ත්‍රස්ත මර්දන පනත යටතේ අත්අඩංගුවට ගෙන මාස 09ක කාලයක් බන්ධනාගාර ගත කර සිටි 21 හැවිරිදි මොහොමඩ් සූහීල්ව ඇප මත මුදාහැරීමට ගල්කිස්ස මහේස්ත්‍රාත් අධිකරණය ජුලි 15 වන දින නියෝග කර ඇත.
2025 ජුලි 09 වන දින සුහීල් අත්අඩංගුවට ගැනීම සම්බන්ධ නඩුවාරයක් ගල්කිස්ස මහේස්ත්‍රාත් අධිකරණයේ පැවැත්වුණු අතර එහිදි දෙහිවල පොලිසියේ ස්ථානාධිපතිවරයා පවසා ඇත්තේ සුහීල් ත්‍රස්තවාදය වැළැක්වීමේ පනත යටතේ වරදක් කර ඇති බවට සාක්ෂි හමුවී නැති බැවින් සැකකරුව ඇප මත නිදහස් කරන ලෙස අධිකරණයෙන් ඉල්ලා තිබිණි.
එහිදි ගල්කිස්ස අතිරේක මහේස්ත්‍රාත් හේමාලි හාල්පන්දෙණිය මහත්මිය දෙහිවල පොලිසියට දෝෂාරෝපණය කර තිබුණු අතර ඇය පවසා තිබුණේ ත්‍රස්තවාදය වැළැක්වීම පනත යටතේ අත්අඩංගුවට ගත් අය සම්බන්ධයෙන් ඇප ලබා දීමට තම අධිකරණයට බලයක් නැති බවයි.
අතිරේක මහේස්ත්‍රාත්වරිය වැඩිදුර පවසා ඇත්තේ සැකකරු ත්‍රස්ත මර්දන පනත යටතේ වරදක් කර ඇති බවට සාක්ෂි තමන් සතුව ඇති බවට, දෙහිවල පොලිසිය දිගින් දිගටම අධිකරණය හමුවේ කී බවත්, අදාල තරුණයාව මාස 9කට වඩා කාලයක් බන්ධනාගාර ගත කර තැබිමෙන් පසුව කිසිදු වරදක් කර නොමැති බවට පවසන්නේ ඇයි ද යන්නය. අතිරේක මහේස්ත්‍රාත්වරිය වැඩිදුරටත් දෙහිවල පොලිසියට නියෝග කර ඇත්තේ මේ සම්බන්ධයෙන් නිතීපතිවරයාව වහාම දැනුවත් කරන ලෙසත් සුහීල්ව ජුලි 15 වන දින භෞතිකව අධිකරණයට ඉදිරිපත් කරන ලෙසට මහේස්ත්‍රාත්වරිය බන්ධනාගාර නිලධාරීන්ට නියෝග කර තිබුණි.
ඒ අනුව ලැබුණු නීතිපතිවරයාගේ උපදෙස් මත ගල්කිස්ස මහේස්ත්‍රාත් අධිකරණය මොහොමඩ් සූහීල්ව ඇප මත නිදහස් කර තිබුණි.
2024 වර්ෂයේ ඔක්තෝබර් 23 වන දින දෙහිවල චාබට් හවුස් ගොඩනැගිල් අසළදී හැඳුනුම්පත තමන් සන්තකයේ නොතිබිම නිසා සුහීල්ව දෙහිවල පොලිසියෙන් අත්අඩංගුවට ගෙන තිබුණු අතර ඔක්තෝබර් 24 දින උදෑසන ගල්කිස්ස මහේස්ත්‍රාත් අධිකරණයට සුහීල්ගේ පියා ඔහුගේ හැඳුනුම්පත ඉදිරිපත් කිරීමෙන් අනතුරුව නිදොස් කොට නිදහස් කර තිබිණි.
නිදහස් කිරීමෙන් අනතුරුව සුහීල් සහ ඔහුගේ පියා මාවනැල්ලේ ඔහුන්ගේ නිවසට යන අවස්ථාවේදී දෙහිවල පොලිසියේ ස්ථානාධිපතිවරයා ඇතුළු නිලධාරීන් පිරිසක් පැමිණ සිට ඇති අතර කටඋත්තරයක් ගත යුතු බව පවසමින් සුහීල්ව නැවත ඔක්තෝබර් 24 දින රාත්‍රියේදි අත්අඩංගුවට ගෙන ඇත.
සුහීල්ව දින තුනක් දෙහිවල පොලිසියේ රඳවා තබා ගැනීමෙන් අනතුරුව ඔක්තෝබර් 27 දින (සෙනසුරාදා) ගල්කිස්ස මහේස්ත්‍රාත් අධීකරණයට ඉදිරිපත් කර ඇති අතර එදින වැඩබලන මහේස්ත්‍රාත්වරයා ඔහුව රිමාන්ඩ් කිරීමට නියෝග කර ඇත. මොහොමඩ් සුහීල්ව මාස 09ක් බන්ධනාගාර ගත කර තිබිණි.
