- නිවස, වාහන හා ලක්ෂ 8ක පමණ දීමනා අහිමි වේ
- විශ්‍රාම වැටුප් අහිමි නොවේ
අහෝසි කිරීම සඳහා ඉදිරිපත් කර ඇති ජනාධිපතිවරයන්ගේ හිමිකම් පනත ගැන හිටපු ජනාධිපතිවරුන්ගේ විරෝධය පළවී ඇති බව මේ වනවිට ඉතා ඉහළ ප්‍රසිද්ධියක් ලබාදෙමින් මාධ්‍ය වාර්තා කර තිබේ. එම මාධ්‍ය වාර්තාවලට අනුව හිටපු ජනාධිපතිවරුන් කිහිප දෙනෙකු හමුවී ඒ සම්බන්ධයෙන් සාකච්ඡා කර ඇති අතර එම හිමිකම් පනත අහෝසි කිරීමට අදාළ පනත් කෙටුම්පත අධිකරණය හමුවේ අභියෝග කිරීමටද තීරණය කර ඇත. එහිදී වෙනත් රටවල හිටපු ජනාධිපතිවරුන්ට ලබාදෙන පහසුකම් හා වරප්‍රසාද පිළිබඳව අධිකරණයට කරුණු ඉදිරිපත් කිරීමටද තීරණය කර ඇත.
මේ සම්බන්ධයෙන්ම හිටපු ජනාධිපතිවරයෙකු නිර්නාමිකව උපුටා දක්වමින් දිවයින පුවත්පත වාර්තා කර ඇත්තේ ‘අපි විශ්‍රාම වැටුප හෝ වෙනත් හිමිකම් බලෙන් ඉල්ලා ගත්තු ඒවා නොවේ. ඒවා ව්‍යවස්ථානුකූලව ජනාධිපති ධුරයට හිමිවූ දේවල්. අප ජීවත් වන්නේ සුඛෝපභෝගී මාලිගාවල හෝ නිවාසවල නොවෙයි. අපි ජීවත්වෙන හැටි ගැන වැරදි චිත්‍රයක් ජනතාවට දෙන්න ආණ්ඩුව උත්සාහ කරනවා.’
‘අපට ජීවත් වෙන්න සමහරුන්ට වගේ පක්ෂ කාර්යාලවලින් මුදල් ලැබෙන්නේ නැහැ. ලැබෙන විශ්‍රාම වැටුපත් එදිනෙදා වියදමට ගියාම ප්‍රමාණවත් නැහැ. අපි වෙනත් මුදලක් ඉල්ලන්නේ නැහැ. ටික කලකට බලය අරගත්තු උදවිය අපට හිමි අයිතිය හිතුමතේ ගන්නා මෙවන් තීරණවලින් කපා හැරීම යට ඇත්තේ වෛරය මිස අන් කිසිවක් නොවේ.’
හිටපු ජනාධිපතිවරුන්ගේ හිමිකම් පනත අහෝසි කිරීම මගින් හිටපු ජනාධිපතිවරුන්ගේ විශ්‍රාම වැටුප අහෝසි වන්නේ නැත. මන්ද ඔවුන්ට එම විශ්‍රාම වැටුප ලබාදී ඇත්තේ ආණ්ඩුක්‍රම ව්‍යවස්ථාවේ ඇති ප්‍රතිපාදනයක් යටතේ වන නිසාය. එහෙත් හිටපු ජනාධිපතිවරුන්ගේ වැන්දඹුවන්ට හිමි විශ්‍රාම වැටුප නම් ජනාධිපතිවරයන්ගේ හිමිකම් පනත අහෝසි කිරීම මගින් අහෝසි වේ. ඒ හිටපු ජනාධිපතිවරුන්ගේ වැන්දඹුවන්ට එම විශ්‍රාම වැටුප් හිමිකම ලබාදී ඇත්තේ ජනාධිපතිවරයන්ගේ හිමිකම් පනත යටතේ වන නිසාය. ජනාධිපතිවරුන්ගේ වැන්දඹුවන්ට හිමි විශ්‍රාම වැටුපක් පිළිබඳ ආණ්ඩුක්‍රම ව්‍යවස්ථාවේ කිසිඳු ප්‍රතිපාදනයක් නැත.
ජනාධිපතිවරයන්ගේ හිමිකම් පනත යටතේ හිටපු ජනාධිපතිවරුන්ට වාසය සඳහා සුදුසු නිවසක් නිවාස කුලියෙන් තොරව ලබාදිය යුතු අතර එසේ නිවසක් ලබානොදෙන අවස්ථාවලදී මාසික විශ්‍රාම වැටුපෙන් තුනෙන් එකක දීමනාවක් නිවාස කුලිය වශයෙන් ලබාදිය යුතුය. එය හිටපු ජනාධිපතිවරුන්ගේ වැන්දඹුවන් සඳහා ද අදාළ වන එකකි.
එමෙන්ම හිටපු ජනාධිපතිවරුන්ට ජනාධිපතිවරයාගේ පෞද්ගලික ලේකම්වරයාට තත් කාලයේ ගෙවන මාසික වැටුපට සමාන මාසික ලේකම් දීමනාවක් ගෙවනු ලැබිය යුතු අතර හිටපු ජනාධිපතිවරයකුගේ වැන්දඹුවකට ගෙවිය යුත්තේ අමාත්‍යවරයකුගේ පෞද්ගලික ලේකම්වරයකුට තත් කාලයේ ගෙවනු ලබන මාසික වැටුපට සමාන මාසික ලේකම් දීමනාවකි.
ඊට අමතරව හිටපු ජනාධිපතිවරයකුට හා හිටපු ජනාධිපතිවරයකුගේ වැන්දඹුවකට අමාත්‍යවරයකුට තත් කාලයේ සපයනු ලබන නිල ප්‍රවාහන හා වෙනත් සියලු පහසුකම් සැලසිය යුතු යන්න ජනාධිපතිවරයන්ගේ හිමිකම් පනතේ සඳහන් කර ඇත.
හිටපු ජනාධිපතිවරයකු කියා ඇති ඉහත උපුටා දැක්වූ කරුණු අනුව ජනාධිපතිවරයන්ගේ හිමිකම් පනත අහෝසි කිරීම මගින් ඔවුන්ට ජීවත් වීමට නොහැකි තත්වයක් උදාවේ. ඒ නිවසක් නැතිකම හා අනෙකුත් පහසුකම් නොලැබීම නිසාය. ඔවුන්ට ලැබෙන විශ්‍රාම වැටුප පමණක් ඒ සඳහා ප්‍රමාණවත් නැති අතර එය එදිනෙදා වියදමටවත් ප්‍රමාණවත් නොවන බව එම කරුණු දැක්වීමේ අදහසය.
එහෙත් හිටපු ජනාධිපතිවරුන් සම්බන්ධයෙන් ගත්කළ චන්ද්‍රිකා බණ්ඩාරනායක කුමාරතුංග හැරුණු විට අනෙක් හිටපු ජනාධිපතිවරුන්ට විශ්‍රාම වැටුප් දෙකක හිමිකම ලැබේ. ඒ ආණ්ඩුක්‍රම ව්‍යවස්ථාව අනුව හිටපු ජනාධිපතිවරයකුගේ විශ්‍රාම වැටුප වෙනත් විශ්‍රාම වැටුපක් හිටපු ජනාධිපතිවරයාට ලැබුණද, එ අගතියක් නොවී අතිරේකව එම විශ්‍රාම වැටුප ලැබෙන නිසාය.
ඒ අනුව මහින්ද රාජපක්ෂට ජනාධිපති විශ්‍රාම වැටුපට අමතරව පාර්ලිමේන්තු මන්ත්‍රීවරයකු වශයෙන් ගතකළ කාලයට අදාළව තවත් විශ්‍රාම වැටුපක් ලැබේ. පාර්ලිමේන්තු විශ්‍රාම පනත අනුව එම විශ්‍රාම වැටුප ලැබෙන්නේ යම් මන්ත්‍රීවරයෙක් කථානායක, විපක්ෂ නායක, ඇමති, නියෝජ්‍ය ඇමති, රාජ්‍ය ඇමති, නියෝජ්‍ය කථානායක, නියෝජ්‍ය කාරක සභා සභාපති යන තනතුරු දැරුවේ නම් එම තනතුරුවල වැටුප් වලට සාපේක්ෂවය. මන්ත්‍රීවරුන්ගේ වැටුප්වලට වඩා එම තනතුරු සඳහා ලැබෙන වැටුප් වැඩිය.
මේ අනුව මෛත්‍රීපාල සිරිසේන, රනිල් වික්‍රමසිංහ යන හිටපු ජනාධිපතිවරුන් දෙදෙනාටද හිටපු ජනාධිපති හා පාර්ලිමේන්තු මන්ත්‍රීවරුන් වශයෙන් විශ්‍රාම වැටුප් දෙකක් හිමිවේ. ගෝඨාභය රාජපක්ෂටද විශ්‍රාම වැටුප් දෙකක් හිමිවුවද ඒ ඒ ආකාරයට නොවේ. එකක් හිටපු ජනාධිපති වශයෙන්ය. අනෙක් විශ්‍රාම වැටුප ඔහුගේ හමුදා රැකියාවට අදාළව හෝ අමාත්‍යාංශ ලේකම් තනතුරට අදාළවය. හිටපු ජනාධිපතිවරුන්ට වෙනත් විශ්‍රාම වැටුපකට බාධාවක් නොවන ආකාරයට ලබාදෙන විශ්‍රාම වැටුප ලබාගත හැකි වුවද, රජයේ විශ්‍රාම වැටුප් ලබාගත හැක්කේ එකක් වන නිසා ඉන් වැඩි ප්‍රතිලාභය ලැබෙන විශ්‍රාම වැටුප ලබා ගැනීම සිදුකරයි. ඒ නිසා ගෝඨාභය රාජපක්ෂ ලබා ගන්නේ හමුදා විශ්‍රාම වැටුපද, නැතහොත් අමාත්‍යාංශ ලේකම්වරයකු සඳහා වන විශ්‍රාම වැටුපද යන්න නිශ්චිත නැත.
හිටපු ජනාධිපති චන්ද්‍රිකා බණ්ඩාරනායක කුමාරතුංගට විශ්‍රාම වැටුප් දෙකක් හිමි නොවන්නේ ඇයට පාර්ලිමේන්තු මන්ත්‍රීවරයකු ලෙස විශ්‍රාම වැටුපක් නොලැබෙන නිසාය. ඒ ඇය 1994 පාර්ලිමේන්තු මන්ත්‍රීවරියක ලෙස තේරී පත්වී අගමැති ධුරය දරමින් කටයුතු කළේ මාස දෙකකට ටිකක් වැඩි කාලයක් වන නිසාය. පාර්ලිමේන්තු මන්ත්‍රී විශ්‍රාම වැටුප ලබාගැනීම සඳහා අවමය අවුරුදු පහක පාර්ලිමේන්තු කාලයක් ගතකළ යුතුය. එහි ව්‍යාතිරේකයක් ඇත්තේ යම් පාර්ලිමේන්තු මන්ත්‍රීවරයකු ත්‍රස්තවාදී ක්‍රියාවක් ලෙස හඳුනාගන්නා සිදුවීමකින් මරණයට පත්වූවේ නම් එම කාලය නොසලකා විශ්‍රාම වැටුප් හිමිකම ලබාදීම සම්බන්ධයෙන් පමණක් වන නිසාය.
හිටපු ජනාධිපති වැන්දඹු හේමා ප්‍රේමදාසට ද රජයේ වෙනත් විශ්‍රාම වැටුපක් නැති නිසා හිමිවන්නේ හිටපු ජනාධිපති වැන්දඹු විශ්‍රාම වැටුප පමණය. ජනාධිපතිවරයන්ගේ හිමිකම් පනත යටතේ ලැබෙන එම විශ්‍රාම වැටුප එම පනත අහෝසි කිරීම මගින් අහෝසි වීම සිදුවේ.
හිටපු ජනාධිපතිවරුන් ජනාධිපතිවරයන්ගේ හිමිකම් පනත අහෝසි කිරීමට විරුද්ධ වන්නේ ඔවුන්ට ලැබෙන විශ්‍රාම වැටුපට වඩා වැඩි වරප්‍රසාද ප්‍රමාණයක් එම පනත අහෝසිය මගින් ඔවුන්ට නොලැබෙන නිසාය.
තොරතුරු දැන ගැනීමේ පනත් යටතේ ජනාධිපති ලේකම් කාර්යාලයට ඉදිරිපත් කළ තොරතුරු ඉල්ලීමක් අනුව සිලෝන් ටුඩේ පුවත්පත 2023 වසරේ නොවැම්බර් මාසයේදී වාර්තා කර තිබුණේ හිටපු ජනාධිපතිවරයකුට රුපියල් 97,500ක විශ්‍රාම වැටුපක් ලැබෙන බවයි. එමෙන්ම රුපියල් 100,000ක ලේකම් දීමනාවක් ලැබෙන බවය. ගෝඨාභය රාජපක්ෂට, මෛත්‍රීපාල සිරිසේනට හා මහින්ද රාජපක්ෂට රුපියල් 679,950ක ඉන්ධන දීමනාවක් ලැබෙන බවයි.
එහෙත් හිටපු ජනාධිපති චන්ද්‍රිකා බණ්ඩාරනායක කුමාරතුංගට රුපියල් ලක්ෂ 5ක ඉන්ධන දීමනාවක් ලැබෙන බව වාර්තා කර තිබූ අතර හිටපු ජනාධිපති වැන්දඹු හේමා ප්‍රේමදාසට රුපියල් ලක්ෂයක ඉන්ධන දීමනාවක් ලැබෙන බව වාර්තා කර තිබුණි.
පාර්ලිමේන්තු මන්ත්‍රීවරුන්ගේ විශ්‍රාම වැටුපද අහෝසි කරන බවට ආණ්ඩුව පාර්ශවයෙන් මේ වනවිට නිවේදනය කර ඇති අතර එම යෝජනාව ඒමට කලින්ම ජනතතා විමුක්ති පෙරමුණේ හිටපු පාර්ලිමේන්තු මන්ත්‍රීවරයකු වූ හා ජනාධිපතිවරණ අපේක්ෂකයකු වූ නන්දන ගුණතිලක සිට ෆේස්බුක් ගිණුමේ සටහනක් තබමින් කියා තිබුනේ ඔහුට වෙනත් ආදායමක් නැති බවත්, ඒ නිසා එම විශ්‍රාම වැටුප අහිමි කිරීමට එරෙහිව දැඩි ක්‍රියාමාර්ග ගන්නා බවයි. එම අදහස් දැක්වීම තුළ ඇති වැදගත්ම කරුණ වන්නේ ඔහුට මාසිකව රුපියල් 68,000කට වැඩි විශ්‍රාම වැටුපක් ලැබෙන බව සඳහන් කර තිබීමයි.
එම මුදල පිළිගත හැකි එකක් නොවන අතර එවන් ප්‍රමාණයක මන්ත්‍රී විශ්‍රාම වැටුපක් ඔහුට ලැබෙනවා නම් එය ෂලකා බැලිය යුතු තත්වයකි. ඒ පාර්ලිමේන්තු මන්ත්‍රීවරුන්ගේ මාසික වැටුප රුපියල් 54,285ක් වන නිසාය. පාර්ලිමේන්තතු මන්ත්‍රීවරුන්ගේ විශ්‍රාම වැටුප් පනතත අනුව පාර්ලිමේන්තුවේ අවුරුදු 5ක් සම්පූර්ණ කළ මන්ත්‍රීවරයකුට විශ්‍රාම වැටුප ලෙස හිමිවන්නේ එම වැටුපෙන් තුනෙන් එකක් වන අතර පාර්ලිමේන්තුවේ ධුර කාලය අවුරුදු 5ත් 15ත් අතර මන්ත්‍රීවරයකුට විශ්‍රාම වැටුප ලෙස හිමිවන්නේ වැටුපෙන් තුනෙන් දෙකක් වන නිසාය. එමෙන්ම පාර්ලිමේන්තුවේ ධුර කාලය අවුරුදු 15ට වැඩි මන්ත්‍රීවරුන්ගේ විශ්‍රාම වැටුප කථානායකවරයා විසින් තීරණය කරනු ලබන බව එම පනතේ සඳහන් වන අතර එහෙතත් එය සියයට සියයක විශ්‍රාම වැටුපක් වුවද රුපියල් 54,285 ඉක්මවා යා නොහැකිය.
මේ නිසා මන්ත්‍රීවරුන්ගේ විශ්‍රාම වැටුපට අදාළ පනතේ ඇති ප්‍රතිපාදනයන්ට පටහැනිව ඔවුන්ට විශ්‍රාම වැටුප් ගෙවා ඇති ද යන අලුත් ප්‍රශ්නයක්ද මේ මගින් මතුවේ. එය අනිවාර්යෙන්ම සෙවිය යුතු කරුණකි.
