විසිවන ආණ්ඩුක්‍රම ව්‍යවස්ථා සංශෝධනයට එරෙහිව ශ්‍රේෂ්ඨාධිකරණයට පෙත්සමක් ඉදිරිපත් කර නැති විපත්ෂයේ ප්‍රධාන දේශපාලන පකෂය බවට ජනතා විමුක්ති පෙරමුණ පත්වී ඇත.

එම සංශෝධනයට එරෙහිව මේ වන විට පෙත්සම් 39ක් ඉදිරිපත් කර ඇති අතර එම සංශෝධනයට පක්ෂව අතරමැදි පෙත්සම් කිහිපයක්ද ඉදිරිපත් වී ඇත.

සමගි ජන බලවේගය, එක්සත් ජාතික පක්ෂය, දෙමළ ජාතික සන්ධානය, ශ්‍රී ලංකා මුස්ලිම් කොංග්‍රසය යන විපක්ෂයේ ප්‍රධාන දේශපාලන පක්ෂ 20 වන සංශෝධනයට එරෙහි පෙත්සම් ඉදිරිපත් කර ඇති විපක්ෂයේ දේශපාලන පක්ෂ අතර වෙති.

එයට එරෙහිව පෙත්සම් ඉදිරිපත් කළ සංවිධාන අතර විකල්ප ප්‍රතිපත්ති කේන්ද්‍රය, ට්‍රාන්ස්පෙරන්සි ඉන්ටර්නැෂනල්, ශ්‍රී ලංකා පුවත්පත් ආයතනය හා ලංකා ගුරු සංගමය වැනි සංවිධාන වේ.

ජවිපෙ සෘජුව නොවෙතත් ඊට සම්බන්ධ වෘත්තීය සමිති හෝ වෘත්තීය සංවිධාන කිසිවක්වත් 20ට අභියෝග කර නැත. ඔවුන් සමඟ කටයුතු කරන පුද්ගලයන් හෝ නීතිඥයන් කිසිවකුත් ඊට අභියෝග කර නැත. අඩුම තරමේ ජවිපෙ මූලිකත්වයෙන් බිහිවූ ජාතික ජන බලවේගයේ නාමධාරි ක්‍රියාකාරින් කිසිවකුත් අධිකරණය හමුවේ ඊට අභියෝග කර නැත. විධායකය  අත බලය ඒකරාශි කරන, එය පරික්ෂාවට ලක්කිරිමේ යාන්ත්‍රණ බිඳදමන හා පාර්ලිමේන්තුවේ මුල්‍ය බලය හෑල්ලුවට ලක් කරන මෙම සංශෝධනය  නීතිය හමුවේ  ජනතා විමුක්ති පෙරමුණ අභියෝගයට ලක් නොකිරීම පුදුම සහගතය. ඒ සඳහා හේතු ඔවුන් පැහැදිලි කර නැත.

අධිකරණය අපට විශ්වාශ නැහැ, ඒ නිසා අධිකරණයට යෑමෙන් තේරුමක් නැහැ වැනි දෙයක් මේ සඳහා පැහැදිලි කිරිම වශයෙන් ජවිපෙ පාර්ශවයෙන් ඉදිරිපත් විය හැකිය. එහෙත් අධිකරණයේ තීරණය කුමක් වූවත් රටට තීරණාත්මක මෙවැනි අවස්ථාවක එය මඟ හැර යෑම ජවිපෙ වැනි  දේශපාලන ව්‍යාපාරයකින් බලාපොරොත්තු විය හැක්කක් නොවේ.

ජවිපෙ සිදුකරන පැහැදිලි කිරිම එයාකාර නම් දේශපාලන පලිගැනීම් පිළිබඳ සොයා බලන ජනාධිපති කොමිසමට එරෙහිව අධිකරණයට යෑමටද ජවිපෙට නොහැකිය. ඔවුන් එම කොමිසම බාරගත් පැමිණිල්ලක් සම්බන්ධයෙන් මීට පෙර අධිකරණයට ගියේය.

අධිකරණය විශ්වාශ නැහැ යන උපකල්පනයෙන් ජවිපෙ මේ අවස්ථාවේදී අධිකරණයට නොයන්නේ නම් මේ ආණ්ඩුව තිබෙන තාක් වෙනත් කිසිඳු කරුණක් සම්බන්ධයෙන්ද ජවිපෙ අධිකරණයට නොයා යුතුය.■