මිනිස්සු හිනා වුණා, විචාරකයන් ප්‍රතික්ෂේප කළා – රංජන් රාමනායක

හෑල්ලුවට ලක්කරන්නේ ඇයිද කියලා කනගාටු වුණා – දිල්හානි අශෝකමාලා

 

ටෙනිසන් කුරේ මුලින්ම හමුවුණේ කොහේදීද?

රන්ජන්: ටෙනී අයියා මුලින්ම මට හමුවුණේ 1986 දී විජේ කුමාරතුංග මහත්මයා රඟපෑ “ඔබටයි ප්‍රියේ ආදරේ” චිත්‍රපටයේ රූගත කිරීම් කරද්දී. ඒ චිත්‍රපටයේ මමයි, ටෙනී අයියායි සුළු චරිත රගපෑවා. චිත්‍රපටයේ ප්‍රධාන චරිත විජේ, සනත්, ගීතා රඟපෑවා.

ඒ චිත්‍රපටයේ ‘මනාලියක් සඳ වාගේ’ ගීතයේ මනාලයාගේ චරිතයට හිටියේ මම. ගීතයේ නර්තනය කරන්න ටෙනිසන් අයියත් ඇවිත් හිටියා. ඒ ගීතයේ රූගත කීරීම්වලින් පස්සේ අපි දෙන්නා හොඳ යාළුවෝ වුණා. එහෙම වෙන්න ලොකුම හේතුව වෙන්න ඇත්තේ රගපාන්න චරිත හොයාගන්න සෑහෙන්න කට්ටක් කාපු නිසා වෙන්න ඇති. මුල්ම හමුවීමේ ඉඳන් හැමදේටම ටෙනී අයියා මගෙත් එක්ක හිටියා. ‘පාර්ලිමන්ට් ජෝක්ස්’ චිත්‍රපටයේ මගේ  ලොකු අයියාට තෝරගත්තේ ටෙනිසන් අයියා.

දිල්හානි: ටෙනී අයියා මට හමුවුණේ සිනමාව ආව මුල්ම කාලයේදී.  ඒ කාලයේදී පටන් ගත්ත අපේ මිත්‍රකම ඔහු මියයන තාක් අපි පවත්වාගෙන ගියා. ඔහුගේ ජීවිතේ හැම සිදුවීමක්ම වාගේ ටෙනී අයියා මට කියලා තියෙනවා.  චිත්‍රපට රූගත කිරීම්වලදී අපිට සෑහෙන්න උදව් කරනවා වගේම දර්ශනයකට කලින් මොනවාද කරන්න සුදුසු කියලා අපි කතා වෙනවා. ටෙනී අයියා කියන්නේ මම දැකපු නිහතමානී පුද්ගලයෙක්. ඔහු අන්තිම මොහොත  වෙනකම් නළුවෙක් විදියට තමන්ගේ ගෞරවය ආරක්ෂා කරගත්තා. හදිසියේ කතාකරලා, අහවල් චරිතය කරන්න එන්න කියලා කීවොත්, ඔහු ගියේ නැහැ. විධිමත් විදියට කතා කරන්න ඕනෑ.

 

කැමරාව ඉදිරියේ ටෙනී, බන්දු බිම පෙරළිලා, කෑගහලා, වැටිලා, නැගිටලා හොඳට විනෝද වෙද්දී, ඒ විනෝදයම ප්‍රේක්ෂකයාට හිනා නංවනවා…

රන්ජන්: ඒක හරිම සුන්දර අත්දැකීමක්. ‘රෑ දැනියෙල් දවල් මිගෙල්’ චිත්‍රපට රූගත කරද්දී රෝයි ද සිල්වා මහත්මයා අපිට ඊළඟට රූගත කරන්න නියමිත දර්ශන ගැන පොඩි හැඳින්වීමක් කරනවා. ඊට පස්සේ ස්ක්‍රිප්ට් එක අදාළ නෑ. ඒ දර්ශනයට අවශ්‍ය දෙබස් සහ පන්ච් ඩයලොග් වගේ හදාගන්නේ අපි තුන්දෙනා එකතු වෙලා. අපි කතාවෙනවා මොනවාද හොඳ දෙබස් කියලා. ඒත්, අපිට වුවමනා දෙබස් දාගත්තාට අපි තුන්දෙනාට පොඩි සැකයකුත් තිබුණා. රෝයි අයියා මේ දෙබස්වලට බනීවිද කියලා. මම ඉතිං ඒ බන්දුටයි ටෙනීටයි යෝජනා කරනවා අපි එක සැරයක් රඟපාලා රෝයි අයියාට පෙන්වමු කියලා. ඉතිං ඒ දර්ශනය  රිහසල් කරනවා. ඒක බලලා රෝයි අයියා පුටුවෙන් වැටී වැටීත් හිනාවෙනවා. ඉන්පස්සේ රෝයි ද සිල්වා අපිට කියන්නේ ඒ විදියටම දර්ශනය කරන්න කියලා. අපි ඉතින්, අතිනුත් දෙබස් දාගෙන හොඳට කැමරාව ඉස්සරහ පිස්සු වැඩ කළා. අපි විඳපු විනෝදයම සිනමා රසය වෙන්න ඇති.

දිල්හානි: මට හිතාගන්න ගන්න බැහැ ටෙනී සහ බන්දු දෙන්නාට විහිළු ඩිලිවරි කිරීමේ හැකියාව කොහෙන් ආවාද කියලා. හරි ලස්සනට ඒ විහිළු රස විදිමින් ටෙනී අයියලා ඒ දර්ශන රූගත කළා. මම ඔහුගේ කැමතිම පොඩි ළමයෙක් වගේ විහිළු ඉදිරිපත් කරන එකට. ඒ රංගන හැකියාව ටෙනි අයියාට විතරක් ආවේණික වුණ හැකියාවක්. ඒ නිසා ඔහු ලංකාවේ ප්‍රේක්ෂකයන්ව ආකර්ෂණය කර ගත්තා.

 

සිනමාහල්වලට පිරිස් ආවේ නැති කාලෙක බන්දුලා, ටෙනිසන්ලා, රන්ජන්ලා කැමරාව ඉස්සරහ විනෝද වෙන හැටි බලන්නම සමහර ප්‍රේක්ෂකයන් ආවා…

රන්ජන්: ඔව්, සමහර සිනමාහල්වලින් අපිට කියලා තියෙනවා අපේ විහිළු රස විඳින්නම ප්‍රේක්ෂකයෝ සිනමා ශාලාවලට ආවා කියලා. මම මෙහෙම කියන්නේ චිත්‍රපටයේ ගෞරවය ගන්න නෙවෙයි. ඒත් රන්ජන්ලා, ටෙනිලා, බන්දුලා අමුඩ ගහන් විහිළු කරනවා බලන්න සිනමා ශාලා හවුස් ෆුල් වුණා.

දිල්හානි: බන්දු සහ ටෙනී අයියා ඉන්න නිසා මිනිස්සු සිනමාහල්වලට පිරුණු අවස්ථා ඕනෑ තරම්. මම හිතන්නේ ඔවුන්ගේ හාස්‍යමය හැකියාවෙන් ප්‍රේක්ෂකයන්ව සිනමා ශාලාවට ඇද ගත්තා.

 

පාර්ලිමන්ට් ජෝක්ස් චිත්‍රපටයේ අත්දැකීම් කොහොමද?

රන්ජන්: චිත්‍රපටය පටන් ගත්ත මුල් ටිකේ බන්දු සහ ටෙනීට අමුඩ අන්දවන්න බොහෝම අමාරු වුණා. මම අලුත් අධ්‍යක්ෂවරයෙක්. ඒ මේ දෙන්නා ප්‍රවීණ විකට නළුවෝ දෙන්නෙක්නේ. මම කිව්වා චිත්‍රපටයේදී අමුඬේ අඳින්න සිද්ධවෙනවා කියලා. දෙන්නාම අමුඬේ අඳින්න ප්‍රතික්ෂේප කළා. ටෙනි අයියා කිව්වේ මම දුවෙක් ඉන්න තාත්තා කෙනෙක්. මම කොහොමද අමුඬේ ඇඳලා රඟපාලා, දුවගේ ඉස්කෝලේ ගුරුදෙගුරු රැස්වීම්වලට යන්නේ කියලා. ළමයි දුවට තාත්තා අමුඬේ ගහලා රඟපෑවා කියලා විහිළු කරයි කියලා ලොකු ප්‍රශ්නයක් දැම්මා ටෙනී අයියා. එයාට මම පැහැදිලි කළා අමුඬේ අඳින එක ප්‍රශ්නයක් වෙන එකක් නැහැ කියලා. ඉන්පස්සේ අඳින්න කැමති වුණා. හැබැයි රූගත කිරීම් කරන වෙලාවට විතරයි අමුඬේ එක්ක කැමරාව ඉස්සරහට ආවේ. රූගත කිරීම්වලට කලින් අමුඬේ උඩින් තුවායක් ඇඳගෙන දෙන්නාම හිටියේ. රූගත කිරීම් පටන් අරගෙන ටික වෙලාවක් ගියා. මෙන්න බොලේ ඊට පස්සේ අමුඬේ පිටින්ම තමයි දෙන්නා ගම වටේ ඇවිද්දේ.

 

ටෙනිසන් සහ බන්දුගේ විහිළු ‘මෝඩ විහිළු’ ලෙස සැලකුවා…

රන්ජන්: ඒක ටෙනිසන් අයියාගේ හිත ජීවිතේ අවසානය වෙනකම් තිබුණ වේදනාවක්. මිනිස්සු හිනා වුණා. ඒත්, විචාරකයන් ප්‍රතික්ෂේප කළා. කාලයක් ටෙනී අයියා නිසාම චිත්‍රපට බලන්න සෙනඟ ආවා. ‘රැල්ල’ වගේ නාට්‍යවල ප්‍රචාරණ කටයුතු කරද්දී නිෂ්පාදකවරු කරන්නේ ටෙනිසන් කුරේ රඟපාන නාට්‍යයක් කියලා දාන එක. ඒ නිසාම ඒක බලන්න පිරිස් ආවා. ඒකට හේතුව මොකක්ද කියලා විචාරකයන් විචාරයට ලක් කරන්න එපැයි. බාල වැඩ කියලා අත්හරින්නේ නැතිව. ලංකාවේ  විචාරකයන්ගේ අවධානය ගොඩක් කලාකාරයන්ට ලැබුණේ නැහැ. ඇයි අපි ජනප්‍රිය කියලා ඔවුන් හෙව්වේ නැහැ. ටෙනී අයියා විචාරක ඇගයීමක් නොතිබීම ගැන වේදනාවෙන් හිටියා.

දිල්හානි: සම්මාන උළෙලවල් ටෙනී අයියා අගය කරලා සම්මාන ලබා දුන්නේ නැහැ. එහෙත් ඔහු  හරිම සන්තෝෂයෙන් හිටියේ සම්මාන උළෙලවලදී  ඔහුට ලැබුණු ප්‍රේක්ෂක ප්‍රතිචාර ගැන. සමහර තැන්වලදී මිනිස්සු පොර කනවා ටෙනී අයියා එක්ක පොටෝ එකක් ගන්න. විචාරකයන්ගෙන් ටෙනී අයියාගේ වැඩවලට අවධානයක් යොමුවුණේ නැහැ. තමාව හැමවේලාවේම මේ තරම් හෑල්ලුවට ලක්කරන්නේ ඇයිද කියලා ඔහු කනගාටු වුණා.

 

ඔහුගේ අවසාන කාලය ගැන කීවොත්…

රන්ජන්: ටෙනිසන් අයියා අසනීප වුණාට පස්සේ කේරළෙන් ආපු නිල වෙද මහත්මයෙක් ගාවට ගිහින් බෙහෙත් කළා. ඒත් ඒ ප්‍රතිකාර හරි ගියේ නැහැ. මම බලන්න ගිය වෙලාවට එයා ගෙදරට කෑම ගොඩක් ගෙන්නුවා. අපි ඒ කෑම කන ගමන් පරණ දේවල්  පැය ගණන් කතාකළා. මම උසස්පෙළට ක්‍රිස්තු ධර්මය ලිව්වා. ඒ වෙලාවේ මගේ ගුරුතුමිය වුණේ ටෙනී අයියාගේ දුව. ටෙනි අයියා එක්ක තිබුණු මගේ හිතවත්කම නිසාම ඇය මට නොමිලේ ඉගැන්නුවා. මම දන්න  වෛද්‍යවරයෙකුත් ටෙනි අයියාට බෙහෙත් කරන්න සූදානම් කළා. ප්‍රතිකාර  කරන වෛද්‍යවරුන් එක්කත් විහිළු කරමින් බොහෝම ළෙන්ගතුව ටෙනි අයියා හිටියේ. ලෙඩ වුණාට පස්සේ එයා කෙට්ටු වෙලා ඉන්න නිසා වෙන අයට එන්න දුන්නේ නැහැ. එයා කැමති වුණේ නැහැ. අනෙක් අය තමන් ඒ විදියට දකිනවාට. අර ජනප්‍රිය ටෙනිසන් මිනිසුන්ගේ මතකයේ රැඳෙනවාට තමයි ඔහු කැමති වුණේ.

 

ඔහු සිනමා නළුවෙක් පමණක් නෙවෙයි නේද?

දිල්හානි: ටෙනී අයියා චිත්‍රපටවල රඟපෑ විකට නළුවෙක් විතරක් නෙවෙයි. ඔහු චිත්‍රපට පිටපත් ලියලා තියෙනවා, ගීත ලියලා තියෙනවා, වේදිකා නාට්‍යවල පවා රඟපාලා තියෙනවා. ඒත් අපේ රටේ කලාකාරයෙකුට ඔවුන් කරන වැඩවලට අගය කිරීමක් සිදුවෙන්නේ බොහෝම කලාතුරකින්. ඒක මටත්, තව බොහෝ අයටත් උරුම වූ දෙයක්. ඒ කලාකාරයා මිය ගියාට පස්සේ  ඒ කෙනා අගය කරන්න ගන්නවා. දැන් ටෙනී අයියාටත් ඒ වගේ ඇගයීම් ලැබේවි.■