ශ‍්‍රී ලංකා පොදුජන පෙරමුණේ නායක, විපක්ෂ නායක මහින්ද රාජපක්ෂ මහතා විධායක ජනාධිපති ක‍්‍රමය අහෝසි කිරීම සඳහා ජනතා විමුක්ති පෙරමුණ ඉදිරිපත් කර ඇති 20 වැනි ආණ්ඩුක‍්‍රම ව්‍යවස්ථා සංශෝධනයට කැමැත්ත පළ කර ඇත.

ඔහු එම කැමැත්ත පළකිරීම කර ඇත්තේ පසුගිය දිනවල ජනාධිපති මෛත‍්‍රීපාල සිරිසේන සමඟ පැවති සාකච්ඡුා වලදීය.

විධායක ජනාධිපති ක‍්‍රමය අහෝසි කිරීම සඳහා වන යෝජනාවකට තමන්ට එරෙහි විය නොහැකි බවත්, විධායක ජනාධිපති ක‍්‍රමය අහෝසි කිරීම ප‍්‍රතිපත්තියක් ලෙස තමා පිළිගන්නා බවත් මහින්ද රාජපක්ෂ මහතා තමන් සමඟ කටයුතු කරන පක්ෂ නායකයන් සමඟද ප‍්‍රකාශ කර තිබේ.

හදිසියේම සැප්තැම්බර් 19 වැනිදා විශේෂ කැබිනට් මණ්ඩල සාකච්ඡුාවට ඉදිරිපත් කරන ලද එම යෝජනාවට ඔහුගේ සහාය ලැබේද යන්න පිළිබඳ අවිනිශ්චිතය. ඊට හේතුව ඒකාබද්ධ විපක්ෂයේ අනෙකුත් නායකයන් එම සංශෝධනයට විරෝධය පළ කර තිබීමය.

අප කළ විමසීමකදී ඒකාබද්ධ විපක්ෂ පාර්ලිමේන්තු මන්ත‍්‍රී වාසුදේව නානායක්කාර මහතා ප‍්‍රකාශ කළේ මේ නිශ්චිත මොහොතේ මහින්ද රාජපක්ෂ මහතාගේ මතය කුමක්දැයි තමාට නිවැරදිවම කිව නොහැකි බවයි. එහෙත් මීට පෙර 20 වැනි සංශෝධනය පිළිබඳව ඒකාබද්ධ විපක්ෂයේ සාකච්ඡුා පැවැත්වූ මොහොතේ රාජපක්ෂ මහතා 20 වැනි සංශෝධනයට පක්ෂව අදහස් පළ කළ බවද ඔහු කීය.

කෙසේ වෙතත් ඒකාබද්ධ විපක්ෂයේ මන්ත‍්‍රීවරුන් කණ්ඩායම 20 වැනි සංශෝධනයට එකඟ නැති බව නානායක්කාර මන්ත‍්‍රීරයා පැවසීය. ඉදිරි ජනාධිපතිවරණයට සූදානම් වෙමින් සිටින පසුබිමක විධායක ජනාධිපති ක‍්‍රමය අහෝසි කිරීම ගැන සාකච්ඡුා නොකළ යුතුය යන්න තමාගේද අදහස බව ඔහු පැවසීය. කෙසේවෙතත් 20 වැනි සංශෝධනය ඉදිරිපත් කර ඇතැයි නිල වශයෙන් කියා නැති නිසා ඒ තත්වය ගැන නිවැරදිවම කිව නොහැකි බවත් නව තත්වය යටතේ ගතයුතු ක‍්‍රියාමාර්ග ගැන සාකච්ඡුා කිරීමට සිදුවන බවත් නානායක්කාර මන්ත‍්‍රීවරයා පැවසීය.