2019 පාස්කු ඉරිදා සංහාරය මෙහෙයවූ මහමොළකරුවකු පිළිබඳ සංකල්පය මුලින්ම ජනගත කළේ එවකට විපක්ෂ නායකයා වූ මහින්ද රාජපක්ෂ මහතාය. ඒ, සිදුවීමෙන් දින දෙකකට පසු අප්‍රේල් 23 වෙනිදා පාර්ලිමේන්තුවේදී කළ විශේෂ ප්‍රකාශයකිනි. පාස්කු ඉරිදා සංහාරය වැළැක්වීමට නොහැකිවූයේ සිරිසේන-වික්‍රමසිංහ පාලනය බුද්ධි අංශ දුර්වල කළ නිසාය යන මිථ්‍යාව තුළින් රට රැකිය හැක්කේ තමන්ට පමණක්ය යන සාවද්‍ය නිගමනය ජනප්‍රිය කරවීමට ඔහු ඉතා දක්ෂ ලෙස තම කථාව භාවිත කළේය. ඔහු කථාව අවසන් කළේ මේ ප්‍රශ්න දෙකෙනි.
“මේ ප්‍රහාරයට විදේශීය හස්තයක් තිබෙන බව තහවුරු වෙලා තිබෙනවාද? එසේනම් ඒ විදෙස් පාර්ශ්වය කවුද?”
රාජපක්ෂ මහතාගේ පැනයන්ට පිළිතුරු සැපයුවේ එසමයේ සුවච-කීකරු රාජපක්ෂවාදියකු වූ විමල් වීරවංස මන්ත්‍රීවරයාය. ඒ, සංහාරයෙන් දෙසතියක් තුළ කොළඹ පැවැති උත්සවයකදීය. ඔහුට අනුව මහමොළකරු, මහමොළකාරියකි. එනම් එවකට ලංකාවේ ඇමරිකානු තානාපතිවරිය වූ ඇලෙයිනා බී ටෙප්ලිට්ස් මහත්මියයි. උග්‍ර රාජපක්ෂවාදී වෙබ් අඩවියක් වූ ලංකා සී නිව්ස් වාර්තාවකට අනුව, ISIS , තලේබාන්, අල්කයිඩා වැනි සංවිධාන අඩපණ කළ සෑම රටකම ටෙප්ලිට්ස් මහත්මිය තානාපතිනිය ලෙස කටයුතු කළ බව වීරවංස මහතා කියා තිබුණි. “අද රට තුළ ඇතිවී තිබෙන හදිසි තත්වයට ජාත්‍යන්තර සහාය ලබාදෙන බව පවසමින් රට තුළට ඒමට සැරසෙනුයේ එක්සත් ජනපද ආධිරාජ්‍යවාදය බවත්… ශ්‍රී ලංකාව තවත් සිරියාවක්, ලිබියාවක් බවට පත් කිරීමට ඔවුන්ට උවමනා වී ඇති බවත් සිදුවූ සියල්ල අගමැති රනිල් වික්‍රමසිංහ මහතාගේ දැනුවත්භාවය මත සිදුවූ ඒවා බවත්” මන්ත්‍රීවරයා ප්‍රකාශ කළේ යැයි වෙබ් අඩවිය වාර්තා කළේය.
ටෙප්ලිට්ස් මහත්මිය මුලින්ම තානාපති තනතුරකට පත්වූයේ 2015 දී නේපාලයේදීය. ඉන්පසු 2018 සිට ඇය ලංකාවේ හා මාලදිවයිනේ තානාපතිනිය ලෙස කටයුතු කළාය. ඇය සිරියාව, ලිබියාව, ඇෆ්ගනිස්ථානය යන රටවල තානාපතිනිය ලෙස කටයුතු කළායැයි වීරවංස මහතා කීවේ fදාස්තර සාෆි හා ගර්භාෂ යුද්ධය මට්ටමේ බොරුවකි. ඔහුගේ අවශ්‍යතාව වූයේ ඒ වන විට රාජපක්ෂවරුන්ගේ අංක එකේ ප්‍රතිවාදියා වූ රනිල් වික්‍රමසිංහ අගමැතිවරයා හා ඔහුට සහාය දෙන අමෙරිකාව පාස්කු ප්‍රහාරයේ මහමොළකරුවන්ය යන බොරුව සනාථ කිරීමටය.
ඊළඟට මහමොළකරු හඳුනාගැනීමේ තරගයට පිවිසියේ ඒ සමයේ වීරවංස මන්ත්‍රීවරයාට පමණක් දෙවැනි රාජපක්ෂවාදියකු වූ උදය ගම්මන්පිළ මන්ත්‍රීවරයාය. ඔහු වීරවංස මන්ත්‍රීවරයාගේ කුමන්ත්‍රණ කතාව සර්වාභරණයෙන් සරසා fදාරට වැඩුවේය. ඒ මැයි මස 8 වෙනිදා පාර්ලිමේන්තුවේ පැවති රටේ ආරක්ෂක තත්වය පිළිබඳ විවාදයට එක්වෙමිනි. ඔහුට අනුවද පාස්කු ප්‍රහාරය ඇමරිකාවේ වැඩකි. “ISIS කියන ඇමරිකානු බළල් අත යොදාගෙන පාස්කු ඉරිදා සිදුවුණේ ඇමරිකානු කුමන්ත්‍රණයක්. එකම දිනයක රට පුරා බෝම්බ නවයක් පත්තු වුණාම ජනතාව හැඟීම්බර වෙනවා. 1983 ජුලි කලබල වගේ ඉහළ මට්ටමේ සිංහල-මුස්ලිම් කෝලාහලයක් ඇතිවේවි කියලා ඒ අය බලාපොරොත්තු වුණා. .. මේ අය සූදානම් කරගත්තා මුස්ලිම් පිරිසක් සිංහල නම් ගත්ත. ඒගොල්ල හමුදා ඇඳුම් ඇඳ මුස්ලිම් ජනතාවටම පහර දෙනවා මේ එකතු කරගත්ත අවිවලින්. ඒ වගේම ඒ මුස්ලිම් පිරිසට සිවුරු දරාගෙන ඇවිත් ආශීර්වාද කරන්න තවත් පිරිසක්. එතකොට මොකක්ද ලෝකෙට යන පණිවිඩය. මුස්ලිම් ජනතාවට පහර දෙන්නේ රටේ හමුදාව. ආශීර්වාද කරන්නේ භික්ෂූන් වහන්සේලා. ඒ අය රකින්න සාම හමුදාවක් යවන්න කියලා මුස්ලිම් ලෝකයෙන්ම ඉල්ලීම් එනවා. මුස්ලිම් හමුදා එපෝ කියලා අපි හඬ නගනවා. එතකොට ඔන්න බටහිර බලවේගයන්ට මග පෑදෙනවා, “නෑ නෑ මුස්ලිම් හමුදා නෙවෙයි, අපියි එන්නේ” කියලා බටහිර සාම සාධක හමුදාවක් මේ රටට ගොඩබස්වන්න.” (ලංකා සී නිවුස්, 9.5.2019.)
ඒ දිනවල රාජපක්ෂ පිලේ සිටි මැල්කම් රන්ජිත් කාඩිනල් තුමාද ‘විදේශ හස්තයක’ කතාව අනුමත කළේය. ඒ ජුනි මස කටුවාපිටිය පල්ලිය යළි කැපකිරීමේ උත්සවයේදීය.
මහමොළකරු; කුමන්ත්‍රණ; විදෙස් හස්තය යන ත්‍රිත්වය 2019 රාජපක්ෂ දේශපාලන හා මැතිවරණ වේදිකාවල තීරණාත්මක මාතෘකාවක් විය. මේ පිලේ ඇතැමුන්ට මහමොළකරු වූයේ රනිල් වික්‍රමසිංහ මහතාය; තවත් අයට රිෂාඩ් බදියුදීන් මහතාය; තවත් පිරිසක් තවමත් හඳුනා නොගත් මහමොළකරුවකු ගැන කතාකළේය. මහ මොළකරු නම් හැන්දෙන් වතුර බොරකළ රාජපක්ෂවරු, ඒ බොරදියේ ඡන්ද නමැති මාළු ඉතාමත් සාර්ථක ලෙස බෑවෝය. 2019 ජනපතිවරණයෙන් කතෝලික/ කිතුනු ඡන්ද අති බහුතරයක් දිනාගැනීමට රාජපක්ෂවරුන් සමත් වුණේ මේ නාට්‍යයට පින් සිදු වන්නටය.
නමුත් පොරොන්දු වූ විලස ‘මහ මොළකරු- කුමන්ත්‍රණ- විදෙස් හස්තය’ සාක්ෂි -සාධක සහිතව හෙළිදරව් කිරීමට රාජපක්ෂවරු අසමත් වූහ. තමන්ට 2019දී මහත් ඵල ලබාදුන් මහා මොළකරු සංකල්පය 2023 වනවිට රාජපක්ෂවරුන්ටම පාරා වළල්ලක් වූයේ මේ අනුවය.
ජනමතය විරුද්ධ දිශාවට දෝලනය වත්ම, ප්‍රහාරය පිටුපස සිටියේ ඉන් දේශපාලන ඵල නෙලාගත් රාජපක්ෂවරුන්මය යන අදහස ක්‍රම ක්‍රමයෙන් ජනප්‍රිය වන්නට විය.
සත්‍යය මගහැරීම
ප්‍රහාරය පිළිබඳ පරීක්ෂණ කිරීමට මෛත්‍රීපාල සිරිසේන ජනාධිපතිවරයා 2019 සැප්තැම්බර් 22 දා ජනාධිපති කොමිසමක් පත්කළේය. ඒ ශ්‍රේෂ්ඨාධිකරණ විනිසුරු ජනක් ද සිල්වා මහතාගේ නායකත්වයෙනි. මෙම කොමිෂන් වාර්තාවේ ඇතැම් කරුණු ප්‍රකාශයට පත්වුවද සමස්ත වාර්තාවම ජනගත කිරීමට ගෝඨාභය රාජපක්ෂ හා රනිල් වික්‍රමසිංහ ජනාධිපතිවරු මැලිවූහ.
අනුර කුමාර දිසානායක ජනාධිපතිවරයාද සම්පූර්ණ වාර්තාව පොලිසියට බාරදුන්නේ පසුගිය සඳුදාය. වාර්තාව ජනගත කරන බවට ආණ්ඩුව කියතත් එය කවදා වන්නක්ද යන්න අවිනිශ්චිතය.
ජනක් ද සිල්වා වාර්තාව ප්‍රකාශයට පත් කිරීමට පක්ෂ තුනකට අයත් ජනාධිපතිවරුන් තිදෙනකු අදිමදි කරනුයේ මන්ද යන්න ඇසිය යුතු හා තවමත් උත්තර නැති ප්‍රශ්නයකි.
ශ්‍රී ලංකා පොදු ජන පෙරමුණට හා එජාපයට අයත් ජනාධිපතිවරුන් දෙදෙනකු රැක්කේ හා ජාතික ජන බලවේග/ජවිපෙ ජනපතිවරයා තවමත් රකින්නේ කාවද?
පාස්කු ඉරිදා ප්‍රහාරය පිළිබඳ විදෙස් බුද්ධි අංශ ලංකාවේ බුද්ධි අංශ කලින්ම දැනුවත් කළ බව නොරහසකි. ලංකාවේ බුද්ධි අංශවලට කළ යුතුව තිබුණේ එම තොරතුරු අනුව කටයුතු කිරීමයි. නිලන්ත ජයවර්ධන මහතාට මෙම තොරතුරු ලැබී තිබුණේ අප්‍රේල් 4 වෙනිදා බව වාර්තා වේ. ප්‍රහාරයට පෙර අප්‍රේල් 9 වෙනිදා පැවති බුද්ධි සමාලෝචන රැස්වීමට තමාද එවකට රාජ්‍ය බුද්ධි සේවයේ අධ්‍යක්ෂ ජයවර්ධන මහතාද සහභාගි වූ බවත්, ඔහුට අප්‍රේල් 4 වෙනිදා ලැබුණු තොරතුර රැස්වීමේදී ඉදිරිපත් නොකළ බවත් ඒ අවස්ථාවේ යුද්ධ හමුදා බුද්ධි අධ්‍යක්ෂ ධුරය දැරූ බි්‍රගේඩියර් චූලා කොඩිතුවක්කු මහතා අධිකරණයට කියා සිටියේය. ඒ හිටපු ආරක්ෂක ලේකම් හේමසිරි ප්‍රනාන්දු මහතාට විරුද්ධව පැවති මහාධිකරණ නඩුවේ සාක්ෂි දෙමිනි.
මරාගෙන මැරෙන බෝම්බ ප්‍රහාරයන් ලංකාවට ආධුනික නොවේ. ජාතික හෝ ආගමික අන්තවාදයන් පමණක් නොව රජකුට ඇති දැඩි භක්තියද මෙවැනි ප්‍රහාරයන්ට හේතු විය හැකි බව ජපානයේ කමිකාසේ (න්පසන්‘ැ) ගුවන් නියමුවන්ගේ ආදර්ශයෙන් පෙනේ.
ප්‍රහාරයට රහසිගත මහමොළකරුවකු සිටීම කෙසේ වුවත් ප්‍රහාරය ගැන ලැබුණු තොරතුරු වසන් කිරීම පිටුපස නම් කුමන්ත්‍රණයක්, මහමොළකරුවෙකු සිටින්නට ඉඩ තිබේ.
පාස්කු ප්‍රහාරය පිළිබඳව මහින්ද රාජපක්ෂ මහතා අප්‍රේල් 23 දා පාර්ලිමේන්තුවේදී කළ ප්‍රකාශයේ ඔහු මෙලෙසද කීවේය. “මගේ ආරක්ෂක නිලධාරීන්ටත් ඒ අනතුරු ඇඟවීම (අප්‍රේල් 21 ප්‍රහාරයක් විය හැකි බවට) එවලා තිබුණා. නමුත් ඒගොල්ලෝ මාව දැනුවත් කළේ නැහැ ඒ වගේ තර්ජනයක් තියෙනවා කියලා.”
රාජපක්ෂ මහතාගේ මෙම ප්‍රකාශයම ගවේෂණයට ලක්විය යුතු කරුණකි. ඔහුගේ ආරක්ෂක නිලධාරීන්ට මේ තොරතුරු දුන්නේ කවුද? නිල මාර්ගයකින්ද? නොනිල මාර්ගයකින්ද? ආරක්ෂක නිලධාරීන් රාජපක්ෂ මහතාව මේ ගැන දැනුවත් නොකළේ මන්ද? ඒ ඔවුන් ගත් තීරණයක්ද? එසේනම් ඒ තීරණයට හේතුව කුමක්ද? නැතහොත් මේ තොරතුර රහසිගතව තබාගන්නැයි කවුරුන් හෝ ඔවුන්ට දැනුම් දුන්නේද? එසේ නම් ඒ කවුද?
ජාතික ආරක්ෂාවට මේ තරම් වැදගත් වන තොරතුරක් විපක්ෂ නායක හා හිටපු ජනාධිපති වන තමන්ගෙන් වසන් කිරීමට කටයුතු කළේ මන්දැයි රාජපක්ෂ මහතා තම ආරක්ෂක නිලධාරීන්ගෙන් ඇසුවේද? එසේ නම් ඔවුන් දුන් පිළිතුර කුමක්ද? නොඇසුවේ නම් ඒ මන්ද?
තවත් දේශපාලන නායකයන් කී දෙනකුගේ ආරක්ෂක නිලධාරීන් මෙම තොරතුර දැනසිටියාද? ඒ කාගේ ආරක්ෂක නිලධාරීන්ද? ඔවුන්ට මෙම පුවත සන්නිවේදනය වූයේ කෙසේද? ඔවුන් කවුරුත් තමන් රකින දේශපාලනඥයන්ට මෙම පුවත නොකිව්වේද? නොකිව්වා නම් ඒ මන්ද? කිව්වා නම් ඒ කාටද?
පාස්කු ප්‍රහාරය පිළිබඳව කෙසේ වෙතත් එම ප්‍රහාරය ගැන ලැබුණු බුද්ධි තොරතුරු අනුව කටයුතු නොකිරීම පිළිබඳව නම් ඇත්තේ බරපතළ අබිරහසකි. බැලූ බැල්මට කුමන්ත්‍රණයකි. මේ සම්බන්ධයෙන් පූර්ණ හා නිල පරීක්ෂණයක් සිදු විය යුතු නොවේද?
පාස්කු සිදුවීම අපරාධ දෙකකි. එකක් නම් ප්‍රහාරයයි; දෙවැන්න නම් ප්‍රහාරය පිළිබඳ දින 17ක් පුරා ලැබුණු බුද්ධි තොරතුරු සැඟවීමේ හා ඒ සම්බන්ධයෙන් ක්‍රියාත්මක නොවීමේ අපරාධයයි. දෙවන අපරාධය නොවන්නට පළවෙනි අපරාධය වළක්වා ගන්නට හෝ ඉන් වූ ජීවිත විනාශය අවම කරගන්නට හැකියාවක් තිබුණි.
ප්‍රහාරකයෝ අපරාධකරුවෝය; ප්‍රහාරය පිළිබඳ බුද්ධි තොරතුරු දැන දැනත් කිසිවක් නොකළ රාජ්‍ය නිලධාරීහු හා දේශපාලනඥයෝද අපරාධකරුවෝය. ඔවුන් සියල්ලම හඳුනාගත යුතුයි. ඔවුන් සියල්ලන්ටම එරෙහිව නීතිය ක්‍රියාත්මක කළ යුතුයි.
ස්ටිකරයේ අපරාධය
2018 ඔක්තෝබර් 26 ව්‍යවස්ථා විරෝධී බල පෙරළියට පදනම සකස් කළ එක් කාරණාවක් වූයේ සිරිසේන ජනාධිපතිවරයා හා ගෝඨාභය රාජපක්ෂ හිටපු ආරක්ෂක ලේකම්වරයා ඝාතනය කිරීමේ කුමන්ත්‍රණ බොරුවයි. නාමල් කුමාර නමැති ඒ වන විට සමාජය නොදැන සිටි පුද්ගලයකු මෙම කතාව මුලින්ම ප්‍රකාශ කළේය. ඔහුගේ දූෂණ විරෝධී බලකාය නම් වූ සංවිධානය පැවැත්වූ මාධ්‍ය හමුවකට සහභාගි වූ මහින්දානන්ද අලුත්ගමගේ මන්ත්‍රීවරයා ඝාතන කුමන්ත්‍රණකරුවන්ගේ අරමුණ රනිල් වික්‍රමසිංහ අගමැතිවරයාට සේවය කිරීම බව කියා සිටියේය. මෙම කුමන්ත්‍රණය ත්‍රස්තවාදී පරීක්ෂණ දෙපාර්තමේන්තුවේ ප්‍රධානී නියෝජ්‍ය පොලිස්පති නාලක සිල්වා මහතාගේ ක්‍රියාවක් බවද ඔහු කියා සිටියේය.
නාලක සිල්වා මහතා අත්අඩංගුවට ගැනෙනුයේ මේ හේතුවෙනි.
අත්අඩංගුවට පත්වන විට සිල්වා මහතා සහරාන් හෂීම් ගැන පරීක්ෂණ කරමින් සිටියේය. ඔහුගේ අත්අඩංගුවට ගැනීමත් සමග පරීක්ෂණ අතරමග කඩාවැටුණි. සහරාන් හෂීම් ගැන හොයනවා වෙනුවට පොලිසිය කුමන්ත්‍රණ මිරිඟුවක් හඹා ගියේය. ඒ සිදුවීම නොවන්නට පාස්කු ප්‍රහාරය වළක්වා ගත හැකිව තිබුණි.
මෙරට රාජ්‍ය සේවයේ අන් සියලුම කොටස් මෙන්ම පොලිසියද උග්‍ර දේශපාලනීකරණයකට ලක්ව ඇති බව නොරහසකි. මෙහි ප්‍රතිඵලය වනුයේ යුක්තිය යටපත් වීමත් අපරාධ වර්ධනයත්ය. මෙයට හොඳම උදාහරණයක් නම් ශානි අබේසේකර කතා පුවතයි. අබේසේකර මහතා දශක ගණනාවක් පොලිස් සේවයේ නියුතු කෘතහස්ත නිලධාරියෙක් විය. නමුත් ගෝඨාභය ජනපතිවරයාගේ උදහසට ලක්ව ඔහුගේ සේවය අත්හිටුවීමත් සමග දේශපාලන බලාධිකාරයේ උවමනාව අනුව යමින් ඔහුට විරුද්ධව බොරු නඩුවක් ගොනු කිරීමට පොලිසිය කටයුතු කළේය. පොලිසිය තමන්ගේම කෙනකු වූ ශානි අබේසේකරට සලකන්නේ මේ අයුරින් නම් සාමාන්‍ය ලාංකිකයන් ගැන කතා කුමටද?
පාස්කු ප්‍රහාරය වළක්වා නොගැනීමේ වරද අබේසේකර මහතා මත දමා ඔහුව ත්‍රස්තවාදය වැළැක්වීමේ පනත යටතේ අත්අඩංගුවට ගෛන ඇප නොදී රඳවාගැනීමේ උත්සාහයක් දේශපාලන අධිකාරිය දරන බව ගිය වසරේ වාර්තා විය. මෙම උත්සාහය සාර්ථක වූවා නම් පොලිසිය කිසිදු පැකිලීමකින් තොරව අබේසේකර මහතාව ත්‍රස්තවාදය වැළැක්වීමේ පනත යටතේ අත්අඩංගුවට ගෙන ඔහුට එරෙහිව චෝදනාද ගොනු කරනු නියතය.
ෂක්‍ක්‍ඡඍ පනත අවභාවිත කරමින් දේශපාලන අධිකාරියේ හෝ අගතිගාමී භික්ෂූන්ගේ උවමනාවට පොලිසිය කටයුතු කළ ආකාරය අමතක කළ නොහැක. නැවක සුක්කානමක රූප තිබූ ඇඳුමක් ඇඳි කාන්තාවක පොලිසිය අත්අඩංගුවට ගත්තේ ඇගේ ඇඳුමේ තිබුණේ ධර්මචක්‍රය බව කියමිනි. ඇය සැකයට භාජනය වූයේ ඇගේ මුස්ලිම් ආගම නිසාය.
මේ වසරේ මුල් මාස 4 තුළ රැඳවියන් තිදෙනෙකු පොලිස් අත්අඩංගුවේදී මිය ගොස් ඇත.
අධිකරණය සමග හැංගිමුත්තන් සෙල්ලම් කරමින් සිටි වැඩ තහනම් වූ පොලිස්පති දේශබන්දු තෙන්නකෝන් මහතා අත්අඩංගුවට ගැනීමට අසමත් වූයේද මෙම පොලිසියයි.
රට පුරා අපරාධ රැල්ලක් පැතිර යයි. සතියකට ‘පාතාලය’ විසින් ජීවිත දෙක තුනක්වත් බිලිගැනීම සාමාන්‍යයකි. ඊශ්‍රායලයට විරුද්ධ ස්ටිකරයක් ඇලවූ ‘ත්‍රස්තවාදී අපරාධයට’ 22 හැවිරිදි මුස්ලිම් ආගමික තරුණයකු ත්‍රස්තවාදය වැළැක්වීමේ පනත යටතේ අත්අඩංගුවට ගැනීමට උත්සුක වනුයේ මෙවැනි දහසක් රාජකාරි මැදය.
මුජිබර් රහුමන් මන්ත්‍රීවරයා පාර්ලිමේන්තුවේ කළ ප්‍රකාශයකට අනුව, මෙය හුදෙකලා සිද්ධියක් නොවේ. එරාවුර්වල තිස් හැවිරිදි මුස්ලිම් කවියකු පලස්තීනය ගැන කවියක් ලිවීම නිසා පොලිස් ප්‍රශ්න කිරීමට ලක්වී ඇති බව මන්ත්‍රීවරයා ප්‍රකාශ කළේය. ගාසා තීරයේ ජනතාව ඉලක්ක කරගනිමින් ඊශ්‍රායලය ගෙනයන සමූලඝාතක යුද්ධයට එරෙහි උද්ඝෝෂණයක් සංවිධානය කළ තවත් මුස්ලිම් ආගමිකයකුගේ නිවසට ගිය පොලිසිය ස්ටිකර් තිබේදැයි ඔහුගෙන් අසා ඇත. (ඊශ්‍රායල් අගමැති) නෙතන්යාහුට ත්‍රස්තවාදියා කියන්නේ ඇයි? හා ගාසා තීරයේ ළමයින් මැරීම ගැන ඔබට ඇති ප්‍රශ්නය කුමක්ද? යනු පොලිසිය මතු කළ අනෙක් ප්‍රශ්න බව රහුමන් මන්ත්‍රීවරයා ප්‍රකාශ කළේය.
ඊශ්‍රායෙල් විරෝධය ත්‍රස්තවාදයක් ලෙස දැකීමේ මේ නවතම පොලිස් ප්‍රවණතාව පොලිසිය ඇතුළෙන්ම මතුවූවක්ද? නැතිනම් දේශපාලන බලධාරීන්ගේ වුවමනාවක්ද?
පලස්තීනයට සහාය දැක්වීම මෙරට වමේත් දකුණේත් මැදත් සියලුම පක්ෂවල පොදු ස්ථාවරයයි. මෙතෙක් මෙම සම්මුතියට පිටින් සිටියේ උදය ගම්මන්පිළ වැනි අගතිගාමීන් සුළුතරයක් පමණි. නමුත් ඊශ්‍රායලයේ සමූල ඝාතක යුද්ධයට සාමකාමීව හා ප්‍රජාතන්ත්‍රවාදී විරෝධය දක්වන මුස්ලිම් ලාංකිකයන් දඩයම් කිරීමට පොලිසිය උත්සුක වීමෙන් පෙනීයනුයේ ජාජබ/ජවිපෙ පාලනය දැන් දැන් මෙම සම්මුතියෙන් බැහැරව ගම්මන්පිළ වැනි අගතිගාමීන්ගේ අන්තයට ගමන් කරන බව නොවේද?
පුරවැසියන් ත්‍රස්තවාදීන් බවට පත්කරන එක් ප්‍රධාන සාධකයක් වනුයේ ආණ්ඩු හා පොලිසිය යුක්තියට පයින් ගසා දේශපාලන, මතවාදීමය හා/හෝ බල උවමනාවන් මත ක්‍රියාකිරීමයි. මෙය උතුරේත් දකුණේත් අතීත අත්දැකීම්වලින් අපි දකිමු. පොලිසියත් දේශපාලන බලාධිකාරයත් මේ සැරසෙනුයේ ඒ අඳුරු අතීතය යළි ප්‍රතිනිර්මාණය කිරීමටද?
ගාසා තීරයේ දස දහස් ගණන් අහිංසක ළමුන් ඝාතනය වීමේ වේදනාව ප්‍රකාශ කිරීමට ස්ටිකරයක් ඇලවීමෙන් මොහොමඩ් රුෂ්ඩි තරුණයා කළේ තම මනුෂ්‍යත්වය ප්‍රකාශ කිරීමයි. පොලිසිය ඔහුව අත්අඩංගුවට ගත්තද ඔහුගේ පවුලට විවිධාකාර තර්ජන කළද ඔහුට එරෙහිව එකුදු චෝදනාවක් හෝ අත්තනගල්ල උසාවියේදී ගොනු කිරීමට ඔවුහු අසමත් වූහ. නමුත් අත්අඩංගුවට පත්වීම නිසා ඔහුගේ රැකියාව අහිමි විය. තම මූලික අයිතියක් ක්‍රියාත්මක කිරීමට යාම නිසා ඔහුගේ තරුණ ජීවිතය අඳුරු විය. නීතිගරුක යුක්තිගරුක පුරවැසියන් අගතියට තල්ලු වනුයේ මෙවැනි අසාධාරණකම් නිසා නොවේද?
බොදු බල සේනාව වැනි අන්තවාදී සංවිධානවල මුස්ලිම් විරෝධී උන්මාදයත්, අලුත්ගම හා දිගන මුස්ලිම් විරෝධී ප්‍රචණ්ඩත්වයත් 2019 පාස්කු ඉරිදා සංහාරයට පාර කැපූ බව ජනාධිපති කොමිෂන් සභාවේ නිගමනයක් විය. පාස්කු ප්‍රහාරය පිළිබඳ බුද්ධි තොරතුරු අනුව ක්‍රියාත්මක නොවීම තුළින් ඒ විනාශයට දොර විවර කළ පොලිස් හා අනෙකුත් රාජ්‍ය නිලධාරීහු කිසිදු අගතියකින් තොරව නිදහසේ කල් ගෙවති. ගාසා සමූල ඝාතනයට එරෙහිව ස්ටිකරයක් ගැසීමේ ‘ත්‍රස්තවාදී අපරාධය’ නිසා 22 හැවිරිදි තරුණයකුගේ හා ඔහුගේ පවුලේ වර්තමානය අවුල් වී අනාගතය බොඳ වී ඇත.
පුනරුදය කියන්නේ මේකටද?
