ත්රිකුණාමලයේ දී නීතියට පිටින් වැඩ කරන්නට ගොස් රිමාන්ඩ් බන්ධනාගාරගත වන්නට සිදුවුණු බලංගොඩ කස්සප හිමි ඇතුළු පිරිසට සතිය මුල දී ඇප ලැබිණ.
පුදුමයකට මෙන්, ඔවුන් රිමාන්ඩ් බන්ධනාගාරගතව සිටි කාලය තුළ ලංකාවේ බුද්ධ ශාසනයට අබ මල් රේණුවක් තරම් වත් හානියක්, අඩුවක්, පාඩුවක් සිදු වී ඇති බවට කිසි ම සාක්ෂියක් නැත. ඔහු සිරගතව සිටි නිසා බුද්ධ ශාසනයට පාඩුවක් ‘නොවීම’ කොයි තරම් ද යත්, රිමාන්ඩ් බන්ධනාගාරයේ සිටිය දී නොකා නොබී සිටිමින් ඊට ප්රචාරයක් දෙමින්, ‘මම මෙහේ ඉන්නවා යැයි’ තමා වෙත අවධානය යොමු කරගන්නට සිඟිති උත්සාහයක් පවා ගන්නට කස්සප හිමිට සිදු විය. කස්සප හිමි උපවාසයක් කරනවා යැයි කී විට, කොලු කෙල්ලන්, එය මාරාන්තික උපවාසයක් දක්වා ගෙනයන්නැයි ආරාධනා කිරීමෙන් ම මේ පුද්ගලයා කොයි තරම් විහිළුවවක් බවට පත් වී ඇද්ද යන්න පැහැදිලි විය.
එහෙත් ලංකාවේ සමහර මහානායක හිමිවරුන් ඇතුළු සමහර ජාතිකවාදීහු හා ජාතිවාදීහු පිරිසක් එකතු වී කස්සප හිමි හිරේ ලෑම මහා ශාසනික විලෝපයක් හැටියට හඳුන්වා දෙන්නට අසරණ උත්සාහයක් ගත්හ. ඔවුහු හැම අතේ ම දුවමින් කස්සප හිමි රිමාන්ඩ් කිරීම සිංහල බෞද්ධකමට, බුද්ධ ශාසනයට කරන මහත් නිගාවකැයි ආණ්ඩුවට fදාස් පවරන්නට පටන් ගත්හ. මෙවැනි අවස්ථාවක තමන් හැසිරිය යුත්තේ කෙලෙස දැයි සිහි එළවාගන්නට නොහැකි අසරණ විපක්ෂ නායකයා ද, කස්සප හිමි මිහිඳු මාහිමියන් තත්වයට ඔසොවා තබා, ඔහු සිරගත කිරීම නිසා ආණ්ඩුව බුද්ධ ශාසනයට කළ ඊනියා නිගාවක් ගැන වචන නාස්ති කළේ ය.
ගෞරව කළ යුතු දේ නම්, මේ කිසිවකුගේ පුහු නාදවලින් ආණ්ඩුව නොසැලී, නීතියෙන් ම එය විසඳාගන්නට ඉඩ දී නිශ්ශබ්දව සිටීමයි. අවසානයේ මෙවැනි අවස්ථාවක ඇප ලබාගැනීමට නීතියෙන් නියම කර ඇති මහාධිකරණයට ඉදිරිපත් වී ඇප ලබාගන්නට කස්සප හිමි ඇතුළු පිරිසට සිදු විය.
පසුගිය දිනවල කස්සප හිමි කර උඩ තබාගෙන යන්නට තැතනූ මහානායක හිමිවරුන් ඇතුළු සියලු ජාතිකවාදී ජාතිවාදී මහත්ම මහත්මීන්ගෙන් අසන්නට වැදගත් ප්රශ්නයක් තිබේ.
බලංගොඩ කස්සප යනු අනාගත බුද්ධ ශාසනයේ මුරදේවතාවකු ලෙස තමුන්නාන්සේලා විසින් සලකනු ලැබීමට සුදුසු කෙනෙක් ද? යන්න ඒ ප්රශ්නයයි.
බලංගොඩ කස්සප බැබළෙන්නට පටන් ගත්තේ 2022 ගොල්ෆේස් අරගල බිමේ සිට ය. එහෙත් ටික දවසක් යන විට මේ පුද්ගලයා අන්තවාදී, සිංහල බෞද්ධ ජාතිවාදී ශ්රමණ වේශධාරියකු පමණක් බව සියල්ලන්ට ම තේරෙන්නට විය. හැම පොදු වැඩක දී ම සිංහල බෞද්ධ අන්තවාදය ඇදගෙන මැද්දට පැනීම ඔහුගේ දෛනික චර්යාව බව ගෝල්ෆේස් පිටියේ සිටි සාමාන්ය බුද්ධියක් ඇත්තෝ දනිති.
එයින් පසු, ඔහු වරින් වර රටේ ජනතාවට හමුවන්නේ පුරුදු ලෙස ම සිංහල බෞද්ධ අන්තවාදය කටින් වැගිරෙන, අංග චලනයෙන් අන්තවාදී භාව ප්රකාශනයක යෙදෙන පුද්ගලයකු ලෙසිනි. සභාවක කතාකරන්නේ කෙසේ ද, මාධ්යයක දී අදහස් දක්වන්නේ කෙසේ ද යන්න පිළිබඳව අයනු ආයනුවත් නොදන්නා මේ භික්ෂු වේශධාරියාට වඩා, පාසල්වල 6 -7 ශ්රේණිවල දරුවෝ ද විනයධර ය. කස්සප යනු ඊටත් පහළට වැටී, අඩු ගණනේ සිවුරේ ගෞරවය වත් රකින්නේ නැති කෙනෙකි.
අපේ රටේ ජාතිකවාදීන්ගේ ‘රෝල් මොඩ්ල්’ එක බවට දැන් පත් කරගෙන මෙලෙස විනක් නැති, බලංගොඩ කස්සප වැනි කෙනෙකු ද?
වෙන්නට පුළුවන. මීට කලින් මේ වැඩේ ම කළ ගලගොඩඅත්තේ ඥානසාර, දැන් ටිකක් වියපත් ය. හතර අතේ නඩු ය. කොයි වෙලාවේ මෛත්රීපාල සිරිසේන ජනාධිපති දුන් ජනාධිපති සමාව අවලංගු වී නැවත හිරේ ලගින්නට සිදුවේ දැයි සිතාගන්නට බැරි ය. ඒ නිසා ‘බැට්න්’ එක අතට ගන්නට එවැනි ම භික්ෂු ප්රතිරූපකයකු අපේ සිංහල බෞද්ධ අන්තවාදීන්ට වුවමනා වෙයි. ඊට තකට තක ගැළපෙන පුද්ගලයා බලංගොඩ කස්සප හිමි ය.
එහෙත්, බුදුදහම වැනි අත්යන්තයෙන්ම සහනශීලී අහිංසාවාදී දහමක භාරකාරත්වය දරන්නට මෙවැනි ගර්හිත පුද්ගලයන් ඉදිරියට පැමිණීම පිළිබඳවත්, ඇතැම් මහානායක හිමිවරුන් එවැනි අයගේ ආරක්ෂාවට ඉදිරිපත් වීම පිළිබඳවත්, විස්සෝප විය යුත්තේ බුදුදදහම ඇත්තට ම අනුගමනය කරන මේ රටේ සැබෑ බෞද්ධයන් ය. ඔවුන් ඉදිරියට පැමිණ, මෙවැනි භික්ෂු ප්රතිරූපකයන් ශාසනයේ නිල අල්ලාගැනීමට එරෙහිව, ඉදිරියට පැමිණිය යුතු ය.
