ආණ්ඩුවට 20වැනි ආණ්ඩුක්‍රම ව්‍යවස්ථා සංශෝධනය සම්මත කරගැනීම සඳහා අවශ්‍ය වන තුනෙන් දෙකක බලය නොමැතිවීම පිළිබඳ කැබිනට් මණ්ඩලය තුළ සාකච්ඡා කර ඇතැයි වාර්තා වේ.  මේ වනවිට පාර්ලිමේන්තුව නියෝජනය කරන ශ්‍රී ලංකා පොදුජන පෙරමුණෙන් මැතිවරණයට ඉදිරිපත්ව තේරී පත් වූ මන්ත්‍රීවරුන් සංඛ්‍යාව 145කි. ඒ අතරින් ප්‍රේමලාල් ජයසේකර මන්ත්‍රීවරයා තවම මන්ත්‍රීධුරයේ දිවුරුම්දී                 නොමැති අතර ඔහුගේ මන්ත්‍රීධුරය පිළිබඳ ප්‍රශ්නය තවම විසඳී නොමැති බව කැබිනට් මණ්ඩලයේදී සාකච්ඡා කර තිබේ. කථානායකවරයාට ඡන්දය ප්‍රකාශ කළ නොහැකි නිසා ඔහුගේ ඡන්දයද අහිමි වේ.

ඊට අමතරව ආණ්ඩුවට සහයෝගය පළකරන පක්ෂ කිහිපයකින් තේරී පත් වූ මන්ත්‍රීධුර සංඛ්‍යාව පහකි. ඩග්ලස් දේවානන්දා මහතාගේ පක්ෂයේ මන්ත්‍රීවරුන් දෙදෙනෙකු සහ වෙනම තරග කර තේරී පත් වූ සිවනේසදුරෙයි චන්ද්‍රකාන්තන් හෙවත් පිල්ලෙයාන්, ඒ.එල්.ඒ. අතාවුල්ලා, සහ ශ්‍රීලනිපයෙන් තේරී පත් වූ අංගජන් රාමනාදන් එම මන්ත්‍රීවරුය.

ඒ අනුව දැනට ආණ්ඩුව පාර්ශ්වයේ සිටින්නේ මන්ත්‍රීවරුන් 148ක් පමණි.

ආණ්ඩුවට තුනෙන් දෙකේ බලයක් නොමැති වීම නිසා විසිවැනි සංශෝධනය සම්මත කරන්නට ඉඩ නොදී පරාජය කිරීමට අවස්ථාවක් ඇති බව සමගි ජන බලවේගයේ පක්ෂ නායකයන් අතර සාකච්ඡා කළ බව එම සන්ධානයේ නායකයෙක් අනිද්දා සමග කීය. කෙසේවෙතත්, සමගි ජන බලවේගයෙන් තේරී පත් වූ මන්ත්‍රීවරුන් ආණ්ඩුවට එකතු කරගැනීමට උත්සාහ කිරීමේ ඉඩක් පවතින බවත්, ඒ පිළිබඳ සැලකිල්ලෙන් කටයුතු- කිරීමට එකඟ වූ බවත් එම නායකයා කීය.■