ලේක්හවුස් ආයතනයෙන් මුද්‍රණය කරනු ලබන  ළමා පුවත්පතක් වන ‘මිහිර’ පුවත්පතෙහි ජනාධිපති ගෝඨාභය රාජපක්ෂගේ නමෙහි අකුරක දෝෂයක් හේතුකොටගෙන එම පුවත්පතේ කර්තෘවරයා, උප කර්තෘවරයා, මාධ්‍යවේදියකු සහ පිටු සැකසුම් ශිල්පියාගේ සේවය වහාම ක්‍රියාත්මක වන පරිදි අත්හිටුවා ඇත.

සැප්තැම්බර් 14 වන දින  නිකුත් වූ මිහිර පුවත්පතෙහි ඇතුළු පිටුවක පළ වී තිබුණු ‘රට රටවල ජනාධිපතිවරු’ යනුවෙන් ලියා තිබුණු  විශේෂාංගයක ගෝඨාභය රාජපක්ෂ ජනාධිපතිවරයාගේ නම  ‘ශෝ’ඨාභය රාජපක්ෂ ලෙස අකුරක දෝෂයක් සටහන්ව තිබී ඇත.

සැප්තැම්බර් 13 වන දින රාත්‍රියේ එම මුද්‍රණ දෝෂය සහිතව වෙළඳපොළට නිකුත් කර තිබූ මිහිර පුවත්පත පිළිබඳව දැනගත් ලේක්හවුස් පාලනාධිකාරිය ප්‍රවාහන සේවකයන් යවා නැවත එම පුවත්පත් තොගය ආපසු ලේක්හවුස් ආයතනයට ගෙන්වා ගෙන ඇත. පසුව අකුරක මුද්‍රණ දෝෂයක් සහිතව පළවී තිබුණු විශේෂාංගයේ එම අකුර නැවත නිවැරදි කර අලුතින්ම  පුවත්පත මුද්‍රණය කිරීමට කටයුතු කොට තිබේ.

පුවත්පත් නැවත ගෙන්වාගැනීමේ ක්‍රියාවලිය නිසා ලේක්හවුස් ආයතනයට විශාල පාඩුවක් සිදුවී ඇතත් එය මිහිර පුවත්පතේ ප්‍රමිතිය හා ගෞරවය ගැන සිතා කළ ක්‍රියාවලියක් යැයි සිතා සෑහීමට පත් විය හැක. එහෙත් පසු දිනෙක මෙම වරද නිවැරදි කිරීමේ හැකියාව තිබුණි. අපේ රටේ ජනාධිපතිවරයාගේ නමෙහි ඇති වැරැද්ද පාඨකයන්ට ක්ෂණිකව තේරුම්ගත හැකි වරදකි.

කෙසේ වෙතත් එක් අකුරක් හෝ වැරැද්දීම පුවත්පත් කලාවේදී අතිශය බරපතළ වරදක් ලෙස සලකනු ලබයි. යම් ආයතනයක් ප්‍රතිපත්තියක් ලෙස එවැනි වැරදි පිළිබඳ තීන්දු ගන්නේ නම් මෙවැනි සිදුවීමක් පුදුමයක් ලෙස සැලකිය නොහැක. එහෙත්,  ලේක්හවුස්  ආයතනයෙන් මුද්‍රණය වන අනෙක් පුවත්පත්වලද විටින් විට මුද්‍රණ දෝෂ හා අකුරු වැරදීම් සිදුවන නමුත්, මෙවැනි ක්‍රියාමාර්ග ගෙන නැතැයි ලේක්හවුස් සේවකයෝ පෙන්වාදෙති. අනෙක් අතට යම් දෝෂයක් පිළිබඳ ඊළඟ කලාපයේ නිවැරදි කිරීමක් හා සමාව අයැදීමක් සිදු කළ හැකිව තිබුණු බවත් ඔවුහු පෙන්වා දෙති.

ඇත්තෙන්ම මෙතැන විශේෂයක් වී තිබෙන්නේ ගෝඨාභය රාජපක්ෂ ජනාධිපතිවරයාගේ නම සටහන් කිරීමේදී දෝෂය සිදුව තිබීමය. ජනාධිපතිවරයාගේ නම ‘ශුද්ධ වූ දෙයක්’ ලෙස සලකනවා විය හැක. නැති නම් මේ විනය පියවර ගැනීම් සිදුකළ නිලධාරීන් ජනාධිපතිවරයාගේ නම වැරැද්දීමටවත් ඉඩ නොදෙන බව පෙන්වා, නායකයාගෙන් ලකුණු දමාගැනීමේ වුවමනාවෙන් සිටිනවා විය හැක.

මේ වරද නිසා මිහිර පුවත්පතේ කර්තෘ සහ අනෙක් තිදෙනාගේ සේවය අත්හිටුවීම  සාධාරණ යැයි කෙනෙකු පැවසූවද මෙම විශේෂාංගයේ සෝදුපත් බැලූ පුද්ලයාට කිසිදු ගැටලුවක් සිදු වී නැත. යම් අකුරක වරදක් පිළිබඳ සෝදුපත් බලන්නාද වගකිව යුතුය. ඔහුගේ මුක්තියට හේතුව ලේක්හවුස්  ආයතනයේ සේවය කරන නිලධාරීහු හා මාධ්‍යවේදීහු කිහිපදෙනෙක්ම පැවසූහ. ඔවුන් පෙන්වා දෙන්නේ ලේක්හවුස් ආයතනයේ  ශ්‍රී ලංකා පොදුජන පෙරමුණේ වෘත්තීය සමිතියේ සාමාජිකයෙකු නිසා ඔහුගේ සේවය අත්හිටුවා නැති බවය.

අකුරක් වැරැද්දුවායැයි සෝදුපත් කියවන්නා හැර පිටු සකසන්නාත් ඇතුළු අනෙකුත් පුද්ගලයන්ගේත් වැඩ තහනම් කිරීම අලුත්ම පුවත්පත් කලා භාවිතාවක් බවට පත්කර තිබීමෙන් පෙනෙන්නේ ලකුණු දමාගන්නට කාට හෝ දඬුවම් කළායැයි ඉහළට පෙන්වීමේ වුවමනාව මිස අනෙකක් නොවේ. අනෙක නායකයාගේ නමේ අකුරක් වැරදීම ‘වැඩ තහනම් වන’ වරදක් වන විට ඊට එහා දෙයක් කරන පුද්ගලයන්ට ලැබෙන දඬුවම කුමක් වේදැයි සිතාගැනීමටත් අසීරුය.■