කොළඹ රාජකීය විද්යාලයේ ඉගෙනුම ලබන පහළොස් හැවිරිදි සිසුවෙකු විද්යාලයේ තෙමහල් ගොඩනැගිල්ලකින් බිමට වැටී බරපතළ තුවාල ලබා ගැනීම සම්බන්ධයෙන් කුරුඳුවත්ත පොලිස් ස්ථානය මඟින් විමර්ශනයක් ආරම්භ කර ඇති බව පොලිස් මාධ්ය ප්රකාශක සහකාර පොලිස් අධිකාරී එෆ්.යු. වුට්ලර් මහතා පවසයි.
මාර්තු 11 වන දින සිසුවා ශාන්ත තෝමස් විද්යාලය සහ රාජකීය විද්යාලය අතර පැවැත්වීමට නියමිතව තිබූ ක්රිකට් තරගයට සමගාමීව සංවිධානය කර තිබූ රථවාහන පෙළපාළියට එක්වීම සඳහා ගොස් තිබූ අතර, තෙවන මහලේ වසා තිබූ පන්ති කාමරයකට ජනේලයක් හරහා ඇතුළු වීමට උත්සාහ කර ඇති බව සඳහන් වේ.
සිය පාසල් බෑගය කර මත රඳවාගෙන මෙලෙස ගොඩනැගිල්ලට ඇතුළු වීමට උත්සාහ කිරීමේදී එක්වරම පය ලිස්සා යාමෙන් ඔහු බිමට වැටී ඇති බව ද සඳහන් වේ. ගොඩනැගිල්ලේ ඉහළ මහල අසල පිහිටි ගසක අත්තක්ද කැඩී ගොස් සිසුවා සමඟ පහළට වැටී ඇති බව පොලිස් විමර්ශනවලදී අනාවරණය වී ඇති බව වාර්තා වේ.
හංසි මානවඩු
