ජනපතිගේ ඩිජිටල් අමාත්‍යාංශයට උපදේශකයෝ 10ක්
පාර්ලිමේන්තු මන්ත්‍රී දයාසිරි ජයසේකර වාචික පිළිතුරු අපේක්ෂා නොකරමින් අගමැති හා අධ්‍යාපන, උසස් අධ්‍යාපන සහ වෘත්තීය අධ්‍යාපන ඇමතිවරියගෙන් අසන ලද ප්‍රශ්න දෙකකට ඔක්තෝබර් 09 වැනිදා පිළිතුරු සභාගත කර තිබුණි.
ඉන් එක් ප්‍රශ්නයක් වූයේ කැබිනට් අමාත්‍යාංශ සඳහා පත්කර ඇති මුළු උපදේශකයන් සංඛ්‍යාව කොපමණද යන්නය. ඒ සඳහා ලබාදී තිබුණ පිළිතුර වූයේ ඒ වනවිට අමාත්‍යාංශ 10ක් සඳහා උපදේශකවරුන් 37 දෙනෙකු පත්කර ඇති බවයි.
අසා තිබූ ප්‍රශ්නය
ප්‍රශ්නය මගින් වැඩිදුරටත් විමසා තිබුණේ එම එක් එක් උපදේශකයාගේ නම, පත්කරන ලද දිනය, ගෙවනු ලබන මාසික වැටුප හා දීමනා, පෙර සේවය කරන ලද ස්ථාන හා දරන ලද තනතුරු, ඔහුට/ඇයට වාහන ලබාදී තිබේ නම් වාහනයේ අංකය, වාහනයේ වර්ගය, වාහනය වෙනුවෙන් ලබාදෙන මාසික ඉන්ධන දීමනාව, ඔහුට/ඇයට කාර්යාලයක් ලබාදී තිබේ නම් එම කාර්යාලය පිහිටි ස්ථානය සහ එම කාර්යාලය සඳහා ගෙවනු ලබන මාසික කුලිය, එක් එක් අමාත්‍යාංශ සඳහා වෙන් වෙන් වශයෙන් කවරේද යන්නය.
සභාගත කර ඇති තොරතුරු අනුව සුනිල් හඳුන්නෙත්ති ඇමති ධුරය දරන කර්මාන්ත සහ ව්‍යවසායකත්ව අමාත්‍යාංශයට උපදේශකයන් 3 දෙනෙකු පත්කර ඇති බව සඳහන් කරන අතර ඒ අමිත සම්පත් අමරසිංහ, තුෂිර රදැල්ල, චන්දිමා හේමමාලි ඩයස් අභයගුණවර්ධනය. ඔවුන් කිසිවෙකු වැටුප් හෝ දීමනා මෙන්ම වාහන හෝ ඉන්ධන දීමනා ලබා නොගන්නා බව සඳහන් කර ඇත. එමෙන්ම ඔවුන්ට කිසිදු කාර්යාල පහසුකමක් ලබාදී නැති බවද සඳහන් කරයි.
ජනපතිගේ අමාත්‍යාංශයේ උපදේශකයන්
ජනාධිපති අනුර කුමාර දිසානායක අමාත්‍ය ධුරය දරන ඩිජිටල් ආර්ථික අමාත්‍යාංශය සඳහා පත්කර ඇති උපදේශකවරුන් වන්නේ මාර්ග සංවර්ධන අධිකාරියේ අධ්‍යක්ෂ මණ්ඩල සාමාජිකයකු ලෙස සේවය කර ඇති ආර්එම්එන් සුමුදු කුමාර ධනපාල, අවින්යා පදනමේ ප්‍රධාන තාක්ෂණ නිලධාරි ලෙස කටයුතු කර ඇති සමීස අබේසිංහ, ඊඒපී විකාශන සමාගමේ නියෝජ්‍ය අධ්‍යක්ෂ ඉංජිනේරු ලෙස කටයුතු කර ඇති එන්ඩබ්ඒපී හරිප්‍රිය, සම්පත් බෑන්ක් පීඑල්සී හි විධායක ඩිජිටල්කරණ උපදේශක ලෙස කටයුතු කර ඇති සංජය කරුණාසේන, කොළඹ මහ නගර සභාවේ තොරතුරු තාක්ෂණ හා වත්කම් කළමනාකරණ ප්‍රධානී ලෙස කටයුතු කර ඇති බන්දුල රණතුංග, හුවායි ටෙක්නොලොජි සමාගමේ ඉංජිනේරුවරයකු ලෙස කටයුතු කර ඇති දිනින්ද්‍ර ප්‍රේමචන්ද්‍ර, ඉන්ටෙලිජන්ට් සොලූෂන්ස් ඇන්ඩ් කන්සල්ටන්සි සමාගමේ නිර්මාතෘ ආචාර්ය මනෝද ගමගේ, ශ්‍රී ලංකා ටෙලිකොම් ආයතනයේ විදුලි සංදේශ පරීක්ෂකවරයකු ලෙස සේවය කර ඇති එම්එස් සලීම්, ඩයලොග් සමාගමේ ජාල මෙහෙයුම් සහකාර කළමනාකරු ලෙස සේවය කර ඇති මනෝජ් සමරකෝන් හා වෙබ්ටෙක් සංස්ථාවේ ජ්‍යෙෂ්ඨ තාක්ෂණික ව්‍යාපෘති කළමනාකරු ලෙස කටයුතු කර ඇති උපුල් අබේසිරිවර්ධන යන අයයි.
ඔවුන් වැටුප් හෝ දීමනාවක් මෙන්ම වාහන හෝ ඉන්ධනද ලබා නොගන්නා බව සඳහන් කරයි. එහෙත් ඒ සියල්ලන්ම ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනයේ කාර්යාල පහසුකම් ලබන බව සඳහන් කරයි.
අගමැතිගේ අමාත්‍යාංශ උපදේශකයන්
අගමැතිනිය යටතේ ඇති අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍යාංශයේ උපදේශකවරුන් වශයෙන් මහාචාර්ය ශ්‍යාමිනී හෙට්ටිආරච්චි, ආනන්ද ගලප්පත්ති, පූජ්‍ය මොරකන්දේගොඩ ආරියවංශ හිමි, ආචාර්ය සෙන්ගරපිල්ලෛ අරිවලහන්, වෛද්‍ය සයුරි රුවන්මලී පෙරේරා, රමිඳු පෙරේරා, රත්නායක කරුණාසිරි, මහාචාර්ය කාලිංග ටියුඩර් සිල්වා, වෛද්‍ය වයිඑච් ශසිදර ද සිල්වා, ටී ජෝන් ක්වින්ටස්, ටීඑම් ප්‍රේමවර්ධන, විජය ධම්මික අලහප්පෙරුම, එච්එම් වසන්ත හේරත්, ජේඒඩී ජානක ජයලත් කටයුතු කරන බව සඳහන් කර තිබේ.
ඒ සියල්ලන් වැටුප් හෝ දීමනා ලබා නොගන්නා බවද, වාහන හෝ ඉන්ධන ලබා නොගන්නා බවද ඔවුන් ස්වේච්ඡාවෙන් සේවය කරන බවද සඳහන් කර තිබේ. එමෙන්ම ඔවුන්ට කිසිදු කාර්යාල පහසුකමක් ලබාදී නැති බවද සඳහන් කර තිබේ.
ගොවිජන සම්මේලනයේ උපදේශක
කේඩී ලාල් කාන්ත යටතේ පවතින කෘෂිකර්ම, පශු සම්පත්, ඉඩම් සහ වාරිමාර්ග අමාත්‍යාංශයට උපදේශකයකු ලෙස සමස්ත ලංකා ගොවිජන සම්මේලනයේ වසර 25ක් ජාතික විධායක සභිකයකු ලෙස කටයුතු කර ඇති ඩබ්එම් සරත් විජේකෝන් පත්කර ඇති අතර ඔහු වැටුප් හා දීමනා ලබාගන්නේ නැති බව සඳහන් කර ඇත. එසේ වුවද ඔහුට වාහනයක් ලබාදී ඇති බවද ඒ සඳහා මෙතෙක් ඉන්ධන දීමනාවක් ලබාගෙන නැති බවද, බත්තරමුල්ල ගොවිජන මන්දිරයේ කාර්යාල පහසුකම් ලබාදී ඇති බවද සඳහන් කරයි.
විෂයන් මාරුව සිදුවීමට පෙර බිමල් රත්නායක ඇමතිවරයා වශයෙන් කටයුතු කළ ප්‍රවාහන, මහාමාර්ග වරාය සහ සිවිල් ගුවන් සේවා අමාත්‍යාංශයට ස්වෙච්ඡා උපදේශකයන් වශයෙන් බීආර්කේ මධුභාෂිණී, පාලිත විජේසිරි වික්‍රමසේකර කටයුතු කරන බව සඳහන් කරයි. ඔවුන්ට වැටුප් හෝ දීමනා නොගෙවන බවද, වාහන හෝ ඉන්ධන මෙන්ම කාර්යාල පහසුකම් ලබාදී නැති බවද සඳහන් කරයි.
රාජ්‍ය පරිපාලන, පළාත් සභා හා පළාත් පාලන අමාත්‍යාංශයේ උපදේශකවරයකු වශයෙන් ටී අශෝක පීරිස් මහතා කටයුතු කරන බව සඳහන් කරන අතර ඔහුගේ මූලික වැටුප රුපියල් 117,150ක් බව හා ජීවන වියදම් දීමනාව රුපියල් 17,800ක් බව සඳහන් කරයි. එමෙන්ම ඔහුට වාහනයක් ලබාදී ඇති බවද, ඒ සඳහා ඉන්ධන දීමනාව වශයෙන් රුපියල් 46,695ක් මාසයකට ලබාදෙන බවද, කාර්යාලයීය පහසුකම් ලබාදී ඇති බවද සඳහන් කරයි.
බරම උපදේශක වසන්තට
වසන්ත සමරසිංහ අමාත්‍යවරයා වශයෙන් කටයුතු කරන වෙළෙඳ, වාණිජ, ආහාර සුරක්ෂිතතා හා සමුපකාර සංවර්ධන අමාත්‍යාංශයේ උපදේශක වශයෙන් අයි ශාන්ත ජයරත්න කටයුතු කරන බව සඳහන් කරන අතර ඔහුට ගෙවන මාසික වැටුප් හා හෝ දීමනාව රුපියල් 227,695ක් බව සඳහන් කරයි. ඊට අමතරව පෞද්ගලික වාහනය වෙනුවෙන් ප්‍රවාහන දීමනාවක් ලබා ගන්නා බව සඳහන් කර ඇතත් එහි අගය දක්වා නැත. එහෙත් ඔහුට මාසයකට රුපියල් 46,695ක ඉන්ධන දීමනාවක් ගෙවන බව සඳහන් කර ඇත. කාර්යාල පහසුකමක් ලබාදී ඇති බවක් සඳහන් කරන්නේ නැත.
ආනන්ද විජේපාල අමාත්‍ය ධුරය දරන මහජන ආරක්ෂක හා පාර්ලිමේන්තු කටයුතු අමාත්‍යාංශයේ උපදේශකවරයකු වශයෙන් විශ්‍රාමික ජ්‍යෙෂ්ඨ නියෝජ්‍ය පොලිස්පති ඩීආර්එල් රණවීර කටයුතු කරන බව සඳහන් කරන අතර ඔහු වැටුප් හා දීමනා ලබා නොගන්නා බවද, ඔහුට වාහනයක් ලබාදී නැති බවද, ඉන්ධන දීමනා ලබානොදෙන බවද, එහෙත් කාර්යායීය පහසුකම් භාවිත කරන බවද සඳහන් කරයි.
වෛද්‍ය ක්‍රිෂාන්ත අබේසේන අමාත්‍ය ධුරය දරන විද්‍යා හා තාක්ෂණ අමාත්‍යාංශයේ ස්වෙච්ඡා උපදේශකයන් වශයෙන් වීරතන්ත්‍රීගේ පැටි්‍රක් මාමියන් ඩයස් හා මහාචාර්ය ජීඅයිඩී රොද්‍රිගෝ කටයුතු කරන බව සඳහන් කරයි. ඔවුන් වැටුප් හා දීමනා, වාහන හෝ ඉන්ධන ලබා නොගන්නා බවද, කාර්යාලීය පහසුකම් ලබානොගන්නා බවද සඳහන් කර ඇත.
දම්මික පටබැඳි අමාත්‍ය ධුරය දරන පරිසර අමාත්‍යාංශයේ උපදේශකවරයකු වශයෙන් කේඑම්එච්ආර් ගුණවර්ධන කටයුතු කරන බවද, ඔහුට රුපියල් 213,635ක වැටුප් හා හෝ දීමනා ගෙවන බවද, වාහනයක් ලබාදී ඇති බවද, එයට මාසයකට රුපියල් 47,685ක ඉන්ධන දීමනාවක් ගෙවන බවද, අමාත්‍යාංශ පරිශ්‍රය තුළ කාර්යාල පහසුකම් ලබාදී ඇති බවද සඳහන් කරයි.
ජනපති චක්‍රලේඛය
අමාත්‍යාංශවල උපදේශකයන් පත්කිරීම ගැන පීඑස්/සීඑස්ඒ/00/1/4/12 යටතේ අනුර කුමාර දිසානායක මහතා ජනාධිපති ධුරයට පත්වීමෙන් පසු සියලුම අමාත්‍යාංශ ලේකම්වරුන් වෙත දැනුම් දීමක් කරන්නේ 2025 ජනවාරි 21 දිනදීය. ඒ ‘නව රජයේ අමාත්‍යවරුන්ගේ කාර්යයන් සහ ප්‍රතිපත්ති සම්පාදන ක්‍රියාවලිය ශක්තිමත් කිරීම සඳහා පහසුකම් සැලසීම සඳහා උපදෙස්’ යනුවෙන්ය.
එහි අමාත්‍යාංශ සඳහා උපදේශකවරුන් පත්කර ගැනීම, ස්වෙච්ඡා උපදේශකවරුන් පත්කර ගැනීම යටතේ සඳහන් කරන්නේ සෑම අමාත්‍යවරයකුටම ස්වකීය අමාත්‍යාංශයේ කාර්යය සහ කර්තව්‍යයන් සම්බන්ධයෙන් ප්‍රතිපත්තිමය තීරණ ගැනීමට සහාය වීම පිණිස උපදේශකවරයෙකු හෝ කණ්ඩායමක් පත් කර ගත හැකි බවය.
මෙසේ උපදේශකවරුන් ලෙස පත්කර ගන්නා පිරිස අදාළ අමාත්‍යාංශයේ විෂය පථය සම්බන්ධයෙන් ප්‍රාමාණික උගතුන්/ පර්යේෂකයන්/ වෘත්තීයවේදීන්/ පුරවැසි සංවිධාන නියෝජිතයින් හෝ මහජන නියෝජිතයින් විය යුතු බව සඳහන් කරන අතර උපදේශක මණ්ඩලය සඳහා පත්කිරීමේ බලය විෂය භාර අමාත්‍යවරයා සතුවන බවද, එම පත්කිරීම් සම්බන්ධයෙන් අමාත්‍ය මණ්ඩල සටහනක් මගින් අමාත්‍ය මණ්ඩලය දැනුවත් කළ යුතු බවද සඳහන් කර තිබේ.
අමාත්‍යාංශ සඳහා පූර්ණ කාලීන උපදේශකවරයන් පත්කර ගැනීම සම්බන්ධයෙන් සඳහන් කරන්නේ, අමාත්‍යාංශයේ විෂය කටයුතු සම්බන්ධයෙන් දැනට සිටින කාර්ය මණ්ඩලයට අමතරව විශේෂඥ විෂය දැනුම තවදුරටත් එම අමාත්‍යාංශයට ලබා ගත යුතු යැයි අමාත්‍යවරයාට හැඟී යන්නේ නම්, එහිදී ඒ සඳහා විෂය ප්‍රවීනතාව අනුව උපදේශකවරයෙකු හෝ උපදේශකවරුන්ගේ සේවය, ගෙවීමේ පදනමින් හා පූර්ණ කාලීනව සේවය කිරීමේ පදනමින් ලබා ගැනීමට අවස්ථාව ඇත යන්නය.
කිසියම් අමාත්‍යාංශයක් විෂය ක්ෂේත්‍ර ගණනාවක් ආවරණය කරන අවස්ථාවලදී එක් එක් විෂය ක්ෂේත්‍රයන් සඳහා උපදේශකයන් බඳවා ගත හැකි බවද, එහි උපරිම සංඛ්‍යාව දෙදෙනෙකු නොඉක්මවිය යුතු බවද සඳහන් කර තිබේ.
උපරිම වැටුප් සීමා
මෙම උපදේශකවරුන් සඳහා ලබාදෙන දීමනා සහ පහසුකම් උපදේශකවරයාගේ අධ්‍යාපන, වෘත්තීය සුදුසුකම් හා පළපුරුද්ද මත තීරණය කළ යුතු බවද, එය රාජ්‍ය පරිපාලන චක්‍රලේඛ අංක 03/2016 (සංශෝධන ද ඇතුළත්ව) ීඛ 3 තනතුරුවල වැටුප්, දීමනා සහ අනෙකුත් පහසුකම් මට්ටම ඉක්මවා නොයා යුතු බව සඳහන් කර තිබේ.
එම උපදේශකවරයා හෝ වරුන්ගේ ප්‍රවහන පහසුකම් හා දීමනා එම තනතුරට අනුරූපිව රාජ්‍ය පරිපාලන චක්‍රලේඛ 22/99 (සංශෝධන ඇතුළත්ව) සලසා දිය යුතු බවද, උපදේශකවරුන් පත් කිරීම අමාත්‍ය මණ්ඩලයේ අනුමැතිය මත සිදුකළ යුතු බවද සඳහන් කර තිබේ.
2025 වර්ෂයයට අදාල රාජ්‍ය සේවයේ නවතම වැටුප් අනුව ීඛ 3 තනතුරුවල ආරම්භක වැටුප රුපියල් 156,000ක් වන අතර අවුරුදු 12ක කාලයකදී එහි උපරිමය රුපියල් 214,200ක් වේ.
රාජ්‍ය සේවයේ එම වැටුප් තලයේ දීමනා හා අනෙකුත් පහසුකම් බැලූ විට ඉන්ධන දීමනාව ලෙස මාසයකට ලීටර් 165ක ප්‍රමාණයක් සඳහා වන මිල ලබාගත හැකි අතර ඊට අමතරව දූරකථන දීමනා ලෙස රුපියල් 6000ක් ලැබේ.
මෙසේ ීඛ 3 උපරිම වැටුප් මට්ටමේ සිටින පරිසර අමාත්‍යාංශයේ උපදේශක වශයෙන් පත්කර ඇති කේඑම්එච්ආර් ගුණවර්ධනගේ පෙර රැකියා ලෙස සඳහන් කරන්නේ ශ්‍රී ජයවර්ධනපුර විශ්වවිද්‍යාලයේ පරිසර විද්‍යාව පිළිබඳ බාහිර කථිකාචාර්ය, පරිසර ක්ෂේත්‍රයේ විශ්වවිද්‍යාලයේ ශිෂ්‍ය ක්ෂේත්‍ර අධික්ෂකවරයකු, කළපු කළමනාකරණ ව්‍යාපෘතියේ උපදේශක, ලංකාවේ තිරසර කෘෂිකර්මය හා ග්‍රාමීය සංවර්ධන (ී්ඎ) පර්යේෂණ නිලධාරි ලෙස කටයුතු කර ඇති බවය.
එම උපරිම වැටුප් මට්ටමත් ඉක්මවා සිටින වෙළෙඳ, වාණිජ, ආහාර සුරක්ෂිත හා සමුපකාර සංවර්ධන අමාත්‍යාංශයේ උපදේශක ලෙස පත්කර ඇති අයි ශාන්ත ජයරත්න මහතාගේ පෙර රැකියා ලෙස සඳහන් කර ඇත්තේ ජ්‍යෙෂ්ඨ උපදේශක ස්ලීඩා, උපදේශක කැලණිය විශ්වවිද්‍යාලය හා ද්විතීය පාසල් ගුරු වශයෙනි.
මෙම තොරතුරු පොදු මහජන විමසා බැලීම සඳහා අප ඉදිරිපත් කරන්නේ පසුගිය ආණ්ඩුවල උපදේශකයන් සම්බන්ධයෙන් වත්මන් ජාතික ජන බලවේග ආණ්ඩුවේ නියෝජිතයන් විමසීම් කරමින් එම පත්කිරීම්වල විනිවිදභාවය, ඔවුන්ට ලබාදෙන වැටුප්, දීමනා හා පහසුකම් ගැන නිරන්තරයෙන් අවදියෙන් කටයුතු කළ පිරිසක් වන නිසාය. එමෙන්ම වත්මන් ආණ්ඩුව බලයට පත්වීමෙන් පසු මේ දක්වා සිය ආණ්ඩුවේ පත් කිරීම් ඇතුළු අනෙකුත් කටයුතු සම්බන්ධයෙන් වන තොරතුරු ලබාදීමට මැලිකමක් දක්වන නිසාය. තමන් අන් අයගෙන් මෙතෙක් බලාපොරොත්තු වූ පාරදෘශ්‍යභාවය ඔවුන් තුළ තිබේද යන්න මෙම තොරතුරු සම්බන්ධයෙන් සමාජ කතිකාවේ ඇතිවන සාකච්ඡාව අනුව තවදුරටත් තීරණය වනු ඇත.
