ගල්කිස්ස අධිකරණ භූමියේදී නීතිඥවරයකුට පහර දීම සම්බන්ධයෙන් එල්ල වූ චෝදනා හේතුවෙන් රිමාන්ඩ් භාරයට පත්කරන ලද පොලිස් කොස්තාපල්වරයාට ඇප ලබාදී තිබේ.
ඒ ඊට අදාළ නඩුව අද (ඔක්තෝබර් 13) කැඳවූ අවස්ථාවේදී ගල්කිස්ස මහේස්ත්‍රාත් පසන් අමරසේන විසිනි. ඔහුව මුදාහැර ඇත්තේ රුපියල් ලක්ෂය බැගින් වූ පුද්ගල ඇප දෙකක් මතය.
එදින පොලීසිය එම සිදුවීම සිදුවූ අවස්ථාවේදී නීතිඥ ගුණරත්න වන්නිනායක අසභ්‍ය වචනයෙන් පොලිස් කොස්තාපල්වරයාට බැන වැදීම සම්බන්ධයෙන් බී වාර්තාවක්ද අධිකරණයට ඉදිරිපත් කර ඇත.
ඒ සම්බන්ධයෙන් අධිකරණයට කරුණු වාර්තා කරමින් පොලීසිය දන්වා ඇත්තේ නීතිඥ ගුණරත්න වන්නිනායක මේ වනතුරු පොලීසියට ප්‍රකාශ ලබාදීමක් සිදුකර නැති බවයි.
මෙම සිදුවීම සම්බන්ධයෙන් සිදුකෙරෙන විමර්ශනයකට අදාළව ජාතික පොාලිස් කොමිෂන් සභාවේ ආවරණ අනුමැතියට යටත්ව ගල්කිස්ස පොලීසියේ මූලස්ථාන පොලිස් පරීක්ෂක මංජුල තුෂාර පොලිස් වෛද්‍ය කොට්ඨාශයේ සාමාන්‍ය රාජකාරි සඳහා මාරුකර ඇත.
- ඉඳුවර බණ්ඩාර
