේ ඉවර වුණාම උදේ 10ට විතර කරුණාසේන හෙට්ටිආරච්චි  ලේකම්තුමා හමුවෙන්න මම ගියා. වාර්තාවකුත් දුන්නා. විස්තරත් කිව්වා. කාමරයේ ලේකම්තුමාට අමතරව අතිරේක ලේකම් සමන් දිසානායක මහතාත් (නඩුවේ 11 වැනි චුදිත) හිටියා. දිසානායක මහත්මයා ලියුමක් අත්සන් කරන්න ලේකම්ට දුන්නා. මටත් ඒක දුන්නා. බැලුවාම ඒකේ මේ ඇවන්ගාඞ් නැව ගැන තමයි තියෙන්නේ.

වැරදි වැඩක්

එකේ කියලා තියෙන්නේ ඇවන්ගාඞ් නැවට අවසර දෙන එක ගැන. මම කිව්වා මේ වෙනකොටත් අපි නැව අත්අඩංගුවට අරගෙන තියෙන්නේ කියලා. ඒකේ අවසර දීලා තියෙන්නේ නැවේ අවි තියාගෙන ඉන්න මිසක්, නැවට රතු මුහුදේ ඉඳලා මෙහාට එන්න නෙවෙයි. මම ආරක්‍ෂක ලේකම්තුමාට කිව්වා, මේකට අවසර ගතයුතුව තිබුණේ රතු මුහුදෙන් පිටත් වෙන්න ඉස්සර කියලා. ඒ කියන්නේ සැප්තැම්බර් මාසේ 21වැනිදාට ඉස්සෙල්ලා. දැන් නැව ඇවිල්ලා ඉවරයි ගාල්ලට. මේ කළේ ඉතාමත් වැරදි ක්‍රියාවක්. මොකද නැව එන එක අපි දැනගෙන හිටියේ නැහැ. නමුත් දැන් 6 වැනිදා, අනුමැතිය දෙනවා රතු මුහුදේ ඉඳන් එන්න. එහෙනම් එයා පිටත්වෙන්න ඕනෑ, 6 වැනිදා තමයි රතු මුහුදෙන් ලංකාවට එන්න. නමුත් 6 වැනිදා ලංකාවට ඇවිත් ඒකට අනුමැතිය ඉල්ලපු එක ජාත්‍යන්තර වශයෙන් අපිට ලොකු ප්‍රශ්නයක් වෙලා තියෙන්නේ. පළමු දේ තමයි, මේක දැනගත්තට පස්සේ ඉන්දියන් නාවික හමුදාව මේ පිළිබඳව ප්‍රශ්න කරනවා. ඊට දවස් කීපයකට ඉස්සෙල්ලා නවදිල්ලියේ තිබුණ ආරක්‍ෂක ලේකම්තුමාගේ සම්මේලනයේදී විශේෂයෙන්ම කිව්වා, මේ අවි පුරවාගත්තු පාවෙන අවි ගබඩාව කියන නැව් මුහුදේ එහා මෙහා ගමන් කිරීම ඒ අය ලොකු අවදානමක් හැටියට දකිනවා කියලා. ලංකාවේ නාවික හමුදාව ඒ ගැන විශේෂයෙන්ම ආරක්‍ෂාකාරී වෙන හැටියට. බොම්බෙ ප්‍රහාරයෙන් පස්සේ ඒ අය සෑහෙන බයකින් ඉන්නේ.

අපිට ඒ ලියුම 21වැනිදා දුන්නා නම්, අපි රුසියාව, චීනය, ජපානය, ඉන්දියාව යන රටවලට කියනවා මෙහෙම අපේ විශාල අවි ප්‍රමාණයක් තියෙන නැවක් එනවා, ඒ සඳහා අවශ්‍ය අවසරය දෙන්න කියලා. ඉන්දියාවට හා මාලදිවයිනට කියනවා ඔවුන්ගේ ටෙරිටරි එකෙන් නැව යනකොට ආරක්‍ෂාව සපයන්න කියලා. ප්‍රශ්නෙ තියෙන්නේ, මේ නැව කොල්ලකරුවන්ට හරි වෙන රටකට හරි අහුවුණා නම් මොකද වෙන්නේ කියලා. ඒකේ රැගෙන යන්නේ ශ්‍රී ලංකා ධජය. එතකොට ලංකා රජය ඒ සඳහා වගකියන්න ඕනෑ. ඒ වැරැද්දයි මම පෙන්නුම් කළේ. ආරක්‍ෂක ලේකම්තුමා කිව්වා, දැනට කරගෙන යන වැඬේ ඔහොමම කරගෙන යන්න, වරදක් තියෙනවා නම් ඒ ගැන විමර්ශනයක් කරලා ඒ පිළිබඳ කටයුතු කරන්න කියලා. 

..ඇවන්ගාඞ් නැව නීති විරෝධී කියලා තීරණය කළේ කාරණා කීපයක් හින්දා. පළවෙනි දේ අපිට දීලා තිබුණු ඉස්සෙල්ලා පැහැදිලි  කළ විස්තරවල වෙනස.  ඒ වාගේම නැවේ තිබුන ආයුධ ප්‍රමාණය. ඒ වාගේම සමහර අවිආයුධවල තිබුණ නොම්මර. ඒ ආයුධ රක්නා ලංකා කොම්පැනියට අයිතියි. අපිට තේරුණා සමහර ආයුධවල තිබිච්ච නොම්මරය මකලා උඩින් නොම්මරයක් ගහලා. උදාහරණයක් හැටියට ඒ උඩින් ගහපු නොම්මරය 712 නම් ඒ නොම්මරය තමයි, අර රක්නා ලංකා එකේ ලිස්ට් එකේ තියෙන්නේ. ඒ වාගේ ගොඩක් නොගැළපීම් තිබුණා. මේවා මත තමයි නැව අත්අඩංගුවට අරගෙන පොලිසියට බාරදෙන්න කියලා නියෝග කළේ. ■

■ අරුණ ජයවර්ධන

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි