“නිනෝ ලයිව්” සිනමාපටයෙන් සිනමා අධ්‍යක්ෂණයට පිවිසි තිසර ඉඹුලාන “සෙකන්ඩ් ෂෝ”, “ආච්චිට හාල් ගරනා නිසා” සහ “බඹර නාදේ” ඇතුළු ජනප්‍රිය සංගීත වීඩියෝ ද නිර්මාණය කළේය. ඔහු තම, පළමු සිනමාපටය වන “නිනෝ ලයිව්” සඳහා, 2018 හිරු රන් සිනමා සම්මාන උළෙලේ තුන්වැනි ජූරි සම්මානයද, 34 වැනි සරසවි සම්මාන උළෙලේදී කුසලතා සම්මානය ද දිනාගත්තේය. “හතේ හත” සංගීත වීඩියෝපට මාලාව සඳහා දෙරණ ක්ලෝස්-අප් සම්මාන උළෙලේදී ජූරියේ විශේෂ සම්මානය ද තිසරට හිමිවිය. “මෝඩ තරිඳු” සිනමාපටය තිසර ඉඹුලානගේ දෙවෙනි අධ්‍යක්ෂණය වේ.
“මෝඩ තරිඳු” කුමන ශානරයකට අයිති සිනමාපටයක් ද?
“මෝඩ තරිඳු” කියන්නේ අතිශය ශ්‍රී ලාංකික සිනමාපටයක්. මෙහි තිරපිටපත ලියනකොටම බැලු‍වා, අපි මොකක්ද මේ කරන සිනමාපටය කියලා, කරන්න පටන් ගත්ත දවසෙ ඉඳන්ම අපි කල්පනා කළේ, ලංකාවේ සිනමාපට බලන්න කැමති සහ සිනමා ශාලාවලට එන ප්‍රේක්ෂකයන් කවුද, ඒ ප්‍රේක්ෂකයා මොනවටද කැමති, සහ නරඹන්න චිත්‍රපට ශාලාවලට එන්නේ නැති පිරිස කවුද, ඒ ඒ ඕඩියන්ස් එක තේරුම් ගන්නත් තේරුම් අරගෙන රිසර්ච් පාර්ට් එකක් එක්ක තමයි අපි සිනමාපටය හදන්න සහ ලියන්න පටන් ගත්තේ. ඔය අපි වර්ගීකරණය කරලා තියෙන ශානරය ගොඩක් ටච් කරන්න උත්සාහ කළා, මෝඩ තරිඳු මෙන්න මේ ශානරයට අයිති චිත්‍රපටියක් කියන්නේ නැතුව, අතිශය ශ්‍රී ලාංකික සිනමාපටයක් කියලා කියන්න. එක එක්කෙනා බලන කෝණය අනුව සහ එක එක මිනිසුන්ගේ රසඥතාව අනුව මේ සිනමාපටය තමන් කැමති ශානරයකට දාගන්න පුළුවන්.
මෙරට සිනමා විචාරකයන්, විද්වතුන් වගේම බුද්ධිමත් ප්‍රේක්ෂකයන් කියන්නේ, සිනමාවේ ස්වර්ණමය යුගය නැවතත් උදාවූ බවයි?
2025දී තමන්ගේ ගමක නගරයක, ගෙවල් ළඟ සිනමා ශාලාවක් තියෙනවාද කියලවත් දන්නේ නැති ප්‍රේක්ෂකයෝ ප්‍රමාණයක් සිනමා ශාලාවලට ඇද බැඳගත්තා සහ පොඩි fට්‍රන්ඩ් එකක් හැදුණා වගේ එකක් වුණා. එහෙම ප්‍රේක්ෂාගාරය සිනමා ශාලාවලට ඇදිච්ච චිත්‍රපටි ගොඩක් ආවා. රාණි, නෙළුම් කුළුණ, වාලම්පුරි, ක්ලැරන්ස්, මදර් ලංකා ඒ වැනි සිනමාපට ගණනාවක්, සිනමා හෝල්වලට ආ වසරක්.
අපිට මතක ඇති කාලේ සිනමා ශාලා පිරී යන චිත්‍රපටි තුනයි හතරයි අවුරුද්දකට එන්නේ. මේ අවුරුද්දේ තරුණ පිරිස සහ අර මං ඉස්සෙල්ලා සඳහන් කළ ප්‍රේක්ෂාගාරය නැවත නැවත එන්න ගත්තා. මේ වසරේ ඒක ළඟ ළඟ වුණාට, සාමාන්‍යයෙන් ප්‍රේක්ෂාගාරය ඇද බැඳගන්න නිර්මාණ, සිනමා ශාලාවලට ආවාට, සුනිල් ආරියරත්නගේ, සෝමරත්න දිසානායකගේ, ඊට පස්සේ වාසව බදුගේ චිත්‍රපටිය ආවායින් පස්සේ, තමයි මේ අලුත් ප්‍රේක්ෂක පිරිසක් හැදෙන්නේ. 2025 ඒ වගේ චිත්‍රපටි ගණනාවක් එක ළඟ ආ වසරක්. ඉතින් මං විශ්වාස කරනවා, ස්වර්ණමය යුගය උදාවුණා කියලා සහ එහෙම කියන්න පුළුවන් කියලාත්.
පසුකරගෙන පැමිණි දශකවල පැවැති ආකාරයේ ප්‍රේක්ෂාගාරයක් තනන්න, තාමත් මෙරට සිනමාවට නොහැකිවෙලා තියෙනවා?
සිනමාත්මකව කොහොමද වැඩේ කරන්නේ, තමන්ට කියන්න තියෙන දේ, තමන්ගේ පිටපතේ තියෙන අන්තර්ගතය වගේ කාරණා ගැන හිතනවා නම්, තමන් විෂය කරගන්න ප්‍රස්තුතයට අවංක වෙලා ඒ නිර්මාණය ප්‍රේක්ෂාගාරයට ගෙනියන්න අවංක නිර්මාණයක් කරනවා නම්, ඕනෑම දශකයක ප්‍රේක්ෂාගාරය සිනමා කෘතියත් එක්ක බද්ධ වෙලා ප්‍රේක්ෂකයන් අතරට යනවා කියලා මගේ විශ්වාසයක් තියෙනවා. කලින් දශකවල හිටපු සහ ඒ වගේ වැඩ කළ කට්ටියත් එක්ක කතාකරලා බැලු‍වොත් ඒක පෙනෙනවා.
ලාංකේය සිනමාව, පවත්වාගෙන යාම වෙනුවෙන් තරුණ සිනමාකරුවෙක් විදිහට ඔබටත් යම් යෝජනා, විවේචන ඉදිරිපත් කරන්න ඇති නේද?
මම චිත්‍රපටි දෙකයි හදලා තියෙන්නේ. මෝඩ තරිඳු තාම තිරගත වෙමින් පවතින්නේ. දැනට මට තියෙන්නේ චිත්‍රපටි එකහමාරක වගේ අත්දැකීම්. මේ චිත්‍රපටියත් තිරගත වෙන්න පටන් අරන් සතියක් දෙකක් විතර කාලයක් වෙන්නේ. ඒ නිසා, ඔබ යොමුකළ පැනයට ලොකුවටම අදහසක් සහ යෝජනාවක් ඉදිරිපත් කරන්න බෑ. නිනෝලයිව් චිත්‍රපටිය රිලීස් කරලා අවුරුදු 10කට විතර පස්සෙනේ මේ චිත්‍රපටිය හැදෙන්නේ. ඉන්ඩස්ටි්‍ර එක වැඩ කරන විදිය, මේකෙ ඩයිනමික්ස්, මේකේ මිනිසුන්ගේ හැසිරීම, මේ තැන්වල ඉන්න පිරිසගේ වෙනස්වීම් එක්ක අරකේ තිබ්බ එක්ස්පීරියන්ස් එකට වඩා හාතිපසින්ම වෙනස් මේ චිත්‍රපටයේ එක්ස්පීරියන්ස්. මේ චිත්‍රපටිය තිරගත වෙලා ඉවර වෙලා මේ ප්‍රොජෙක්ට් එක තනිකරම ඉවර වුණායින් පස්සේ තමයි මට මෙහෙම යෝජනාවක් හෝ විවේචනයක් ඉදිරිපත් කරන්න පුළුවන් වෙන්නේ.
ඔබ, මෝඩ තරිඳු ප්‍රචාරක කටයුතු සඳහා භාවිතාවට ගත්තේ සමාජ මාධ්‍ය. මේක කෙතරම් දුරකට සාර්ථක වුණාද?
මෝඩ තරිඳු ප්‍රචාරණ කටයුතුවලට සමාජ මාධ්‍ය භාවිත කළා කියන එක ඇත්ත. හැබැයි අපි ඒකම විතරක් නෙමෙයි පාවිච්චි කළේ. සාමාන්‍ය පෝස්ටර් කැම්පේන් එක, ඊට පස්සේ ඒඅයි, රේඩියෝ මාධ්‍ය වගේ ඒවා ගොඩක් භාවිත කළා. හැබැයි මූලික වශයෙන්ම පාවිච්චි කළේ සමාජ මාධ්‍ය තමයි. තමන්ගේ ලයිෆ් ස්ටයිල් එක මේන්ටේන් කරන්න ගොඩාක් අය හෑන්ඩ් ෆෝන් එක භාවිත කරනවා. පිටරට වගේම ලංකාවේ ඕඩියන්ස් එක ෆෝන් එකත් එක්ක ඉන්න නිසා සමාජ මාධ්‍ය තුළින් අපිට ඔවුන් ආමන්ත්‍රණය කරන්න පුළුවන්. තිරගත වෙන මුල්ම අවධියේ මට තේරෙන්නේ නැහැ සමාජ මාධ්‍ය භාවිතය සාර්ථක වුණාද නැද්ද කියලා.
මෝඩ තරිඳු කොයි විදිහට සිනමා ප්‍රේක්ෂාගාරය වැළඳගනීද?
අපි නිනෝලයිව් සිනමාපටය, 2010 වසරේ තමයි ඉවර කළේ. අවුරුදු 15ක් විතර ගතවෙලා. හිතාමතාම ගත්ත එකකටත් වඩා, අපිට ඒ කාලේ ගන්න සිද්ධ වුණා. නිනෝ ලයිව් චිත්‍රපටිය ඉවර වුණායින් පස්සේ, අපි මේ ක්ෂේත්‍රයේ කොහොම හරි රැඳී සිටින්න ඕනෑ වුණා.
මම ඉගෙන ගත්තේ සිනමාව සහ රූපවාහිනී රූප කලාව. ඕඩියෝ වීඩියෝ මීඩියම් එක. මටයි, තිසරටයි මේ ක්ෂේත්‍රයේ රැඳී සිටින්න ඕනෑ වුණා. අපි ඉගෙන ගත්තු දෙයකින් කවදහරි සිනමාපටයක් හදන එක තමයි අපේ සිහින වුණේ. හැබැයි ඒ අතරතුර ජීවත් වෙන්න සහ රැකියාවක් විදියට මේ ෆීල්ඩ් එකම අපි තෝරා ගත්තා. මියුසික් වීඩියෝ සහ කොමර්ෂල්ස් කරන එක රස්සාව විදියට.
දැනට සිනමාපට දෙකයි. චිත්‍රපටිය මියුසික් වීඩියෝ නම් පනහක් විතර කරලා තියෙනවා. මේ ටීවී කමර්ෂලු‍ත් ඒ වාගෙ ගාණක් කරලා ඇති. ඒකෙන් තමයි අපිට මූලිකවම ඕඩියන්ස් එක තේරුම් ගන්න වටපිටාව හැදුණේ. ඊට පස්සේ මමයි, තිසර මංගල බණ්ඩාරයි නිතරම කතා කළ දේ තමයි, අපි ඊළඟට කරනවා නම් අපි කාටද සිනමාපටයක් කරන්නේ, කොයි වගේ චිත්‍රපටියක්ද කරන්නේ කියන එක. අපි ලංකාවේ මිනිස්සු සිනමාවට ගෙන්න ගන්නවා නම් කොහොමද සිනමාපටයක් කරන්නේ කියන එක ගැන. ඉතිං ඒ රිසර්ච් එකේ ප්‍රතිඵලයක් විදියට තමයි මෝඩ තරිඳු හැදෙන්නේ. අපි බලාපොරොත්තු වෙනවා, ඒ රිසර්ච් එකේ ප්‍රතිඵලයක් විදියට, මෝඩ තරිඳු ප්‍රේක්ෂකයන් වැළඳගනියි කියලා. මේකත් සිනමා ශාලාවලින් ගැලවිලා, ප්‍රදර්ශනය ඉවර වුණායින් පස්සේ තමයි අපිට කියන්න වෙන්නේ සිනමාපටයට මෙන්න මෙහෙම ප්‍රේක්ෂාගාරයක් සිටියා, මේක තමයි අපි පාවිච්චි කළේ, ඒකට මෙහෙම ප්‍රතිඵලයක් ආවා කියලා සූත්‍රයක් විදියට. මම හිතනවා එතෙක්, සිනමාපටය ප්‍රේක්ෂාගාරය හොඳ විදියට බාරගනී කියල.
- අනුසාර මාහිංගොඩ
