හිටපු අමාත්‍යවරයකු වූ ජනාධිපති නීතිඥ විජයදාස රාජපක්ෂට අපහාස කිරීම වෙනුවෙන් ගෙවන්නට නියමිත රුපියල් මිලියන 1300ක පමණ මුදල නිසා ලේක්හවුස් හෙවත් එක්සත් ප්‍රවෘත්ති පත්‍ර සමාගම දැඩි අර්බුදයකට ලක්වී ඇතැයි වාර්තාවේ.
මෙසේ ලේක්හවුස් ආයතනය අර්බුදයට ලක්වී ඇත්තේ එම වන්දි මුදල ගෙවීම සඳහා මුදල් නැති වීමත්, අතරමැදි එකඟතාවකට පැමිණීමට විජයදාස රාජපක්ෂ මහතා මෙතෙක් කැමැත්ත පළ නොකිරීමත් නිසාය.
මේ සම්බන්ධයෙන් කරන ලද විමසීමකදී ලේක්හවුස් ආයතනයේ සභාපති ගාමිණී වරුෂමාන පැවසුවේ එතරම් වන්දි මුදලක් ගෙවීමට ආයතනයට හැකියාවක් නැති බවයි. ඒ සම්බන්ධයෙන් විජයදාස රාජපක්ෂ මහතාගෙන් ආයතන අධ්‍යක්ෂ මණ්ඩලය ලෙස ඉල්ලීමක් කළ බවත්, එයට තවමත් පිළිතුරු ලැබී නැති බවත් ඔහු පැවසීය.
ලේක්හවුස් ආයතනයේ කොටස් හිමිකම් සම්බන්ධයෙන් විජයදාස රාජපක්ෂ මහතාට උනන්දුවක් තිබෙන බව මහ භාරකාරවරයාට දැනුම් දී ඇති බවත්, ඔහු විජයදාස රාජපක්ෂ මහතාට කතාකළ අවස්ථාවේ වන්දි මුදල රුපියල් මිලියන 1300ක් පමණ විය හැකි බව පැවසූ බවත්, එකඟතාවක් සඳහා කැමැත්තක් පළ නොකළ බවත් සභාපතිවරයා පැවසීය.
මෙම තත්වය මත බැංකුවකින් දීර්ඝ කාලීන ණය මුදලක් ලබා ගැනීම සඳහා ඇපකරයක් ලබාදෙන ලෙස භාණ්ඩාගාරයෙන් ඉල්ලීමක් කළ බවත්, ඒ සඳහා ආණ්ඩුව කැමති විය යුතු බවත් හා ආයතනයේ කටයුතු සාමාන්‍ය ලෙස ඉදිරියට ගෙන යන බවත් ඔහු පැවසීය.
ලේක්හවුස් ආයතනයට අයත් හෝකන්දර ප්‍රදේශයේ ඇති ඉඩමක් සම්බන්ධයෙන් විජයදාස රාජපක්ෂ මහතාගේ උනන්දුවක් ඇති බවට පැතිරෙන ආරංචිය සම්බන්ධයෙන් කළ විමසීකදී සභාපතිවරයා පැවසුවේ එම ඉඩම ණය වෙනුවෙන් බැංකුවලට උකස් තියා ඇති එකක් බවයි.
විජයදාස රාජපක්ෂ මහතාට කළ අපහාසය සම්බන්ධයෙන් කොළඹ දිසා අධිකරණයේ 2009 වසරේදී නඩු පවරා ඇති අතර ඒ සඳහා 2010 වසරේදී තීන්දුවක් ලබාදී ඇත. ඒ රුපියල් මිලියන 500ක මුදලක් ගෙවන ලෙසය. ඒ සම්බන්ධයෙන් ඉන්පසු අභියාචනයක් ඉදිරිපත් කර ඇති අතර එය 2013 වසරේදී නිෂ්ප්‍රභ කර තිබේ. අවසානයේ ශ්‍රේෂ්ඨාධිකරණයට කළ අභියාචනය 2025 ඔක්තෝබර් 14 දින නිෂ්ප්‍රභ කර තිබේ. රුපියල් මිලියන 1300ක් ගණනය වී ඇත්තේ මුල් තීන්දුව ලබාදුන් දින සිට වසරකට සියයට 12ක පොලී අනුපාතයක් යටතේ එය ගණනය කිරීම හේතුවෙනි.
ඇතිවී ඇති තත්වය සම්බන්ධයෙන් ලේකහවුස් ආයතනයේ වෘත්තීය සමිති විජයදාස රාජපක්ෂ මහතාගෙන් සාකච්ඡාවක් ඉල්ලා ඇති අතර ඒ සඳහා දිනයක්ද ලබාදී පසුව එම හමුව අවලංගු කර තිබේ. ඒ සිය නීතිඥයාගේ උපදෙස් ලබාගත යුතු බව පවසමිනි. ඉන්පසු සාකච්ඡාවක් සඳහා ලිඛිත ඉල්ලීමක් ලේක්හවුස් වෘත්තීය සමිති විජයදාස රාජපක්ෂ මහතාට යොමුකර ඇති අතර එයට මෙතෙක් පිළිතුරක් ලැබී නැති බව එහි වෘත්තීය සමිති නියෝජිතයෙක් අප කළ විමසීමකදී පැවසීය.
මේ සම්බන්ධයෙන් විමසීම සඳහා විජයදාස රාජපක්ෂ මහතා දූරකථනයට සම්බන්ධ කර ගැනීමට උත්සාහ කළද ඔහු සම්බන්ධ වූයේ නැත.
ලේක්හවුස් ආයතනය 1973 වසරේදී රජයට පවරා ගැනීමේ පනත අනුව එහි බහුතර කොටස් අයිතිය මහා භාරකාරවරයාට පවරා ඇති අතර එය පවරා ගන්නා අවස්ථාවේ හිමිකරුවන් වූ විජයවර්ධන පවුලේ සමාජිකයන්ට ඉතිරි කොටස් අයිතිය හිමිවේ.
