■ පුරවැසියා

 

විසිවන ආණ්ඩුක්‍රම ව්‍යවස්ථා සංශෝධනය සම්බන්ධ විභාගය අවසන් කර ඇති ශ්‍රේෂ්ඨාධිකරණය ඒ පිළිබඳ සිය තීන්දුව සති තුනක කාලයකින් දැනුම් දෙන බව ප්‍රකාශයට පත්කර ඇත. එම තීරණය ජනාධිපතිවරයාට හා කථානායකවරයාට ශ්‍රේෂ්ඨාධිකරණය දැනුම් දෙනු ඇත.

තීරණය කුමක් වේදැයි නොදන්නා මුත් පාර්ලිමේන්තුවේ තුනෙන් දෙකක මන්ත්‍රීවරුන්ගේ අනුමැතියට අමතරව 20 වන සංශෝධනය ජනමත විචාරණයකින්ද සම්මත කළ යුතු යැයි ශ්‍රේෂ්ඨාධිකරණය තීන්දු කරනවාට අකමැති දේශපාලන සත්වයන් කොටසක්ද සිටින බවට පුරවැසියාට දැනගන්නට ලැබී ඇත.

මෙම සත්ව කොටස එම එම අකමැත්තට හේතු වශයෙන් ප්‍රකාශ කර ඇත්තේ ජනමත විචාරණයකින්ද 20 වැනි සංශෝධනය සම්මත වුවහොත් එහි සුජාතභාවය වැඩිවන බවය. ඒ නිසා 20 වන සංශෝධනයට පාර්ලිමේන්තුවේ තුනෙන් දෙකක අනුමැතියෙන් එහා ගොස් ජනමත විචාරණයක් ඉල්ලීමට ශ්‍රේෂ්ඨාධිකරණයට යෑම ඵල රහිත දෙයක් බව ඒ සම්බන්ධයෙන් අභියෝග නොකළ ඔවුන්ගේ මතය වී ඇත.

මේ සත්ව කොට්ඨාසය තේරුම් නොගන්නා හෝ ඔවුන්ට නොතේරෙන දෙයක් ඇත. ඒ 20 නව සංශෝධනය පාර්ලිමේන්තුවේ තුනෙන් දෙකක මන්ත්‍රී අනුමැතියට අමතරව ජනමත විචාරණයකින්ද අනුමත කළ යුතු යැයි ශ්‍රේෂ්ඨාධිකරණය තීරණය කිරීම එම සංශෝධනය ගෙන ආ ගෝඨාභය රාජපක්ෂගේ පරාජයක් බවය. එය ජනමත විචාරණයකින් පරාජයට පත්කිරීමට හැකිවුවහොත් එය ගෝඨාභය රාජපක්ෂගේ පමණක් නොව මේ ආණ්ඩුවේද පරාජයක් බවය.

20 වන සංශෝධනය ජනමත විචාරණයකට ඉදිරිපත් කළහොත් ඒ වෙනුවෙන් ජනතාව අතරට ගොස් පෙනී සිටින්නට ආණ්ඩු පක්ෂයේ සාමාජිකයන් මෙන්ම ඔවුන්ට ආධාර අනුබල දුන් සංවිධානද නැති බව එම සංශෝධනය සම්බන්ධයෙන් මේ වන විට මතුවී ඇති සාකච්ඡාවෙන් පෙනේ. එමෙන්ම එම සංශෝධනය ගැන ඇති විවේචන සම්බන්ධයෙන් සොයා බැලීමට පත්කළ අගමැතිවරයාගේ කමිටුවද, පාර්ලිමේන්තු කාරක සභා අවස්ථාවේදී එයට සංශෝධන ඉදිරිපත් කරන බවට ජනාධිපතිවරයා වෙනුවෙන් ශ්‍රේෂ්ඨාධිකරණයට නීතිපතිවරයා ඉදිරිපත් කළ ලියැවිල්ලද එම සංශෝධනය ගැන ආණ්ඩු පක්ෂයේම ඇති විවේචනය පෙන්නුම් කරයි. විපක්ෂයේ පක්ෂ කළ යුත්තේ ආණ්ඩු පක්ෂයේ එම විවේචනයන් 20 වන සංශෝධනය පරාජය කිරීමට ජනතාව දැනුවත්කිරීම් සඳහා යොදා ගැනීමය. ඊට අමතරව 19 වන සංශෝධනයේ ඇති ඉදිරිගාමී බව කියා දීමට හා 20 වැනි සංශෝධනයේ ඇති ඒකාධිපතිභාවය ගැන කියා දීමට එම අවස්ථාව යොදා ගැනීමය.

පසුගිය ජනාධිපතිවරණයට සාපේක්ෂව පසුගිය මහ මැතිවරණයේදී විවිධ හේතු නිසා කලකිරුණු ලක්ෂ 20ක පමණ ඡන්දදායකයන් පිරිසක් ඡන්දපොළට නොපැමිණි බවද, එසේම ඡන්ද පොළට පැමිණ ඡන්දය ප්‍රතික්ෂේප කළ හත් ලක්ෂයකට අධික පිරිසක් සිටි බවද ඒ අය රාජපක්ෂවාදීන් නොවන බවද විපක්ෂය තේරුම් ගත යුතුය.

ජනමත විචාරණයකදී ආණ්ඩුව ලබාගන්නේ ජනාධිපතිවරණයේදී හෝ මහා මැතිවරණයේදී ලබාගත් ඡන්ද ප්‍රමාණයට හෝ ඡන්ද ප්‍රතිශතයට වඩා අඩු සංඛ්‍යාවක් නම් එයද ආණ්ඩුවේ පරාජයකි. මන්ද ආණ්ඩුවේ ඡන්ද ගොඬේ පිරිසද 20 වන සංශෝධනය සම්බන්ධයෙන් සිය විරෝධය දක්වා ඇති බව එයින් පෙනෙන නිසාය.

ජනමත විචාරණයක් සම්බන්ධයෙන් වැදගත් වන තවත් කාරණයක්ද තිබේ. ඒ ජනාධිපතිවරයාට ජනතාව ඡන්දය දී ඇත්තේ පවතින ව්‍යවස්ථාවේ ඇති බලතල ක්‍රියාත්මක කිරීමට පමණක් නිසාය. ජනතාව ලබා නොදුන් බලයක් පාර්ලිමේන්තුව යොදා ගනිමින් ලබාගැනීමම එහි සුජාතභාවය ප්‍රශ්න කරන්නක් වන බැවිනි. ඒ නිසාම යළි ජනතාව අතරට ගොස් ලබාදුන් බලයට වඩා වැඩි බලයක් ලබා ගැනීමට උත්සාහ කිරීම සම්බන්ධයෙන් විමසීමක් කරන ලෙස ඉල්ලා සිටීම විපක්ෂයක කාර්යභාරයකි. එය නොතකා හරිමින් ජනතාව ලබාදුන් බලයට වැඩි බලයක් වෙනත් මාර්ගයකින් ලබා ගැනීමට ජනාධිපතිවරයට ඉඩදී අහක බලාගෙන සිටීම විපක්ෂයක කාර්යභාරය නොවේ.■