සෑම කෙනෙකුගේ අභාවය සමාජ අවකාශය තුළ කතාබහට ලක්වන්නේ නැත. එහෙත් සමාජය මතුයෙහි බලපෑමක් ඇති කරන්නාවූ, සමාජයේ සාමූහික වන්දනාවට ලක්වන කෙනෙකුගේ අභාවය ගැන එසේ නොවී සමාජ කතිකාවක් ඇතිවේ. එවැන්නකින් මියගිය පුද්ගලයාට පලක් නොවුණද ඒ කතිකාව ඇතිවීම නොවැළැක්විය හැකිය. එය හොඳ ද නරක ද යන්න සෙවීම පලක් නොවේ.
මාලිනී ෆොන්සේකාගේ අභාවය ද එවැන්නකි. මාලිනී ගැන සමාජ කතිකාව පැන නැගුණේ ඇගේ රංගන ප්‍රතිභාව හෝ කෞශල්‍යය අරභයා නොවේ.
පසුගිය දිනෙක ආණ්ඩුවේ ජනමාධ්‍ය හා සෞඛ්‍ය ඇමති, නලින්ද ජයතිස්ස ලේඛනයක් කියවූයේ පසුගිය කාලයේ ජනාධිපති අරමුදලේ මූල්‍යාධාර ගන්නා ලද දේශපාලනඥයන් පිළිබඳවය. එම තොරතුරු ප්‍රකාශයට පත්වීම ගැන කිසිදු මහජන විරෝධයක් නොතිබූ අතර තමන්ගෙන් කාලයක් වසං කර තබන ලද එම “රහස් තොරතුරු” දැනගැනීමට තමන්ට ද අවශ්‍ය බව මහජනතාවගේ පොදු මතය විය. අනෙක් අතට ඒ රහස් තොරතුරු රටේ ජනතාව දැනගත යුතුය. ඒ සඳහා ඔවුනට ශුද්ධ වූ අයිතියක් ද ඇත. ඒ අනුව ආණ්ඩුව ද නලින්ද ජයතිස්ස ද නිවැරැදිය.
2024.12.22 දිනැති අනිද්දා පුවත්පතේ තුන්වන පිටුවේ “ජනාධිපති අරමුදල ගසා කෑ දේශපාලු‍වෝ” නමින් යුතුව ලසන්ත රුහුණගේ විසින් ලියූ ලිපිය සමග වසර 2005 සිට 2024 දක්වා කාලය තුළ ජනාධිපති අරමුදලෙන් මූල්‍ය ආධාර ලබාගත් පාර්ලිමේන්තු මන්ත්‍රීවරුන් ඇතුළු දේශපාලනඥයන්ගේ නාමලේඛනය ලබාගත් මුදලත් සමග පළකර තිබිණි. අදාළ වර්ෂවල ආණ්‌ඩු පක්‍ෂයේ සහ විපක්ෂයේ සිටි බොහෝ දේශපාලනඥයන් මූල්‍යාධාර ලබාගෙන තිබිණි. ඒ නම් අතරේ ජවිපෙ හෝ ජාජබ දේශපාලනඥයන් නොවූ බව සඳහන් කළ යුතුය.
පුවත්පතේ සඳහන් තොරතුරු අනුව අඩුම මූල්‍යාධාර ලබාගෙන ඇත්තේ 2018 වසරේදී ජී.ආර්. ගම්ලත්ය. මුදල රුපියල් 73,529කි. වැඩිම මූල්‍යාධාර ලබාගත් කිහිපදෙනෙක්ම සිටිති. දි.මු. ජයරත්න, කෙහෙළිය රඹුක්වැල්ල සහ රංජිත් ද සොයිසා ලබාගත් මූල්‍යාධාරය පිළිවෙලින් රුපියල් මිලියන 29.80, 10.90 හා 18.74කි. මේ සිව්දෙනා සේම විවිධ ප්‍රමාණවලින් විවිධ ලෙඩරෝග සඳහා මූල්‍යාධාර ලබාගත් දේශපාලනඥයන් සෑහෙන ප්‍රමාණයක තොරතුරු දැක්වේ. ඒ අතර 2015 හා 2023 වසරවලදී ඩබ්ලිව්.එම්.එස්. ෆොන්සේකා ලබාගත් මූල්‍යාධාරයේ එකතුව මිලියන 5.5 කි. පුවත්පත් සටහනෙහි දක්වා ඇති පරිදි මේ ඩබ්ලිව්.එම්.එස්. ෆොන්සේකා යනු මාලිනී ෆොන්සේකාය. මාලිනී මියයාමට පෙරදී නලින්ද ජයතිස්ස මේ අනාවරණය කරන ලදි. එය පුවත්පත් ඇතුළු ජනමාධ්‍යවල ද ප්‍රවෘත්තියක් ලෙස හෝ පළවුණි. කිසිවෙක් හෝ එම කරුණ ප්‍රතික්ෂේප කළේ ද නොමැත. එසේම මාලිනීගේ අභාවය වූ පසුව හෝ එම ප්‍රකාශය ඉවත් කර ගත්තේද නැත.
මියගිය මාලිනී වෙනුවෙන් ආණ්ඩුව රාජ්‍ය අනුග්‍රහය ලබාදීමට ගත් තීරණය නිවැරැදිය. එසේ නොවිණි නම් ආණ්ඩුවට යම් සමාජ අපකීර්තියක් අත්වන්නේ පෙරකී නලින්ද ජයතිස්සගේ හෙළිදරව්ව පදනම් කරගෙනය. සිංහල සිනමාවේ නිළි රැජිණ නමින් මහජන අවකාශයේ සේම මාධ්‍ය අවකාශයේ ද හඳුන්වන මාලිනියගේ සෙලිබි්‍රටි කැරිස්මාව අර මූල්‍යාධාර අනාවරණය වසා දැමීමට තරම් සමත් වීම ගැන ආණ්ඩුවේ තක්සේරුව නිවැරැදිය. ජනාධිපතිවරයා ප්‍රමුඛ ආණ්ඩුවේ බලධාරීහු මාලිනී ෆොන්සේකාහට අවසන් ගෞරව දැක්වීමට පැමිණියහ. ඇමති ජයතිස්ස පැමිණි බවක් මාධ්‍යයෙහි වාර්තා නොවිණි. නලින්ද ජයතිස්සගේ අනාවරණය නොසලකා හැර ජනාධිපතිවරයා හා ආණ්ඩුව මාලිනීගේ අවමංගල්‍ය වෙනුවෙන් රාජ්‍ය අනුග්‍රහය ලබාදීම යනු ආණ්ඩුව ඇතුළේ අර්බුදයක් ලෙසින් සමහරු දකිති. එය එසේ නොවන බව තේරුම්ගත යුතු වන්නේ මේ සිදුවීම අහඹුවක් වීමත් ඒ සඳහා දේශපාලන උපාය මාර්ගයන් වෙනස් කිරීම ආණ්ඩුව දැනුවත්ව කළ නිසාත්ය.
ආණ්ඩුව රාජ්‍ය අනුග්‍රහය ලබාදීමට ගත් තීරණය මගින් ඇමති නලින්ද ජයතිස්ස පාර්ලිමේන්තුවේදී කළ අනාවරණය අවලංගු වන්නේ නැත. එම අනාවරණයන් රහසක් ලෙස මෙතෙක් කල් පැවතුණේ ඒවා පරීක්ෂා කර බැලීමේ දේශපාලන උවමනාව නොතිබූ නිසාය. දැන් ඒ නීතිමය හා ව්‍යවස්ථාමය හැකියාව හා බලය ජනතාව විසින්ම ආණ්ඩුවට ලබාදී ඇත. රටේ මහජනතාවගෙන් වසං කළ රහස් අඩවි එකිනෙක වෙත පරීක්ෂාවේ ආලෝකය එල්ල කළ යුතුය.
අනෙක් අතට එම අණාවරණය මාලිනී එල්ල කරගෙන කළ එකක් නොව සමස්ත දේශපාලනඥයින් ලබාගත් මූල්‍යාධාරයන් හෙළිදරව් කිරීමකි. එම ලේඛනයේ ඇයගේ නම සඳහන්ව ඇත්තේ ඇය ද 2010 සිට 2015 දක්වා පාර්ලිමේන්තු මන්ත්‍රීවරියක ලෙස සිටීම නිසාය. එම කාලයේ ජනාධිපතිවරයා මහින්ද රාජපක්ෂ වූ අතර ආණ්‌ඩු බලය තිබුණේ ඔහුගේ එක්සත් ජනතා නිදහස් සන්ධානයටය. මාලිනී මන්ත්‍රීධුරය දැරුවේ එම ආණ්‌ඩුවේය.
මාලිනී මූල්‍යාධාරය ලබාගැනීම ඇයගේ මරණය සමග ගැටගැසීම නිසා එම ලේඛනයේ සිටින අනෙකුත් දේශපාලනඥයින් ලබාගත් මිලියන ගණන් මූල්‍යාධාර යුක්තියුක්ත වන්නේ නැත. ඒ බවට යම් කුකුසක් ඇති හෙයින් මෙම මූල්‍යාධාර ලබාදීම් ගැන පරීක්ෂණයක් කරන බව ජයතිස්ස පාර්ලිමේන්තුවේදී ප්‍රකාශ කළේ මෙම සිදුවීමට පෙරදීය. එය ඇයට මෙන්ම ලැයිස්තුවේ සිටින සෑම දේශපාලනඥයෙකුටම පොදුය.
මාලිනී ෆොන්සේකා සහ අනෙකුත් දේශපාලනඥයින් ජනාධිපති අරමුදලෙන් මූල්‍ය ආධාර ඉල්ලු‍ම් කරන්නේ ඔවුන්ගේ ලෙඩරෝග සුවපත් කරගෙන සෞඛ්‍ය සම්පන්නව තව කාලයක් ජීවත් වීමටය. එම ඉල්ලීම අසාධාරණ නොවේ. ජනාධිපති අරමුදලෙන් එක් එක් රෝගාබාධ සඳහා ලබාදෙන මූල්‍යාධාර ප්‍රමාණය කොපමණද යන්න නිශ්චිතවම දක්වා ඇත; තීරණය කර ඇත. ඒ පිළිබඳ තොරතුරු ජනාධිපති අරමුදලේ වෙබ් අඩවියට පිවිස දැනගත හැකිය. ඉහතින් සඳහන් කළ දේශපාලනඥයින් තිදෙනා ද මාලිනී ෆොන්සේකා ද පුවත්පතෙහි සඳහන් බහුතර දේශපාලනඥයින් ද ජනාධිපති අරමුදලෙන් ලබාගත් මූල්‍යාධාරය අර උපරිම මුදලට වඩා වැඩිය. එසේ වන්නේ කෙලෙසද? ජනාධිපති අරමුදලෙන් මූල්‍යාධාර ඉල්ලා සිටින රටේ සාමාන්‍ය පුරවැසියන්ට ද මේ ආකාරයට සීමාව ඉක්මවා මූල්‍යාධාර ලබා දෙන්නේ ද?
මෙම අරමුදලෙන් පසුගිය කාලයේ දී රටේ සාමාන්‍ය ජනතාවට ලබාදුන් මූල්‍යාධාර පිළිබඳ විස්තර ආණ්ඩුව විසින් පාර්ලිමේන්තුවට සහ ජනමාධ්‍ය වෙත ලබාදීම කළ යුතුය. ඒ අතරට රාජ්‍ය නිලධාරීන්, විවිධ ක්ෂේත්‍රවල නියැලෙන කලා ශිල්පීන්, මාධ්‍යකරුවන්, වෘත්තිකයන් ඇතුළු සියලු දෙනාගේම තොරතුරු ඉදිරිපත් කළ යුතුය. එම තොරතුරු සමග දේශපාලනඥයින් වෙත ලබාදුන් මූල්‍යාධාර සසඳා බැලිය හැකිය. කිසිදු ආකාරයක බලපෑමක් කළ නොහැකි, සිවිල් බලයක් නැති රටේ සාමාන්‍ය ජනතාව සහ ආණ්ඩුවට එහි බලධාරීන්ට බලපෑමක් කළ හැකි, සබඳතාවන් ඇති සිවිල් බලයක් සහිත පුද්ගලයන් ජනාධිපති අරමුදල වෙතින් ලබාගත් මූල්‍යාධාර කොපමණදැයි තක්සේරු කළ හැකිය.
මාලිනී ෆොන්සේකාගේ අභාවය සමග ඇතිවූ මෙම කතාබහ තුළට සිනමාකරු අශෝක හඳගම මුහුණු පොතේ සටහනක් ලියමින් මැදිහත්වීමක් කළේය. තෝරාගත් කොටස් කිහිපයක් ඔහුගේම වචනවලින් මෙහි බහාලමි. “අපේ සිනමාවේ ‘නිළි රැජින’ මාලිනී ෆොන්සේකා ජනාධිපති අරමුදලින් රුපියල් ලක්ෂ පනහක් අවභාවිත කළේ යැයි ඇතැමුන් චෝදනා කරනවා. එක් අතකින් රැජිනකට අන්දා ගරුබුහුමනට ලක් කෙරෙන මේ ගැහැනියම, අනික් අතින් හෙරක සේ ගෙන අවමන් කෙරෙනවා. මේ අවභාවිතාව ගැන තරමක් හෝ දන්නා මම ඒ දන්නා දේවල් මෙසේ ලියා තැබීම, දශක පහකට වඩා අපේ සිත් සතන් පිනවූ, හෙට අවසන් ගමන් යන ඇයට හිතේ කහටක් නැතුව සමුදෙන්නට හේතු වේවි.
තම ජීවිතයේ අවසාන භාගයේ ඉතා අසාධ්‍ය තත්ත්වයෙන් සිටි ඇයව ඉන්දියාවේ ආරෝග්‍යශාලාවකින් ශල්‍යකර්මයක් කරවා ගැනීම සඳහා කැඳවාගෙන ගියේ ඇයට ඉතා සමීප හිතවතුන්. එම ශල්‍යකර්මය සඳහා ගෙවිය යුතු මුදල රුපියල් ලක්ෂ 150කට අධිකයි. මෙයට ජනාධිපති අරමුදලින් කිසියම් සහයෝගයක් ගත හැකිදැයි සමන් අතාවුදහෙට්ටි හිතවතාගෙන් විමසා ඇත්තේ රවීන්ද්‍ර රන්දෙනියයි. සමන්, ජනාධිපති රනිල් වික්‍රමසිංහ සමග සම්බන්ධීකරණය කර ජනාධිපති අරමුදලින් රුපියල් ලක්ෂ පනස් පහක (55) මුදලක් මාලනී වෙනුවෙන් ඉන්දියානු ආරෝග්‍යශාලාවට ගෙවීමට කටයුතු කළා”. ඔහුගේ සටහනේ මට අවශ්‍ය කොටස පමණක් උපුටාගෙන අන් කොටස් බැහැර කිරීම ගැන කමන්න.
හඳගමගේ ඉහත සටහන අනුව තේරෙන්නේ එවකට ජනාධිපති රනිල් වික්‍රමසිංහගේ සමීපතමයෙකු වූ සමන් අතාවුදහෙට්ටිගේ මැදිහත්වීම මත මාලිනී ෆොන්සේකා වෙත රුපියල් ලක්ෂ පනස්පහක මුදලක් ලබාගැනීමට හැකිවූ බවයි. මාරාන්තික රෝගයකින් පෙළෙන ඕනෑම පුද්ගලයෙකුගේ අපේක්ෂාව කවර හෝ ආකාරයකින්, ඉඩකඩම් විකුණා හෝ ණයට මුදල් රැගෙන හෝ කොතැනකින් හරි මූල්‍යාධාර ලබාගෙන හෝ තමන්ගේ රෝගය සුවපත් කරගෙන ජීවත් වීමටය. මෙය ලියන මාත් කියවන ඔබත් කටයුතු කරන්නේ එලෙසින්මය.
එසේ වුවද මගේ පැනය එය නොවේ. හඳගම ඇසූ ආකාරයට එසේ සීමා පැන “සිංහල සිනමාවේ නිළි රැජිණ වෙනුවෙන්” මූල්‍යාධාර දීම පාපකර්මයක්ද යනුවෙන් අසන්නේ ද නැත. නිළි රැජිණක නොවූ නිළියන්ට ඒ ආකාරයට මූල්‍යාධාර දෙන්නේද? ඒ සඳහා සිවිල් බලය ඇත්තවුන් මැදිහත් වන්නේ ද? ඒ අතුරු ප්‍රශ්නවලට වඩා වැදගත් වන්නේ මේ රටේ කිසිදු ආකාරයක හෝ සිවිල් බලයක් නැති පොදු මහජනයා වෙත එවැනි ආකාරයට මූල්‍යාධාර දෙන්නේද යන්නයි. එවැනි අයද මූල්‍යාධාර ඉල්ලන්නේ තම රෝගාබාධ සුව කරගෙන තව ටික කාලයක් හෝ ජීවත් වීමටය. ඔවුන්ට ද එවැනි සහකම්පිත බවකින්, සහානුකම්පාවකින් ජනාධිපති අරමුදල කටයුතු කරන්නේ ද ? ඒ අරමුදලේ බලධාරීන් කටයුතු කරන්නේ ද ? එවැන්නක් සිදු නොවන බව ජනාධිපති අරමුදලෙන් මූල්‍යාධාර ඉල්ලා සිටින සාමාන්‍ය ජනතාව කියන දුක් අඳෝනා ඇසූ විට පැහැදිලිය.
මේ රටේ පොදු මහජනතාව වෙත තමන්ගේ ලෙඩරෝග, ආර්ථික අවශ්‍යතාවන්, දරුවන්ගේ අධ්‍යාපන අවශ්‍යතාවන් වෙනුවෙන් සාධාරණ ලෙස මූල්‍යාධාර ලබාගැනීමට ක්‍රමවේදයක් සකස් කිරීම රජයේ වගකීමකි. එය සැමට සාධාරණ යුක්ති සහගත විය යුතුය. අනෙක් අතට තම හිත මිතුරන්, පාක්ෂිකයන්, දේශපාලන සගයන් ආදින් වෙත මහජන අරමුදල් සිතූ සේ ලබාදීමට හැකිවන අයුරින් සකස්කර ඇති නීතිමය ප්‍රතිපාදන වෙනස් කළ යුතුය. ඒවා සමාජවාදී, වාමාංශික ආකල්ප හෝ ක්‍රියාමාර්ග නොවේ. ලොව දියුණු ධනේශ්වර ප්‍රජාතන්ත්‍රවාදී රටවල් කටයුතු කරන්නේ ද එලෙසින්මය.
සිනමා නිළි, සිනමා අධ්‍යක්ෂිකා හා නිෂ්පාදිකා, ටෙලිනාට්‍ය නිළි, අධ්‍යක්ෂ හා නිෂ්පාදක, දේශපාලනඥයා, මන්ත්‍රීවරිය ආදි විවිධ භූමිකාවල ගමන් කළ හෙළ සිනමාවේ නිළි රැජින මාලිනී සෙනෙහෙලතා ෆොන්සේකාගේ දිවි ගමන අවසන කළු දුමාරයක් අළු මිටක් බවට පත්විය. ඇය පවුලේ සමීපතයන්ට, ආදරය කළ අයට මිහිරි මතකයක් සැමරුමක් බවට පත්වනු ඇත. එයින් බැහැර සමාජයට වසරකට දෙවරක් සිහිපත් කරන, දේශනයක හා ලිපියක මාතෘකාවක් බවට පත්වනු ඇත. කලෙකට පෙර හෙළ සිනමාවේ සක්විති ගාමිණී ෆොන්සේකා ද හෙළ සිනමාවේ සුරූපී ආදරවන්තයා විජය කුමාරතුංග ද මිය ගියේය. දැන් කාටද මතක?
