- හිටපු මන්ත්රීවරුන් 316කට
- හිටපු මන්ත්රීවරුන්ගේ වැන්දඹු බිරියන් 165කට
- විශේෂ අවශ්යතා සහිත දරුවන් 4කට
රජයේ සේවකයෙකුට විශ්රාම වැටුපක් ලබා ගැනීමට නම් එම සේවකයාට පළමුව විශ්රාමික වැටුප් සහිත ස්ථිර පත්වීමක් තිබිය යුතු අතර එම සුදුසුකම් සම්පූර්ණ කිරීමට නම් එම සේවකයා අවුරුදු 3ක පරිවාස කාලයක් සම්පූර්ණ කළ යුතුය. රජයේ සේවකයාට අවම අවුරුදු 10ක සේවා කාලයකින් අනතුරුව විශ්රාම යෑමට හිමිකම් ලැබුණද විශ්රාම වැටුප ලැබෙන්නේ අවුරුදු 55න් පසුවය.
කෙසේ වෙතත් රජයේ සේවයෙන් විශ්රාම ගිය අයෙකුට උපරිමය ලෙස ලැබෙන්නේ තමන් අවසන් වරට ලබා ගත් වැටුපෙන් සීයයට 90කට අඩු විශ්රාම වැටුපක්ය. පාර්ලිමේන්තු මන්ත්රීවරුන්ට සහ ජනාධිපතිවරුන්ට තමන්ගේ අවුරුදු 5ක ධුර කාලයෙන් අනතුරුව විශ්රාම වැටුපක් හිමිවන අතර 1989.11. 29 දිනැති ගැසට් පත්රය ප්රකාරව හා වරින් වර ඊට සිදුකරන ලද සංශෝධනවලට අනුව අමාත්යවරුන්ගේ කාර්ය මණ්ඩලයන්හි ඇතැම් තනතුරු වෙනුවෙන් ද විශ්රාම වැටුප් හඳුන්වා දී ඇත.
පාර්ලිමේන්තු මන්ත්රීවරුන්ගේ විශ්රාම වැටුප අහෝසි කිරීමේ පනත් කෙටුම්පත ජනවාරි 06 වන දින අධිකරණ අමාත්ය හර්ෂණ නානයක්කාර පාර්ලිමේන්තුවට ඉදිරිපත් කළ අතර එම පනත් කෙටුම්පත පිළිබඳ විවාදය පෙබරවාරි මාසයේ පැවැත්වීමෙන් අනතුරුව සම්මත කිරීමට සැලසුම් කර ඇත.
පනත් කෙටුම්පත පාර්ලිමේන්තුවේ සභාගත කිරීමෙන් අනතුරුව ඊට එරෙහිව ශ්රේෂ්ඨාධිකරණයට පෙත්සම් හතරක් ලැබී තිබුණි. මේ පිළිබඳව ජනවාරි 22 වන දින කථානායක ජගත් වික්රමරත්න පාර්ලිමේන්තුවේ ප්රකාශ කළ අතර ඔහු පවසා සිටියේ ආණ්ඩුක්රම ව්යවස්ථාවේ 121(1) ප්රකාරව මෙම පෙත්සම් ශ්රේෂ්ඨාධිකරණයට ඉදිරිපත් කර ඇති බවය.
හිටපු පාර්ලිමේන්තු මන්ත්රීවරුන් සහ ඔවුන්ගේ ඥාතීන් එසේ නොමැති නම් වැන්දඹුවන් හෝ දරුවන් කීදෙනෙකු හිටපු පාර්ලිමේන්තු මන්ත්රීවරුන්ට ලබා දෙන මන්ත්රී විශ්රාම වැටුප් ලබා ගන්නේ දැයි 2026 ජනවාරි 08 දින පාර්ලිමේන්තු මහ ලේකම් කාර්යාලයට තොරතුරු ඉල්ලුම් පතක් අප යොමු කළ අතර, එම කාර්යාලයේ තොරතුරු නිලධාරී සහ පාර්ලිමේන්තු සහකාර මහ ලේකම් හංස අබේරත්නගේ අත්සනින් යුතුව 2026 පෙබරවාරි 03 වන දින තොරතුරු ලබා දී තිබිණි.
මන්ත්රීවරුන් 316ක්
ඊට අනුව, ජාතික රාජ්ය සභාවේ 1977 අංක 1 දරන පාර්ලිමේන්තු විශ්රාම වැටුප් පනතෙන් 2026 වර්ෂයේ ජනවාරි මස විශ්රාම වැටුප් ගෙවනු ලැබූ, හිටපු පාර්ලිමේන්තු මන්ත්රීවරුන් සංඛ්යාව 316කි.
අදාළ මන්ත්රීවරුන්ට විශ්රාම වැටුප් ගෙවීම ආරම්භ කළේ කවදා දැයි විස්තර ඉදිරිපත් කිරීමට සහ එක් එක් මන්ත්රීවරයාගේ ගොනුව පරීක්ෂා කිරීම සඳහා විශාල කාලයක් සහ ශ්රමයක් වැය වන බැවින් පාර්ලිමේන්තුවේ මුදල් හා ගිණුම් කාර්යාංශයට පැමිණ, එම කාර්යාංශයේ නිලධාරියෙකු ඉදිරියේ තොරතුරු පරීක්ෂා කිරීමට අවස්ථාව ලබා දිය හැකි බව හංස අබේරත්න මහතා ලියුම්කාරියට දන්වා ඇත.
මන්ත්රීවරුන්ගේ පෞද්ගලික ලිපි ගොනු තවමත් කඩදාසි ෆයිල් ගොනු වශයෙන් තිබීමත්, ඒවා තවමත් ඩිජිටල් නොකිරීමත් නිසා විශ්රාම ගිය දින සොයා ගැනීමට නොහැකි බව අනුමාන කළ හැකිය.
1977 වර්ෂයේ පාර්ලිමේන්තුවට තේරී පත්වී 2000 වර්ෂය වන තෙක් එක්සත් ජාතික පක්ෂය නියෝජනය කරමින් පාර්ලිමේන්තුවේ සිටි ගුණසේකර දොන් ප්රේමරත්න, වී ආනන්දසංගරී, දොන් වින්සන් ඩයස්, අමරා පියසීලි රත්නායක, රන්ජන් විජේවර්ධන, ජගත් බාලසූරිය විශ්රාම වැටුප් ලබාගන්නා බව සඳහන් කර ඇත.
නිරූපමා රාජපක්ෂත් ගන්නවා
ලොව බලවතුත් සහ දේශපාලනඥයන් විසින් සිදු කරනු ලැබූ බදු පැහැර හැරීම්, අයථා ධනය රැස් කිරීම් සහ මුදල් විශුද්ධිකරණ කටයුතු ආදිය හෙළිදරව් කෙරුණු පැන්ඩෝරා පේපර්ස් නම් අනාවරණයෙන් පසුව කතාබහට ලක් වූ හිටපු ජනාධිපති මහින්ද රාජපක්ෂ මහතාගේ ඥාති දියණියක වන නිරූපමා රාජපක්ෂ 2026 වර්ෂයේ ජනවාරි මාසයේදීද මන්ත්රී විශ්රාම වැටුප් දීමනාව ලබා ගෙන ඇත.
පැන්ඩෝරා පේපර්ස් හෙළිදරව්වලට අනුව 2017 වන විට නිරූපමා රාජපක්ෂ සහ ඇගේ සැමියා තිරු නඩේසන් සතුවූ අක්වෙරළ හිමිකම්වල වටිනාකම ඩොලර් මිලියන 18ක් පමණ වෙයි.
මහීපාල හේරත්, ජීවන් කුමාරතුංග, ෆීලික්ස් පෙරේරා, පී. රාධාක්රිෂ්ණන්, අක්මීමන දයාරත්න හිමි, සාගල රත්නායක, රෝහිත බෝගොල්ලාගම, රන්ජිත් අලුවිහාරේ, මිලින්ද මොරගොඩ, උඩුවේ ධම්මාලෝක හිමි, උපේක්ෂා ස්වර්ණමාලි, එල්ලාවල මේධානන්ද හිමි, උදිත් ලොකුබණ්ඩාර, බැසිල් රෝහණ රාජපක්ෂ, විනයාගමූර්ති මුරලිදරන් හෙවත් කරුණා අම්මාන්, සනත් ජයසූරිය යන හිටපු පාර්ලිමේන්තු මන්ත්රීවරුන්ද විශ්රාම වැටුප් ලබාගෙන ඇත.
රෝසි සේනානායක, සජීන් ද වාස් ගුණවර්ධන, අකිල විරාජ් කාරියවසම්, අර්ජුන රණතුංග, චන්ද්රානි බණ්ඩාර, ජෝන් අමරතුංග, හිටපු කථානායක ලක්ෂ්මන් යාපා අබේවර්ධන මහතා ද ලබාගෙන ඇත.
රෝසි සේනානායක මහත්මිය සහ උපේක්ෂා ස්වර්ණමාලි මහත්මිය 2010 වර්ෂයේ සිට 2015 දක්වා පාර්ලිමේන්තුවේ මන්ත්රීවරියන් ලෙස කටයුතු කර තිබුණු අතර අවුරුදු දහයක් පුරා ඔවුන්ට විශ්රාම වැටුප් ගෙවීමට ජනතාවගේ බදු මුදල් අය කරගෙන ඇත.
විශ්රාම වැටුප් දෙකක්
රනිල් වික්රමසිංහ, මහින්ද රාජපක්ෂ සහ මෛත්රිපාල සිරිසේන මහත්වරුන්ට විශ්රාම වැටුප් දෙකක් ලැබෙන අතර එක් විශ්රාම වැටුපක් හිටපු ජනාධිපතිවරුන් සඳහා ද අනෙක් විශ්රාම වැටුප පාර්ලිමේන්තු මන්ත්රීවරුන් සඳහාද ලබා දෙන විශ්රාම වැටුප්ය.
මුදල් විශුද්ධිකරණය යටතේ චෝදනා ලැබ සිටින කෙහෙළිය රඹුක්වැල්ල මහතාද 2026 ජනවාරි මාසයේ ඔහුට හිමි මන්ත්රී විශ්රාම වැටුප ලබා ගෙන ඇත.
වැන්දඹුවෝ 165ක්
2026 වර්ෂයේ ජනවාරි මස විශ්රාම වැටුප ගෙවන ලද හිටපු පාර්ලිමේන්තු මන්ත්රීවරුන්ගේ වැන්දඹුවන් සංඛ්යාව 165කි. විශේෂ අවශ්යතා සහිත දරුවන් 05 දෙනෙකුටද මන්ත්රී විශ්රාම වැටුප් ලබා දෙන බව සඳහන් කර ඇත.
එක්සත් ජාතික පක්ෂය නියෝජනය කරමින් 2000 ඔක්තෝබර් 10 දින සිට අවුරුදු 9යි මාසයක් කාලයක් පාර්ලිමේන්තු මන්ත්රිවරයෙකු ලෙස කටයුතු කළ එම්. මහරුෆ් මහතා 2012 වර්ෂයේ මියගිය අතර මේ දක්වා ඔහුගේ මන්ත්රී විශ්රාම වැටුප බිරිඳ වන කේ මහරුෆ් මහත්මිය ලබාගන්නීය.
ලක්ෂ්මන් කදිරගාමර් මහතාගේ අභාවයෙන් පසුව ඔහුගේ බිරිඳ වන සුගන්ති කදිරගාමර් මහත්මියද හිටපු පාර්ලිමේන්තු මන්ත්රී නඩරාජා රවිරාජ්ගේ ඝාතනයෙන් පසුව ඔහුගේ බිරිඳ වන සශිකලා රවිරාජ් මහත්මියද මන්ත්රී විශ්රාම වැටුප ලබා ගෙන ඇත.
හිටපු අමාත්ය භාරත ලක්ෂ්මන්ගේ ඝාතනයෙන් පසුව ඔහුගේ බිරිඳ වන සුමනා හේමචන්ද්ර මහත්මියද ආරුමුගම් තොන්ඩමන්ගේ බිරිඳ වන රාජලක්ෂ්මි තොන්ඩමන් මහත්මියද අදාළ මුදල් මේ දක්වා ලබාගෙන ඇත.
කුමාර වෙල්ගම මහතාගේ බිරිඳ ටී.එච්.කේ. වෙල්ගම මහත්මියද, තමිල් අරසු කච්චි පක්ෂයේ නායක ලෙස කටයුතු කළ ආර්. සම්බන්දන් මහතාගේ බිරිඳ වන ලීලා දේවී සම්බන්දන් මහත්මියද, මාවයි සේනාධිරාජා මහතාගේ බිරිඳ ද මන්ත්රී විශ්රාම වැටුප් ලබා ගෙන ඇත.
මාසයකට මිලියන 33ක්
පාර්ලිමේන්තු මහ ලේකම් කාර්යාලයෙන් ලබා දී ඇති තොරතුරුවලට අනුව, විශ්රාම වැටුප් සඳහා දළ වශයෙන් මාසයකට රුලියල් මිලියන 33ක මුදලක් වැය වෙයි. එසේනම් හිටපු මන්ත්රීවරුන්, ඔවුන්ගේ බිරියන් ඇතුළු 485 දෙනෙකුට වසරකට විශ්රාම වැටුප් ගෙවීම සඳහා රුපියල් මිලියන 396ක් ගෙවීමට රජයට සිදු වන අතර එම පිරිස අතර නිරූපමා රාජපක්ෂ සහ කෙහෙළිය රඹුක්වැල්ල වැනි මුදල් විශුද්ධිකරණය නම් වරද සිදු කළ අයත් ඇත. ඇතැම් දේශපාලනඥයන්ට මසකට වරක් ලබා දෙන මෙම මුදල, එනම් රුපියල් 68,000ක් පමණ මුදල දිනකටත් නොසෑහෙන බව අප දන්නා කරුණකි.
