පාස්කු ඉරිදා බෝම්බ ප්‍රහාරය පිළිබඳ සොයා බලන ජනාධිපති කොමිසම හමුවේ හිටපු ජනාධිපති මෛත්‍රිපාල සිරිසේන ඔක්තෝබර් 05 වැනිදා පෙනී සිටියේය.

එසේ ඔහු පෙනී සිටිමින් සාක්කි ලබා දුන්නේ එම කොමිසම කරන ලද දැනුම් දීමක් අනුවය.

එම සාක්ෂි ලබාදීමේදී හිටපු ජනාධිපතිවරයා ප්‍රකාශ කර ඇත්තේ රටක බෝම්බ පිපිරූ විට එහි වගකීම රටේ නායකයා බාරගත යුතු නැති බවයි.

කොමිසම හමුවේ සාක්ෂි දී පිටව යන අවස්ථාවේදී එම කොමිසම හමුවට ඔහුව කැඳවීමට හැකිවූයේ පසු ගිය ආණ්ඩු කාලයේදී ජනාධිපතිවරයාගේ මුක්තිය 19 වැනි සංශෝධනයෙන්  සීමා කිරීම නිසා නේදැයි මාධ්‍ය ප්‍රශ්න කරනු ලැබු අවස්ථාවේදී  ඔහු ඊට පිළිතුරු දෙමින් ඒ සම්බන්ධයෙන් අප්‍රසාදයක් පළකළේ නැත. ඒ මගින් හිටපු ජනාධිපතිවරයා කියන්නට උත්සාහ  කළේ ජනාධිපති කොමිසමකට ඔහුව කැඳවීමට තරම් වූ යහපත් ප්‍රතිසංස්කරණ ඔහුගේ කාලයේදී සිදුකළ බවයි.

19 වැනි සංශෝධනය සම්බන්ධයෙන් වූ එම පිළිගැනීම පසුගිය ආණ්ඩුව සමයේදී හිටපු ජනාධිපතිවරයාට කරන්නට හැකිවූයේ නම් ආණ්ඩු පෙරළි ඇතිවී අද මෙවැනි ඉරණමක් ඔහුට අත්වන්නේ නැත.

19 වැනි ආණ්ඩුක්‍රම ව්‍යවස්ථා සංශෝධනය කොතරම් ප්‍රජාතන්ත්‍රවාදී හා යහපත් ප්‍රතිසංස්කරණයක්ද යන්න හිටපු ජනාධිපතිවරයා එම කොමිසමට කැඳවීමෙන් පෙන්නුම් කෙරේ. එහෙත් 20 වැනි   සංශෝධනය සම්මත වුවහොත් යළි ජනාධිපතිවරයාට මුක්තිය ලැබීම මගින් මෙවැනි තත්වයක් අපට දකින්නට ලැබෙන්නේ නැත. මෙම සිදුවීමේ සරදම වන්නේ ඔහු විසින්ම පත් කරන ලද කොමිසමක කැඳවීමට ලක්වීමට හා එය හමුවේ සාක්ෂි ලබාදීමට හිටපු ජනාධිපති මෛත්‍රිපාල සිරිසේනට සිදුවීමය. එම කොමිසමේ අවසන් තීරණය කුමක්දැයි අපට දැන්ම කිව නොහැකිය. සමහර විට පාස්කු ප්‍රහාර වගකීම සම්බන්ධයෙන් හිටපු ජනාධිපතිවරයාවද වරදකරුවකු කළ හැකිය. යම් හෙයකින් එසේ වුවහොත් එය නම් කළ යුත්තේ කොහි ආකාරයකටද?■