අරුණ පුවත්පතේ කර්තෘ මහින්ද ඉලේපෙරුමට අද (නොවැම්බර් 24) දින උදේ 10.30ට අපරාධ පරීක්ෂණ දෙපාර්තමේන්තුවට පැමිණෙන ලෙස දන්වා ඇති නමුත්, ඔහු අද දින එම දෙපාර්තමේන්තුවට පැමිණියේ නැත.
අපරාධ පරීක්ෂණ දෙපාර්තමේන්තුවේ සහකාර පොලිස් අධිකාරි සේමසිංහ විසින් නොවැම්බර් 22 දරන ලිපියකින් ඉලේපෙරුම මහතාට ප්‍රකාශයක් ලබාගැනීම සඳහා සීඅයිඩීයට පැමිණෙන ලෙස දන්වනු ලැබ තිබිණ.
‘ග්‍රාම නිලධාරි සහතිකය මදි, පොලිස් වාර්තා ගන්න මහජන කමිටු ප්‍රධානීගේ අනුමැතියත් ඕනෑ. යන ශීර්ෂය යටතේ 2025.11.19 දින අරුණ පුවත්පතේ ප්‍රචාරය වූ අසත්‍ය පුවත සම්බන්ධව’ යන ශීර්ෂය යටතේ එම දැනුම්දීමේ ලිපිය, සීඅයිඩීය විසින් ඉලේපෙරුම මහතාට යවකනු ලැබ තිබිණ.
‘උක්ත කරුණ සම්බන්ධයෙන් සීඅයිඩීයට ඉදිරිපත් කර ඇති පැමිණිල්ලකට අදාළව විමර්ශන කටයුතු කරගෙන යන බවත්, එම විමර්ශනයට අදාළව මෙම පුවත ඇරුණ පුවත්පතේ පළකිරීම සම්බන්ධයෙන් ප්‍රකාශයක් සටහන් කර ගැනීමට අවශ්‍ය බවත්, පුවත්පත් දැන්වීමට අදාළ සියලු විස්තර හා ලේඛන රැගෙන සීඅයිඩීයේ විශේෂ විමර්ශන අංශයට පැමිණෙන ලෙසත්’ එම ලිපියෙන් මහින්ද ඉලේපෙරුම මහතාට දන්වා තිබේ.
එහෙත්, එම පැමිණිල්ල කර ඇත්තේ කවුරුන් විසින්දැයි සීඅයිඩීයේ ලිපියේ සඳහන් නොවේ.
නොවැම්බර් 20 වැනිදා පාර්ලිමේන්තුව අමතමින් ජනමාධ්‍ය ඇමති නලින්ද ජයතිස්ස මෙම පුවත විවේචනය කළ අතර, ඒ ගැන අවශ්‍ය නීතිමය පියවර ගන්නා බවද සඳහන් කළේය. එම ප්‍රවෘත්තිය අසත්‍ය එකක් බවද, ඊට කිසිම මූලාශ්‍රයක් නැති බවද කී ඔහු ඒ තුළින් රටේ කැළඹීමක් හැදීමට පුවත්පත උත්සාහ ගන්නා බවද එය කඩාකප්පල්කාරී ක්‍රියාවක් බවද කීවේය.
සීඅයිඩීයෙන් මහින්ද ඉලේපෙරුම මහතාට කැඳවීමක් එවා ඇත්තේ නලින්ද ජයතිස්ස ඇමතිවරයාගේ ප්‍රකාශයෙන් දින දෙකකට පසුවය.
කෙසේ වෙතත් සීඅයිඩීයේ ලිපියේ, පැමිණිල්ල කර ඇත්තේ කවරකු විසින්ද යන්න සඳහන් කර නොමැත. එසේ සඳහන් කිරීම, පොලිස් චක්‍රලේඛයක් මගින් නියම කර ඇති අනිවාර්ය අවශ්‍යතාවකි.
නලින්ද ජයතිස්ස ඇමතිවරයා කළ ප්‍රකාශයෙන් පසුව පිළිතුරු දුන් විපක්ෂ නායක සජිත් ප්‍රේමදාස, අරුණ පුවත්පතේ ප්‍රවෘත්තියට මුල්වූ මූලාශ්‍රය තමා බව පාර්ලිමේන්තුවට කීවේය. පුවතේ සඳහන් අන්දමට, පොලිස් වාර්තාවක් ගැනීම සඳහා ග්‍රාමනිලධාරී සහතිකය ප්‍රමාණවත් නොවී, මහජන කමිටු ප්‍රධානීගේ අනුමැතියද ඕනෑ වූ අවස්ථාවලට අදාළ නම් ගම් හා ලිපිනයන්ද ඔහු ඒ මොහොතේ පාර්ලිමේන්තුවට ඉදිරිපත් කළේය. තමා මේ කරුණු හෙළිකරන්නේ වගකීමෙන් බවත් විපක්ෂ නායක ප්‍රේමදාස එහිදී කීවේය.
මේ අතර, පුවත්පතේ පළකරන ලද ප්‍රවෘත්තියක් පිළිබඳව අරුණ කර්තෘවරයා සීඅයිඩීයට කැඳවීම සම්බන්ධයෙන් ජනමාධ්‍ය ක්ෂේත්‍රයේ පුළුල් විරෝධයක් මේ වන විට පැනනැගී තිබේ. ජාතික ජන බලවේග ආණ්ඩු බලයට ගෙනඒම සඳහා දායකවූ පිරිස් අතරින් මෙන්ම, ජනමාධ්‍ය සමිතිවලින්ද ඒ ගැන විරෝධය පළ කර තිබේ.
වෘත්තීය ජනමාධ්‍යවේදීන්ගේ සංගමය නිවේදනයක් නිකුත් කරමින් පවසා ඇත්තේ මේ හරහා ආණ්ඩුව ජනමාධ්‍ය මර්දනයක යෙදෙන බව පෙනෙන බවත්, තම සංගමය ඊට විරෝධය පළකරන බවත්ය. ‘පුවත්පතේ කර්තෘවරයා අපරාධ පරීක්ෂණ දෙපාර්තමේන්තුව වෙත කැඳවීම පැහැදිලිවම තමන්ට හිලෑ නොවන ජනමාධ්‍ය මර්දනයට රජය තුළ පවත්නා කැමැත්ත ප්‍රක්ෂේපණය කරන බව’ එම නිවේදනයේ සඳහන් වෙයි.
