රජයේ ගිණුම් පිළිබඳ කාරක සභාව හෙවත් කෝපා විසින් 2025.03.10 සහ 2025.03.21 යන දෙදින මෝටර් රථ ප්‍රවාහන දෙපාර්තමේන්තුවේ 2020, 2021, 2022 සහ 2023 මූල්‍ය වර්ෂයන් සඳහා විගණකාධිපති වාර්තාවන් සලකා බැලීම සහ වර්තමාන කාර්ය සාධනය පිළිබඳ විමර්ශනය කර ඇති අතර ඒ සඳහා ප්‍රවාහන, මහාමාර්ග වරාය සහ සිවිල් ගුවන් සේවා අමාත්‍යාංශයේ හා මෝටර් රථ ප්‍රවාහන දෙපාර්තමේන්තුවේ නිලධාරීන් කාරක සභාව හමුවට කැඳවා තිබුණි.
එම විමර්ශනයන් සඳහා එම විගණන වාර්තා මගින් අනාවරණය කරන ලද පහත සඳහන් කරුණ ද පාදක කරගෙන තිබුණි.
‘ජාත්‍යන්තර රියැදුරු අවසර පත්‍ර නිකුත් කිරීමේදී ශ්‍රී ලංකා ඔටෝ මොබයිල් සංගමය විසින් ඉදිරිපත් කරනු ලබන අයදුම්පත් සඳහා ජාත්‍යන්තර රියැදුරු අවසර පත්‍ර ලබාදීමේදී අයකළ යුතු ගාස්තුවලට පරිබාහිරව, 2023 සහ 2024 වසර වලදී රුපියල් මිලියන 527.3ක මුදලක් අනීතිකව අයකරගෙන තිබීම සහ කිසිදු නෛතික පදනමකින් තොරව මෙරටට පැමිණෙන ජාත්‍යන්තර රියැදුරු අවසරපත් හිමියන්ගෙන් රු. 8466ක මුදලක් අයකර “ රෙකග්නිෂන් පර්මිට්” නමින් අනීතික රියැදුරු අවසර පත්‍රයක් නිකුත් කිරීමට කටයුතු කර තිබීම’
ඒ අනුව ජාත්‍යන්තර රියැදුරු අවසර පත්‍ර නිකුත් කිරීම සම්බන්ධයෙන් කෝපා කමිටුව පහත සඳහන් කරුණු අනාවරණය කරගෙන තිබුණි.
1. ජාත්‍යන්තර රියැදුරු අවසර පත්‍රයක් නිකුත් කිරීමට පෙර කොමසාරිස් ජනරාල්වරයා විසින් තත්කාර්ය සඳහා පත් කරනු ලබන බලයලත් නිලධාරියෙකු විසින් ජාත්‍යන්තර රියැදුරු අවසර පත්‍රයක් සඳහා ඉල්ලුම් කරන සෑම තැනැත්තෙකුම පරීක්ෂා කළ යුතු බව දක්වා ඇති නමුත්, රියැදුරු කාර්යය සඳහා අත්‍යාවශ්‍ය වන අයදුම්කරුවන්ගේ භෞතික ශරීර අවයව නිසි පරිදි ක්‍රියාත්මක වන්නේ ද යන්න හෝ (උදා අත්, කකුල්, ඇස් නිසි ක්‍රියාකාරිත්වයෙන් යුක්තද යන්න) පරීක්ෂාවකින් තොරව, අයැදුම්කරු රහිතව ශ්‍රී ලංකා ඔටෝ මොබයිල් සංගමය විසින් ඉදිරිපත් කරන අයැදුම්පත් සඳහා ජාත්‍යන්තර රියැදුරු අවසර පත්‍ර ලබාදී තිබීම.
2. ශ්‍රී ලංකා ප්‍රජාතාන්ත්‍රික සමාජවාදී ජනරජයේ අංක 2301/17 හා 2022.10.10 දිනැති අතිවිශේෂ ගැසට් පත්‍රය මගින්, මෝටර් වාහන පනතේ 203 අධිකාරය සඳහා වූ නියෝග අනුව, ජාත්‍යන්තර රියැදුරු අවසර පත්‍රයක් නිකුත් කිරීමේ සාමාන්‍ය සේවා ගාස්තුව රු. 3000ක් හා එක්දින සේවා ගාස්තුව රු.3500ක් වන අතර, එකී ගාස්තු මෝටර් රථ ප්‍රවාහන දෙපාර්තමේන්තුව විසින් අය කළ යුතුවේ. එහෙත් එකී නියෝගයන්ට පටහැනිව, එක් ජාත්‍යන්තර රියැදුරු අවසර පත්‍රයක් වෙනුවෙන් රු. 10,394ක මුදලක් ශ්‍රී ලංකා ඔටෝ මොබයිල් සංගමය විසින් අයකර ගෙන ඇති අතර ඒ අනුව එක් රියැදුරු අවසර පත්‍රයක් වෙනුවෙන් රු. 7394ක නීත්‍යනුකූල නොවන ගාස්තු අයකිරීමක් සිදුකර ඇති බව නිරීක්ෂණය කර ඇත. විගණනයට ඉදිරිපත් වූ තොරතුරු අනුව 2023 හා 2024 වර්ෂයන්හි දී එලෙස රු. 527,305,864ක මුදලක් අනීතිකව අයකරගෙන ගැනීම.
3. මෝටර් වාහන පනතේ 132 (ආ) වගන්තිය අනුව, වියානා සම්මුතියේ ගිවිසුම් රාජ්‍යවලින් නිකුත් කරන ලද වලංගු ජාත්‍යන්තර රියදුරු අවසර පත්‍රයක්, පනතේ විධිවිධාන යටතේ නිකුත් කරන ලද රියදුරු අවසර පත්‍රයක් ලෙස සලකනු ලැබිය යුතුවේ. ජාත්‍යන්තර රියැදුරු පත්‍රයක් හිමි තැනැත්තෙකුට මෝටර් වාහන පනත ප්‍රකාරව කිසිඳු බාධාවකින් තොරව ශ්‍රී ලංකාව තුළ බලපත්‍රලාභී පංතියට අදාළ මෝටර් වාහන පැදවිය හැකිවේ. එහෙත්, ශ්‍රී ලංකා ඔටෝ මොබයිල් සංගමය කිසි නෛතික පදනමකින් හෝ බලයකින් තොරව, ශ්‍රී ලංකාවට පැමිණෙන ජාත්‍යන්තර රියදුරු අවසර පත්‍ර හිමි ආගන්තුකයන්ගෙන් රු. 8466ක මුදලක් අයකර, ඍැජදටබසඑසදබ චැරපසඑ නමින් අනීතික රියැදුරු අවසර පත්‍රයක් නිකුත් කිරීමට කටයුතු කිරීම.
ඉහත කරුණ සම්බන්ධයෙන් මෙන්ම විමර්ශනයට ලක්වූ අනෙකුත් කරුණු පිළිගත හැකි පිළිතුරු සැපයීමට මෝටර් රථ ප්‍රවාහන දෙපාර්තමේන්තුවේ නිලධාරීන් අපොහොසත් වී ඇති අතර එම දෙපාර්තමේන්තුවේ ක්‍රියාකලාපය සහ කාර්ය සාධනය කාරක සභාව සිය වාර්තාව මගින් දැඩි ලෙස දෝෂ දර්ශනයට ලක්කර ඇත. ඉදිරිපත් වූ කරුණු සියල්ලෙහි බරපතළකම සලකා බලා, මෙම අක්‍රමිකතාවලට සම්බන්ධ නිලධාරීන් සම්බන්ධයෙන් විනය ක්‍රියාමාර්ගයන් දෙපාර්තමේන්තුවේ විමර්ශන කමිටු හරහා අනිවාර්යෙන්ම ගත යුතු බවත්, එකී විමර්ශනයන්හි ප්‍රගතිය මාසිකව කාරක සභාවට වාර්තා කළ යුතු බවත්, දෙපාර්තමේන්තුවේ කාර්ය සාධනයේ ප්‍රගතිය පරීක්ෂා කිරීමට මෝටර් රථ ප්‍රවාහන දෙපාර්තමේන්තුව මාසිකව කාරක සභාව හමුවට කැඳවිය යුතු බවත්, ජාත්‍යන්තර රියදුරු අවසර පත්‍ර නිකුත් කිරීම සඳහා ශ්‍රී ලංකා ඔටෝ මොබයිල් සංගමය වෙතින් අයදුම්පත් භාර ගැනීම සම්බන්ධයෙන් විමර්ශනයක් පවත්වා එහි ප්‍රගතිය මාසයක් තුළදී කාරක සභාවට වාර්තා කරන ලෙසත් අදාළ පාර්ශ්වයන් වෙත නිර්දේශ ලබාදී තිබේ.
එමෙන්ම එම වාර්තාවේ සඳහන් වංචා සහ දූෂණ හා සම්බන්ධ අපරාධමය වැරදි සම්බන්ධයෙන් රටේ පවතින නීතියට අනුව අධිකරණමය ක්‍රියාදාමයක් හරහා දඬුවම් පැමිණවීම් සිදුකළ යුතු බවත්, ඒ සඳහා එම වාර්තාව පාර්ලිමේන්තුවට ඉදිරිපත් කර, පාර්ලිමේන්තුවේ යෝජනා සම්මුතියක් මගින් නීතිය බලාත්මක කරන ආයතන හරහා දූෂිත නිලධාරීන්ට එරෙහිව අපරාධ නීතිය ක්‍රියාත්මක කළ යුතු බවටත් වැඩිදුරටත් තීරණය කර ඇත.
එමෙන්ම කෝපා කාරක සභාව එම වාර්තාව මගින් වැඩිදුරටත් මෝටර් රථ ප්‍රවාහන දෙපාර්තමේන්තුවේ ගණන්දීමේ නිලධාරි වෙත නිර්දේශ කර ඇත්තේ, ජාත්‍යන්තර රියැදුරු අවසර පත්‍ර නිකුත් කිරීමේදී මෝටර් රථ වාහන පනතට අනුකූල නොවන ලෙස කටයුතු කර ඇති බව නිරීක්ෂණය වී ඇති බැවින්, ජාත්‍යන්තර රියැදුරු අවසර පත්‍ර නිකුත් කිරීම පිළිබඳව පරීක්ෂණයක් පවත්වා කාරක සභාව වෙත මාසයක් ඇතුළත වාර්තාවක් ඉදිරිපත් කරන ලෙසයි.
ශ්‍රී ලංකාවට පැමිණෙන විදේශිකයන්ට කටුනායක ගුවන් තොටුපලේදීම ජාත්‍යන්තර රියැදුරු බලපත්‍ර නිකුත් කිරීමේ මෝටර් රථ ප්‍රවාහන දෙපාර්තමේන්තතු කවුළුවක් විවෘත කිරීම ප්‍රවාහන, මහාමාර්ග වරාය හා සිවිල් ගුවන් සේවා ඇමති බිමල් රත්නායක විසින් පසුගිය දිනෙක සිදුවිය. එය ඇත්තෙන්ම සිදුවිය යුත්තකි. ඒ මගින් රස්තියාදු වීමකින් තොරව හා ගසා කෑමකින් තොරව විදේශිකයන්ට ඔවුන්ට හිමි ජාත්‍යන්තර රියැදුරු බලපත්‍ර ලබා ගැනීමට හැකිවනු ඇත.
එහෙත් කෝපා කමිටුව මගින් හෙළිකර ඇති ලංකා ඔටෝ මොබයිල් සංගමයේ මහා පරිමාණ මූල්‍ය වංචාවට ඒ මගින් විසඳුම් ලැබෙන්නේ නැත. අනිවාර්යෙන්ම සිදුවිය යුත්තේ කෝපා කමිටුව නිර්දේශ කර ඇති පරිදි ඒ පිළිබඳව තවදුරටත් පරීක්ෂණ පැවැත්වීම හා පාර්ලිමේන්තුවේ යෝජනා සම්මතයක් මගින් අවශ්‍ය නෛතික පියවර ගැනීම සඳහා නීතිපතිවරයා ඇතුළු බලධාරීන්ට යොමු කිරීමයි.
මේ සම්බන්ධයෙන් මෙම විමර්ශනය සිදුකළ අවස්ථාවේ කෝපා කමිටුවේ සභාපතිවරයා ලෙස කටයුතු කළ පාර්ලිමේන්තු මන්ත්‍රී අරවින්ද සෙනරත්ගෙන් කළ විමසීමේදී ඔහු ප්‍රකාශ කළේ එම කමිටුව ලබාදුන් නිර්දේශ අනුව මෝටර් රථ ප්‍රවාහන දෙපාර්තමේන්තුව මාසයක් ඇතුළතදී එම වාර්තාව ලබානොදුන් බවත්, ඒ සඳහා තවත් කාලයක් ඉල්ලා ඇති බවත්ය. එමෙන්ම කෝපා කමිටු සභාපතිවරයා ලංකා ඔටෝ මොබයිල් සංගමයේ එම වංචාව හැඳින්වූයේ කාලයක් තිස්සේ කරන ලද ජාවාරමක් වශයෙනි.
ලංකා ඔටෝ මොබයිල් සංගමයේ 2025 වසරට අදාළ නිලවරණය පසුගිය ජූලි මාසයේදී පැවති අතර වෙන කවරදාකවත් නොවන ආකාරයට එහි ඉදිරි වසර 4ක කාලය සඳහා පත්වූ සභාපතිවරයා වූ දම්මික ආටිගල පිළිබඳ ප්‍රදර්ශනාත්මක මාධ්‍ය වාර්තා පළවිය. එවන් වාර්තා කිරීමක් සමහරවිට වුවමනා වන්නට ඇත්තේ කෝපා කමිටු වාර්තතාවෙන් අනාවරණය වූ එම සංගමයේ මෙම මූල්‍ය වංචාව නිසා විය හැකිය.
ලංකා ඔටෝ මොබයිල් සංගමයේ සභාපතිවරයා ලෙස දම්මික ආටිගල පත්ව ඇත්තේ 2009 වසරේදී වන අතර මෙම මූල්‍ය වංචාව සිදුකරන කාලයේදීත් සභාපතිවරයා ලෙස සිට ඇත්තේ ඔහුය. මේ වනවිට ඔහුගේ ධුර කාලයට අවුරුදු 16ක් වන අතර ඉදිරි අවුරුදු 4ත් සමග එය අවුරුදු 20ක් බවට පත්වේ. වෙන කිසිම පුද්ගලයකු එවන් දීර්ඝ කාලයක් එම සංගමයේ සභාපති ධුරය දරා නැත.
දම්මික ආටිගල මහතා උපාලි සමූහයේ අධ්‍යක්ෂවරයකු වශයෙන් කටයුතු කරන අතර ඔහු හිටපු ජනාධිපති රනිල් වික්‍රමසිංහගේ ඥාතියෙකි. රනිල් වික්‍රමසිංහ මහතාගේ රජයන් යටතේ රාජ්‍ය ආයතනවල ඉහළ තනතුරු දරා ඇති තැනැත්තෙකි. ඒ නිසා ඔහු බලවන්තයෙකු බව පෙනේ. මෙවර ලංකා ඔටෝ මොබයිල් සංගමයේ නිලවරණයේදී කෝපා කමිටු වාර්තාව පදනම් කරගෙන ඔහුට එරෙහිව චෝදනා එල්ල වුවද ඒවා පරාජය කිරීමට හැකි වූයේ එම බලවත්කම නිසා බව පෙනේ. ඒ අනුව අපට පැන නඟින ප්‍රශ්නය වන්නේ මෙම ප්‍රමාදයන් හේතුවෙන් කෝපා කමිටුවත් එම බලවන්තකමට යටවේද යන්නයි.
