ටී. ජයකුමාර් /තරිඳු උඩුවරගෙදර

පළාත් සභා මැතිවරණය පැවැත්වීම කල් දමා එළැඹෙන ජනවාරියේදී ජනාධිපතිවරණයක් ප‍්‍රකාශයට පත්කිරීම සඳහා ජනාධිපතිවරයාට හිතවත් ආණ්ඩුවේ සිටින ශ‍්‍රීලනිප ඇමතිවරුන් කණ්ඩායම සැලසුමක් සකස් කරමින්,ඒ පිළිබඳව සාකච්ඡා කරමින් සිටින බව අනිද්දාට වාර්තා වෙයි.

මේ වන විට ඒකාබද්ධ විපක්ෂය ජනාධිපතිවරණ අපේක්ෂකයෙකු රාජපක්ෂ පවුල තුළින් තෝරා ගැනීම ගැන දැඩි අර්බුදකාරී තත්ත්වයකට පත්ව සිටීම, එක්සත් ජාතික පක්ෂය යහපාලන ආණ්ඩුව තුළ ශීඝ‍්‍ර ලෙස අප‍්‍රසාදයකට පත්ව තිබීම යන කරුණු මූලිකව පදනම් කර ගනිමින් ජනාධිපතිවරණය කැදවීමට නියමිතය.

අනිද්දා කළ විමසීමකදී ශ‍්‍රීලනිපය නියෝජනය කරන අමාත්‍යවරු කිහිපදෙනෙක් ඒ තොරතුර තහවුරු කළෝය. වැඩිදුර අදහස් දක්වමින් එම අමාත්‍යවරු, ජනාධිපතිවරණය හිතනවාට වඩා කලින් පැවැත්විය හැකි බව ප‍්‍රකාශ කළෝය.

දහනවවැනි සංශෝධනයෙන් සංශෝධිත ව්‍යවස්ථාව අනුව ජනාධිපතිවරයා දිවුරුම් දී වසර හතරක් ඉක්මවූ පසුව දෙවැනි ධුර කාලය සඳහා ජනාධිපතිවරණයක් කැඳවිය හැකිය. ඒ අනුව මැතිවරණ කොමිෂන් සභාව විසින් නාමයෝජනා කැඳවිය යුතුය. එහෙත් බලයේ සිටින ජනාධිපතිවරයා නාමයෝජනා ඉදිරිපත් නොකළහොත් එම ජනාධිපතිවරණය කැඳවීම අහෝසි වන්නේය. ඒ නිසා මෙවැනි ජනාධිපතිවරණය කලින් කැඳවීමකදී බලයේ සිටින ජනාධිපතිවරයා ජනාධිපතිවරණය වලංගු වීම සඳහා අනිවාර්යයෙන්ම නාමයෝජනා බාරදිය යුතුය.

ආණ්ඩුක‍්‍රම ව්‍යවස්ථාවේ 30 (3අ) අ(1) වගන්තියට අනුව, ප‍්‍රකාශයක් මගින් තවත් ධුර කාලයක් සදහා තමා තෝරා පත්කැර ගැනීම පිණිස වරමක් ලබාගැනීමට ජනතාව වෙත ආයාචනය කිරීමේ අභිලාෂය, තම ප‍්‍රථම ධුර කාලය ආරම්භවී අවුරුදු හතරක් ඉකුත්වීමෙන් පසු යම් අවස්ථාවක ජනාධිපතිවරයා විසින් ප‍්‍රකාශ කරනු ලැබිය හැක්කේය. මෙම ප‍්‍රතිපාදනයට අනුව 2019 ජනවාරි මස 08 වෙනිදායින් පසුව ජනාධිපතිවරණයක් කැදවීමට ව්‍යවස්ථාමය ප‍්‍රතිපාදන පවතී.

පළාත් පාලන මැතිවරණයෙන් අත්වූ පරාජය හේතුවෙන් තවත් මැතිවරණයක් පැවැත්වීමෙන් පසුව ජනාධිපතිවරණය පැවැත්වීම තම කණ්ඩායමට අවාසිදායක නිසා මේ යෝජනාව ඉදිරිපත් වී ඇත. පළාත් සභා මැතිවරණයට පෙර ජනාධිපතිවරණය පවත්වා පොදු අපේක්ෂකයෙකු ලෙස මෛත‍්‍රීපාල සිරිසේන ජනාධිපතිවරයාම නැවතත් ඉදිරිපත් කිරීම එහි අරමුණ වී ඇත. ජනාධිපතිවරණය කලින් කැඳවුවහොත් අනෙක් කණ්ඩායම්වලට සූදානම් වීමට කාලය ප‍්‍රමාණවත් නොවීම නිසාත්, මෛත‍්‍රීපාල සිරිසේන මහතා අනිවාර්යයෙන්ම ජනාධිපතිවරණයට නාමයෝජනා ලබාදිය යුතු නිසාත් එම අවස්ථාව උරගා බැලිය යුතු බව ශ‍්‍රීලනිප කණ්ඩායමේ අදහස වී ඇත.
ඒ සදහා වඩාත් ජනතා ආකර්ෂණය දිනාගත හැකි වැඩපිළිවෙළක් ඉදිරියට ගැනීමට ද ජනාධිපතිවරයා තීරණය කර ඇති අතර එහි පළමු අදියර මරණ දණ්ඩනය නැවත ක‍්‍රියාත්මක කිරීම තුළින් ආරම්භ කිරීමට නියමිතය.

මත්ද්‍රව්‍ය සහ වෙනත් අපරාධ ඉතා ඉහළ මට්ටමක පවතින වත්මන් වකවානුව තුළ මරණ දණ්ඩනය යළි ක‍්‍රියාත්මක කිරීම කෙරෙහි වැඩි ජනතා ආකර්ශණයක් දිනාගත හැකි බවට ජනාධිපතිවරයාට උපදේශකයන් දැනුම් දී ඇති බවත් දැනගන්නට ඇත.
ඒ සඳහා ඒකාබද්ධ විපක්ෂ කණ්ඩායම සමග හෝ එක්සත් ජාතික පක්ෂය සමඟ සන්ධානගත වීම සඳහා විවෘත අවස්ථාවක් ශ‍්‍රීලනිප කණ්ඩායම විසින් තබාගෙන සිටින බවත් එජාපය සමඟ සන්ධානගත වීමේ වැඩි අවස්ථාවක් පවතින බවත් අප කළ විමසීමේදී ශ‍්‍රීලනිප ඇමතිවරු අදහස් දක්වමින් පැවසූහ.

මේ වනවිට පළාත් සභා මැතිවරණ පනතේ තාක්ෂණික දෝෂ නිවැරදි කරමින් සංශෝධනය කිරීමට සහ සීමා නිර්ණය යෝජනා සම්මත කරගැනීමට දේශපාලන පක්ෂ එකඟ වී ඇතත් එම යෝජනා පාර්ලිමේන්තුවේ විවාදයට ගැනීම සඳහා තවමත් දිනයක් නියම කර නොමැත. මාර්තු මාසයේදී යෝජනා වී තිබුණු දිනය පක්ෂ නායක රැුස්වීමේදී පාර්ලිමේන්තුවේ සභානායක ලක්ෂ්මන් කිරිඇල්ල අමාත්‍යවරයා විසින් ඉවත් කර තිබුණි.