හිටපු අමාත්‍ය කෙහෙළිය රඹුක්වැල්ල මහතා රක්ෂිත බන්ධනාගාරගත කිරීමෙන් අනතුරුව බන්ධනාගාරයට ඇතුළත් කිරීමට පෙර කළ පරීක්ෂාවේදී ඔහු සන්තකයේ තිබී මැයි 07 වැනිදා සොයාගත් ගජ මුතුව, දඹ රන් කුඩා බුදුපිළිමය සහ දුඹුරු පැහැති ශාඛ පොතු 05ක් විමර්ශන කටයුතු සඳහා බොරැල්ල පොලිස් ස්ථානයට ඉදිරිපත්කර ඇත.
බන්ධනාගාරය මඟින් එම භාණ්ඩ බොරැල්ල පොලිස් ස්ථානයට ඉදිරිපත්කර ඇත්තේ විමර්ශන කටයුතු සඳහාය.
අදාළ භාණ්ඩ බන්ධනාගාර බුද්ධි නිලධාරීන් භාරයට ගැනීමත් සමගම අමාත්‍යවරයා කළහකාරි ලෙස හැසිරි ඔහුගේ ආරක්ෂාව සඳහා එය සන්තකයේ තබාගත් බව පවසමින් ඒවා නැවත ඔහු වෙත ලබා දෙන ලෙස ඉල්ලා තිබේ.
හිටපු අමාත්‍යවරයා අල්ලස් හෝ දූෂණ චෝදනා විමර්ශන කොමිසමේ නිලධාරීන් අත්අඩංගුවට ගෙන තිබෙන්නේ ජනමාධ්‍ය පරිසර සහ සෞඛ්‍ය අමාත්‍යවරයාගේ පෞද්ගලික කාර්ය මණ්ඩල තනතුරු සඳහා ඥාතීන් හිතවතුන් සහ දේශපාලන ආධාරකරුවන් පත්කරගෙන, ඔවුන් සේවයේ නොයොදා ඔවුන්ට වැටුප් සහ දීමනා ගෙවූ බවට හඟවා රජයට රුපියල් ලක්ෂ 800 කට අධික පාඩුවක් සිදු කර තිබීම හේතුවෙනි.
රඹුක්වැ්ලල මහතා බන්ධනාගාර නිලධාරීන් විසින් වැලිකඩ බන්ධනාගාරය වෙත රැගෙන ඒමෙන් අනතුරුව කොළඹ රිමාන්ඩ් බන්ධනාගාර ප්‍රධාන දොරටුව අබියසදී බන්ධනාගාර බුද්ධි නිලධාරීන් විසින් ඔහු පරික්ෂා කිරීමේදී අතෙහි සඟවා ගෙන සිටි ලේන්සුවක් තුළ ඔතා තිබූ ගජමුතුව සහ ශ්‍රී මහා බෝධියේ පොතු බව කියන දැවමය කොටස හමු වී ඇත.
තමන් ළඟ තිබුණු ගජමුතු, ප්‍රතිමාව සහ ශාඛ පොතු තම පියාගෙන් ලැබුණු බවත් පොතු කිහිපය ශ්‍රීමහා බෝධියේ පොතු බවත් තමන්ගේ ආරක්ෂාවට ඒවා ලඟ තබා ගත් බවත් ඔහු එහිදී පවසා තිබේ.
